الارشيف - فستان العرس

Pages: 1

فستان العرس
(انقر هنا ان احببت مشاهدة الموضوع الاصلي بالالوان و الصور )

Posted by: Nada1981

مرحبا جميعا

اليوم قريت موضوع عن فستان العرس و حبيت انقله هون:

اقتباس:

لماذا يكون فستان زفاف العروس باللون الابيض
لم يكن اللون الأبيض لون فستان الزفاف معروفا من قبل فكانت النساء قبل القرن 19 يرتدين أجمل ما عندهن من ملابس مهما كانت ألوانها إلى أن جاءت ملكة بريطانيا فيكتوريا عام 1840 وارتدت فستانا أبيض ناصعاً في زفافها وأحدثت صدى كبيراً وسط الناس وقلدوها حتى الآن.
ورغم محاولة بعض المصممين إدخال عدة ألوان عليه إلا أن اللون الأبيض ظل هو السائد، لأن له عدة دلالات منها: الصفاء والنقاء، كما أنه أصبح يرتبط فى الذاكرة بالفرح ويجعل العروسة تبدو كالملاك أو الأميرة.
وهناك قصة طريفة أخرى تفيد بأنه في أثناء الحروب قديما كانت القبائل التي تريد الاستسلام ترفع راية بيضاء ، وانتقل هذا التقليد إلى الزواج، فعندما يتقدم العريس إلى أهل العروس، فإذا وافقو عليه ترتدي الفتاة فستاناً أبيض كرمز لقبولها وأهلها بالعريس.

مابعرف شو رأي حزبنا النسائي بلمنتدى بموضوع اللون الابيض و فستان العرس. انا بعرف في بنات كتير بتختار لون ثاني, مثل الوردي او الازرق بدل الابيض بس الفكرة كلها ماداخلة بعقلي. يعني شو رح يتغيير بلموضوع كله اذا كان لون الفستان ابيض او اي لون ثاني؟

انا بعتبر القصة كلها عاداة و تقاليد متبعة من الجميع, يعني مثل ما ستنا و امنا و جارتنا عملت لازم نحنا كمان نعمل

بعدين علو شو مبسوطين لحتى يلبسو لون ابيض؟ على العرس و الحفلة و الصور و الزواج ولا على السجن الي رح يدخلوه من لحظة لبسهم للفستان الأبيض؟؟

سناء و انجيل من العضوات بحزب الحلاوة و الدلع الي سبق و لبسو الفستان الأبيض بلعرس فياريت لو نسمع منهم رأيهم بلموضوع. كان رح يتغيير شي لو لبسو غير اللون الأبيض بلعرس ولا كله مثل بعضه ؟

تحياتي

Posted by: angel

ندى عم تحكي عن الفستان الأبيض...الله يسمعنا الأخبار الطيبة

.. لا لا مانك مطولة انشالله.. بزمانو حسام أخذت معو الشغلة شي سنتين بين أول ما بلش يلمح عن مواضيع الزواج لحتى خطب .. فمتأمل من هون لسنتين نشوفك عروسة يا ندى...
بالنسبة للون فستان العرس .. يمكن مثل ما اتفضلت يا ندى شي مترسخ بأذهاننا من الصغر يعني البنت من وقت بتوعى .. بتصير تحلم بالفستان الأبيض ..اللي بيرمز لإنها عروس.
هلأ يمكن الموضوع موروث وعادة.. بس إذا بتفكري ما بتلاقي أحلى من اللون الأبيض ليرمز لفرحة العمر ..وكثير مصممين عرضوا فساتين عرس بغير ألوان بس ما لاقت رواج بدليل إنو الفستان الأبيض هوي المحبب والمقبول أكثر بالعرس.. وبعدين هيك بتتميز العروس من بين كل الحضور .. يعني تخيلي إنها لابسة فستان ملون .. إي رح تضيع بساحة الرقص وما تنعرف من غيرها ... أما الفستان الأبيض فرح يظهرها إنها ملكة المناسبة ..
وعقبال ما نشوفك أحلى عروس .. ياستنا ومو مشكلة حتى لو بفستان ملون..

