Pages: 1
دالاس مافريكس × ميامي هيت ؟؟؟ من سيحصد اللقب لموسم 2006
(انقر هنا ان احببت مشاهدة الموضوع الاصلي بالالوان و الصور )
Posted by: hosam abdulaziz
تبدا اليوم الخميس نهائيات دوري كرة السلة للمحترفين NBA بلقاء كل من فريقي دالاس مافريكس و فريق ميامي هيت بطل المجموعة الشرقية
× 
الفريقين يصلان لأول مرة للمبارة النهائية و بالتالي سنشهد اسما جديدا يحمل لقب البطولة.
كفة الفريقيت نتساوية تقريبا , رغم ان دالاس مافريكس فاز في اللقائين اللذين جمعا الفريقين في المباريات التأهيلية في الموسم العادي.
لكن فريق ميامي اظهر ادائا مميزا في مرحلة البلاي اوف.
و يحتفظ فريق دلاس مافريكس بافظلية عدد اللقاءات في ملعبه لأن سجله في البطولة افضل من سجل ميامي هيت و بالتالي سنشهد 4 لقاءات في ملعب دالاس و 3 مي ملعب ميامي.
المواجهة الكبرى ستكون بين عملاقي الفريقين و سيكون لها دور كبير في ترجيح كفة احد الفريقين
ديريك نوفتسكي من دالاس و المخضرم شاكيل اونيل من ميامي.
و هذا جدول مباريات النهائي
Posted by: a_aroush
أنت مع مين حسام .. و مع مين كنت من قبل .. بتعرف اني كنت أنا مع فريق Los Angeles Lakers ... و لو أني كنت أعرف ما عندو فرصة للتأهل .
أما هلأ فما فيي كون غير مع الفريق اللي فيه Shaquille O'Neal حبيب قلبي .. ولو أنه راح على ميامي فما رح أنسى أنه كان بفريق ال Lakers اللي بحبو .. و قضينا معه و معهم أحلى مواسم كرة السلة .. و خصوصاً الكؤوس الثلاثة المتتالية التي حصل عليها . سنة 2000 _ 2001 _ 2002 .. و لدي تسجيل كامل عن تلك النهائيات . من أحلى الذكريات .
حقيقة لم أتابع المباريات النهائية لل Play Off هذه السنة لانشغالي أولاً .. و ثانيا لأن فريقي خرج مبكراً منها.. و لكن أتابع الأخبار و من يربح من بعيد .
أما توقعاتي لهذه البطولة ... و خصوصاً أن شكيل يلعب جيداً كما سمعت مؤخراً .. فهي حتماً ستكون من حظ ميامي ... فإذا كان معدل تهديفة كما كان سابقاً أكثر من %60 و فوق الاربعين نقطة و أكثر من 20 ريباوند و شي أربعة خمسة بلوك .. فعلى دالاس السلام من هلأ .. على كل توقعي هو ميامي 4-2 ستنتهي بست مباريات لصالح ميامي .
Posted by: hosam abdulaziz
انا بعد ما خرج العملاق مايكل جوردان من فريق شيكاغو بولز ما كان عندي فريق ثاني شجعه لوقت ما سمعت عن الألماني جيريك نوفتسكي من فريق دالاس مافريكس و عن قوة هالاعب و تالقه مع النادي.
و فعلا بلشت شجع هالفريق من سنة الـ1998 و حتى اليوم , مع انه ما كان اله حضوض يوصل للنهائيات بسبب قوة منافسيه في المنطقة الغربية , رغم لعب ستيف ناش و مايكل فنلي و فان ايكسل في احد المواسم.
طبعا ما كنت احرم حالي من تشجيع احد الفرق بالنهائي و كنت لاقي ضالتي في فريق ديترويت بيستونز .
ففريقي المفضل هو دالاس مافريكس لسبب وحيد و هو وجود لاعب الماني من طراز نوفتسكي بين صفوفه.
بتصور يا عبد الله غيابك عن اجواء الـNBA خلا توقعاتك تروح لبعيد و خصوصي حول شاكيل اونيل اللي صار بآخر اياه الكروية و لازم يعتزل و فريق ميامي بدون لاعب اسمه D.wade ما بيسوى شي.
