الارشيف - جكااااااااارة بالمغتربين .

Pages: 1

جكااااااااارة بالمغتربين .
(انقر هنا ان احببت مشاهدة الموضوع الاصلي بالالوان و الصور )

Posted by: Desert rose

صباح الخير
بعرف في كتير أعضاء زيادلة مغتربين قلبهم مكوي على شم شوية هوى من هويات زيدل الحلوين
اليوم بعكس كل الأيام حبيت أتخلى عن تهذيبي لوقت قليل وحرقصكن شوي وقلكن أنا اليوم رايحة بسياحة قصيرة لحضن الأم ....لزيدل الحبيبة ....معزومة على فنجان قهوة يعني غط الحمام طار الحمام.... ولكن بيضل الكحل أحلى من العمى يعني .....غطة .......نطة......... المهم الواحد يشوف أحبابه ويعبطهم أحلى عبطة .....ويقول يلعن أبو الغربة ويلبط هالفرق أقوى لبطة .
ياحراااااااااااام بعرف أنكم متلي مشتاقين للأهل بس مش طالع بإيديكن شي .... العين بصيرة والإيد قصيرة .....أميركا أميركا ........شغل شغل ..............والمحظوظ فيكن إجازته مابتتجاوز الجمعة وإذا خبصها بيمدها كل 10 سنين للشهر

.
شو بدكن تعملوا هي حال الدنية ......ناس هون وناس هونيك....... وناس أنحرمت من البيض البلدي وناس من المتي الصبح.... وناس من صياح الديك .

فأللــــــــــــه بكرة عالوعية بكير مع شمس زيدل ...وفنجان قهوة يعطيني قوة .........مع ناس أنا مشتاقة شوفهم كتير ... خالي ...وجاري ....عمتي ...........وعمي .....
ودقة صغيرة عاكل باب لاقي فيها هالأحباب......... المعصور على فراقهم قلبي .

بشو بتحبوا أتذكركن

أكيد بشي كاسة متي !!!!!!!!!!

إلى اللقاء

وماتواخذوني بس حرقصتكم من وقت لوقت واجب وطني

زهرة الصحراء

Posted by: aziz m

اول شي صباح الخير سنااء ........ وبعدين شو قصتك انتي والمغتربين شي بتتهجمي عليهم وشي بتحرقصيهم انو رايحة على زيدل بس معليش سنااء جاي الايام وانشالله كلنا بنرجع على زيدل البلد الام وانتي بتضلي ببيروت ونحنا صير نحرقص فيكي والايام جاي سناااااااااااء

Posted by: Desert rose

اقتباس:

وبعدين شو قصتك انتي والمغتربين شي بتتهجمي عليهم

هلق حبيت حرقصهم أي بحيث الكل ممكن يكون مشتاق للضيعة ولهواياتها الحلوين
بس مش عارفة من وين أقتبست أني أتهجمت على المغتربين
هلق هني من غير دف بيرقصوا وبدهم خبرية بأنو نحنا عم نتهجم عليهم وبتصور البعض بردك هالحلوا قبضتوا أكتر من كل اللي بدو يطلعوا بكل اللي رح يطلعوا بغربتوا .
صحيح أنا بحب هز الورد بس صدقني مش تأزعجوا بالعكس تشم عطره وأتمتع بريحتوا
ويعدين رح نفترض أنا حقيقة أتهجمت على المغتربين أنو وين الغلط شو المغتربين منزلين من عند الله ومابيغلطوا او ممنوع نحكي عنهم وعن وضعهم بالكربة قصدي الغربة .
طيب سماع هالخبرية اللي جبتها معي :

قال واحد قال لوحدة ...ولايهمك نزلي بسيارتك على حمص شرطي السير مابيخالفك وقت بيعرف أنك أميركانية

ولك ياعمي من وين بيجيبوا هالخبريات
ومن وين صارت أميركانية
ولك على هويتها ودفتر السواقة ملزوق أنو أصلها زيدلية
ووقتها أنا وبكل صدق جاوبت إذا العالم بدها تزيد من إحترامها إلي لأني مغتربة معترة من أميركا أي بدي أنكر هالجنسية .
هلق مش مهم الشرطي شو بيفكر المهم مغتربنا الفاضل مايكون عم يفكر بأنو الشرطي لازم يحترموا لأنوا أميركي ************
وياعزيز أهلين فيك بزيدل أيمتا مابدك البلد بلدك ((يه يه يه)) ...ولكن الحرقصة ألها أصول وكل شي بوقتوا حلوا ومابتصور لاأنت وأكبر مغترب بيقدر يحرقصي لأن إذا بضرب حجر بوصل قبله على زيدل وبـــــــ10 دولار ....مش متلكن بأميركا إذا ضربتوا الحجر بيوقع بالبحر والتكيت بـــــ 1200 دولار

وإنشالله ماترجع تعتبر اللي اللي قلتوا تهجم عالمغتربين !!!!

