الارشيف - مبروك للبنان ...وعقبال مانقول ...مبروك لسوريا

Pages: 1

مبروك للبنان ...وعقبال مانقول ...مبروك لسوريا
(انقر هنا ان احببت مشاهدة الموضوع الاصلي بالالوان و الصور )

Posted by: Desert rose

شعيا يغرس العلم على الافرست

الياس يوسف من بيروت: حقق بطل الدراجات ومتسلق الجبال اللبناني ماكسيم شعيا انجازا تاريخيا عندما وصل الى قمة جبل ايفيرست،الأعلى في العالم في جبال هيملايا على حدود نيبال والتيبت في الصين والبالغ ارتفاعها 8848 مترا، وذلك بعد رحلة تسلق استغرقت سبعة أيام.

وثبت شعيا العلم اللبناني على القمة، عند الساعة 5:50 صباح الاثنين الماضي 15 أيار( مايو) 2006. وكان أمضى أسابيع في التحضير والتأقلم على منحدرات الجبل ما بين 5000 و7000 متر، وترك معسكره المتقدم على ارتفاع 6555 مترا الاربعاء 10 أيار( مايو) وباشر المرحلة الاخيرة من صعوده، أملا في بلوغ القمة في الساعات الاولى من صباح الأحد، لكن رياحا شديدة سرعتها 80 كيلومترا في الساعة اضطرته وفريقه الى المبيت ليلة أخرى في المعسكر الرقم 2 على ارتفاع 7900 متر. ويوم الاحد 14 منه وصل الى المعسكر الرقم 4 على ارتفاع 8400 متر وارتاح بضع ساعات. وقبيل منتصف الليل بدأ الفريق الرحلة الى القمة، فوصل اليها مع شروق الشمس.

وفي اتصال بمالك "بنك عودة" ، ريمون عودة،شكر شعيا لهما تمويل الرحلة ومساعدته في تحقيق حلمه ، وقال إنه كان فخورا بأن يغرس العلم اللبناني على أعلى قمة في العالم تحية للبنان وللشعب اللبناني. كذلك أعلنت رئاسة الجمهورية انه اتصل برئيس الجمهورية وابلغ اليه انه غرس العلم اللبناني على قمة ايفيرست، فهنأه إميل لحود وحدد له موعداً لتكريمه عقب عودته.

ويحضر اصدقاء شعيا وأسرته لاستقباله لدى عودته الى لبنان بعد أيام.

تحية للعلم اللبناني وتحية كبير لمكسيم شعيا

مادفعني لنقل هذا الخبر هو تمنياتي للعلم السوري أن يجاور العلم اللبناني في يوم من الأيام فيُثبت من قبل أحد الرياضيين السوريين أيضاً على قمة إيفرست

الغيرة بهيك أمور مش غلط ..............أما التساؤل فهوي :

ليه دائماً لبنان البلد السباق بالإبداع بالرغم من الظروف القاسية والصعبة اللي مرق فيها وبعدو عم يمر ؟

مبروك للبنان .........وعقبال مانقول ...........مبروك لسوريا

يمكن سيمون بيهموا الخبر

زهرة الصحراء

Posted by: سيمون برصون

انا حاسس بشوي وجع ظهر و سناء عم توصف لي النومة على الصوفا شي كم يوم و على الاغلب اسمع النصيحة

مبروك للبناني مكسيم شعيا و للبنان الشعب

العُنفُوان مِلْكٌ لمن يَصْنَعهُ

أما عن
ليه دائماً لبنان البلد السباق بالإبداع

الجواب سهل

لأن أصله سوري

Posted by: Desert rose

يمكن من مصلحتك ياعزيزي ولكن مش من مصلحة سوريا أكيد تقول لأن لبنان أصلوا سوري هالشي كان السبب في إبداع اللبنانين .
كتير صعب ياسيمون وقت التلميذ بيتفوق على أستاذوا والتفوق إن حصل فبيكون دائماً الفضل للتلميذ أولاً وبعدين للأستاذ ومش رح ضيف أكتر بيكفي

شو أستاذ زياد ....ماتزعل مني !!!!..بيصير معك هيك شي

؟؟؟؟

ماتطول بالنومة سيمون ....مامنقدر على فراقك أنتَ محسوب عاللبنانية

وألف سلامة لظهرك .

