Pages: 1
لا تلبس النظارة وانت تتحدث بالهاتف الخليوي
(انقر هنا ان احببت مشاهدة الموضوع الاصلي بالالوان و الصور )
Posted by: سيلفانا خوري
أصبح الهاتف النقال في الآونة الأخيرة إحدى سمات ثورة الاتصالات و المعلومات، حتى من الضروريات التي لا يمكن الاستغناء عنها!
وفي المقابل انقسم الباحثون قسمين بشأن مخاطر النقال، فالبعض يحذر منه والبعض الآخر يقلل من شأن مخاطره، حتى أصبحت بحوثهم في نهاية المطاف لا يأبها بها أحد!!
غالب تلك المخاطر والتحذيرات تتحدث عن الإشعاعات وتأثيرها على الجسم وخصوصاً الرأس..
لكن العجيب أن يخرج إلينا من يحذر من خطر الهاتف النقال على مستخدمي النظارات الطبية أو الشمسية، فهم أكثر عرضة للخطر من غيرهم.
والعلة في ذلك: أن النظارات يحيط بها إطار خارجي من المعدن يعمل كمنظومة هوائية مع هوائي الهاتف النقال ويصدر من هذا الإطار مجالات مغناطيسية لها تأثير مباشر على شبكية العين، ويزيد من معدل امتصاصها لتلك الموجات الكهرومغناطيسية، مما يؤثر سلباً على النظر ويورث أمراض العين المختلفة.
أما الحل فهو بكل بساطة: أن تنزع النظارة أثناء المكالمات والتقليل من استخدامه إلا عند الضرورة او استخدم السماعه .
سيلفانا
Posted by: Nada1981
مرحبا جميعا
يعني يا سيلفانا معقول هيك؟ عنجد العلماء و الاطباء هدول يمكن ماعندهم شغلة يعملوها منشان هيك كل فترة بيطلعونا شغلة جديدة على الساحة. يعني يمكن تكون الشغلة جدية بس الموضوع كله على بعضه ماعم افهمه. 
تصوري واحد بيلبس نظارة و كان ماشي بلشارع و اجاه تلفون و شال النظارة و كان قدامه جوره و ماشافها؟؟!!!!
شكرا سيلفانا على الموضوع و خلص انا بطلت البس نظارة رح خليها عدسات لانه مافيني بلا الموبيل.
على فكرة: نسيت قلك انه اشتقلك كتير و كتير اشتهيتك معنا بسوريا 
تحياتي
ندى 
Posted by: a_aroush
أولاً بدي أشكر سيلفانا على المعلومة الجديدة , و ثاني شي رحب بندى الحمدالله عالسلامة .
و كالعادة ندى بترجع و بترجع معها خفة دمها , يعني مو ثقلان منوب بهالروحة عسورية , و لولا أنك سبقتيني بهالتساؤل ندى كنت رح اسأل نفس السؤال لسيلفانا , يعني لو الواحد بيلبس نظارات طبيات الأفضل ما يحمل موبايل منوب , و إلا يا أما بيصيبو موجات كهرمغناطيسية و بتنتزع عيونو بزيادة , يا أما بدو يشلحهن لما بيجيه مكالمة و بتنكسر رقبته بشي حادث ... فالأفضل خليه بلا تلفون .
طيب عرفنا شو لازم يسوي بالتلفون ليحمي عيونه سيلفانا , بس شو لازم يسوي بخطك , لأنه لو حاول يقراه رح ينتزعو عيونو عالآخر ... لا و الأحلى بس يقرا خط ندى .. ما رح يغود يعرف هو العطل من عيونه ولا من مين .. وحدة خطها ما مبين و الثانية لازم نبعد عن الشاشة .... يعني أكثر من مرة بدي قول لندى ليه بتكبر خطها هيك .. يعني شفتي شي مرة واحدة عمل يفتل راسه من اليمن لليسار ليقرا كلمة .. ؟؟ ههههههههههه . ولا بدك تعبي سطور عأساس .. و سيلفانا إذا خايفي على نظرنا كبري خطك شوي بس . 
.
معليش صبايا ما حبيت أقلب الموضوع مزح .. بس صرلي زمان حاصر هالكلمتين ببطني .. و لازم قلكن .
Posted by: سيلفانا خوري
ندى اهلا وسهلا وانا كمان اشتقتلك كتيييير
وصلتني كل أخبارك بسوريا وسمعت انك ما بطلتي شرب أركيلة ......