وأنتبه أنااااا رجعت

زهرة الصحراء

Posted by: RUSHA AWAD

هلأ تحرقصني ومشي الحال بس اللي محرقصني لهلأ انو أنتي ليش حابي تحرقصيني كل هالحرقصة؟؟؟؟؟؟؟؟
انو يعني هزيتي الورد بس شميتي ريحتو

؟؟؟؟؟؟ والله انتي شغلتك غريبة يا سناء مع هالمغتربين, ياعمي شو عاملينلك بتضلي تتمحشري فيهن وعلى قولة "تحرقصو, انتن عظمكن ذهب....." وكلو كوم وتذكيرتني بحق تكت الطيارة على سورية كوم ثاني ومشان تصلحي معلوماتك الاقتصادية "سعر التكت على سورية هلأ مو أقل من 2000 دولار

" يعني ما أحلاني كون بلبنان وماروح على سورية عالقليلة كل شهر خصوصي وقت بكون عندي كم من الأصدقاء "انترنت وغيرو" والتكلفة ما بتتجاوز 10 دولار

. ولك عمي حلو عن هالمغتربين "المشحرين" اللي ماناقصهن حرقصة وأني أولهن.

مع حبي واحترامي

رشاعواد

Posted by: Desert rose

مابعرف اذا حلينا عنكن يارشا شو بيبقى معنى لحياتكن بلانا
بعدين طولتي لرديتي شو قصتك مع أ نو في ناس نصحوني وقالولي اتحركشي بمشاركتك برشااا وحرقصيها أكتر من غيرها ولكن أنا ماقبلت وكان ردي :

رشا مابدها حركشة وحرقصة لأنها محرقصة خلقة

وسألوني متل ما أنتي سألتيني شو بدي بالمعترين المغتربين فكان ردي :

لأني مابحب الغربة وخصوصاً أميركا لأنها سرقت مجموعة كبيرة من ناس انا بحبها
بغض النظر عن كرهي وبغضي لكلمة غربة بكل حروفها ومتناقضاتها
فيارشا إنشالله تكوني زعلتي كتير ... ويكونوا زعلوا كمان هالمغتربين المشحرين على قولتك بأستراليا وكندا وميامى وكاليفورنيا وحتى بجاكسن فيل وبأوروبا كمان ........لأن هيدا المطلوب من المشاركة المعنونة بــــــــــــــــــ

جكاااااااااااااااااااااااااارة بالمغتربين

بعدين ضيفي لمعلوماتك هالمعلومة في كتير سوريين مقيمين بلبنان بس إحتمال المغترب بأميركا يزور سوريا أكتر من الشخص المقيم بلبنان (( صدقيني معلومة صحيحة ))
شكراً على المعلومة الإقتصادية
وبرجع بذكرك أنا بحب هز الورد تشم عطره واليوم شميت عطر أحلى وردة مغتربة بمنتدى زيدل وبتمنى شم كتير من بعدها .

أهلين رشا.......

زهرة الصحراء

Posted by: hosam abdulaziz

سناء ولك شو قصتك صحيح حاطة حطاكي بهالمغتربين و نازلة دق دق
هلق ما بتعرفي شو بتخبيلنا الايام و بيجوز انا صير منهم و فيهم يوما ما لهيك من هلق رح بلش دق فيكي و رد عاي كلام بيكون براي منه مزبوط.
اول شي بحب قلك انه المفهوم الطويل للأجازة اللي كنا نعرفه ايام زمان انتهى و ولى , يعني معد في شي اسمه اجازة اكثر من شهر شهرين .
لهيك وقت تحكي عن اجازة شهر او حتى اسبوعين فهو امر طبيعي بظل سهولة التنقل و الأتصالات الحالية اللي نحنا عايشينها.
و انا واحد من اللي مجربين الأجازات , يعني الرايح شهر و لا ثنين و لا ثلاث ما رح تفرق مع القصة.
و بالمناسبة اي شخص منه عميزور الضيعة فهو بنسبة كبيرة 90% من ايده و ليس ضروفه اللي حاكمته, و اذا منه عمفكر بهالزيارة فالسبب هو انه آخر همه ان زار الضيعة او ما زارها.
خصوصي اذا اهله عميروحوا يزوروه اي وقت بدهم.
بس كلامك بيكون اكثر واقعية عالاشخاص اللي وضعهم القانوني بالبلد بيمنعهم من المغادرة و العودة, فهذول انا بجي معك كان الله بعونهم و ما بدهم مين يحرقصهم.

