أنتوا المغتربين عظمكم ذهب أو أنا غلطانة

زهرة الصحراء

اني شخصيا عظمي مانو ذهب بالمرة والذهب كلو ماكثير بحبو . المهم ياجماعة سناء ماقصدها شي من هالموضوع غير تتعرف اكثر على طبيعة حياتنا هون بالغربة يعني باميركا باستراليا بالبرازيل او باي مكان بالعالم بس يمكن الباب اللي جتكن منو بميل للاستفزاز ولو ماكنت حاكية مع سناء بهالموضوع كانت ردة فعلي غير شكل.
مابعرف مين اللي خبركن انو المصاري هون منلاقيها عالطريق وبجوز كل اللي كتبتي يكون صح الا هالشغلي . وكمان صح انو معظم "ومو كل" الناس هون عندهن ستورات ونسبة كبيرة منهن رضيانين واللي بصرلو يحسن وضعو بستورات بعد ليش لاء , ليش حتى مايحسن الواحد وضعو . اما بالنسبة للستور فهوي عبارة عن محل زغير او ميني ماركت مبيعاتو عبارة عن دخان, بيرة, سيكار, لوتو اللي هوي مثل اليانصيب, شوية معلبات مع شوية اكلات طيبة للولاد الزغار, عصير وكولا وتوابعه, في ستورات بتبيع نبيت وكل ستور بيحوي بضاعة بتخص اهل المنطقة اللي موجود فيهي لانو لكل منطقة زباين بتختلف عن المناطق الثانية بس الشي المشترك بين كل الستورات انو اللي بفوتو عليها هني الطبقة المتدنية بالمجتمع ومن هون فيكن تتصورو الناس اللي منتعامل معهن شو طبيعتهن " اذا كان في عندهن طبيعة" . من ناحية الموبايلات فكل مين حسب قدرتو ويعني ماكثير الاسعار غالية لهالدرجة اللي بتتصوروها لانو في منافسة بين الشركات والجهاز بضل سعرو غالي كم شهر وبعدين بصير عادي وحتى بالسعر الاصلي كثير ناس فيها تشتري وفي ناس كثير مابتشتري اخر صرعات الموبايل حتى ولو كان عندها الامكانية لانو بكل بساطة الموبايل بالنسبة الهن هوي عبارة عن " حاجة" يعني مو شغلي للفشخرة مثل مامنقول وصدقوني باميركا الموبايل بالفعل شغلي مهمة من قطعة طريق او من ضيعان بشي منطقة الواحد مانو سمعان عنها بحياتو مو مثل زيدل مثلا واللي اني بعتبر الموبايل فيها اخر شغلي ممكن تكون ضرورية " يعني وين ممكن الواحد يضيع بالحميدية مثلا او بالدبلان؟" المهم نحني بسيرة المغتربين. بالنسبة للعطل أني مافيني احكي عن هالموضوع لأنو بعد ماجربتو بدك تسألي اللي عم يعطلو ياسناء. وبالنسبة للسيارات كمان السيارة شغلي ضرورية مثل حاجة الانسان لأي شي مثل المي والأكل والنوم ومانها ابدا للرفاهية مثل سورية وعلى فكرة كل أهالي زيدل بزيدل سياراتهن أحدث من كثير سيارات لناس عايشين هون لأنو أهم شي بالسيارة هون انها تمشي ويكون فيها مكيف مو مشان الرفاهية بس لأنو الشوب هون مابينطاق حتى مع مكيف وشو كمان بدكن أجوبة على اسئلتكن نحنا حاضرين قلبا وقالبا وقلما كمان مشان ماتزعلو وخلوني نحكي بالواقع اللي بتصور قلال اللي بيعرفو او كثار اللي سمعانين عنو بس مانهن رضيانين يصدقو اسمعو لشوف ويمكن صار يحقلي احكي بعد 3 سنين غربي لانو اللي مفروض اعرفو عن الغربة صرت حافظتو عن ظهر قلب.

يتبع.......

