الارشيف - معقول نلاقي هيك رجال ؟

Pages: 1

معقول نلاقي هيك رجال ؟
(انقر هنا ان احببت مشاهدة الموضوع الاصلي بالالوان و الصور )

Posted by: Desert rose

إن الحلم الأول للمرأة في رجلها هو أن يكون على قدر مقبول من الجمال
أما المرحلة الثانية والتي تلى مرحلة الجمال هي حالته المادية فهى تتمنى إن لم يكن غني أن لايكون فقير ..
و المرحلة الثالثة وهي المرحلة الأدق والأهم وهي بيت القصيد في موضوعي اليوم هي تلك الصفات التي تحلم بها لابل تشدد على أن يتمتع بها رجلها في يوم من الأيام فهي تحب :

1 - الرجل الذي يكون كريم في عواطفه ويده ويهبها الأمان والحنان .
2 - اللين في تعامله الرقيق في مشاعره القوي الشخصية بلا غرور الواثق من نفسه .
3 - الذي تشعر وهي معه برجولته وأنوثتها .
4 - اذا تحدث تنبهر من أسلوبه وحسن حديثه ولاتمله .
5 - الذي يدللها ويرويها عشقاً.
6 - الذي يتقن فن النظرات تجاهها
7 - الذي يقدر احساسها ومشاعرها ويحن عليها وقت حزنها وألمها.
8 - الذي يستمع لها ويقدر رأيها ويطلب مشاركتها ويحترم رأيها.
10 - الذي في بعض الأمور يفضلها على نفسه .
11 - الذي اذا كانت أخطائها بسيطه يسامح ويعفو عنها .
12- الذي يكون غيور عليها بدون تحكم أو تسلط .
13- أن يطرب مسمعها بكلمات دافئه مليئه بالحب و الغزل.
14 - أن يحتمل تقلب مزاجها ويشاطرها المزاح والضحك .
15 - أن يفرح أذا فرحت ويحزن أذا حزنت ويقف معها سنداً لها.
16- الذي تشعر انه يحتاجها في كل لحظة .
17- الذي يفتخر بها ويراها في عينه غالية جوهره ثمينه .
18- الذي تهبه عمرها لثقتها به وتعتمد عليه .
19- الحار في عواطفه الذي تشعر معه دوماً أنه لايرى غيرها .
20- الذي يشركها بمعرفتة أسراره .
21- الذي ترى دموعه ولايخفيها عنها .
22- الذي يشعرها انها ملكت فؤاده وعقله.

هذا في رأي الرجل الذي لا تنساه المرأة .

اذا توفرت في رجل واحد كل هذي الصفات فهو مثالي ..وماذا تريد المرأة اكثر من ذلك !

برأيكن معقول نلاقي هيك رجال ....وإذا في وين منلاقي منوا ؟؟؟!!

زهرة الصحراء

Posted by: اردني وفي

كلامك رائع يا وردتنا وفعلا هو بصراحة لا تخلو مثل ما بيحكي المثل "ان خليت بليت "

يعني الا ما يكون في بس هما بهايدا الزمن مع الاسف اقلية يعني قليل القليل ممكن تتوفر فيوا هيك صفات .. او حتى ع الاقل 50% منهم ...

لأنوا هاي الصفات بصراحة يا سناء هي مخلوقة مع الرجل يعني هي اقرب للطباع فما ممكن مثلا انوا شخص يحاول يتصنع او يلصق لنفسوا هيك صفات ..

وبنرجع نحكي موجود وفي كثير بس وين بدنا نلاقيهم ...

تحياتي

Posted by: hosam abdulaziz

صدقي يا سناء قريت هالصفات اكثر من مرة , و ما غدرت استثني نفسي من شي وحدة فيها

بقا طلبك موجود و منه من ضروب الخيال.