دخلك مطول عنا ؟؟؟

زهرة الصحراء

Posted by: hosam abdulaziz

ما بعرف ليش مكبرة القصة يا سناء , اذا كل ما واحد تعشبق عالحيط بدنا نعمله طنة و رنة نقلده الأوسمة فشو خلينا لكن للي عميفيدوا البشرية بشي ؟؟؟
يعني دخلك شو استفاد لبنان من زرع هالعلم على قمة افرست ؟؟؟
يعني لو صاحبنا مسخر وقته ليلف بالعالم و يجمع شوية تبرعات لهالفقراء و المحتاجين بلبنان ما كان احسن.
عسيرة زرع العلم اللبناني
كان في نكثة بالمنتدى حول هيفاء وهبة و العلم اللبناني بس للأسف دورت عليها و ما لقيتها ؟؟؟

Posted by: عـــون

اولاً مبرووووك للبنان وللعرب جميعاً

اقتباس:

ليه دائماً لبنان البلد السباق بالإبداع بالرغم من الظروف القاسية والصعبة اللي مرق فيها وبعدو عم يمر ؟

لأن الشعب الذي يريد الحياة سيبقى نبضه حياً لا يموت فيه الابداع والرغبة المستمرة في التجديد والتحديث
بالعربي لأن الشعب اللبناني شعب حي ويستحق الحياة

Posted by: Desert rose

رح يطبق علينا المثل ياحسام بيضلوا يتناقروا متل الديك والدجاجة .
مش غلط أنو نتناقر بشرط أنو اللي عم يناقر بالتاني يكون صاحب حق طيب شوف
أقتبست من تعقيبك هالجملة :

اقتباس:

المشاركة الأصلية كتبت بواسطة حسام

يعني لو صاحبنا مسخر وقته ليلف بالعالم و يجمع شوية تبرعات لهالفقراء و المحتاجين بلبنان ما كان احسن.

طيب إذا صاحبنا سخر وقتوا ليلف العالم ليجمع شوية تبرعات لها الفقراء مين بدو يتعمشق ليرفع العلم اللبناني على قمة إيفرست .
مابتنلام ياحسام يعني لو شي عداء أو رياضي سوري رفع العلم السوري على قمة هالجبل
_ كنتوا زمرتواااو طبلتوووووا بالعالم كلوا .
_وطَلّعتوووووا عالأخبار شي مية مرة باليوم .
_وكل يوم نتعلوووووا خطاب عن فضل سورية بوصولوا لقمة إيفرست
_وصار كل يوم يعمل مهرجان ليخبر هالشعب عن أول دعسة لآخر دعسة بها الجبل .
_والمدارس رح تكرمووووا بيوم عطلة حتى ولاد المدارس يزقفولوووا بقوة
_والله يستر ماتعملووووا شي مسيرة شعبية
وترفعوووووووووا على الكتاف .............ومتل العادة تبلشوا بالهتاف (( بالروح بالدم نفديك يا XXXXXمن الناس ))
ياعمي قولوا مبروك يه يه يه يه هيدا العلم اللبناني مش العلم الأميركي

العزيز عون شكرا جزيلاً للرد أُحيّ فيك إحترامك وتقديرك للشعب اللبناني

زهرة الصحراء

Posted by: syrian eagle

تحية للجميع:

أنا أؤيد الأخ حسام في كل ما قاله و ما هي الفائدة من هذا الإنجاز الخلبي و هو انجاز فردي لهاو و لا يجسد هذا العمل الفردي أي أهمية . و لا يهمنا منه شيء , و إن اللبنانيين يحبون هذه الإنجازات الفارغة و لا ننسى كم تغنوا بزيارة إليسا إلى هوليود أو مشاركة ملكة جمالهم في بولندا أو أو أو ......

و لا نرضى أبدا أن نقول بأننا نتمنى أن تلحق سوريا بلبنان لأننا السباقون دائما , و لم أرى أحد يتذكر رائد الفضاء السوري محمد فارس الذي كان أول رائد فضاء عربي يدور حول الأرض و يصعد للفضاء و يحمل العلم السوري إلى الفضاء الخارجي الذي يعلو قمة إفرست بألاف الكيلو مترات و جاء صعوده تتويجا لجهود مركز البحوث العلمية السوري و علمائه.

على أي حال يحق للبنانيين الذين يعيشون خنقة الطائفية و التوترات السياسية أن بروا في هذا الإنجاز البسيط فسحة للتنفس و الترويح عن النفس و نتمنى لهم مزيدا من النجاحات في هذه الميادين الدعائية و الترفيهية و الاستعراضية .