بس الفريق اللي اخرج سان انطونيو سبرز , و من بعده فونيكس سنز هو بكل تأكيد بطل الـNBA
و على فكرة عبد الله صرلي شهر بتابع الـNBA البلاي اوف عالأنترنت , عبر الياهو play by play
يعني مني شايف شي و لا سامع شي , بس يعني الكحل احلى من العمى.
بس الله فرجها عليي اليوم و بلشت القناة السلوفينية (تنبيه للمشاهدين بسورية) بنقل هالمباريات النهائية و ما عطيت بسطي لحدا و انا عمشوف هالمبارة و خصوصي انه فريق دالاس مافريكس حقق فوزه الاول على فريق ميامي هيت بنتيجة 90 - 80.
ماذا عن المبارة:
الملعب هو ملعب دالاس
كان اللقاء متكافئا جدا حتى لحضاته الأخيرة مع تفوق ميامي في الربع الأول بتألق نجمه D.wade و العملاق شاكيل اونيل.
بينما تفوق فريق دالاس في جميع مراحل المباراة المتبقية.
اليوم لم يكن يوم اللماني نوفتسكي من ناحية التسجيل 16 نقطة لكنه تميز بالدور الدفاعي و التقاط الكرات المرتدة.
و تألق من صفوف دالاس جيسون تيري مع 32 نقطة.
و هنا جدول نتائج اللقاءات
Posted by: a_aroush
ما أسرعك إيمت لحقت تكتب كل هالكلام .. لسا هلأ خلصت المبارة .
مبروك يا سيدنا فوز دالاس .. إذا لهالدرجة بتحبه .. بس يعني ليه هالمحبة لديرك نيفتسكي بالذات .. كل هاللعيبة اللي بال NBA ما عجبك غيرو .. مع أنه في أحسن منه كثير مرقو و لساهن من سنة ال 98 لهلأ .. شو يعني ألماني بالقدم و السلة .
بعدين شو عاجبك فيه .. كان مثل الجاجة الخوثة اليوم مو عارف يلعب .
بس إذا ميامي فيها تخبّص لهالدرجة و ما تخسر غير بفارق 10 نقاط .. فيا ويلكن لو لعبو لعب أحسن من هالأداء الليلة ... يعني عملو بيطلع شي عشرين Turn over و ما جابو غير 3 من 17 ضربة فاول .. و مع هالشيء ما خسرو غير بهالفارق .. بتظن رح يخبصو لهالدرجة المرة الجاي ؟؟؟ صعبة عليكن .
بعدين صحيح بعيد السنة عن السلة بس بعرف أنو شكيل كبر بس بيضل أثره عاللعبة أد ثلاث نفيتسكي .. و طالما شفت اليوم الصورة يمكن أخذت فكرة شو ممكن يعمل .. بدو ثلاث لعيبة ما شغلتهن غيرو يحرسوه .. و هاذ اللي بيفضي باقي اللعيبة .. مين بالك اللي خلا wade يقدر يسجل بهالطريقة لولا أن ثلاث من الفريق الثاني عينهن بس على أونيل .
على كل لا تفرح كثير .. مو كل مرة بتسلم الجرة .. و اليوم لولا أن فريقك يعمل فاول على أونيل كل ما استلم الطابة ما كانت النتيجة هيك .. بس بيعرفو انو مو شاطر بضربة الفاول .. و المصيبة روّح الكل ما عدا وحدة .. صحيح بعرفو سيء بس مو لهالدرجة .
يالله اليوم حظظتو ... يعني أول مرة بشوف واحد بيسجل أكثر من 80% من ضرباته مثل ما عمل لاعبكن Jason Terry بس هاذ تحظيظ عم تزبط معه .. صحيح هو مليح .. بس معدله 16 - 17 نقطة .. بس اليوم حظظ و جاب 32 ... يعني صابو مثل ضربة الجحش كول اليوم لحتى ربحتو ..
.