Posted by: merellaa

مرحبا يا زهرة الصحراء
هي المواصفات كتير كتير حلوة واكيد كل بنت بتتمنى الشب يلي بدها تحبو يكون هيك بس يا ترى شو يلي بيخلينا ما نلاقيون ؟
بتخيل السبب هو اما المجتمع وشو بيفرض على الشباب من ضغوطات ومن تحمل للمسؤولية لهيك بيكون الشب بحالة من التعب بيقصر تجاه حبيبتو بكتير اشيا هي بتحبها

السبب التاني البنت نفسها لانو لما البنت بتطلب من الشب هيك طلبات بتخيل انو هي كمان مطلوب منها المثل بس للاسف لما البنت او الشب يتقدملون الشي الحلو بينسوا انو الشخص يلي هن ملتزمين معو كمان بحاجة لنفس الشي

تالت سبب هو كبرياء معظم الشباب انو ا نا اذا كنت هيك ما بقدر افرض رجوليتي على البنت ههههههههههههههههههه وليييييييييييييييييييي بعد هالجملة رح اكل بهادل طويلة عريضة من الشباب قال شو بتمدح فينا بعدين مناكلها هههههههههههههه

بس عنجد من الصعب نلاقي هيك شب واذا تلاقى فهو بيكون من نصيب البنت يلي ما بتكون عم تطمح لهيك اشيا .....

يا حسام ربي يحميك ويحرسك اكيد اكيد ما عم تلحق خطابة لانك بتملك كل هالصفات وامانة اذا في شي مطرح شاغر نزلي اسمي بركي بيجيني الدور بعد شي عشر سنين هههههههههههههههههههههههههه

ربي يحميكون
ميمو

Posted by: tomassen

مرحبا :
هي الصفات كتير حلوة ، بس انا برأيي انه ما فينا نحدد صفات معينة للشريك قبل بوقت ،يعني احيانا الواحد بيكون بيكره صفة وبعدين بيحب شخص يمكن يكون كل شي في مليح الا هي الصفة يلي بيكرهها ويمكن المتزوجين أو المرتبطين فيهن يلاحظوا هذا الشي .
المهم أنا برأيي انو الشريك المناسب هو الشخص يلي فينا نقبله على علاته يعني متل ماهو وبالنهاية ما حدا فينا كامل

Posted by: Desert rose

رح أبدا ردي بالترحيب بالصديقتين tomassen و merellaa أهلاً وسهلاً نور المنتدى بوجود الصبايا .

merellaa ردك لطيف ولكن أنا معارضة على فكرة تحميل المجتمع مسؤوليه حمل الرجل لها الصفات وبرأي المسؤولية بتوقع على طباع كل رجل والهالة اللي خلقها لنفسوا ضمن مجتمع خاص في .أما عن الجنس اللطيف فمابعتقد بأنو البنود المذكورة ماتجتمع بالإجمال بنفس الفتاة لأن طبيعة الخلق فرضت على الأنثى حمل هالصفات .
عزيزتي tomassen أنا بوافقك بأنو ضروري نقبل الشخص على علاتوا بشرط يقبلونا هني على علاتنا وهيهات المرأة شو عندها علات بنظر الرجل اللي بيعتبر نفسه منزه عن كل علة .لذلك صعب نلاقي هيك صفات مجموعة بالرجل ....لاقبل ولا بعد

حسام بتسمع أكيد بالأشخاص اللي بينصابوا بجلطة دماغية ...أو بناس ا نصابوا بجلطة قلبية ...ولكن أكيد بعد ماسمعت عن إصابة أسمها ((الجلطةالتسطيلية )) من فعل تسطيل .

فمن 21 آذار يعني من عيد الأم لليوم أصبت أنا بها الجلطة وماعد أستوعبت كتير...واليوم أنت بإختصارك الشديد بردك زدت علي من أعراض هالجلطة واللي أتسببتلي بسوء فظيع بالفهم لردك وماقدرت أعرف هل أستثنيت نفسك من هالصفات أم أستثنيت الصفات منك .
وفي حال أنا اللي بالفعل مصابة بالتسطيل ومافهمت فشو رأيك بالبند 14 هل هيك صفة متوفرة فيك ...بشك

!!!!

زهرة الصحراء

Posted by: hosam abdulaziz

يعني بهنيكي سناء عهالداء اللي صايبك
انت الله منعم عليكي بأمر و منك منتبهة لأنه التسطيل هو قناديل الراحة في ليل هذا العالم المظلم (ميس الريم بتصرف)
ليهك الله يديم السطلة عليكي يا رب

موضوع البند 14
يعني اذا في رجال بالعالم بيتحمل تقلبات مزاج حبيبته , فبيكون هالعبد الفقير اللي قدامك .
لهيك انا بأكدلك انه هالبند لابسني لبس مثله مثل باقي البنود

.