لازم كلكن تعرفو انو مافي شخص سافر على اميركا "وخليني نحكي عن اميركا وعن جاكسون فيل تحديدا" غير من حاجة شو ماكانت تكون ولو صايرلو الواحد يعيش ببلدو بكرامة مابسافر على أي مكان بالعالم. المهم كل الناس تعبت واشتغلت وعانت الأمرين حتى وصلت للي هيي في " سيارات, مصاري, سياحات" اللي بتريدو واللي بيخطر على بالكن بس مو للدرجة اللي انتن بتتخيلوها من غنى فاحش يعني ممكن يكون في كم شخص يكونو فعلا مليانين بس الأغلبية بعدها عم تكافح وتشتغل لساعات طويلة وبما انو نحني بسيرة الشغل خليني احكيلكن عن شغل الستورات. عيني روحي خذو الكلام من بنت اشتغلت بهالمصلحة اللي مابتمناها لأي شخص بالعالم وبقول الله يعين الشباب اللي مجبورين يشتغلو بهالشغلة وماعندهن خيار أفضل لعدة أسباب بجوز اذكرها بعدين. المهم ياجماعة نحني عم نتعامل مع أدنى طبقات المجتمع الأميركي عم نتعامل مع تجار مخدرات وحشاشين ومجرمين وسكرجية والراقي فيهن بدخن " مو دخان لاء ماريوانا" الشغل 7 ايام بالاسبوع 364-365 يوم بالسنة لانو بجوز ومو أكيد الواحد يعطل على عيد الميلاد فقط لاغير وبدقة متناهية.الشغل عم يكون 10-13 ساعة وفي ناس بتشتغل اكثر من هيك خصوصي باول سنتين ثلاث بالغربة مشان الواحد يوفي ديناتو ويقوم بحالو ومن هذا القبيل وبعدين وقت الواحد بدو يفكر ياخذلو شي نص نهار عطلي لازم يفكرلو كم شهر قبل مايتخذ هالقرار الحاسم بحياتو ووقت بدو ياخذ نهار كامل لازم يحط كل قدراتو بالرياضيات والحساب ويعصر فكرو مشان يحدد اذا رح ياخذ هالنهار بالاسبوع او لاء وغالبا بكون القرار بالتأجيل لحتى يصير مايقدر يوقف على رجلي وقتها عاد بقول انو صار الوقت. بقولو فلان عندو ستور وأني بضيف لهالكلمة " فلان عندو هم او بالأحرى هموم" ياريت تسألو المغتربين كم مرة راحو بنص الليل على ستوراتهن لأنو جهاز الانذار رن بالستور والشرطة موجودة هناك والواحد فوق النأزي بصير عقلو ياخذ ويجيب " مين اللي فات عالستور, شو سرقو, حرقو للستور او بعد, اخذو شي من البضاعة, شركة التأمين رح تعوضني؟؟؟؟؟" ياريت لو بتسألو المغتربين لكم عملية سطو " تشليح" تعرضو بستوراتهن وكم واحد تأوس وكم واحد مات وكم واحد بعدها الرصاصات بجسمو وكم واحد انشحن عالضيعة بصندوق خشب وكم واحد اندفن هون. ليش الواحد بيخلص اذا كان عندو ستور فكركن , الواحد بيخلص من الأخلاق الزفت اللي بيتمتع فيها معظم زباين ستوراتني, بيخلص من الضرايب اللي بتهلك الواحد وبترجعو لورا مية خطوة, بيخلص من فوائد الدين اللي لازم يوفيها للبنوك, بيخلص من ...وبيخلص من وووووو......واحدكن بالبلد اذا بيمرض او راسو بيوجعو ولك اذا بيرشح بيغيب عن المدرسة او الجامعة او الشغل , اذا رجع عالبيت تعبان بحط راسو وبنام بينما نحني هون اذا رشحني مناخذ advil واذا وجعني راسني مناخذ advil واذا صابني اي وجع كان مناخذ advil بس اخر شي ممكن ناخذو هوي كم ساعة راحة , ونومة بعد الظهر محرومين منهي مابعرف لايمت , واذا الواحد مرشح وراسو عم يوجعو وعم يطق سن بسن من البردية بروح عالشغل مثل الحباب " او الحبابي" وبدق على الكاش وبيغني دارت الايام على قولة هذاك الواحد, اي ياريت بتسألو اي مغترب ايمت اول مرة راح فيها على قداس الشعانين او اي عيد يعني بعد كم سنة بالغربة؟ ياريت لو بتسألو اللي بيشتغلو وبيدرسو شلون بيحضرو المحاضرات بالجامعة يعني بروحو عين مفتحة وعين مغمضة ولا بكون كل واحد ناتع معو كاس قهوي بيسقى عشيري مشان يضل مصحصح ولا بضل عقلو عند الشغل اللي مضطر يأمن بمين ماكان مشان هوي يقدر يحضر المحاضرة او بالاخر وقت اللي بتنسد بوجهو من كل الجهات بيفوت على حالو المحاضرة وبروح هوي عالشغل والقهر عم ياكلو أكل او الاحسن انو يوقف جامعتو ليفرجها الله؟؟؟؟؟ " اي حكيلك كلمة سيمون"
ياريت لو بتسألو كل مغترب كم مسدس عندو وكم مرة استعمل هالمسدس وكم واحد صاب وكم مرة اتصل بالشرطة مشان حرامي وكم مرة تهدد ووووووووو.......
بتحكو عالسعادة وبتعيدو وبتزيدو والشاطر بيعطي فلسفات الها اول مالها اخر, السعادة بالنسبة الي هيي اني ادرس فصل بالجامعة بدون ما اضطر اشتغل, السعادة عندي هيي انو عطل من الشغل اسبوع اشبع فيهن نوم وخصوصي "نومة بعد الظهر" وروح لعند رفيقتي الوحيدة مرتين بالاسبوع بدل مرة كل اسبوعين واحيانا شهر وهاي هيي السعادة بالنسبة لكثير مغتربين او لأغلبيتهن.
فلان عندو سيارة موديل اخر سني وحقها الشيء الفلاني , اي كمان فلان صرلو بالغربة كذا سنة او انتن عندكن رأي ثاني؟؟؟؟؟ بعدين لازم تعرفو شغلي كثير مهمة انو اي شخص هون بيقدر يشتري اي سيارة يعني اللي بيخطر ببالكن بس يدفع دفعة اولى والباقي تقسيط " اي نص العالم صار عندها مرسيدس هون" يعني مانها مقياس اذا الشخص غنى او فقير او عايف حالو ومثل ماذكرت بالاول السيارة شغلتها انو توصل الواحد على المكان اللي قاصدو مو مشان الناس تشوفو راكب سيارة فخمة وهالشي مابيمنع انو في ناس عندها هالكبرة انو السيارة اللي راكبينها مافي حدي راكب منها هون وهذول بدكن ماتسألوهن عن شي منوب بهالبلد "ياحرام نايمين بالعسل".بعدين ياجماعة السيارة هون مصروف بحد ذاتها من تأمين وبنزين وووووو واللي عندو بالبيت اثنين ماخذين شهادات السواقة جديد وماكلين كم مخالفي " مثل حكايتني بالبيت" بيدفع تأمين دبل على كل سياراتو " الله لا يضركن".
وهلأ منجي للنسوان وياعيني عالنسوان بالشابينغ, اي في كثير نسوان بتقضيها بالموال والسواق بس كمان مافيني نلومهن لانو حالة زواجهن بتسمح بهالشي من جهة ومن جهة ثانية بكونو عم يجهزو لروحة البلاد والتجهيز بيبلش قبل الروحة عالقليلة ب6شهور واحيانا سنة وليش بيضلو النسوان بالسواق مشان يجيبو شي حلو ومحطوط عالتنزيل يعني عمليا هني عم يوفرو اكثر مانهن عم يصرفو" وبالتالي كلو صرف" بس كمان روحو حاسبو كل وحدي قديش عم تصرف, شو رأيكن؟؟؟؟؟؟؟؟؟ اذا القاضي راضي والموضوع مانو لهالدرجة سيء او سلبي بس في كثير نسوان مانهن بحاجي انهن يشتغلو لهيك بيتسلو بالموال والمحلات التجارية وبجوز مايشترو شي بس بيتفرجو وبيتسلو . بشكل عام العلاقات الاجتماعية هون ماشي حالها بجوز تكون أقل من زيدل بس كل مين عندو مشاغلو هون والولاد عندها مدارس والأهل غالبا بتاخذ الولاد عالمدرسة , بس بأي مناسبة فرح او حزن منلاقي اهل الضيعة داير بعضهن ومافي حدى بقصر من ناحية الثاني وعم احكي عن خبرة شخصية ومثل مابقولو الواحد بيحمل منية لأغلب هالناس اللي الغربة ماغيرتهن وخلت جواتهن المحبة وبنفس الوقت وجود اهل الضيعة بخفف كثير من تعب الغربة وهمومها اللي على طول نحني معرضين الهي.
في ناس تعبت كثير وبعدها عم تتعب مشان تثبت وجودهي وتقدر تأمن مستقبل لولادهي وفي ناس مرتاحة بعد سنين التعب وعايشين حياة فيني نقول عنهي كريمة يعني مانهن مجبورين يشتغلو كل يوم يعني كم ساعة بالنهار بتكفي, وفي ناس حظاتهن كثار وما أضطرو يعانو كثير وصارو بسرعة وفي ناس حظاتهن قلال كثير ومع هيك مقتنعين باللي الله قاسمو ومثل مابقولو الحمدلله على كل شي.
في كثير ناس ضحت تضحيات كبيرة بالغربة, في ناس ضحت بشهاداتها العالية مشان تقدر تأمن مستقبل عائلاتهن وفي ناس ضحو بشبابهن وصحتهن, وبالنتيجة كل مغترب عم يضحي كل يوم بشكل او باخر والمهم انو يلاقي الانسان مقابل للتضحية اللي بكثير من الاحيان عم تكون اكبر بكثير من النتيجة. من كم سنة صار في كم شب وصبية قررو يكفو تعليمهن وبالفعل التحقو بجامعات ودخلو اختصاصات مختلفة " صيدلة, طب, هندسة كمبيوتر, هندسة مدنية, وكثير اختصاصات" بس انتن عطوني فرصة مشان نقدر نحقق شي اهم من الانجازات المادية ومن الستورات يعني خلو الواحد يتنفس مشان يقدر يقلع من جديد وإلا رح نختنق اذا رح نضل بقفص الاتهام واذا ماكني عند حسن ظنكن فبدكن تعذروني لانو الشي اللي عايشينو هون بكون اقوى من قدرتني عالتحمل يعني بدكن ماتواخذوني وبدكن تاخذوني بحلمكن ونحني منوعدكن انو نكون عن حسن الظن.
بس بدكن تعرفو شغلي كثير مهمي انو قرار الرجعة لاي مغترب مانو بالامر السهل بالمرة يعني لازم الواحد يحسب كثير وقليل ويدرس امكانياتو والفرص المتاحة الو بالبلد وبدو يكون عندو امكانية كبيرة لحتى اذا مامشي حالو بالبلد يقدر يعوض خسارتو المادية والمعنوية خصوصي انو بكون الواحد عاف حالو لحتى زبط امورو هون وهناك وصار عندو بيتين والولاد صارت بالمدارس ولازم يعانو حتى يتأقلمو مع البلد عن جديد ومية شغلي وشغلي انتن مابتعرفو عنها شي بعد ومع هيك بتسألو : فلان , مانك مفكر بالرجعة؟؟ اي والله حل؟؟؟
اني بالنسبة الي وهالسؤال انسألتو من أهلي قبل اي شخص والجواب هو التالي:
اذا بتعطوني سيارة اخر موديل, وبيت مكمل من مجاميعو, وكل المغريات المادية اللي بتخطر ببال انسان مابرجع على زيدل قبل ما حقق شي واحد بس واللي مو ممكن حصلو بسورية لعدة اسباب وهوي" الشهادة الجامعية" ووقتها ممكن فكر بالرجعة على سورية بس مو أكيد مع العلم انو اني شخصيا مافي شي يشدني لهون اكثر من هناك بس كل مين عندو قناعة ومين قنع عاش.
اذا عندكن اي استفسارات عن الوضع هون اني جاهزي وبحكي وبكل صراحة لانو حارتني زغيري ومنفهم على بعض.