Posted by: Desert rose

C'est la vie

بالعربي ((هذه هي الحياة ))

تختلف وجهات النظر من شخص لآخر فماقد نراه نحن إنجاز قد يراه الآخر أمر تافه وسخيف تماماً كتلذذنا بنوع من الطعام لايحبه ذاك الآخر .
وتلعب المجاملة أحياناً دوراً مهماً في تقديرنا لمثل هذه الأمور فإما أن تأتي بإيجابية أم تحتوي البعض من السلبية
وهذه الأخرى يلعب على أوتارها فعل عنيد وشديد يدعى "فعل المحبة "
فأنت لاتستطيع مجاملة إنسان لاتحبه ولن تستطيع بعد اليوم محبته !!!!
وعلى مايبدو أن الأحداث الأخيرة التي عصفت بلبنان قد تركت في نفوس البعض أثراً سلبياً كبيراً فزرعت حقداً في قلوب وأفكار البعض للدرجة التي لم يعد باستطاعتهم قول كلمة مبروك للآخر
وأقول هنا على محمل المزح :

مش معقول تقول لجارك اللي ربنا رزقوا بمولود جديد حتى لو الحقد مالي قلبك

يلعن أبوك على أبو اللي خلفوك

حررررررررام مشان الولد

أهلا بنسر سوريا

زهرة الصحراء

Posted by: عـــون

اذا تــــــــــــــأملنا بهذه المقولة سنجدها في مكانها الصحيح حين يحين القول :

نعم فاقد الشئ لا يعطيه

مبروووك للبنان ولكل العرب ، وللانجاز هذا معنى واحد نستطيع ان نفهمه هو تعبير عن وجود لبنان وحياته لمن يدرك معنى التعبير كقيادة دراجة يلف فيها العالم ليعبر عن وجهة نظر او لفت انتباه وشكرا .

Posted by: syrian eagle

شكرا للآنسة زهرة الصحراء على الترحيب

وأما المشترك عون فلا أعرف ما الذي يقصده بفاقد الشيء لا يعطيه؟

و إذا لم تخني الذاكرة فأنت شخص من الأردن و قد تصادمنا في نقاش سابق

هل أنت محدوف إلى هذا الموقع السوري لكي تشعل المشاكل ؟ يا أخي مبروك عليك إنجاز اللبنانيين أصحابك و أنتظر منكم في الأردن إنجاز مماثل لأبارك لكم فيه , أو يمكن ليس عندكم وقت فأنتم مسخروون لمهمات قمع الفلسطينيين و تلفيق التهم لهم كما يأمر العم سام؟

الرجاء أن ترد فقط عل الأمور التي تعنى بها لتجنب المشاكل

Posted by: عـــون

ما شاء الله على ذاكرتك اه انا الي محذوف على الجنة الي حاسدني عليها
على فكره الفلسطينين اخوانا الله يعينهم على حالهم اول شئ

وهذا منتدى منتدى وارجو ان تعرف ما هو تعريف المنتدى اولا حيث انه لا يتطلع الى جنسية وفي لباقة بالرد ومبرووك للبنان وانا اردني وانت سوري شو الي مضايقك اذا ابارك للبنان واهلها جد شو الي مضايقك والا بتشتغل عالجنسية بس .
يا اخي بجد لو عرفت معنى منتدى كان اختصرت كثير كثير حكي وكلام ومره اخرى فاقد الشئ لا يعطيه وردك اكبر دليل

Posted by: سيمون برصون

الحقيقة المثل هو
الطبع غلب التتطبع
الامبريالية عم تعمل فرق تسد
و مكسيم صهيوني من الاسم مبين
نحنا العرب الاشاوس
رح نمنع الفساد و الخيانة لقضية الامة العادلة
الخائن شال علم لبنان العرب لاعلى قمة
و خذلنا
علامنا طول عمرها عالواطي
وهيك استعماري ما فشر ياخذ ها معه لاعلى من راس خيمتنا المجيدة

Posted by: Desert rose

اقتباس:

و مكسيم صهيوني من الاسم مبين

جربت فك رموز شو بتعني ياسيمون بأنو مكسيم من الإسم مبين صهيوني .
مش رح أطلب أي توضيح
رح أتركلك الحرية بتفسير المكتوب
وإلا إعذرني لو وقعت بسوء الفهم .
وتمنى على كل الأعضاء الأحباء تجنب أي إستفزاز من خلال التراشق بالكلام وبشكل عشوائي لأن غالباً هالشي بيخلي نهاية الموضوع مش هوي المطلوب .

