Pages: 1
بس لحزب الحلاوة والدلع
(انقر هنا ان احببت مشاهدة الموضوع الاصلي بالالوان و الصور )
Posted by: Desert rose
يأتي الإعراب عن الحب بين الزوجين بالكلمات فقط ! .. وإنما هناك أيضاً وسائل عملية وتصرفات ملموسة وإيحاءات ذات معنى كبير تجعل الطرف الآخر يشعر بحبنا العميق حتى وإن لم نعرب عن مشاعرنا العاطفية بكلمات صريحة ..
إن الإعراب عن الحب بدون كلام أمر ميسور ، وهو أكثر واقعية وتأثيراً من الكلمات المنمقة والعبارات الرنانة !
وهذه بعض اللفتات الجميلة واللمسات الحلوة التي تدل على العاطفة المتأصلة من جانب الزوجة تجاه زوجها ( والعكس صحيح أيضاً):
1ـ استخدمي حبات الفاكهة الصغيرة ( الكرز ـ العنب ـ الفراولة .. ألخ ) لتكتبي بها عبارة "أحبك" وسط طبق الفاكهة الكبيرة .
2ـ ضعي مكعبات ثلجية على شكل قلب في كأس العصير الذي سيشربه .
3ـ ضعي وردة داخل الكتاب أو الصحيفة التي يقرأها .
4ـ في يوم الإجازة حضري له إفطاراً دافئاً وقدميه له في فراشه .
5ـ علقي صورته في مكان بارز .
6- أرسلي رسالة عاطفية رقيقة ومختصرة بالفاكس إليه أثناء العمل .
7-بعد الاستحمام ارسمي على مرآة الحمام بإصبعك صورة قلب على البخار ليراها وهو داخل بعدك .
8- ارفعي درجة برودة المكيف قليلاً والتصقي به التماساً للدفء
من أحلى عاشق لبناني
زهرة الصحراء
Posted by: Nada1981
مرحبا جميعا
عنجد سناء ما بتصدقي اديه ضحكت من قلبي لمى كنت عم اقرا الموضوع هدا, حسيت حالي عم اقرا قصة رومانسية خيالية من شي كاتب فرنسي
انا عن نفسي بفضل اللمسات الحلوة الرومانسية هي تجي من الطرف الثاني, لانه المرأة عندها غير طرق للتعبير عن شعورها و رومانسيتها 
بعدين مين هدا الي بيستاهل انه نعمل كل هلشي منشانه؟ للأسف زمن الرومانسية و زمن افلام الابيض و الاسود الرومانسي مات من زمان 
. اكيد في عالم كتير بتعارض فكرتي بس كل شخص بيفكر بطريقة مختلفة عن الثاني
تحياتي للجميع و شكرا سناء على الموضوع
Posted by: mariam
شكرا سناء على هالنصايح ........صحيح مابتلزمني بس ضحكت لمن قريتها لانو اتذكرت جدها لرشا الله يرحموا........
كان كل يوم الصبح يحمل زوادة ويروح عالبرية ليشتغل ....وكانوا كل يوم رفقاتوا يقولوا قداموا انو نسوانهن بتصبلهن متي الصبح وبيفيقوهن بحنية ويوم العطلة بيحضرولهن فطور مرتب وما بيحلى الصبح الا معهن........وهيك حتى مرة قال بدو يتاخر ليشرب متة ويغازل عمتي اللي هيي مرتو.....وعمتي من الناس اللي عندها اسلوب لبق بالحديث وحلو .......
وعند الصبح جابت غراض المتة وقعدت حدوا وسمعتو كم كلمة حلوين .قلك اوه مو بطيبهن بيتاخرو كل يوم عالشغل ....وثاني يوم حبت عمتي تسقيه متة ...وبعد كم كلمة حلوين قالتلو ايه الله يعطيك العافية ويخليك لهالبنات والله الكبيرة بدها اليوم فسطان....و كثير حلوي منك تعطيها حقو..والوسطانية بدها العفو منك بوط بوطها صار قديم شوي......والاصغر بدها كتب للمدرسة ....والصغيري .............هون قلها ملعون ابوه اللي بيشرب مته مرة ثانية .......وشال الزوادة وراح عالشغل.........