Posted by: hosam abdulaziz
انه انتى بس بتشوف الـ3 لعيبة حوالين اونيل و ما بتشوف الـ لعيبة اللي حوالين نوفتسكي و اللي لهالسبب غدر تيري يسجل هالكم من النقاط.
هي احدى مزايا فريق دالاس , عنا اربعة لعيبة ممكن يسجلوا فوق الثلاثين باي مبارة
نوفتسكي , تيري , هاورد , ستاك هوس.
و عسيرة الحظ , يعني نوفتسكي اذا كان مثل الجاجة بيحطله 25 نقطة و هو مغمض , بقا احمدوا ربكم اليوم فضت معه على 16 نقطة
انا ما رح احكي كثير عن نوفتسكي و رح خلي لغة الارقام تتلكم
Points Per Game
Free Throw Percentage
Posted by: a_aroush
طيب إذا بدك أرقام حسام شفلي وين اسم نويتسكي .. ووين اسم أونيل هون و أنت قرر ... مهلان بضربات الفاول .
شو ماني شايف اسم نويتسكي بينهن ... و هي السنة و أونيل عمره 34 سنة .. مانا عم نحكي على الفارق بينهم بتاريخ لعبهم ... إذا بتحب بحطلك هذيك الأرقام , بس حرام ما بدي خجلك أنت و نويتسكي .
Posted by: hosam abdulaziz
ما بعرف اذا عبد الله رح تسحب كلامك فيما قلت سابقا عن فريق دالاس و العملاق نوفتسكي بعد الفوز السهل و الكاسح الذي حققه فريق دالاس في المباراة الثانية التي جمعت الفريقين
و انتهت بفوز دالاس 99 - 85 مع 26 نقطة لللعملاق نوفتسكي كأفضل مسجل في المباراة.
عبد الله اذا تابعت المباراة رع تعرف منيح انه نوفتسكي هو لاعب مميز بكل المقاييس و آخر مهمة له هي تسجيل النقاط.
لأنه العقل المدبر في الفريق و مهيء الفرص الول و خلق الظروف الملائمة لزملائه بالتسجيل.
مفاجئة المباراة هي اكتفاء شاكيل اونيل بتسجيل 5 نقاط فقط!!!!!!!!!
بينما نوفتسكي حسب احصائية التلفزيون فهون سجل اكثر من 20 نقطة في 45 مباراة من اصل الـ47 مباراة الأخيرة التي لعبها.
عبد الله لدي بعض السئلة و لا اعرف هل بامكانك الأجابة عليها
بالنسبة للملعب الذي تجري عليه المبارة Amirican Airlenes Center هل هو ملك الفريق ام انه ملك لشركة اخرى و يستأجره النادي لأجراء مبارياته فيه.
لاحظت ان عدد الحكام في المبارة ضمن الملعب اكثر من 2 , فهناك حكام تبقى دائما خلف السلة و تشارك بالقرارات ؟؟ هل هذا امر قديم ام حديث العهد.
بالنسبة للمهرجان في المباراة و الاستعراضات والفقرات و طريقة دخول الاعبين
هل يحدث نفس الأمر في كل مباريات الـ NBA ام فقط في البلاي اوف او تحديدا المباراة النهائية.
و اخيرا لا يمكنني الا ان اتمنى ان اشاهد يوما هكذا مبارة على ارض الواقع لأنها بجد اشبه بكرنفال او احتفال منظم الى ابعد الحدود .
نتائج الفريقين
Posted by: a_aroush
مبروك يا عمي و عقبال عند الكأس .. ما حضرت المباراة حسام كان عنا سهرة مبارح .. بس إذا قدرتو تخلو شاكيل ما يسجل غير خمس نقاط فهذا الحقيقة دفاع ممتاز .
بعدين ما شككت بقدرات نويتسكي .. بس حبيت نكرزك شوي 
.
بالنسبة لسؤالك عن الملعب .. عادة بيكون من ملك المدينة اللي هو فيها .. و الفريق بيستأجر الملعب مقابل أجر معين ... و بيكون أكثر من فريق بيلعب فيه مثل ما بيحصل هون بلوس أنجلوس بملعب Staples Center.. حيث بيلعب فيه كل من فريق ال Clippers و ال Lakers و فريق الهاكي و اسمة LA Kings .. و فريق السلة للسيدات LA Sparks أو حتى يمكن استعماله أيضاً لل Figure Skating أو الرقص الفني عالجليد .. و أيضاً بيصلح يكون مسرح للحفلات .. فمثلاً لو لحقت حالك ممكن ناخذك معنا على حفلة شكيرة بملعب Staples Center ب 15 آب .