يعني بمعنى تاني رجعتي على هولندا مدمنة وصرت خايفة ماتقضي على كل الاحتياطي اللي عندك من التنباك بيعود بيصير لازمك روحة مرة تانية على سوريا للتموين
وبعدين شو قصتكم انتي وعبدالله
يعني شرط كل اللي بيلبسوا نضارات يكونوا عميان ..ويوقعوا من بعد اول مكالمة هاتفية يعني اللي بيوقع ما لانو اعمى ممكن يوقع لانو عميان على قلبوا لانوعشقان اومهموم او مديون الخ...يعني للوقوع اسباب كتيرة وما شرط تكون بس بسبب النضارة 
وعبدالله تبقى خبرنا اذا مشي حال الخط معك هلق من بعد التكبير .. حيرتنا شي كبير وشي صغير يمكن صار بدك شي فحص عيون مستعجل .
Posted by: faizdawod
شكرا سيلفانا خوري على هذه المعلومة...التي فسرت لي ما حدث معي منذ يومين..ولكن لا تضحكي على ما حدث لي.
كانت الساعة الثانية من بعد ظهر يوم الاثنين حيث ذهبت إلى مزين الشعر.عندما دخلت الصالون كان هناك اثنان ينتظران دورهم ولما كان وقتي قصير..وقفت عند الباب حيث هناك درجة واحدة للنزول إلى الصالون وقلت للمزين أن يعطيني رقم هاتفه الجوال لاتصل به في الرابعة وبينما أقوم بالتسجيل قال لي تفضل فقد أخذت لك الإذن من الموجودين ..وعندما هممت بالنزول ما أحسست بنفسي إلا وقد فقدت توازني وسقطت منبطحا على الأرض ولولا حلم الله لكنت في عداد المكسرين ولكن ربك لطف.( طبعا أنا ارتدي نظارات طبية ).
حياة أفضل هي شاغلنا الأكبر
Life is our life's work
Posted by: سيلفانا خوري
في الحقيقة شر البلية ما يضحك 
شكرا على مشاركتنا بهالحادثة الواقعية اللي صارت معك والحمدالله اجت سليمة.. ولو انو اخدنا الموضوع بالنكتة ... بس اكيد هالشي ما بيلغي
انها حقيقة علمية. وعلى حسب ما قرأت أن الموجات الكهرومغناطيسية ما بس بتأثر عالعيون وانما بتأثر عالمخ وتسبب في بعض الاحيان الدوار والصداع و بتعمل على تسخين الجسم والدم نظرا لأنها تصدر على شكل نبضات تشكل خطرا على الإنسان .
واكتشف فريق من الباحثين الألمان مؤخرا أن الاشخاص الذين يستخدمون النقال بانتظام
تتضاعف فرصة اصابتهم بسرطان العين ثلاث مرات، وكان العلماء قد اختبروا 118 مريضا ممن يعانون من الورم الخبيث وهو سرطان يصيب قزحية العين وقاعدة الشبكية لها ضمن
مجموعة مختارة تتكون من 475 فرداً، فوجدوا ان كل هؤلاء المصابين بسرطان العين هم ممن يستخدمون الهاتف النقال بكثافة عالية، وبينما ربطت الدراسة بين استخدام الهاتف الجوال وسرطان العين إلا ان رئيس فريق البحث حذر في افتتاحية البحث من ان الدراسة التي اجريت تعطي تقويما غير مكتمل نسبيا
لذلك تبقى الوقاية خير من العلاج ؟؟ على ما تنتهي هالابحاث وتعطي نتائج مؤكدة...
والوقاية هي عدم الرد على الهاتف المحمول عند رن الجرس مباشرة ، بل الانتظار قليلا ،وكذلك إبعاد الجهاز عن الجهة اليمنى للمخ ، وان لا يزيد زمن المكالمة على 6 دقائق فقط لحالات الضرورة القصوى .
Posted by: Desert rose
Posted by: faizdawod
مدام سناء اشكر لطفك..
بوجود أمثالك في موقع زيدل أحس دوما إنني احد أفراد عائلة هذا المنتدى الرائع وسبب غيابي ما هو إلا لضيق الوقت واعدك واعد جميع أعضاء وزوار موقع زيدل بالكتابة حين تسنح لي الفرصة.
أشكرك مرة ثانية والى اللقاء قريبا.
حياة أفضل هي شاغلنا الأكبر
Life is our life's work
موقع زيدل سوريا حمص
..
خدمات تشات و
دردشة ...
أرشيف المنتدى
vBulletin Copyright ©2000 - 2008,
Jelsoft Enterprises Limited.
vB Easy Archive Final ©2000 - 2008
- Created by Stefan "Xenon" Kaeser