ميريلا اولا مرحبا فيكي بيناتنا
ثانيا ديري بالك دورك ما رح يطول كثير , بتعرفي ليش: هو صحيح الطابور كبير و بالمئات بس المصيبة انه بسبب انقطاعي عن سورية و اقامتي في السعودية صار 90% منهم شباب

(this is Saudi Arabia )

tomassen
اهلا و سهلا فيكي معنا و كلامك قريب جدا للواقع بس بحب ذكرك بغنية اصلها لعلياء التونسية (اذا مني غلطان)
بتقول : لاموني اللي يغاروا مني و قالولي وش عاجبك فيها.
جاوبت اللي جهلوا فني , خذوا عيني شوفوا بيها.
يعني مغزى الحديث انه النظرة اللي بيشوف فيها العاشق لحبيبته تختلف كليا عن النظرة اللي بيشوفوها فيها الناس العاديين.

Posted by: Nada1981

مرحبا جميعا

سناء بتعرفي هلا انا لحتى تأكدت ليه نحنا ( انا و الصبايا الي معي بشلة حزب الحلاوة و الدلع ) لهلا قاعدين بيتنا و على شعاري انا الي ب بيت اهله على مهله.

يعني وين بدنا نلاقي هدا الشاب الي يكون فيه ال 22 شرط؟ اذا فيه 10 من ال 22 لازم نقول الحمدلله و نقبل فيه و نتمسك فيه بأيدينا و اسنانا.

ميمو اهلا و سهلا فيكي معنا مرة ثانية و عنجد مثل ماقلتلك كتير انا مبسوطة و خاصة هلا اجا مين ياخذ مني حرف ال ه و يعمله هههههههههههه
انشاءالله يارب دائما الضحكة هي تكون متواجدة بكل مشاركاتك.
و انا معك بكلامك انه الي الله بيبعتلها هيك شاب بتكون هي ماعم تدور على هيك مواصفات.
بعدين تعي لهون من ايمتى البنت بتخطب الشاب؟

tomassen كمان اهلا و سهلا فيكي معنا, انا رح فسر كلامك بطريقة غير طريقة حسام.
المشكلة بأيامنا هي الشاب و حتى كمان البنت عم يكونو وقت التعارف و الخطبة شكل, و بعد الزواج شكل ثاني و هلشي عم يسبب ببداية المشاكل من اول فترة.
يعني الشاب بده البنت ترضه عليه لبين ما تصير عنده بلبيت و البنت رح تحاول تجذب الشاب لطرفها لحتى يقبل فيها و بعد ماتصير عنده بلبيت الله يعينه.
مابعتقد في اي شخص بلعالم بيفرجي عيوبه قدام العالم او قدام الشخص الي رح يتزوجه و خاصة اذا متعلق فيه.
الانسان الصادق مع حاله و مع العالم مااله مكان بلزمن هدا للاسف, زمن الخداع و الكذب و الخيانة, زمن العجائب.

تحياتي

ندى

Posted by: fr george massis

مرحبة حابب كثير شاركم بهالموضوع بس مشكلتي بكثير من هيك مواضيع لالي فيها لاناقة ولا جمل هههههههههههههههههههه
بس بشوف من واجبي صف بجانب الخال شوي مسكين ما في غير حديدان بالميدان ههههههههههههههههه
على كل حال أنا بشوف بحسام أكثر من 22 صفة موجودة فيه وما بقول غير نيال يلي بدها تبتلي وشوفوا وين أهلها مصلين؟؟؟؟؟؟؟؟؟؟؟؟؟؟؟
ولك هدا حسام موووووووووووووووووو
ميريلا كيفك بهنيك على اختيار حسام لقطة ولاتلاوحي من أيدك بعرف الشوام حدقين بهيك قصص هههههههههههههههههه
باي