أما عن التحكيم بهالطريقة فهو قديم جداً , و حقيقة ما بعرف تماماً من ايمت كان هيك , و لكن باعرف من حضور مباريات قديمة على التلفزيون , كنت شوف أن هالطريقة كانت متبعة من قديم كمان ... و حتى هلأ بيكون في لجنة تحكيم أو مراقبة على طرف الملعب .. بيرجعولها ليتأكدوا لو أن الكره ضربها اللاعب قبل ما يخلص الوقت أم لاء .. و هالشيء ما كان متبع من قبل سنتين أو ثلاث ... بحيث أنهم بيرجعوا للشريط المسجل و بيشوفوا عالكاميرا .. لو أن الطابة فارقت يد اللاعب قبل ما ينتهي الوقت ام لاء .. فلو غادرت ايده قبل ما يقلب التوقيت على الصفر فرح تحسب النقاط .. أما اذا كانت لساها بايده لما بتقلب صفر .. بيلغوها .
و على كل نشالله بتصير قريب على حارتنا و منعزمك على مباراة بهالملعب .. أو بملعب بكندا .. مع فريق Toranto .
Posted by: hosam abdulaziz
شكرا عبد الله عالمعلوامات التي قدمتلنا اياها و انشاء الله يجي يوم نحظرلنا شي مباراة سوى و ليش لاء بين دالاس مافريكس و لوس انجلوس ليكرز.
بالنسبة للجولة الثالثة و التي جرت على ملعب ميامي هيت.
و انتهت بشق النفس و بالثواني الأخيرة بفوز فريق ميامي هيت بنتيجة 98-96
رغم ان فريق دالاس كان اقرب للفوز من خلال تقدمه في مراحل الربع الأخير بفارق 12 نقطة.
عموما و مع هذا الفوز لميامي لكن جميع المؤشرات تقول ان فريق دالاس سيفوز حتما باللقب
و ذلك للأسباب التالية:
ان فريق ميامي استطاع الفوز بسبب تألق نجمه D.wade و الذي سجل 42 نقطة
و من يتابع كرة السلة يعرف ان تكرار هذا الأمر هو امر اشبه بالمستحيل منمباراة لأخرى.
السبب الثاني هو اتكال فريق ميامي على لاعبيه الساسيين فقط و اي تعثر لهم يعني عدم تسجيل النقاط
بينما فريق دالاس يعتمد بشكل كبير على الأحتياطيين Bench Players و هذه نقطة ايجابية لمصلحته
فمثلا في هذ اللقاء سجل احتياطيي دالاس 25 نقطة مقابل 2 نقطة لأحتياطيي ميامي.
و السبب الأخي هو افضلية اللقاءات لدالاس على ملعبه عن فريق ميامي.
لكن ما اعنيه اخيرا ان فريق دالاس هو اقوى بشكل واضح من فريق ميامي و الدليل على ذلك الفوزين السهلين لفريق دالاس بأول لقائين , مقابل فوز كان اقرب للخسارة لفريق ميامي.
بكل الأحوال لننتظر المباراة القادمة و التي سيكون لها دورا كبيرا في حسم نتيجة البطولة.
Posted by: hosam abdulaziz
اكتسح فريق ميامي هيت ضيفه فريق دالاس مافريكس في اللقاء الرابع الذي جمع بينهما و بالتالي ادرك التعادل في محصلة اللقاء بين الفريقين 2-2
الفوز كان سهلا و بفارق كبير 98-74 و ذلك بسبب ابتعاد جميع اعضاء فريق دالاس عن مستواهم المعروف بالتهديف , مقابل تالق معضم لاعبي ميامي و خصوصا النجم D.wade الذي سجل 36 نقطة من نقاط فريقه.