اقتباس:

او ممنوع نحكي عنهم وعن وضعهم بالكربة قصدي الغربة
ويكونوا زعلوا كمان هالمغتربين المشحرين

هلق مو ممنوع تحكي بس مو معقول طريقة تصويرك للمغتربين بالمشحرين و المعثرين!!!!!!
ولك اذا في مشحرين و معثرين فبيكونوا الأشخاص المقيمين ببلاد معثرة مثل سورية و لبنان , و ما تخليني بلش عد و قارن.
ولك اصلا مين منهم بعد بيرضى يرجع يعيش بهالبلاد المعثرة؟؟؟؟

اقتباس:

ووقتها أنا وبكل صدق جاوبت إذا العالم بدها تزيد من إحترامها إلي لأني مغتربة معترة من أميركا أي بدي أنكر هالجنسية

طيب مني عرفان شو المشكلة بهالشي ؟؟؟؟ وين الغلط انه موظفي الدولة عنا يقدموا تسهيلات للمغتربين ؟؟؟
ما اصلا هي تعليمات بتجيهم من السلطات العليا.
و ثاني شي ليش الواحد لينكر جنسيته الثانية طالما عمتأمنله تسهيلات بكل مكان بيزوره بالعالم بعكس الجنسية السورية اللي الها معاملة خاصة (سلبية طبعا)هي و اللبنانية و كم دولة ثانية باي مكان بتحل فيه بالعالم.
دخلك شفتيلي شي واحد معه باسبورت غير السوري و بعده بيتنقل بجوازه السوري بسفراته ؟؟؟؟؟؟

اقتباس:

وناس أنحرمت من البيض البلدي وناس من المتي الصبح.... وناس من صياح الديك .

انا معك هيك اشيا تاركة انطباع حلو بنفس كل واحد مننا
بس خلينا ننحرم من هيك اشيا بسيطة و يكون عنا
كهرباء 24/24 و مي نفس الشي و تقنيات من احدث ما يكون و تسهيلات بعيدة عن الروتين , خطوط انترنت باقصى السرعات و بأخفض الأسعار.
وسائل تنقل من ارفه ما يكون ,
و نكون عايشين ببلد مستقر سياسيا و ما عنا تفجيرات و اغتيالات ,
و الناس تكون كلها متساوية , الفقير و الغني , المدعوم و الغير مدعوم.
بدك نصيحة مني سناء
روحي عملي زيارة للولايات المتحدة و بس جيتي من هنيك ابقي حكي عكيفك و انتقدي عكيفك
و ما حدا اله معك حكي وقتها.

بس و الله سمعة صاروا المغتربين باوروبا و استراليا و امريكا و كندا والبرازيل معثرين , و العايشين بسورية هني المحظوظين...؟؟؟

Posted by: Desert rose

اقتباس:

سناء ولك شو قصتك صحيح حاطة حطاكي بهالمغتربين و نازلة دق دق

لهلق ماعم بقدر أفهم ووين الدق بالمغتربين وهل... الجرأة والصراحة من وقت لوقت بتوضيح الحال للتقارب والتناسب ...صار أسمو نق عالمغتربين !!!!

اقتباس:

هلق مو ممنوع تحكي بس مو معقول طريقة تصويرك للمغتربين بالمشحرين و المعثرين!!!!!!

تعتير عن تعتير بيفرق وبكلامي قصدت التعتير المعنوي ومابعرف ياحسام ليه درت القصة مادية ..هلق بدك تقنعني بأنو التعتير بأميركا واستراليا وكندا بها الغربة المشحشطة متل التعتير بسوريا ولبنان بين الأهل والخلان ..الهئية صار عندك إستعداد تبيع الأهل والوطن بكمشة تراب مخلوطة بشوية دولارات مهرية .

اقتباس:

و نكون عايشين ببلد مستقر سياسيا و ما عنا تفجيرات و اغتيالات ,

هيك أنا معك ولكن إذا كل العالم بدها تفكر متلك مش رح يبقى ناس لابسوريا ولا بلبنان ولا بالدول العربية كمان وبرأي بهيك حال نطلب من أميركا تشرف تقعد عنا لتحمينا من الإغتيالات والتفجيرات لأن كتير صعب كل الوطن العربي يروح على هالقارات .