Posted by: merellaa

بونجوركون
ندوش كيفوووووووو لك أخدت الهاء لدرجة أنو رفقاتي سوولي كيبورد كلو حرف الهاء ههههههههههههه
لك أنا لاقيت حسام لقطة متل ما قال أبونا قلت يا بنت لحقي حالك قبل خيالك هالأيام
ما في كتير شباب هيك ... بعدين أمي مو مصدقة تزوجني قال شو ما بدها ياني أخد البيت وجيب صهر بيت ههههههههههههه يعني يسكن عنا

بعدين لشو نازلين بحسام سفق ورقع لك ريتو يقبشني ريتو لو بيعرف شقد حبيتو ههههههههههههههه
أبونا ماني شامية يا غالي لك أنا ماردلية عايشة بالشام يعني مبندقة ههههههه وامي كفرونية اللههههههههههههه كملت ما هيك ويلا في شرش لبناني وصيدناوي مين بدو قرب قرب ههههههههههه
والله بتقلو امي حميل وشيل ههههههههه

أنا بضم صوتي لصوتك يا ندوش
الانسان الصادق مع حاله و مع العالم مااله مكان بلزمن هدا للاسف, زمن الخداع و الكذب و الخيانة, زمن العجائب.

ربي يحميكون
ميمو

Posted by: Desert rose

حسام شكرا على بحر الظلمات وعلى تنويهك للنعمة اللي انا فيها الحقيقة نعمة ماكنت عارفة قيمتها وعن قصة البند الرابع ياعزيزي كل واحد عندوا نظرتوا وكل واحد بيقدر الأمور متل ماعاشها وشافها مش متل ماغيروا بشوفها .
أبونا جورج كنت عتلانة هم حسام يبقى لحالوا ومابعرف ليه الشباب الطيبة ماساندوا ولو بشي بند عالقليلة شكراً للمؤازرة وماعرفنا شو صار بلإصبعك المجروح بعدوا واو ...طيب رح أهديك غنية دومينيك حورارني الجديدة وهيك بيكون صار عندك اتنين يبوسوا الواو هيفا ودومينيك

ياندى صدقني أنا بروح زحف لأميركا وسباحة لأقطع المحيط إذا بلاقي هيك صفات مجموعة بشي رجال فشو أيمتا ما أيمتا كنا نحنا نطلب الشباب !!!!!

اقتباس:

أسمعي ميموا بحكم الصداقة المميزة اللي بتجمعني بحسام كنا دائماً نتحدث عن مواصفات بنت الحلال وكيف بيحبها ومن دون أي مبالغة كل اللي جمعتي فيكي هوي عم يدور علي فمن عندي ألف مبروك وعقبال التمام بالخير

في بعد حدا شارك وماشكرتوا .....آه في معن ....أهلين معن .....معن الهيئة عم يدور على عروس ؟؟
جاسوسيتي هيك بتقول ....فيامعن أنتِ شو بتقول ؟؟؟
بيمشي حالها لبنانية

....شكرا معن لردك الحلوا

برأي ماعد حدا يعقب لأن الحالة التسطيلية اللي أنا فيها مش عم تسمحلي هدي حالي بها الأيام وأسكت عن شي

زهرة الصحراء

Posted by: hosam abdulaziz

اقتباس:

على كل حال أنا بشوف بحسام أكثر من 22 صفة موجودة فيه وما بقول غير نيال يلي بدها تبتلي وشوفوا وين أهلها مصلين؟؟؟؟؟؟؟؟؟؟؟؟؟؟؟

يعني بعد هالشهادة الكبيرة من ابونا جورج بتصور معد في داعي حدا يدافع عني او عن حزب الرجولة ؟؟؟؟
ابونا هي شهادتك بدي ياك تحتفظ فيها لساعة الجد و ما تتركني وقتها لوحدي اوكيييي.

اقتباس:

بعدين لشو نازلين بحسام سفق ورقع لك ريتو يقبشني ريتو لو بيعرف شقد حبيتو ههههههههههههههه

هي من اسبوع زمان و هيك اي شو خليتي لقدام؟؟؟؟؟؟؟
يعني انا صرت هكلان همك بس تشرفينا بشي زيارة عزيدل شو رح يصير فيكي ؟؟؟

بكل الحوال ميرللا انت اللي باين عليكي بتنحبي بسرعة و بتدخلي القلب بسرعة تناظر سرعة الضوء.
فألف شكر للي عرفك بمنتدانا و ساعدك بالأنضمام لصحبتنا.