هذا الفوز اعاد خلط الأوراق بقوة حول هوية الفريق الذي سيحرز اللقب و سيكون للمبارة القادمة الدور الأكبر في تحديد الفائز و التي ستجري في ملعب ميامي ايضا.
حظر اللقاء العديد من مشاهير العالم لكن اكثر من لفت نظري الحسناء الروسية لاعبة التنس الشهيرة آنّا كورنيكوفا و التي كانت برفقة المغني الشهير انريكيه اجلاسيس , و لا اعرف ما سر هذا التواجد سوية ؟؟؟ ربما هناك علاقة جديدة او قديمة بينهما.
اما محصلة اللقاءات فكانت بالشكل التالي:
Posted by: a_aroush
والله صار خطورة عليكن يا حسام ... هيك العالم بتخسر !!!؟؟ يعني بعشر نقاط فرق معقول .. ب 14 معقول .. أمّا ب 24 نقطة ول ول ول .
هذول الألمان خال شغل نعنعة .. مو خرج سبع لعبات ورا بعض هيك .. ما شفت شلون مثل الجاجة الخوثة كان مبارح نويتسكي .. من 16 ضربة جاب ضربتين و بالحظ .. يعني أضرب من فريق القدم مع بولونيا من يومين .. من 30 ضربة عالكول لجابو كول .
فبرأيي غير اتجاهاتك و شجع ميامي .. لأن نضل فريقن مثل ما لعب مبارح رح يتبهذلوا .. و تتبهذل انت معهن .
Posted by: hosam abdulaziz
عمي عبد الله بالعكس الألمان معروف عنهم انهم ما بيستسلموا حتى الثانية الأخيرة من اي مواجهة.
هلق اذا بتذكر بنهائي كاس العالم 1998 وقت فرنسا فتفتت البرازيليين بثلاثة اهداف مقابل لا شيء.
وقتها صار عشاق البرازيل يختلقوا قصص و اقاويل و فرضيات حول مؤامرة احكيت عالبرازيل و سببت هالخسارة(طول عمركم هيك ما عندكم روح رياضية لتقبل الخسارة)
المهم احدى هالفرضيات انه قال شو حطوا مثل سم بطعام الفريق البرازيلي ادى الى فقدان اللاعبين البرازيليين للياقتهم و تركيزهم و صاروا عقولتك مثل الجاج الاخوث.
و هلق رح اعزي خسارة دالاس بهالطريقة الى شي من هالقبيل , فيا اما مشربينهم شي مخدر افقدهم التركيز.
او انه زارعين كثير هالبنات الحلوين بالصالة امثال كورنيكوفا , و هالشي خلى اللعيبة تفقد تركيزها باللعب.
بكل الأحوال نحن الألمان بنخلص بحبنا لفرقنا وكل ما يتفرع عنها , و انا مع دالاس للنهاية و لو خسرنا بفارق 50 نقطة.
هلق النتيجة تعادل اذا بتحب تدخل معي بتحدي انا جاهز , من عزيمة لعزيمة بسورية بس الله يجمعنا هنيك بالشير او اي مطعم بالوادي, شو رأيك ؟؟؟
و يكون بعلمك اللعبة الجاي النا رح تكون بنص ارض ميامي .
We are the champions
Posted by: a_aroush
طيب فريق السلّة كان مشربينو شيء بميامي عأساس مو عم يلعب على أرضه .. طيب فريق القدم شو مشربينو بدي اعرف .. هي اللعبات كلها على أرضه و بين جمهوره !!؟؟ عشر ضربات لكن عالكول و الكول فاضي و ما يجيبو منهن ولا كول غير للآخر ... بالدقيقة 47 من الشوط الثاني يعني بالوقت الإضافي .. يعني يمكن بالآخر صارت مثل ضربة الجحش جات كول .
و بعدين شو هالحجج هي .. بربك هي حجج .. إذا الكول و كل كبره من جنبه ما عم يشوفو .. بدك تقلي نويتسكي أخوهن كان يشوف الحلوات و هني عالمدرّج .
أما عن الرّهان أنا رح راهنك على لعبة الجاي , طالما واثق لهالدرجة رح تربحوا .. فشو رأيك ؟؟.