طبعا القصة مبهرة كثير لانو الله يرحمو كان صاحب نكثة ............
Posted by: RUSHA AWAD
يظهر كلنا كان عنا ردة فعل وحدي وقت اللي قرينا هالنصايح وانا مثلكن ضحكت كثير وضحكت اكثر على القصة اللي كتبتها الدكتورة مريم عن جدي "يمكن لازم اكتب صفحات خاصة عن نهفات جدي". المهم اني ويمكن في ناس بتستغرب شوي من موقفي
"مابعرف ليش" اني من اللي عندهن ايمان بوجود الرومانسية بس من اللي بأيدوا اكثر التزام الرجل والمرأة بالتعبير عن هالشي وبأكد التزام الطرفين بهالشي ولو بمبادرات كثير منشوفها بسيطة وزغيري بس بتصور "والعلم عن الله" انو هالمبادرات الزغيري الها دور كبير باستمرار العلاقة الزوجية بشكل اريح وبخلي حالي من الفرح تكون موجودي عند كلا الزوجين , هلأ بدكن تقولولي انو يعني اللي ماعندهن مبادرات رومانسية ماعارفين يعيشو هالكم يوم مع بعض؟؟؟ اكيد بعيشو مع بعض لاخر يوم من حياتهن بس بعض الخطوات الزغيري بتجمل هالحياة وبتعطيها نكهة محببة عن الرجل والمرأة.
مع حبي واحترامي
رشاعواد
Posted by: Desert rose
أنتوا أضحكتوا على المضمون بينما أنا راح فكري شوي لبعيد :
فاتخيلت شي ست مهضومة وحلوة ورومانسية حضرت بيوم من كم حبة عنب وكرز وفراولة كلمة بحبك
وحضرة هالرجال الحمش طرق جاط الفواكه وقام نام
أو مثلاً نادى لمرتوا تتمسح منيح مراية الحمام لأنها مغبشة
أو وقت تجبلوا الفطور للفرشة يقلها مش جوعااان بدي نااام
وأخيراً ورغم أنو حرارة الغرفة صارت منيحة يبعد عنها لأن حرارتو مابستمح لحدا يقعد حدو .
بتصور رح تصاب هالمهضومة بجلطة عاطفية خفيفة تنسيها معاني الرومانسية .
بصراحة هالتطبيقات مابتلبق إلا لعريس جديد بشهر العسل
وبعد هالشهر العوض على الرجال بالرومانسية
مش الكل طبعاً 
الشباب اللبناني بيضب ميال لهيك رومانسيات 
دكتورة قصة جدها لرشا مهضومة والحق معوا يهرب من نق النسوان
رشا طيب خبربنا كم قصة من قصص هالختيار المهضوم الله يرحمواااا
ندى روحي الله يبعتلك شي رجال حومصيييييييييي حمش تينسيكي شو يعني رومانسية . قال مافي رجال بيستاهل قال .....
إلى حزب الحلاوة والدلع ما تيأسواااا لابد ماالرب يفرجها علينا بيوم ويحسوا هالرجال شو يعني نجيب الفطور لعند التخت 
زهرة الصحراء
Posted by: mariam
ايه...والله ذكرتينا يا سناء انو الرومانسية هالاحساس الرقيق البسيط ما بدو كثير جهد ليوصل ..بس بدو واحد يفكر فيه ...
نحنا ابدا ماضحكنا عالمضمون بس الذاكرة اوقات بتسبق التفكير وبتحط الواحد بحالة من ردود الفعل السريعة فالواحد بيشوف حالو مباشرة انتقل لحدث تارك عندو اثر معين لدرجة انو بيكون اول شي بيخطر عالبال وطبعا بيكون الموضوع اللي حرض عندو هالحالة مهم استنفر مساحة من الدماغ بتتصرف بشكل عفوي بيعبّر عن الواحد ولمن نقلنالك الصورة مو لانو ضحكنا عالموضوع بس لانو اثار بداخلنا شي حبينا تعيشي معنا فيه.......ومو دائما بيقدر الواحد يسجل هيك لحظات ........يعني لو قرينا الموضوع وتركناه ساعة ورجعنا نكتب مارح يعطي نفس الروح.....بتمنى تكون وصلت الفكرة.............