مع حبي واحترامي
رشاعواد

لاحسد ولاضيقة عين القصة منها حرزانة
وحدها الغربة بتمعس معس
و بتخلي الحالة... تعبانة
ورشا اللي داستكن دوس بجرأة ومنها ندمانة
وين الجد وين الكد ووين القوة بأحلى رد
وليش الخوف وليش الصد... ووينوا قلمك ياعيوني
ماتزعل مني لوقلت : منّك مني ممنونة
وحياتك رح تبقى بقهر بجنّة غربة ملعونة
ولولا الطيب ولولا العطر الـ شميتوا باللبناني
صبرك رح يتحول مرّ ورح تمشي عالطفشاني
رجاع الـ عنا ...رجاع الــ هون وسيب الغربة المجنونة
بلادك حلوة بلادك سحر بلاد ك أمنا الحنونة
كربة غربة رح تبقى كل دقيقة عقلبي
بــ أرض اللي عايش فيها وعم تنظم عــ قوافيها
اسمعني منيح سماع بجد حاج تزاود حاج تقد
وحاجي ترخي ومرة تشد
عزك ...مجدك...... مابيعلى
إلا بأرض الـــ منها طلعت !!!!
فروح ركاع وصلي وصوم
وكفر عن ذنب عملتوا
رفاع عيونك صوب الرب
تتوصل مرة عـــ جنتوا
ومابترم راسك عالغرب اتطلع دايماً عـ شرقوا
وبالصوت العالي نادي وينك ياأحلى بلادي
غير بأرضك ياجدي وحياتك ....لالا مابرضى

ياسليمان هلق اللي طارق حبشة رح يصعب علي يطرق بيتين شعر شكرا ياغالي لمشاركاتك الخفيفة .

رشا كمان شكرا عزيزتي للشرح المفصل ونحنا اليوم قدام إحتمالين :
إما ردك مالاقى إستحسان عند بعض المغتربين ..... فخافوا من الرد.
والإحتمال الثاني والأقوى موافقتهم إلك على كل الشرح اللي كُتب وبإسهاب مميز بمشاركتك.
وتبقى مرة تانية ماتشدي ضهرك بحدا وتطلبي منوا يحكي كلمة يعني أتفضلي شديتي بسيمون ..وسيمون ياريت أنهز لخبرياتك ..وليكوا قاعد ومش مهموم بالستور .

ماتواخذونا



زهرة الصحراء

وحياة الغربة والــ فيها
الهدنة مافي عليها
ولكن كرمال الحلوين
رح أهدى شي أسبوعين
ومن قلبي بكل محبة
صليلك من كل قلبي
وشمعة صغيرة ضويلك
للرب ...النعمة يخليلك
وتحقق كل الأحلام
ونسمع أحلى خبرية
بفوزك من أول خطوة

سيمون بالتوفيق إنشالله
الله بيصبرنا تتتخلص إمتحان

وينك رشا طمنيني عنك من ورا هالمشاركة كنت لازم أتطمن عليكي

رشا كمان شكرا عزيزتي للشرح المفصل ونحنا اليوم قدام إحتمالين : إما ردك مالاقى إستحسان عند بعض المغتربين ..... فخافوا من الرد. والإحتمال الثاني والأقوى موافقتهم إلك على كل الشرح اللي كُتب وبإسهاب مميز بمشاركتك

0f what u said is not completely right u r living in the planet mars and writting
what we earn is enough for our living only ,which we were afraid not to found it in our country.
nothing else .
. r u so naive, simpel , doll, the only thing what we have here is the money