Posted by: سيمون برصون

بالبداية قبلة شوق للاحبىالذين عرفتهم من قبل
و تحية حب للأصدقاء الذين بدأت بالتعرف عليهم من خلال مشاركاتهم و تمنيت أن أتعرف بهم لما لمست من غنى انساني بالمنتدى ورغبة جدية من الاعضاء بالتفاعل مع الاخر و هذا برأيي ما شكل هذه الباقة المزركشةمن الافكار و المواضيع و الاراء حتى بات من الصعب جدآ على أي متصفح ان يبقى بعيدآ عن المشاركة فكم بالاحرى شاب نبت من أرض زيدل الطيبة
وللمرة الالف انحني لسيد الموقع الذي زرع بذرة ورواها بجد و تعب و صبر الى ان غدت شجرة قوية ضربت جذورها في ارض زيدل الطيبة و مدت اغصانها لأصقاع الارض و ثمارها ستغذي اجيالآ و اجيال هنيأ لك وسام حفرت بصمتك على جذع كرمة عجببة اسمها زيدل وهي ستخلد ثمارك خلود ميماسها

ممكن كان لازم موضوعي الاول يكون بمنتدى التعارف أو بموضوع اسهل.أحلى ما من اول موضوع فوت بالحيط ولكن معليشi like to make entrance
تى ما يصير لغط لوجهة نظري بتنظيمات المرأة و دورها في تحرير المرأة من أثقال أغلال كبلتها تراكميآ منذ بداية المجتمع الانساني و من ضمنها حزب الحلاوة والدلع
ترعرعت في احضان أم على اتصال مباشر بواقع و مشكلات المجتمع النسائي مما حررني من بعض قيود المجتمع الذكوري و سهم هالشي بايماني المطلق بالدور العظيم الذي يجب على المرأة ان تلعبه في بناء واستمرارية المجتمع البشري و بحجم الخسارة الهائلة للانسان بسبب اقصاء نصفه ولمدة طويلة عن المشاركة في صناعة مستقبله باستثناء بعض طفرات التاريخ

مع ثورة المكننة العالمية هبت ايضآ ثورة نسائية محقة لموازات المرأة بالرجل بعد ان فقد الرجل التمييز الفزيولوجي الذي كان اساس للسيطرة الذكورية على المجتمع البشري
لكن كما في أي نضال فان بعض المجموعات تجرفها المنطقية الانتقامية و تتحول الضحية الى جلاد بثت بعض الحركات النسائية اراء تقاضي و تحاسب كل الرجال على ذنب ذكوريتهم
(اما الذكورية كالانوثة وكلاهما انصياع لتطور طبيعي حكمته عوامل عديدة على مدى ملايين السنين) ,ولكنهم نجحو . نتيجة الاحساس بالذنب انساق المجتمع الحديث لمقت الذكورية وتقديمها كفارة حتى ان بعض الرجال غدى يخجل من ذكوريته
مثلآ اهتمام الانثى للفت انتباه الذكر واغرائه طبيعة غرائزية مهمةجدا لاستمرارية الكائن البشري وما الاهتمام بالمكياج او اللباس الا نتيجة لهذه الطبيعة
(الشهادة للحق في هذا المنتدى ما تعرضت هذه الطبيعة لتهجم من بعض جاهليها الا وانبرت له ردودا دفاعية شرسة وانا ساصطف مع أول المدافعين)
كما ان ايضا انسياق الذكر لهذا الاغراء هو الرد الطبيعي ولكنه يعد معيب و مشين ويوصف صاحبه بالبربرية
(يعني هيفا تتدلع واوا معليش بس انا اتطلع على هيفا بصير واوا)
فمن مبدئ الاهتمام والنقد البناء لحزب الحلاوة والدلع بتمنى ان لا يؤخذن صبايا المنتدى لنبذ الذكورية بدلا من محاولة فهمها و تهذيبهاو مراعاتها كانوثتهم
وبهذا اتوجه للعزيزة سناء وبالرغم من التماسي في كتاباتك اعجابك بالرجولة المهذبة لكن لم توفقي في اخذها بعين الاعتبار ( رغم محاولتك )في مزايا رجل الاحلام فعدا عن البندين 2 .3 لم تؤخذ الذكورية حيزا في اي بند اخر
لذلك اتوقع اذا ما اعيد صياغة المزايا لتكون الانوثة و الذكورية مقوماتها و اخذت خصوصيات الجنسين في طياتها لاصبحت اكثر منطقية و واقعية
وهيك يصير حدا ياخذ كتف عن الحبيب حسام
رغم ان حسام الشباب بهالمنتدى هو من حما بوميض اراءه الرجولةمن المحاولات الانقلابية الاستبعادية و هو مرشحي الاول لايفاء اي دفتر شروط مهما حاولت سناء اظهار العكس