البطولة براهنك عليها بس يربحوا ميامي اللعبة الجاي 
.
Posted by: hosam abdulaziz
اقتباس:
|
أما عن الرّهان أنا رح راهنك على لعبة الجاي , طالما واثق لهالدرجة رح تربحوا .. فشو رأيك ؟؟
|
طيب رح راهنك عاللعبة الجاي اول شي
اذا ربح ميامي رح شيل الصورة اللي بتطلع حد اسمي بالمنتدى و حط علم البرازيل بدالها لينتهي المونديال.
و اذا ربح دالاس رح تحطلي حد اسمك علم المانيا من اليوم لينتهي المونديال
و بعدها انا قبلان شارط مجددا عالبطولة بغض النظر عن شو رح تكون النتيجة , بس بعرفك ر ح تنسحب اذا فاز دالاس , لأنه ثقتك بالفريق مهزوزة و ما رح تاخذ المغامرة بالفوز مرتين بملعب دالاس.(هذا اللي بيشجع البرازيل بتصير ثقته مهزوزه بكل الفرق اللي بيشجعها) اما المشجع الألماني فعالموت بيكون مع فريقه و اي فريق فيه دم الماني.
ناطر ردك قبل انتهاء اللقاء اليوم.
Posted by: hosam abdulaziz
في مباراة ماراثونية احتجت الى التمديد , استطاع فريق ميامي هيت الفوز في ملعبه على فريق دالاس مافريكس و التقدم 3-2 بمجموع اللقاءات
المباراة كانت رائعة ة متقاربة المستوى و لم يستطع اي فريق ان يصنع فارقا واضحا مع الآخر , كل فريق كان بامكانه الفوز.
اهدر فري دالاس الفرصة في الوقت الأصلي عبر اخفاق تيري بالتسجيل عندما كانت النتيجة التعادل.
و ايضا كان متقدما في الوقت الأضافي بنقطة قبل 9 ثواني من النهاية لكن ابداع D.wade و توفقه في التسجيل هذه الليلة اعطاه خطا و سجل منه سلتين كانتا كافييتين للتقدم بنقطة و الفوز 101-100
الغريب في المباراة هو حرمان نجم دالاس مافريكس Stukhouse من المشاركة باللقاء بسبب الخطا القاسي flagrant foul الذي ارتكبه على شاكيل اونيل في اللقاء الرابع !!!!!!!!!! و ربما لعب هذا الأمر دورا في خسارة فري دالاس , حيث اضطر المدرب للاستعانة بلاعبين لم نعتد مشاهدتهم لمدة طويلة في اللقاءات السابقة.
اللقائين القادمين سيكونان على ارض دالاس ؟؟؟ فهل سيفعلها ميامي و يحقق فوزا خارج ارضه ..؟؟ ام سيستعيد دالاس توازنه و يفوز في ملعبه باللقائين القادمين ؟؟؟
لننتظر لقائي الثلاثاء و الخميس القادمين.
Posted by: a_aroush
في عالم ما اعترفوا بخسارة ثانية غير المباراة .. صحيح حسام ما كنت فاضيلك هالكم يوم .. بس لا تفكر تملص من الشرط إذا ماني هون .
و شوفوا الحجج عاد .. قال بيحكي على جمهور البرازيل قال .. و قال نحنا اللي منخلق حجج .ز و صار يجبلي شواهد شي من مدري اي سنة .. و شي بشهادة عالم ميتين .
المهم هلأ خسرت أول شرط .. و كمان معه لازم تحط علم البرازيل بحد اسمك .
شو بتحب الشرط يكون عالبطولة هلأ .. سهرة و أمنا عليها ..و علم البرازيل لازم ترفعوا .. خيوه نموفق عالشرط معك مباريتين قبل ما توافق و أنا موافق عالشرط حتى لو ربحتوا مبارة رقم 6 .
خيوه إذا ربحتوا البطولة .. رح أعزمك على شلالات نياغرا .. شو رأيك . أما إذا خسرت أنت .. بتصير تكتب كل يوم مقالة مدح بالبرازيل و ذم بالألمان . 