بنرجع للرومانسية..........مجرد انو ينوجد حب لازم يوصل والحب اللي مابيوصل لصاحبو مانو حب لهيك الواحد بيحاول يوصل هالحب شو ماكانت الطريقة .......والرومانسية بتكون اقرب الطرق لمداعبة المشاعر اللي بنحاول نوصلها ونوّصلها ........لهيك اي تصرفيمكن مو حبة العنب او الكرز اللي بنقدمها تحرك المشاعر بس لمجرد وصول فكرة انو نحنا عم نفكر بالشخص الآخر يعمل من حبة العنب هدية ثمينة .....يعني ما بيمنع لمن تكوني حد جوزك تمسكي ايدو بشوية لطف او اذا مريتي جنبو تمسحي بظهر ايدك على خدو وتقوليلو دقنك ناعمة....بدل ماتقوليلو شو من ايمتا مو حالق دقنك ...او لمن بتمري جنب واحد بتحبيه تشمي ريحة عطرو او تحفظي ريحة عطر الحبيب........مو غلط ابدا تعرفي شو بيعجبو من عطرك وتحطيه لمن بتقربي عالفرشة......ومو غلط تتدللي عليه شوي .........شفتي ست سناء شو محرومين انا وندى من رومانسيات ........
Posted by: Nada1981
اقتباس:
|
شفتي ست سناء شو محرومين انا وندى من رومانسيات ........
|
دكتورة مريم للأسف مافينا نحكي كلشي هون
بس هلا عرفت انا ليش مأضربة عن الزواج, منشان ماطلع مواهبي الرومانسية لبرا و خليها لنفسي حمصية 
تحياتي
Posted by: angel
مرحبا لكل العضوات العزيزات ....
تعوا لعندي أنا لإحكيلكن عن الرومانسية .... بس بيناتنا ما يطلع الحكي لبرا مشان حزب الأعداء ...
بزماني قدمت لوسام شبكة كلمات متقاطعة أنا عملتها وطبعاَ كانت كلها عبارات غزل وغرام ... وعبيت فيها كم حرف إذا ترتبوا بشكلوا عبارة ( تملي معاك )... قام طلع فيها شوي وقلي : شو مانك واثقة من قدراتي على حلها كاتبتيلي كم حرف للمساعدة !!!!!
هلأ حرام مابدي أظلمه هوي رومانسي وقت بكون فكره فاضي ...بس للأسف هي من النوادر ...
أنا بعتبر الرومانسية طبع مثلها مثل أي طبع .. مثل الكرم .. أو الشجاعة ..أو الحرص أو أو أو ... يعني الشخص الرومانسي بيقدر يظهر رومانسيته بأي موقف أو أي وقت أو مكان ومهما كانت ظروفه... أما اللي مانها من طبعه وحاول يفتعلها .. فرح تبين مصطنعة وما رح تطول كثير معه ...
نحنا الإناث بشكل عام بنميل للرومانسية يعني مثل ما اتفضلتوا يمكن لمسة إيد أو كلمة حلوة بتعنيلنا كثير وبتمنحنا سعادة كل اليوم .... عا قولة الست فيروز : لمحة من بعيد بتكفيني وقلبي إلك على طول ....
بس الرجال بشكل عام بتفضل تعبر عن حبها بشكل عملي .. يعني الرجل بيعتبر أكبر دلاله على حبه لزوجته هي سعيه ليل نهار ورا توفير حياة مرفهة وكريمة لإلها....
طبعا هالشي ما بيعني إنو مافي رجال رومانسية ... أنا مرة قرأت عن شخص صمم لزوجته منبه خاص على شكل ديك وبغني غنية حلوة ألفها وسجلها بصوته يمكن كان أولها : كوكو كوكو استيقظي يا زوجتي الحبيبة ... لإنو المنبهات العادية صوتها بنقز .... وأمس كنت عم تابع برنامج بالتلفزيون عن رجل استغل غياب زوجته يومين عن البيت وقلب ديكور كل البيت بالاستعانة مع ورشات اشتغلت ليل نهار ليلحقوا ...قال ليعبرلها عن شكره لجهودها اللي عم تبذلها مع أولادهم ....