اقتباس:

روحي عملي زيارة للولايات المتحدة و بس جيتي من هنيك ابقي حكي عكيفك و انتقدي عكيفك
و ما حدا اله معك حكي وقتها.

أنتِ بتعرف البير وغطاه وبتعرف أني ولـــــــــــ6 مرات قمت برحلات سياحية أنا وعيلتي بالكامل لأوروبا ولأهم الودل فيها ..بلجيكا ...ألمانيا ...فرنسا...لوكسمبورغ ...وفرنسا.... وهولندا....ووصلنا لأسبانيا كمان ...ولكن صدقني ولا مرة لقيت الحياة فيها أجمل من الحياة بسوريا ولبنان ....مع أنه الفكرة ماكانت صعبة لصير مغتربة أوروبية ....فمابعرف شو الغاية من تمنياتك بزيارتي لأميركا ...وشو لازم شوف أكتر مما شفت بغض النظر عن أنوا لكل بلد جماله العمراني والطبيعي الخاص فيه ....بس الفكرة صارت قريبة وإنشالله رح قوم بسياحة لمدة 20 يوم على عيد الميلاد بدعوة من الصديقة سيما إذا قبلوني الأميركان

خلص ياحسام كبر عقلك والله إشتقنالك ولك وين رايح مابكيفيك 6 سنين شنططة وتعتير .....وخلي ببالك ....بأنو لوزة وحدة من شجر اللوز الزيدلي ببلادك .....وحبة عنب من عناقيدها ودواليها... بتسوى كل الدنية ومافيها. (( الله عاللوز والعنب

))

وأنا اليوم عندى إستعداد قدم إعتذار خطي لكل المغتربين إذا كانت الرسائل الموجهة هي بالفعل نق ودق عن وضعهم المعتر المشحر

..... وماتواخذوني !!!!!! بتمنى أسمع رأيكن وتجاوبوني ؟؟

م: الموضوع بيستاهل الرد مع أنو طار وأنا عم ضيفوا مبارح بس كان من الضروري عيدوا اليوم .

زهرة الصحراء

Posted by: RUSHA AWAD

انتي تعي على اميركا وشوفي اذا بكون مرحب فيكي او لاء وصدقيني انتي بس اعتمدي وبتلاقي المحبين كثار وأولهن اني يعني ما أحلاكي جاي على فلوريدا وماتحسبي حسابك بكم يوم عندي

هون بجاكسون فيل "طبعا بسلامة اهل ميامي" بس كمان نحنا بيطلعلنا حصة ولا شو رأيك سناء

رح نوعد حالنا فيكي وخلي هالشي ببالك يعني مشان تحسبي حسابك بالإجازة

مع حبي واحترامي
رشاعواد (^_^)

Posted by: Desert rose

ألف شكر رشا لدعم الدعوة
الدعوة بعدها عالورق بالرغم من جديتها

ولكن في حال وصولي لميامي
بالضرورة أتعرف على أحلى وأطيب رشا

بيوم أتمنيت ومازلت ألتقي فيكي بالصدفة على ظهر سفينة
فكيف إذا صرت بأميركا
عن جديد بشكر وفائك للصداقة واللي لمستوا بكل صدق بكلماتك
على أمل اللقاء رشاااااا

رشاااااااااااااااااااااااا

زهرة الصحراء

Posted by: Desert rose

آلوووو ......بونجور

مية بونجور ...............خير ياأمور

أبداً بس بدنا نخبرك أنو قاعدين عم ناكل بجور

بجووووووووووووووووووووووووووور معقول هالتليفون من زيدل لهون ...تتخبروني أنو عم تتسمموا بجور .

معقول ومية معقول ................والمنطق هيك بيقول يعني مش بس أنتي بتجاااااااااااااااااااكري المغتربين .................كمااان نحنا بيطلعنا دور رررررررررررررررر

إذاً هالمرة مش ذنبي يامغتربين ياحلوين الذنب على صديقة منكن وفيكون.... الله يخليكن ... فألف
تحية للصديقة سلام صايغ ...اللي هلق عم تتمتع بأطيب وألذ الفواكه والخضار الزيدلية

خبيلي كم بجوووووورة حبابة سلام للسبت الجاية .