ودمتم
سيمون

Posted by: wisam

بس حبيت ادخل بمشاركة بسيطة رحب فيها بابن العم الغالي سيمون و اشكره على الكلام الحلو و من قرائتي للموضوع لاحظت ان سيمون متابع جيد للمنتدى و ربما منذ زمن طويل فشكرا لمتابعتك و الشكر الاكبر لمشاركتك .. على قولة جبران ليس من ينصت للحق باقل ممن ينطق به و ربما الكثيرون يتابعون قراءة المواضيع و لكن الاقلية يضحون ببعض الوقت للكتابة

Posted by: hosam abdulaziz

سيمون انت من الاشخاص الذين احتار بماذا اخاطبهم
صديق العمر
ام صديق الطفولة
ام صديق الدراسة
ام ابن العم
و ربما استطيع اختصارها جميعا بالاخ الغالي سيمون
مرحبا بك معنا في المنتدى لقد طال الانتظار لقيامك بهذه المباردة الجميلة بالانضمام لنا.
قد اكون من اكثر الناس دراية بالقيمة المكتسبة من وجودك معنا في المنتدى فأهلا و سهلا بك.
اما عن موضوع النساء و علاقتي السلبية بالمنتدى بهم
ربما تكون من اكثر العارفين بتاريخنا الطويل مع الجنس اللطيف ايام الدراسة و بعدها و العلاقة الطيبة التي لطالما جمعتنا بهم و كنا من السباقين بكسب ثقتهم و محبتهم.
لكن هذا لا يمنع من تسجيل الكثير من النقاط السلبية في تكون المرأة و طبيعتها , مع تميز واضح للرجل عليها في الكثير من هذه الجوانب.
لن اوسع نطاق الحوار في هذا الموضوع و اشعب به و لكن يكفيني ان اخبرك انه من جيلنا الدراسي الرائع 1976 يوجد لدينا ( انا و انت و شهد و عزيز و مطانس سلامة و الأب جورج مصيص) بينما حتى الساعة لم تشاركنا اي صديقة على صفحات هذا المنتدى.
فهل من تفسير لذلك سوى هذا التميز الملحوظ

اكرر ترحيبي بك و اتمنى منك الأستمرارية معنا لنستفيد من خبراتك و تجاربك الطويلة في هذه الحياة

على فكرة في عنا كثير احزاب بالمنتدى فغير حزب الدلع و الحلاوة ضد حزب الرجولة
في عنا حزب العازبين ضد حزب المتزوجين
و الهيئة عالحالتين رح نكون ضد بعض

Posted by: Desert rose

جميل أن نسمع عن أو نرى زهرة مميزة على غصن ولكن الأجمل أن نتنشق لنتمتع بعطر هذه الزهرة .
جميل أن نقتني شحروراً ملوناً ولكن الأجمل أن نسمع تغريد وغناء هذا الشحرور .
سيمون برصون سمعت عنك وعن تميز قلمك قبل أن تعانق حروفك صفحات هذا المنتدى فأهلا وسهلاً بك في منتدى زيدل ...وأعذرني ياصديقي أنا لاأريد التهجم عليك من أول مشاركة لك المنتدى لينطبق علينا المثل (( من أول دخولوا شمعة عطولوا )) .
سأحافظ اليوم على الصمت راجية من الله طول الصبر في لقائك مرة أخرى في موضوع يخص النساء ...