مرحبا للجميع:
اسمحلي طمنك يا حسام انو هالتفاصيل وللأسف في كثير ناس بزيدل مابتعرف عنها إلا القليل بعكس ما أنتي متصور أو غيرك ومن هالمنطلق (مابرضى أني شخصيا انو أي شخص ياخذ القصة منك لأنو يظهر انتي كمان ماعندك هالفكرة الواسعة عن الوضع هون). لانو اللي بروحو عالضيعة بيحكو عن معاناتهن هون وخصوصي بأول كم سنة غربة بس مابكثرو من الحكي لأنو أغلبهن يا أما مابحبو ينبشو بصفحات الماضي القاسية أو بحسو أنو هالشي ممكن يرمي كاسيمهن الجديد أوأوأوأو....وكل مين عندو سبب معين ووقت الأهل عم تجي لهون ماعم تشوف ابنها (أغلبهن) غير معلم وعندو ستور وحالتو مليحة وعم يشتغلو كم ساعة بالنهار ليش أصلا مين بيقدر يجيب أهلو لعندو غير الوضعو مرتاح لهيك بكونو فوتو عليهن أحداث كبيرة من حياة ابنهن بالغربة والسمع غير الشوف. بعدين كيف المغتربين بعدهن أغرار بأميركا الشمالية وكيف نسبة كبيرة منهن صارت تحكي بملايين الدولارات, أنو يعني صايبهن مثل أبو سريع يعني؟؟؟؟ جاو ولقو المصاري عالطرقات وصارو؟؟؟ وصححلي معلوماتك وشيل كلمة نسبة كبيرة لأنو اللي معهن ملايين الدولارات مابتتجاوز نسبتهن 1% يعني من بين كل مية مغترب في واحد بس معو (ملايين) واللي عم يقرى مايفكر شي عشرين مليون يعني ممكن شغلة 2_3 مليون وصرلهن عمر بهالبلد أو بغير بلدان لحتى حققو هالشي.
ياريت لو بتعدولي كم صناعي وتاجر بكل سورية بطالع هالمبالغ الضخمة "يا أما مسؤول ولاهفلو كم مليون من خزينة الدولة يا أما تاجر أبا عن جد وورثان مالايعد ويحصى من الأملاك وغيرو وغيراتو يا أما شي مهرب كبير" يعني كلهن على بعضهن بيطلعو مية شخص وبعدين الرجعة والاستثمار بسورية مغامرة كبيرة كثير وتعتبر تجربة جديدة حتى لابن البلد فمين اللي بدو يحط تعب العمر كلو بمشروع لحتى ينقال علي انو "مواطن مخلص او في خير للبلد" ليش بدي أسألك لو أنو البلد كان فيها خير الك ولغيرك من الشباب والناس بشكل عام كنت رحت عالسعودية وبعدكن عم تبيعوني من هالوطنيات اللي كلني منعرف انو لابتقدم ولا بتأخر يعني لو كنت قلت انو هاللي رح يصير معهن شهادات ويكفو دراسات عليا يرجعو يفيدو البلد بالخبرات اللي حصلوها كنت بهضم الفكرة شوي بعدين لاتواخذوني بهالكلمة يعني كل مادق الكوس بالجرة بتقولو المغتربين لازم ولازم ومابعرف شو اي شو شايفين المغترب "بقرة حلابة" كل شغلي من مسؤوليتهن.
ومن مبدأ الجنة بلا ناس مابتنداس مافي مغترب هون بأميركا بفكر يهاجر على أي بلد وضعو أحسن من أميركا يعني الناس هون ماصدقت تلتم داير بعضها لك حتى البيوت عم نشتريها قراب على بعض على قولة الواحد مالو غير ناسو يعني الواحد مانو خالص وحتى لو التقى أي شخص رح يقدم على هالخطوي كانت كل الناس قالت واولهن اني وانت واي شخص انو شو يعني جن؟؟ حدي بيترك أهل ضيعتو وبروح على بلاد مابيعرف حدي فيهي؟؟ بلكي مامشي شغلو هناك؟؟؟
بالنهاية الوضع بأميركا مو هوي السيء لهالدرجة بس نحني الشغلي اللي عم نشتغلهي هيي اللي بتجيب أسوأ طبقات المجتمع لعني ومنضطر نتعامل مع هيك أشكال يعني الطالب اللي بجامعتو أو الشخص اللي عم يشتغل أي شغلة غير الستورات ماعندو كل هالمشاكل بعالعكس واللي بقول انو ليش الستورات الجواب بكون لعدة اسباب:
الستور مابيلزمو شهادة وعالكثير شغيلين او ثلاث بشيلو وربحو سريع اذا مشي حالو وووووو.....
واذا بدكن تفتحو تساؤل جديد عن الأمور اللي بتشدني هون كأهل زيدل لهالبلد وقتها بكون موضوع ثاني ورد ثاني.
بعدين وين هالمغتربين اللي على أساس مشدود الظهر فيهن انو يحكو ويفهمو هالعالم عن الوضع هون ولا ماضل غير حديدان بالميدان لانو كلامهن مهم كثير ويظهر أهل اميركا رح يضلو بقفص الاتهام والهمس واللمز عليهن مارح يوقف .
والأخ سمير حكيت الواقع المعاش انو بكثير أحيان منصرف كل اللي منطالعو على متطلبات الحياة اليومية وبالتالي مافي أي توفير وباقي اللي كتبتو ما قدرت اخذ اي فكرة عنو فياريت اذا حابب تعبر بطريقة اسهل عليني حتى نفهم تكتب بحروف انكليزي بس الكلمات تكون عربية.