Posted by: merellaa

بقووووسة هلق بيقولوا غابت غابت وايجت تتفصحن علينا ههههههههههههه يلا اتحملوا اليوم الله يكون بعونكون
ندوشة صحي متل ما قالت انجل الله يسمعنا ا لاخبار ال..........................
احم احم اي يا ستنا خلينا بالفستان الابيض ممممممممم فعلا هو شي موروث وقديم بس كل الناس بتحبو والبنت من زغرها بيكون عندها حلم بلبس هالفستان بس بما اني انا حرمكوووووووووووووووووووش ةداهية ههههههههههه بس ما تساليني شو يعني حرمكوش فانا بطبعي بحب كون غير هالبشر ومقررة البس فستان اللهههههههههه واكبر بس ما رح قلك شو لونو ولا شو شكلو ميشان ما تضيع المفاجأة خلص بعد 10 سنين او عشرين سنة بتشوفيه علي هههههههههههه
ويلا ندوش خصرنا مشتاق للهز شدي الهمة وعلقي بسنارة شي شب ههههههههههه يا سمكة حبو وولهو
وانتي ندوش صحي خبريني طالعتيلي شي ( حرمكوش هههههههههههه) ولا متل باقي الناس خبريني بسرعة عن فستانك
وربي يحميكون يا بنوتات المنتدى ويزوجكون على اقرب سبب اتفضالي الساحة وضلني العزابية المدللة
اميننننننننننننننننننن
ميمو

Posted by: Nada1981

مرحبا جميعا

انجيييل و ميمووووو شكرا على المشاركة بس ما حبيت منكم هلدعوات هي

بعد الشر عني , انا وييييييين و انتو ويييييييين, انا نقلت الموضوع للنقاش فقط لا غير

ميمو يلا انا رح ضل وراكي و استنى لشوف اللون الي انتي حاططتيه بعقلك, حتى لو بعد 10, 20 سنة وراكي وراكي. بعدين لا تخافي طالما انا موجودة هون مارح تكوني العانس الوحيدة اتطمني. انا اذا اتزوجت عرفي انها رح تكون الاعجوبة رقم 50 من اعاجيب العالم

اقتباس:

بس إذا بتفكري ما بتلاقي أحلى من اللون الأبيض ليرمز لفرحة العمر

هدا الفرق بلتفكير بينا يا انجيل, اذا انتبي بتشوفيها فرحة العمر انا بقلك هي بتكون خسارة العمر

تحياتي للجميع و انشاءالله تكون ايامكم كلها ابيض, و حرمكوش

Posted by: tomassen

مرحبا
الحقيقة ما في احلى من الالوان الفاتحة والمزهزهة (حلوة هي ما) ليحس الواحد انو منور ومتفائل فما بالكن بيوم مميز متل يوم العرس ، بس بيضل اللون الابيض الناصع الو هيبتو بهيك مناسبة
يعني العروس بيوم العرس بتفكر حالها ملاك وداخلة عالجنة او ملكة ورح تبقى هيك على طول فمنشان هيك بيسموها فرحة (هي سايرنا انجيل ) وبعدين بتروح السكرة وبتجي الفكرة ( وهي سايرنا ندى )
على كل حال الله يهني كل العروسات والعرسان و عقبال العزابية

Posted by: lamia

اقتباس:

يعني تخيلي إنها لابسة فستان ملون .. إي رح تضيع بساحة الرقص وما تنعرف من غيرها

يمكن متل ما قالت انجيل هاد كان سبب مهم لانتشار اللون الابيض يعني لما صار هاللون لون رسمي لفساتين العرس صاروا الحضور ما يلبسوه مما بيعطي للعروس تميز خاص !!!
و متا ما بتعرفي فبالعرس بهمها للعروس تكون مميزة و ما حدا متلها ؟؟؟
طيب اتخيلي لو قررتي تلبسي فستان زهر و رحتي على افخم محل و اشتريتي احلى فستان زهر و رحتي على عرسك و لقيتي وحدة غليظة لابسة نفس الفستان ؟؟؟؟؟

عدا انو الابيض بيعطي جمال خاص لكل الوان البشرة سواء كانت بيضاء ام سمراء و بيعطي احساس انو العروس هيي الملاك اللطيف ....

و بعدين تعالي لهون من ايمتى صار العرس كابوسك ؟؟؟؟؟؟ لما بتصير شغلة كابوس بالنسبة لحدا فمعناها عم يفكر فيها كتير .... صح و لا انا غلطانة ؟؟؟؟

يالله لكن خلينا نفرح فيكي بس انتظري شي سنة لسا بلكي بصير عندي خصر متل العالم و الخلق منشان هز معكم ههههههههههههههههههههههههههه

Posted by: sulieman safar

.................... فمتأمل من هون لسنتين نشوفك عروسة يا ندى...
six months is enough
....................و بعدين تعالي لهون من ايمتى صار العرس كابوسك ؟؟؟؟؟؟ لما بتصير شغلة كابوس بالنسبة لحدا فمعناها عم يفكر فيها كتير .... صح و لا انا غلطانة ؟؟؟؟

يالله لكن خلينا نفرح فيكي بس انتظري شي سنة لسا بلكي بصير عندي خصر متل العالم و الخلق منشان هز معكم ههههههههههههههههههههههههههه
very intellegent assessment of the situation.
get smart get married
sulieman