زهرة الصحراء

Posted by: mariam

مسا الخير للجميع .......
ما بعرف ليش الله خالقنا هيك كل شي حلو بنحاول نقلبو ........طيب ما في مجال نستمتع شي مرة بحوار بعيد عن التجاذبات السياسية بمناسبة وغير مناسبة .....يعني ما في مجال نعطي حالنا فرصة انو ننسى شوي كل واحد منين ونكون لمرة وحدة اعضاء بمنتدى حلو يجمعنا ويخلينا شوي ننسى همومنا........حرام نعطي حالنا هيك فرص...............؟؟؟
الحقيقة لمن اي علم عربي بيرتفع باي محل هاذ فخر وشرف إلنا وما تعودنا بيوم نزعل لو فاز اي مواطن عربي باي لقب على الاقل هالشي بيذكر العالم انو في هون ناس عرب الهن بالحضارة موضع قدم ..........ومو المهم علم لبنان او الاردن او سوريا او مصر ياريت بيجي يوم وبيكون علمنا واحد............... يمكن حلمي بعيد شوي بس حتى الحلم اتركونا اياه لاتخلونا ننساه .......بتمنى تتركوا مواضيع اللي بتفرقنا عا جنب شوي.........اذا غلط بعض الاشخاص اللبنانيين مو لازم ننسى انو عنا ناس غلطت كمان وبالاردن ناس غلطت وبكل دولة عربية يمكن في ناس غلطوا.......بس مو لازم كلنا نغلط .............ولازم نتذكر انو في ناس بكل مكان لسا بيحلموا مثلي انو نخلص من قصة اسرائيل ومشاكلها وانو العالم يتركنا بحالنا شوي لنعيش .................؟؟؟؟؟؟؟؟؟؟؟؟؟؟؟؟؟؟
بتمنى تتركولي قصة انا لبناني وانت سوري وهاذ اردني والله النجاح حلو يعني لو كان شوماخر اردني او مصري او ليبي او.............شو يعني معقول ماننبسط لو ارتفع علم عربي ..........وهلق عندي رجاء اخير خلونا لو قرينا اسم نفكر نقرا شو كاتب ما نتوقع مهاترة ومشادة ونترك الموضوع كلكن اقلامكن حلوة خلونا نقرب من بعض ....خلونا نستمتع بحوار او مقال بدون ما تتوتر اعصابنا......
اهلا بعودة الشباب للكتابة وبتمنى نقرالهن مواضيع جديدة بس من دون مشادات كلامية ...........بالنتيجة كلنا عرب والغرب وامريكا بنظرهن نحنا ارهابيين ومتخلفين شو ما كان العلم المرفوع فلا تخلونا ندخل معهن بهالمتاهة عالاقل خلونا نشوف لبعضنا صورة جديدة......
وخلونا السياسة والسياسيين عا جنب الله يخليكن والله قلبنا مل

Posted by: سيلفانا خوري

نفسٌ في جسد ٍكنا ....وآسفاه كيف أصبحنا
في تنهير ٍ وتشهير........ باءت كل مقاصدنا
سوري لبناني اردني... وفي فلسطين مآتمنا
دم عربي في العرق......ينبض مازال وإن زلنا
رفعوا علماً على الإفرست أغرَقَنا في نقائضنا
أهناك أمل ٌ يرجى ...والخلاف أسمى شعائرنا
اليس عربي ٌ وصل.... وإن تطاحنت سياستنا
عربيٌ في منظار ِغرب ٍ...فلتعلوا عليهم هامتنا