مع حبي واحترامي
رشاعواد

يا وردة البهالهدنة تمننيني اسمحيلي, و بكلمتين اسمعيني
بعتقد كان واجبك تسألي عني قبل ما تغلطي و تنازليني

سائلي رفاقك ورود الحديقة سألي الجوري و الياسميني
برد الورد : انا منهل لعطروا ومني بيطلب بواقه الفتيني

انا الي بكلمتي لونت تاجه أخذ حلة بهائو من جبيني
ومكان الورد بلسم لعشاقوا لو ما نهل من حبي و حنيني

اجاني ورد بقمة اندفاعو وتهجم على معقلي و عريني
عرين الورد(الاسد) يا وردة دفاعو بقص الورد و بيشكلو زيني

انا المغترب عممر ضيعة بعطائو بصباها اصبحت زيدل مديني
و صيفها باسمي ختمت كبريائو صيف المغترب لفصولها زيني

انا ما يعييرني الكد التعبتو نيشان عصدري و مرفع جبيني
لقمة شريفة ودولاري عملتو بكد سنين بهالارض الثميني
بأرض الغرب زرعي أخذ وقه عناية و دراية لبذرة حزيني
ندفنت بأرض الغرب هالحبة و قامت بيادر خير لمشرقها موني

اما عن الهم الحملتو و شرحت رشا تفاصيلو الحزيني
ما هو غير هم كادح لاجره بأيي زمان و مكان و مديني

يستاهل الغرب من لساني عطيتو مديح شرقي يزيد الغرب زيني
انا شرقي و صلاتي عالشرقي و لروح الشرق محسوبك سفيني
لكن لساني وللفتو عغربي احلى ما يبقى عالشرقي سجيني

و بهالجولة يكفيني الحكيتو بأمر الحب زمطي تقبشيني
بشفاعة عطر لبناني عبقتو رحمة بسناء ينده و يرجيني



سيمون

ما جيت اتحدى الغربة .....ولا عـ قلبك زيد هالكربة
جيت تقلك من محبتي ألك..... الغربة هم عـ عقلبك وقلبي
بجدك بتعبك ...حميت أهلك ... عمّرت ضيعتك
هيدا كلام شعرا من حرقة قلب مكتوب
من عيون عم تبكي ياحبوب

***
دولارك بجيبتك ياسيمون مابينفعك
وشو بينفع المال ......وأنتَ مش معي .....ولا أنا معك
ولك الدولار والله بأرضـــــوا لأدفــــنوا
لو بدوا يجي يوم يركعني ألك
وعمروا الشقىَ ببلادنا ما كان... قد الشقىَ ببلاد
الدجل والعنكبة
ولساني من شرشه والله لأقطعوا
إذا الــ HI و الـ BYE
رح تنسيني العربي .



جربت يكون نقاشي مع حسام حامي ولكن الحقيقة كان بردوا الأخير منطقي وواقعي وأنا بوافقوا بأنو السبب مش مادي والدليل بأنو كتير أصدقاء ومن من المرتاحين مادياً بيرفضوا الرجعة والإقامة بشكل نهائي على بلادهم .
وأنا بعتذر إذا رح أزعج البعض من المغتربين اللي ممكن يعتبروا اللي رح قولوا إتهام وهوي موضوع طمع الإنسان وشجعه وعدم قناعته ....يعني خلي الـــ 10 مليون يصيروا 20 مليون ...ليه لأ .
وضروري ماننسى بإنو الغربة بتصير عادة .
طيب هاتوا خبروني ليه الأرمن مابيرجعوا لأرمينيا اليوم ...ياعمي يرجعوا
وهلق بتعتقدوا بأن الفلسطيني ممكن إذا رجعلتوا فلسطين رح يرجع ....مابظن حتى لو رح يشحطوهم شحط رح يضلوا يقاتلوا ليضلوا بكل البلاد اللي هني مقيمين فيها هلق ...ونفس الشي بالنسبة للزيادلة صارت الغربة عندهم عادة ومش ممكن يتخلوا عن عاداتهم بعد اليوم

...شو رشااا ؟؟؟

فقط للملاحظة بأنو بحفلة المغتربين مش السنة الماضية اللي قبلها أستبدل سيدنا لويس عواد كلمة مغتربين بكلمة منتشرين حول العالم واليوم حسام بيطلق أسم مهاجرين
وكمان رح وافق حسام صح أكيد إذا مش رح يرجعوا يعني مهاجرين



الحق عليك سيمون أنا قلتلك رح أهدى أسبوعين !!!!