وكمان في رجال عندها خبرة بالتعامل مع النساء ... يعني بيعرفوا اللمسات الرومانسية الصغيرة اللي بتسعد الأنثى وبيحرصوا يطبقوها ..
ما بعرف إذا البيئة أو الجينات إلها علاقة بالرومانسية لإنو مثل ما اتفضلت سناء الشباب اللبناني بيغلب عليه الطبع الرومانسي الحالم وهالشي ببين من خلال تمثيلهم بالمسلسلات إن كان بنبرة صوتهم أو طريقة حديثهم ...أما ببيئتنا فبتغلب الحماشة بس المشذبة عن أول ....
عروستنا الحلوة رنيم ما يهبط قلبك من موضوع الجينات ... عندك حسام رومانسي بامتياز طالع لأبوه ... تعوا بالمناسبة إحكيلكن عن عمي أبو وسام طالما الحكي بيناتنا وأنا بعيدة هلأ ... بزمانو عمي عمل حفلة بذكرى زواجه ال25 من خالتي إم وسام ... وبكل عيد حب بيهديها وردة مع رسالة غزل ...
عا فكرة سناء أوحيتيلي بفكرة بشغلة الفريز والكرز مثلا إذا بدنا نستقبل ضيوف فينا نكتبلهم عبارة أهلا وسهلا بقلب جاط الفواكه ... عجبتني الفكرة ...
شكرا عالنصائح سناء .. بخبرك عالنتائج قريبا....
Posted by: Desert rose
اقتباس:
|
هلأ حرام مابدي أظلمه هوي رومانسي وقت بكون فكره فاضي ...بس للأسف هي من النوادر ...
|
حلوة الصراحة ولكن لعلمك أنجيل أكثر الرجال هيك بعد الزواج
وبالطبع مابتكون عدم مبالاة الرجل بهيك أمور هوي تقليل من مستوى الحب ..فالحب الصادق بيبقى موجود ومش رح تزيدوا لاكم ثلجة بالكاسة ولاكم حبة فريز بجاط الفواكه .
ولأن الرجل دائماً عملي وواقعي أكتر من المرأة لذلك بيعزز رومانسيته بأمور عملية أكثر .
وطبعاً تكون واضحة وما أنفهم غلط ...رومانسيته بتتجلى بتأمين كل الحاجات الخاصة اللي بتطلبها الزوجة من :
البابوج للطربوش
ويادكتور وياندوش إنشالله مابتضلوا محرومين .... وعقبال مانفرح منكن ياحلوين
زهرة الصحراء
Posted by: رجل غريب
الرائع إنو يكون الطرفين يعشقون بعضهما البعض
بغض النظر عمن يبدأ
بل كل منهما مبادر دوماً
محب للآخر
يفضله على نفسه
يتفانى فيه
من الطرق الرائعة
1- تحضير عشاء على ضوء الشموع.
2- نثر ورد أحمر في أطراف المنزل.
3- تخصيص أمسية كاملة بدون كهرباء وعلى ضوء الشموع.
4- تغيير مكان تناول الطعام وتحضير أطعمة لطيفة للطرف الآخر.
5- تبادل الرسائل التي تعبر عما في قلب كل منهما للآخر وأن توضع في مغلف أحمر مع قليل من تاج الورود ورائحة العطر التي يحبها الطرف الآخر.
6- إحضار صورة الطرف الآخر ووضعها في برواظ جميل ووضعها في مكان ظاهر من المنزل.
7- تبادل القبلات اللطيفة عند الدخول والخروج.
8- مناداة الطرف الآخر بأحب الأسماء إليه.
9- تقديم الطرف الآخر في الطعام والشراب.
حلوة الحياة هيك
آآآآآآآآآآآآه
موقع زيدل سوريا حمص
..
خدمات تشات و
دردشة ...
أرشيف المنتدى
vBulletin Copyright ©2000 - 2008,
Jelsoft Enterprises Limited.
vB Easy Archive Final ©2000 - 2008
- Created by Stefan "Xenon" Kaeser