بس بدي شوف علم البرازيل حد اسمك بكرى اعرف انك بتتشارط بالقبل
Posted by: a_aroush
رح حط الخبر بدالك حسام ... حرام شايفك بالموقع و ما الك قلب تكتب آخر خبر 
فاز منذ قليل فريق ميامي في بطولة كرة السلة للمحترفين أو ال NBA في الولايات المتحدة متغلباً على فريق دالاس مافريكس بنتيجة 95-92 , متغلباً عليهم أربعة مباريات متتالية ليربح البطولة باربع مباريات مقابل اثنتين .
مبروك لميامي .. لشكيل أونيل .. و أكثر شيء أنا مبسوط للاعب الكبير غيري بيتن الذي أصبح على أبواب الاعتزال دون الحصول على لقب البطولة .. لكن تحقق له اليوم ما حرم منه منذ سنتين عندما التحق بفريق الليكرز متأملاً الحصول على هذا اللقب.. و لكن سرق منه هذا الحلم فريق ديترويت بيستن عندما تغلب على فريق الليكرز في نهائيات 2004
و مبروك للمدرب الكبير بات رايلي هذا الكاس الذي حرم منه لسنين طويلة بعد أن ترك فريق الليكرز
و تعازينا للأخ حسام و نشالله خيرها بغيرها و لا تيأس .. معليش يمكن هي الخسارة جات لتهيأك نفسياً أو مازة لخسارة الألمان بكرة القدم كمان .. جهزلي أحلى علم برازيلي و شلي صورتك من حد اسمك و علق العلم البرازيلي لشوف يا حباب يالله بطل انت .. و بوعدك ما بهذلك كثير بس ترفع العلم البرازيلي رح مرقلك الموضوع عالسكت بيجوز ما حدا ينتبه
Shaquille O'Neal and Dwyane Wade
Posted by: hosam abdulaziz
الف مبروك الفوز لفريق ميامي هيت (مو طالعة من قلبي) باللقب اللي كان اقرب الى فريق دالاس و ربما و اكثر من يستق نظرا لأعتماده اللعب الجماعي , و ليس كفريق ميامي يعتمد على لاعب واحد
سبق و من اول مباراة قلتلك انننننننننننننننننننمي بدون dwade ما بيسوا شي , بس ما قبلت الفكرة.
و ما بعرف اذا حضرت اللقاءات اللي فاز فيها ميامي و قبلت انه السبب هو لاعب واحد و ليس اكثر.
امغا عن الشرط اللي حيكنا الحقيقة ما فكرتك هالقد ذكي و فهيم , قال شو!!!!!!!!!
بينطر لحتى تنتهي المباراة و بعدين بيعتبر حاله انه موافق عليه و لازم يتطبق شوف انا شو كتبتلك ضمن مشاركة الشرط
اقتباس:
|
ناطر ردك قبل انتهاء اللقاء اليوم
|
يعني انا ناطر موافقتك عالشرط قبل معرفة النتيجة و ليس ثاني يوم بعد ان حسم اللقاء !!!!!!
الحقيقة ما مرق عليي , بعد اساليب حتالة بهالطريقة هي , بس طبعا هالشي بدم كل واحد بيشجع البرازيل.
لهيك الشرط الأول بيعتبر ملغي مجرد ما عطيت موافقتك عليه قبل انتهاء اللقاء , اما الشرط الثاني انا ملتزم فيه , و بس الله جمعنا الك عليي عزيمة.
بشكرك عبد الله على متابعتك للبطولة معي في نهاياتها
و الشكر الأكبر لأنك تجابنت بقبول الشرط الأول و هيك ريحتني من حط هم كبير بحد اسمي , كان رح يعملي رفع ضغط طول البطولة مع علم ما بشتهي طلع فيه , وكيف لو كان حد اسمي , اي و الله اسهمي بتنخفض بالمرة.
على كل انا مع الألمان للثانية الأخيرة و ضد البرازيل و مع اي فريق بتلعب ضده ان كانت المانيا او القرود السود.