Posted by: سيلفانا خوري

اقتباس:

مابعرف شو رأي حزبنا النسائي بلمنتدى بموضوع اللون الابيض و فستان العرس. انا بعرف في بنات كتير بتختار لون ثاني, مثل الوردي او الازرق بدل الابيض بس الفكرة كلها ماداخلة بعقلي. يعني شو رح يتغيير بلموضوع كله اذا كان لون الفستان ابيض او اي لون ثاني؟

عقبال ما نشوفك بهالسجن...سجن قلوب اجتمعت عالحب ...
عقبال ما يتغير هالقرار البرلماني اللي اصدرتيه ووزعتي نسخ عنو في كل انحاء المنتدى

الي ب بيت اهله على اقل من مهله

على كل حال على اقل من مهله.. المهم هوي الانسان المناسب ..اللي انشالله بتلتقي فيه عن قريب ...
وبتختاري اللون اللي بيلائم احساسك سواء كان ازرق او زهري.

واما الابيض اكيد الو طابع خاص في النفوس .. الابيض رمز الرقة والشفافية...
وبتبقى طلة العروس بالابيض متل طلة زنبقة.. في حديقة ورود.

Posted by: Nada1981

مرحبا جميعا

عم سليمان, لميا, سيلفانا برجع و بكرر كلامي الموضوع نقلته للمناقشة فقط لاغير, يعني اتطمنو مافي من ناحيتي اي فكرة للموضوع هدا. لميا لاتخافي لابعد سنة ولا 100 سنة رح غير رأيي الا اذا لقيت الانسان المناسب على قولة سيلفانا و هلشي مستحيل لهيك لاتخافي معك وقت قد ما بدك.

tomassen شكرا على المسايرة بس كيف بتسميها ملكة داخلة على جنة؟ اي قولي نار, قولي عذاب, اي شي الا الجنة

سيلفانا عزيزتي بتضلي رقيقة بكلامك و بمشاعرك حتى بلمواضيع هي. انا مارح قلك شي لانه انشاءالله عن قريب بتلبسي اللون الابيض و مابدي روح عليكي الفرحة هي و بعدها بتمنى اسمع رأيك بلموضوع

النتيجة الي طلعنا منحنا بعد المشاركات كلها انه اللون الابيض لفستان العرس ما هو الا عبارة عن تقليد متبع من زمان لحتى نقدر نمييز العروس عن المعازيم و ما اله اي دافع ثاني, سياسي او ديني ههههههههههههههه

تحياتي للجميع

Posted by: Lady Arwen

انا بفضل الفستان الابيض لانه كمان بيظهر انوثه للبنت و براءه كمان ................
و الناس اذواق في اختيار ملابسهم و الوان ملابسهم و اللوك بتاعهم............لكن اللون الابيض هو لون المحبه و السلام و الناس عندما تشوفوا بتفرح و بتتفتح قلوبهم............ز
مشكوره يا عزيزتي على الموضوع

Posted by: rainbow

عزيزتي ندى سلامات
أنا مارح علّق على فكرة الفستان الأبيض لأنو انحكى كتير أفكار بتمثل بعضها أفكاري والسوق مليان فساتين بكل الألوان وحتى صار الفستان الأبيض يدخلوله ألوان متل الورد الأزرق والأحمر و.......وأنا شخصيا عجبني فستان فييو ورد أزرق ولكن للأسف لم يناسبني ولاّ كنت البسته .
بس رح قول شغله انتي مو اعتراضك عاالفستان الأبيض بالذات أكتر من اعتراضك على فكرة الزيجة ككل (نار- عذاب-سجن........) طيب بدي اسألك كيف انتي بتحكمي على شي ما عشتيه ولاعرفتيه ؟غير من خلال الناس اللي حواليكي ,أنا قبل ما أتزوج سمعت كتير من رفقاتي نق كتير وشكاوي عن الزواج وأزواجهم والمشاكل اللي بتصير بينهم بس تعي قوليلهم كرّهتوني بالزاجه ساعتها بيبلشو يحكولك الشغلات المنيحة اللي هيّ موجودة بالأساس لكن احيانا كتير مامنذكرها بس منذكر العكس, بس أنا رح قلك شي أنا أكتر شخص طلعت وفتت وسافرت :رحلات ,مخيمات, نشاطات,دورات...وكنت كتير مبسوطة وكل مرة اتعرف عامكان جديد وأشخاص جدد بس دوم كان عندي إحساس بالفراغ واتمنى لو يكون شخص معي يشاركني كل هالشغلات اللي عم عيشها وكنت ارجع عالبيت حس حالي وحيدة وعبّي وقتي بالرفقات والتحضير لنشاطات جديدة ......وبعد مااتزوجت بالبداية حسيت حالي بسجن ويمكن أحيانا بحن بس بعدين حسيت أنو وقتي كلو معبى يعني مابحس بفراغ وكتير بحس حالي مبسوطة مع زوجي والحمد لله وعم نطلع مشاويروزيارات وسهرات وحفلات وماعم نقصّر .
نار وعذاب : هالشي مو صحيح (كلام مبالغ به) هلق بقلك أنو مافي زوجين علاقتهما طبيعية مابيصير بينهم خلاف نتيجة الاختلاف الطبيعي بين كل شاب وفتاة بين تفكيره وتفكيرها وعقلية وتربية وبيئة كل منهما ولكن هنا يظهر دور الحب أو أقله التفاهم والاحترام بينهما والذي على أساسه قام كل منهما باختيار الآخر فبذلك وبدون تدخل أحد يتجاوزان المشاكل ويعودان من جديد إلى تجديد الحب وبصراحة أقول لك أنه إن اخترت الشخص المناسب وأنا أكيدة من ذلك مهما طال الزمان ستعيشين سعيدة لأن الزواج حلو عندما تجدين شخص يحبك ويهتم بك ويخاف عليك ويدافع عنك وتتوجان حبكما بالأولاد وتحقيق حلم كل فتاة بأن تكون أم . وبالنتيجة كل شخصان لهما تجربتهما الخاصة التي لم يعشها قبلهما أحد ولن يعشها أحد بعدهما .
بجوز كل حكيي ما يهمك أو ما يعنيلك شي بس أنا حبيت قول رأيي ودافع شوي عن الزواج بالتهم اللي بيتهموه فيها واللي كنت آمن فيها قبل ما اتزوج.
عذرا على الكتابة باللغة العاميّة أرجو ألا تجدوا صعوبة في التعامل معها وشكرا.