ولكن إن كان لابد من وقفة قصيرة مع ماجاء في مشاركتك فلتكن عند هذه العبارة :

اقتباس:

وبالرغم من التماسي في كتاباتك اعجابك بالرجولة المهذبة لكن لم توفقي في اخذها بعين الاعتبار ( رغم محاولتك )في مزايا رجل الاحلام

ياسيمون صدقني سأكون لك من الشاكرين لو ساعدتني على فهم المعنى الحقيقي للرجولة المهذبة ....أقسم بالله أنني ماعرفت معنىً لهذه الكلمة .

قال رجولة مهذبة ....ليه في رجولة مش مهذبة ؟

زهرة الصحراء

Posted by: young sister

صديقتي العزيزة سناء انا رح اختصر هال 22 بند يلي قلتيهن بكلمتين انو يكون الشب بيحب البنت لانو وقت بيكون في حب او بالاحرى بيكون بيحبهي بيكون مستعد يساوي ال 22 بند و فوقهن حبة مسك كمان ....بقى يعني عقولة المثل ان خليت خربت و ان بظن انو في كثير شباب بيتحلو بهالصفات هاي و ليكي زميلنا حسام فورا اتبرع يحط حالو مثال قدامنا
و اكيد بمنتدانا او براتو في كثير شباب بتتحلى بهالصفات
و اخير ا بقول للصبايا العزابيات بالمنتدى النشالله الله يطعمكن شب في كل هالمواصفات

Posted by: Desert rose

الصديقة العزيزة young sister...

كلام من ماس ...كلام من ذهب ....عند ما يشعر إنسان بالحب الحقيقي إتجاه فتاة أو إمرأة رح يعمل المستحيل ويتجاوز كل الخطوط الحمر لتتوفر في هالشرط ....ولكن هيهات وين بعد في حب حقيقي ....!!

أما عن الزميل حسام فياعزيزتي أتعودنا علي .....كازانوفا عصره ....دائماً حاضر لتقديم أي تسهيلات للحصول على قلوب النساء الفتيات ..ولكن للأسف مابيطول و بيتغير بعدين.................

وأغلب الشباب والرجال هيك .........

مع تمنياتي بأنو يكون حظك أوفر بحصولك على شب بتتوفر في بنود

دخلك ليه مابتوقفي بالطابور اللي واقفين في الصبايا وناطرين الرضى من كازانوفا عصره

النعمة الوحيدة اللي بشكر ربي عليها أنو أنا الله مريحني من الوقفة بالطابور *************

مازلت مصرة بأنو ممكن الخطين المتوازيين يلتقوا ومش ممكن يلتقوا هيك صفات مجموعة برجل .

زهرة الصحراء

Posted by: maikel

أولاً الرجل المثالي بنظر كل مرأة مش موجود
متل المرأة المثالية بنطر كل رجال مش موجودة
يعني المعاناة متبادلة

لحتى تنوجد هذه الصفات في الرجل يجب على المرأة أن تظهر صفات أخرى نحو الرجل

أولا: الثقة :

عندما يكون موقف المرأة انفتاحيا وتقبليا نحو الرجل يشعر بأنه موثوق به ، والثقة عند الرجل تعني الاعتقاد بأنه يبذل أقصى جهد لرعاية وخير المرأة ، وعندما يكشف رد فعل المرأة الإيجابي في قدرات رجلها ونياته تكون أولى حاجات الحب الأولية قد أشبعت ويكون اكثر رعاية وانتباها لمشاعر زوجته وحاجاتها.

ثأنياً: التقبل :

عندما تتلقى وتستقبل المرأة الرجل بكل بحب واستحسان دون أن تحاول تغييره يشعر بأنه متقبل وهذا لا يعني أن الرجل كامل وليس لديه أخطاء ولكن يشير أنها لا تحاول تحسينه وأنها تثق بقيامه بالتحسينات المتعلقة به، فعندما بأنه متقبل يكون من السهل عليه أن ينصت إلى المرأة ويمنحها التفهم الذي تحتاج إليه وتستحقه.

ثالثاً: التقدير:

حين يقدر الرجل يشعر بأن جهده لم يذهب سدى وبالتالي يكون متمكنا أن يعطي اكثر وبصورة آلية محفزاً إلى احترام شريكته اكثر.