سيلفانا

Posted by: angel

بحب ضم صوتي لصوت سناء والدكتورة مريم ... وإتمنى من الجميع الحفاظ على روح المحبة والإلفة اللي تأسس عليها المنتدى وتجنب أي كلام ممكن يسبب الحساسية أو الاستفزاز أو يحمل الاتهامات لأي عضو فيه... يعني الحقيقة صرت عم إحمل هم أي موضوع جديد عم ينفتح لأنو شو ما كان فحواه بالنهاية عم يتحور لمنحى ثاني ما كثير بسر .. وعم تكون النتيجة خسارة عضو من الأعضاء... واللي بيفتح على قائمة الأعضاء أو على المشاركات من بداية المنتدى بيكتشف كم عضو كان إلهم وجودهم المميز والفعال .. اختفوا الواحد بعد الثاني وغالبا" للسبب السابق.. وبالتالي انحرم منهم المنتدى وانحرمنا من اّرائهم وكتاباتهم ...ومن جهة ثانية منتدانا عم ينزار كل يوم بالمئات ومن كل الوطن العربي ومو حلوة بحقنا أبدا" يفوت الزائر على المنتدى (والمنتدى بيعني حوار والحوار دليل الحضارة ) ويلاقي شي بعيد كل البعد عن الحضارة...
بتمنى من الجميع رحابة الصدر وتقبل الاّخر وعدم أخذ المسائل بشكل شخصي واستغلال المواضيع لرد الاتهامات لبعض ... حرام منتدى زيدل مابيستاهل يصير هيك فيه..

Posted by: انطونيو

مبرووووووووووووك يا احلى بلد ( يا لبنان السعادة و الهناء ) والله شي بيرفع الراس

و عقبال بلدي الغالية سوريا

Posted by: h_yasor

مبروك لفوز لبنان وعقبال عند العرب جميعا ان الرياضه تعكس صوره طيبه عن البلد وتبادل المعرفه والسياحه

Posted by: h_yasor

ما اجمل هذه القصيده التى تهز المشاعر ومافيها معانى خارقه للعواطف وماستنا نحن الشعوب العربيه من عنصرى اشكرك جزيل الشكر على هذه الكلامات الرائعه ونرجو منك المزيد

Posted by: syria & joleat

يعني إحنا دائما بنقول ليش أمريكا أقوى منا ؟؟؟؟؟
الجواب فيك تلاقي بكل بساطة بس أقرأ هالموضوع والردود عليه وبتعرف ...
يا جماعة أحنا كلنا عرب و وقت ينرفع علم لبنان بينرفع علم كل العرب وأي بلد تانية هيك لكن شو اسمنا امة عربية واحدة...
إذا بدها اضل كلمتنا مو موحدة وبنختلف على ابسط الاشياء بعمرنا ماراح نصير الامة الاقوى
قال وأنا بقول ليش الغرب بياخود عنا فكرة غلط؟؟؟
بعدين مو المهم أنو اتسلق جبل ولا قشر بندوورة المهم أنو نجح بالشي يلي صمم عليه ويلي مستأل بهالشغلة يروح يورجينا شطارتو ويتسلق الجبل...
بعدين هالأمة شو بدها لحتى تنصلح ؟؟ أنو الزبال يكنس منيح والحلاق يحلق بضمير والسباح يسبح من قلبو والمتسلق يوصل لأعلى القمم ....
طالما كل واحد عرفان شغلتو ومشي حالو فيها بنكون احنا بالف خير ....
وفي كلمة عنجد لفتت انتباهي وقت قالت زهرة ( أنو هو رفع علم لبنان مو أمريكا )
والله أنو معك حق ليش انهزو وقت سمعو انو علم لبنان...؟؟؟
بالنسبة لاختلاف الجنسيات بهالمنتدى :
كل واحد ألو حق الافتخار ببلدو وجنسيتو بس هادا ما بيعني انو الباقي كخا ...

نسيت اهم شي بالرد انو قول مبروك للبنان وعقبال النجاح بكلشي

سلام _ ياسمين _

Posted by: Desert rose

ياهيك الأخبار يابلالالالا

من دقايق أعلنت شركة أوجيرو للإتصالات توحيد سعر الدقيقة الواحدة لكل أنحاء العالم فأصبحت 600 ليرة لبنانية خلال ساعات النهار و400 ليرة لبنانية خلال ساعات الليل .

خبر حلو ...وتخفيض محرز

يعني بينما كانت الدقيقة لأميركا 900 ليرة لبنانية أصبحت 600 ل.ل بالنهار و400 ل.ل بالليل
ولأوروبا من 750 ل.ل. لـــ 600 ل.ل والليل متل أميركا

600ل.ل= 19:5ل.س

400ل.ل=13 ل.س

لكل الأصدقاء دعوة للبنان العظيم وقت الحاجة للتخابر الدولي لكل أنحاء العالم (( إجرة الطريق عليكن والتخابر مجاني بس بالليل

))

زهرة الصحراء

موقع زيدل سوريا حمص .. خدمات تشات و دردشة ... أرشيف المنتدى