Posted by: Nada1981

مرحبا جميعا

اخت Rainbow بلأول سمحيلي رحب بحضرتك معنا بلمنتدى و انشاءالله بتقضي وقت حلو و مفيد معنا

مع انه ماهدا موضوعنا بس رح رد على حضرتك حتى ماتفكري انه رأيك مابيهمني, اصلا نحنا بلمنتدى عم نكتب لحتى نتبادل الاراء و النصائح و الافكار .......... الخ

صدقيني انا معك بكل كلمة حضرتك قلتيها و الحمدلله انك مبسوطة مع زوجك وانشاءالله بتضل علاقتك معه هيك طول العمر.

المشكلة يا عزيزتي عم تكون انه نسبة النسوان الي بتحكي بلمنيح عن الزواج عم تكون قليلة كتير حتى مع انها كانت موافقة على الزواج بكل قواها العقلية. حتى حضرتك كتبتي انك كنتي اخده فكرة غير مزبوطة عن الزواج قبل الزواج و تغيرت بعده, الحمدلله فكرتك تغيرت من الاسوء للاحسن, بس فينك تقوليلي كيف كان رح يكون شعورك لو كان بلعكس؟ يعني حاطة ببالك انه الزواج هو الحل لكل شي ( فستان العرس, الحفلة, الاستقرار, السعادة, الاولاد......الخ) و يطلع عكس التوقعات و تتحول حياتك ( بعد الشر ) لجحيم كامل.

بلوقت الحالي رفقاتي المتزوجين كلهم عم يشكو من معاملة ازواجهم الهم و خاصة تغيير المعاملة من وقت الخطبة لوقت الزواج, حتى في وحدة منهم زوجها حفي وراها لحتى قبلت فيه و مثل ما بيقول المثل تمسكن لحتى تمكن و بلخطبة كانت معاملته مافي احسن من هيك و بعد العرس مباشرة ثاني يوم تغيرت معاملته الها. اكيد ماكل الرجال هيك بس اذا انا كل القصص الي عم اسمعها هيك قوليلي كيف رح اخد فكرة كويسة عن الزواج؟

و مع هيك كله انا ماني ضد الزواج بيوم من الايام , بس قاعدة ببيت اهلي و ماني مستعجلة و على اقل من مهلي. و كلشي قسمة و نصيب و ماحدا بيعرف نصيبه مع مين او ايمتى او وين

شكرا على ردك و انشاءالله حياتك الزوجية بتضلها حياة سعيدة

بنرجع لموضوع الفستان Lady Arwen كمان برحب بحضرتك معنا بلمنتدى و شكرا على ردك. الظاهر انه نسبة مؤيدين اللون الابيض كبيرة و فكرة انه العروس تلبس لون ثاني مانها واردة كتير, خاصة انه كلمة عروس عم تكون متعلقة بكلمة فستان ابيض.

تحياتي للجميع

موقع زيدل سوريا حمص .. خدمات تشات و دردشة ... أرشيف المنتدى