زهرة الصحراء

انو يعني بس فهموني لوين بدكن توصلو بعد كل هالحكي, كان فكري بأول الموضوع انو انتن حابين تعرفو أكثر عن وضع المغتربين هون ومن هالمنطلق تمت كتابة الردود بس اللي عم افهمو هلأ غير شي وصارت القصة قصة مواقف من المغتربين والغربة ومين غلطان ومين معو حق ومالازم ينتهي هيك موضوع بهيك اراء "طبعا برأيي" يعني مثلا لو واحدكن فعلا محتاج انو يهاجر بضل متمسك بوطنو وبأهل بلدو؟؟؟؟ بيرفض فكرة الهجرة؟؟؟وقت واحدكن بيقعد يحكي على أميركا بدون نفس وبيعطي شعارات وبشيد بسفارات الدول الأجنبية وبيستهزئ بالتعامل ضمن السفارة الأميركية بكون منطقي بحكيو؟؟؟؟ اي لأنو كلني كني عايشين ببلاد متحضرة التعامل فيها مع المواطن بكل المجالات وبكل المؤسسات على أرقى مستوى, مووووو؟؟؟؟ بتقولولي الطمع والجشع ومن هالكلمات الكبيري, وبنفس الوقت بتقولو اكيد في شي غير المادي عم يخليني نضل بهالبلاد؟؟؟؟ كيف بدي ركب هالفكرتين مع بعض؟؟؟
ولا مرة ندمت على أي رد كتبتو ولا هالمرة يعني متندمي كثير بقدر ماني حاسي حالي عم غني بالطاحون وعم اضحك على حالي واني عم اكتب ردودي على هالموضوع والله لا يجبركن تجو على اميركا غير بغرض الزيارة والكل جاهزين هون لاستقبالكن وأكثر من هيك مارح زيد على هالموضوع.

مع حبي واحترامي واسفي الشديد اذا احسستم بأني أو أي مغترب اخر أشعرناكم بالملل او أزعجناكم بتفاصيل لا تعنيكم او لا تهمكم

رشاعواد

وقت واحدكن بيقعد يحكي على أميركا بدون نفس وبيعطي شعارات وبشيد بسفارات الدول الأجنبية وبيستهزئ بالتعامل ضمن السفارة الأميركية

اذا عندكن اي استفسارات عن الوضع هون اني جاهزي وبحكي وبكل صراحة لانو حارتني زغيري ومنفهم على بعض

حبيبي يسوع
أهلا فيك وبها الإسم المميز وإنشالله بيضل يسوع حبيبنا وحبيبك للأبد
أولاً _حبيت صحح خطأ بسيط بأنو حضرتك مغترب بمصر ومش مغترب من مصر
ثانياً _ سؤالك عن نوعية المواضيع اللي ممكن تكتبها بالمنتدى الإغترابي ، ياعزيزي كون منتدانا تابع لقرية زيدل وكون في عدد لابأس في من المنتشرين الزيادلة حول العالم فأغلب المواضيع رح تكون بتخص هالفئة من هالناس والملاحظ أكتر بأنو الحوارات دائماً عم تكون بين أعضاء بتجمعهم صلة الإرتباط بالأرض الوحدة ومعاناة وحدة وهي موضوع جفاف الغربة وأسبابها .
ولكن هالشي مابيمنع من أنو حضرتك تخبرنا عن معاناتك من غربتك بمصر أو عن أسباب راحتك بغربتك وهالشي رح يسعدنا كتير كونا رح إما نجمع على أنو الغربة كربة ووين ما كان أو ممكن يختلف وضعك عن وضع غير مغتربين .
sam kassab سلامة إبنك ألف مرة بتمناله من الرب الصحة والعافية بعد معناتكم ومعانته .
يعني بالمختصر المفيد ياسام ومن بعد رأي الجميع وخصوصاً رشا لازم نعترف بالمقولة الشعبية

قال شو جبرك عالمر ....قلوا الأمر منوا



ودمتم سالمين يامغتربين ....
دعولنا الرب يهدّي الأوضاع بلبنان حتى مانضطر نلحقكم
أما عن عنونة الموضوع فماحدا يزعل مني اللي مابتعرفوا بتجهلوا ونحنا هيك منسمع وصدقوني أنا مابحب العظم اللي من ذهب

زهرة الصحراء