والله بيحزنوا هالمغتربين

ملاحظة للأعضاء اللي مش من زيدل : البجور (( أو البجر )) هوي البطيخ الأصفر قبل مايحلى ويكبر وبلبنان من سمي الشمام وبالحالتين بيكون طيب ولذيذ ...جربوا ودقوا ..وياسلام ياسلام

زهرة الصحراء

Posted by: angel

بجور ....

حرام عليكم سناء وسلام .. ما بتقولوا في ناس حوامل عم تسمع ...طب أنا ما كنت فطنانة فيه ... شو بعمل بحالي هلأ ؟؟
مالي غير حسام ...ياترى البجر بيتحمل شحن بالطيارة ؟؟ بس المسكين شو بدو يشحن معو ليشحن صارت القائمة عشر متار...
سناء وسلام انشالله بتبسطوا بسياحتكم ... بس أمانة عودوا زوروا بيت عمي أبو وسام وتحديدا" حديقتهم وكلوا عني وعنكم

Posted by: a_aroush

كنت عم فكر احذف هالموضع من أول ما نزل ..

بس المشكلة أنها بتغدر تفتحو مرة ثانية .. قلت احسن شيء نطنشها .. و بلكي الشباب بيطنشوها كمان .. حتى ما تنجح بحرأصتنا .

على كل عم اكتب هلأ فيه مو لأني متحرئص .. بس ..

, و مشان كمان نعزمك لعنا إذا جايي لهون على أميركا .. أحسن ما تقول عبدالله ما عزمني .. يعني موضوع الحرأصة فينا نطنشوا أما ما فينا نطنش عزيمتك .

و بس تروحي لعند رشا خليها تاخذك عالداون تاون .. حفظيها هي .. كثير منطقة حلوة هنيك .. و خصوصاً أنك بتحبي تتبضعي و تنزلي عالسوق كثير ... كنت فكر مافي ولا داون تاون بأميركا أحلى من اللي بلوس أنجلوس .. لوقت رحت على جاكسينفل .. على كل لهيك هي فلوريدا أكثر بلد سياحي بأميركا .. هذا السبب واحد منهن ... فأمانة رشا من هلأ بتاخذيها لهنك .. بس ما تضيعيها .

و من هلأ بتمددي إجازتك هون أكثر من عشرين يوم .. لأنه ما رح تلحقي تشوفي شيء هون بعشرين يوم .. بدها القصة شهرين عالأقل ... شهر عنا و شهر بجاكسينفل .

أما نجيتي لهون رح آخذك على موقع ما بعرف شو بيسموه بالعربي اسمه بالانكليزي .. San Andreas Fault ... بلكي عدورك بيصير فيه احتفالات رقص و هز بتشوفي شلون هالعادات عنا ... لأنو ما بتصير كل مرّة .

أما بروحتك عميامي فحكميها بوقت بين آب و ايلول بيجيهن هوايات كثير حلوات بهالوقت .. الواحد فعلا صعب ينساهن .

و أهلا و سهلا بسناء .. بس ديري بالك بيجوز تحبي كل هذول كثير و تبطلي ترجعي علبنان .. فأعذر من أنذر .

Posted by: Desert rose

اليوم رح أعترف بأني كنت غشيمة كتير
يعني لو جاكرتكن من أربع سنين كنت هلق رح كون من الكسبانين
بسيطة يلا كل واحد بياكل نصيبوا
ونصيبي اليوم أحلى دعوات من أحلى وأغلى محبين
عبدلله بيكفي أنك شاركتني الموضوع لتكون من المحرقصين
وبيكفي كمان أنك عبدلله عرعوش الصديق الغالي لتكون هالدعوة صادقة ومن قلب أمين
فألف ..... ألف شكر
وإنشالله المزحة تقلب جد هيك مش رح أخسر زيارة مع رشا للشوبينغ بالداو تاون .
ويارب يكمل حظي مع هز الخصر كمااااان

شكراً ياحلوين بس دعواتكن مارح تعفيكن من أنو ضل جاكر فيكن ....فأعذروني من محبتي ألكن رح ضل قريبة منكن

.

أنجيل الغالية أنا آسفة أنتي الوحيدة اللي لازم أعتذر منك عن قصة البجر والبجورررر... بس بتصور وإذا مش غلطانة حضرتك قطعتي مرحلة الوحام ...ولا شو ؟؟؟ ماتقللي أنك بتتوحمي تسع شهور إذا القصة هيك الله يكون بعون الريس وسام ...وإذا كمان هيك ...وين المشكلة أنك ماتاكلي بجور... وتطلع بعين الصبي شي بجورة زيدلية غير شكل هيك بالقليلة وين ماراح ووين ماحاص بكندا بيوم من الأيام رح يعرفوا أنو من زيدل الخضراء من الوطن الأم .