Hard luck Dallas Mavericks we will do it next year
Posted by: a_aroush
حسام خليك مثل الرجال و تحمّل الخسارة ما تعملي كاني ماني ... بلشت تعمل حجج لما تسوي الشرط .
أنت كنت واثق أنكن رح تربحوا اللعبة رقم خمسة و طلبت مني شارك و بدليل أني وافقت هون . و هيك كان الكلام .
حسام :
اقتباس:
|
هلق النتيجة تعادل اذا بتحب تدخل معي بتحدي انا جاهز
|
عبدالله :
اقتباس:
|
أما عن الرّهان أنا رح راهنك على لعبة الجاي , طالما واثق لهالدرجة رح تربحوا
|
و هون أنت حددت الشرط :
حسام :
اقتباس:
اذا ربح ميامي رح شيل الصورة اللي بتطلع حد اسمي بالمنتدى و حط علم البرازيل بدالها لينتهي المونديال.
و اذا ربح دالاس رح تحطلي حد اسمك علم المانيا من اليوم لينتهي المونديال
|
ليه هاللف و الدوران .. حط علم البرازيل حد اسمك و كون مثل الزلم هيك .. اللي بيكونوا أد كلمتهن .. يالله شطور .
أما هذا الاقتباس اللي حاططلي ياه : ( ناطر ردك قبل انتها اللقاء ) ما بتمرق على حدا .. كلنا منعرف أنك فيك تضيف كتبه على الموضوع أي وقت كان .
و الموضوع الأساسي عندي نسخته مبارح حتى ما تغير فيه شيء .. لأني توقعتك تسوي هيك .. و صار مثل ما توقعت . .. و هالجملة هي مو موجودة من قبل .
شوف رح كون سهل معك إذا بتنفذ الشرط .. بيجوز أعفيك منو بعد كم يوم و ما خليك تحمل علم البرازيل لآخر المونديال . يالله حباب
Posted by: hosam abdulaziz
عبد الله شو جاي تاكل بعقلي حلاوة؟؟؟؟؟
انا بعترف اني حطيت الشرط و موافق عليه , بس شو بيظمنلي انك سلفا انت موافق عليه؟؟؟؟
بيجوز عندك حط العلم الألماني بجانب اسمك هو بيتجاوز الخطوط الحمراء اللي بتسمح فيها؟؟؟ لهيك كان مفروض انتظر موافقتك.
ذكرتني وقت كنا ولاد زغار و اذا عملنا شي شغلة غلط , بنقلهم لأهلنا اي فلان قلي سوي هيك , بيكون جوابهم انه اذا قلك زت حالك بالجب , بتزت حالك ؟؟؟
و هلق انا بدي اسألك نفس الشي ؟؟؟؟
هلق اكتشف صفة جديدة بمشجعين البرازيل و هي شهادات الزور
اقتباس:
أما هذا الاقتباس اللي حاططلي ياه : ( ناطر ردك قبل انتها اللقاء ) ما بتمرق على حدا .. كلنا منعرف أنك فيك تضيف كتبه على الموضوع أي وقت كان .
و الموضوع الأساسي عندي نسخته مبارح حتى ما تغير فيه شيء .. لأني توقعتك تسوي هيك .. و صار مثل ما توقعت . .. و هالجملة هي مو موجودة من قبل .
|
ولك عمي نحن مشجعين المانيا كلمتنا كلمة و ما بنقبل عحالنا نستخدم هيك اساليب
لهيك بتحداك انه يكون عندك نسخة حقيقية للموضوع بدون الجملة المذكورة.
و انا هلق جاهز ادخل معك بأي تحدي بالمونديال عنتائج المانيا و البرازيل و اذا جاهز انت و غيرك خلينا نفتح موضوع تحديات المونديال بلكي بيحب حدا يشترك معنا.
بس ما تعملي مثل برامج التوتي فروتي , كل ما خسرتني مرة بتشلحني قطعة 
موقع زيدل سوريا حمص
..
خدمات تشات و
دردشة ...
أرشيف المنتدى
vBulletin Copyright ©2000 - 2008,
Jelsoft Enterprises Limited.
vB Easy Archive Final ©2000 - 2008
- Created by Stefan "Xenon" Kaeser