بالمناسبة بتطلب من الرب وبجد يكون معك ويرافقك بكل خطواتك حتى نهاية حملك لخلاصك بخير إنشالله .

زهرة الصحراء

Posted by: hosam abdulaziz

اقتباس:

المشاركة الأصلية كتبت بواسطة desert rose

بيوم أتمنيت ومازلت ألتقي فيكي بالصدفة على ظهر سفينة

يعني يا سناء الك سحبات بتجلط اوقات قال شو عظهر سفينة , ذكرتيني بالتيتانيك و Leonardo DiCaprio وقت التقى عظهر السفينة Kate winslet و عاشوا قصة حب اثرت فينا جميعا.
يعني اذا مع رشا و هيك سرحتي بافكارك , فيكي تخبريني كيف كنتي بتتمني تلتقي بفارس احلامك ؟؟؟

اما انجيل فمع انه مسار الرحلة طويل شوي بس تكرم عينك احلى اكلة بجر رح جبلك معي.

رشا و عبد الله بنصحكم تعدوا للعشرة ثاني مرة بارسال هيك دعوات, و فيكم تحولوها الي فرد مرة بينشد الظهر فيي اكثر.

Posted by: Desert rose

اقتباس:

المشاركة الأصلية كتبت بواسطة حسام المنفوش

يعني يا سناء الك سحبات بتجلط اوقات قال شو عظهر سفينة

والله أنتِ اللي صاير بتجلط ياحسام ...واليوم خير الكلام ماقل وضل ...يعني الله يسامحك على هالشهادة بسناء واللي أكيد لأنها منك رح تكون شهادة ذم ....!!!
و لكن هل لازم أفهم من هالتنبيه لرشا وعبدلله بأنو هالسنة مافي كبسة وورق عريش ودجاج وكباب مشوي عالفحم

.

بتعرف حسام بلشت أترحم على أيام الريس وسام ..............كانت خسارة روحتك لكندا ياريس مش كرمال الكبسة .....لالالا كرمال كتير أشيا كماااان .............أشتقنالك أبو الويس ألك ولأنجيل ولأندروااااا .....ألكن وحشة .

ملاحظة هامة جداً ووعد أكيد :
....رح أحرمك شوفتي هالصيفية حسام ورح يكون الشاهد هالرد العنيد فإلى اللقاء في الصيفية اللي بعد هالصيفية وإنشالله وقتها بتكون للمباركة بزواجك (( الله يستر ))

زهرة الصحراء

Posted by: tomassen

بدي اشكر سناء عالمعلومة وهي انو العجور (البجور ) هو البطيخ الاصفر ، هي أول مرة بسمعها
وانا كنت مفكرة انو العجور مثل القثة الطويلة لانو نفس الطعم بس غير شكل بس ما بعرف اذا القثة الطويلة بتتحول لشي تاني بعد ما تنضج؟!

Posted by: Desert rose

اليوم مش حابة حرقصن كتير
ولكن الشكر واجب وبالشكر تدوم النعم لذلك حبيت أهديكم هالصورتيين إنشالله يعجبوكن مع إعتذار كبير من أم أندروا ...وإنشالله يا أنجيل مابتكوني بتحبي التين .

شكر خاص لوالد الصديقين طلال وردين الأشقر على ذكرنا بأول قطفة من شجرة التين البيتية الزيدلية

أما الشكر الثاني فهوي للصديقة سيما على هالبجووووووراات الطيبين اللي أكيد كمان هني من أراضي زيدل ولكن مش عارفة بالضبط من وين !!! (( شكراً سلام ))

tomassen تكرم عيونك الحلوين بتمنى تضلي مبسوطة بها المعلومات الخضارية وبعلمي الأكيد بأنو القثاء بس بتكبر يعني مابتتحول ولكن للأسف كل ماكبرت برأي بتخفنكتها ولذتها
خبريني عجبوكي الصور ....صدقني مبارح وصلوا لبيروت ....تازة من زيدل .........مممممممممم

وصحتين على قلب اللي شافوا الصور ......أكيد المغتربين مابيحبوا التين

زهرة الصحراء

موقع زيدل سوريا حمص .. خدمات تشات و دردشة ... أرشيف المنتدى