رابعاً: الإعجاب :

مثلما تحتاج المرأة إلى تفاني الرجل فالرجل يحتاج أن يشعر بإعجاب المرأة والإعجاب الذي يريده الرجل من المرأة هو أن تنظر إليه بإكبار وابتهاج واستحسان سار وأن تكون مسرورة من خصائصه الفريدة ومواهبه والتي يمكن أن تتضمن الفكاهة والقوة والإصرار والاستقامة والأمانة والغرام واللطف والحب والتفهم والتفوق والنجاح والكرم والشهامة والتفاني في رعاية الأسرة وغيرها من الفضائل وحين يشعر الرجل بأن المرأة معجبة به يشعر بالأمن إلى درجة تجعله ينذر ينذر نفسه لأسرته وزوجته ويهيم بها.

خامسا : الاستحسان :

كل رجل يريد في أعماقه أن يكون بطل امرأته أو فارسها في درع لامع ودلالة أنه نجح في اختباراتها هو استحسانها وموقف المرأة الاستحساني يعترف بالطيبة في الرجل ويعبر عن الرضا الشامل به ( تذكري بأن بذل الاستحسان لرجل لا يعني موافقته دائما)ً والموقف الاستحساني يركز على المواقف ونوايا الخيرة والإيجابية في أعمال الرجل وعندما يتلقى الرجل الاستحسان يكون من السهل عليه أن يصادق على مشاعر المرأة.

سادساً: التشجيع :

يحتاج الرجل إلى التشجيع من المرأة والتشجيع يعني التعبير عن الثقة بقدراته وشخصيته وهذا يعطي الأمل والشجاعة للرجل، ويشجع على إظهار كل إمكانياته، أن التشجيع الدائم من المرأة للرجل يحفزه إلى أن يقدم اطمئنانا لطيفً هي بحاجة إليه.

(قاعدة هامة )

يظهر الخير والحب في الرجل عندما تشبع حاجات الحب الست الأولية لديه.

أخيراً سناء يمكن نسيتي صفتين مهمين ما ذكرتين وهم
أن الرجال تكون أيده والضرب لما بيتعصب

ولا لشو بيكون رجال
ويشرب ويدخن ولا لشو بتكون عيشته

لكم أجمل تحية
مايكل

Posted by: سيمون برصون

قاعدة هامة )

يظهر الخير والحب في الرجل عندما تشبع حاجات الحب الست الأولية لديه.

التمس التوضيح لهذه الفكرة
عذرا ضبابية شوي علي

سيمون

Posted by: سيمون برصون

ops عذرا maikel انا تسرعت في قرائة الجملة sorrrrrrrrrrrrrrrrrrrrrrrrrrrrrrrry

Posted by: merellaa

حساموووووووو أول شي كل عام وانت بخير والمسيح قام ... حقاً قام
صرلي زمان ما دخلت كنت مشغولة بالعيد والكورال والكشاف لهيك ما قريت ردك علي

هي من اسبوع زمان و هيك اي شو خليتي لقدام؟؟؟؟؟؟؟
يعني انا صرت هكلان همك بس تشرفينا بشي زيارة عزيدل شو رح يصير فيكي ؟؟؟

لا تهكل همي يا مهجة قلبي هههههههههههههههههههههههههههههههههه
أولاً ما بعرف روح على زيدل لهيك ما رح يصرلي شي تاني شي
تاني شي اسأل يلي سجلني بالمنتدى أديشو قلبي بيوسع كل الناس ههههههههههه كبير طولو 150 سم وعرضو 150 مكعب ههههههههههههههه
ربي يحميك وكلك زوق يا غالي
ميمو

Posted by: RUSHA AWAD

مرحبا للجميع:
انا على ثقة تامة ان كثير من الصفات المذكورة أعلاه تحمل نفس المضمون ولكن شكرا لك سناء على تفصيلها لجعلها اوضح وأسهل هضما من قبل الشباب معنا في المنتدى اعضاءا كانوا أو قراء وعلى ثقة أيضا من ان تلك الصفات التي يجب ان تتوفر في الرجل ليكون فارس الاحلام بالنسبة للمرأة يجب ان تتوفر في المرأة نفسها وعلى أن تكون مقابل التضحيات التي يقدمها أحد الطرفين احترام وتقدير وتضحية لا تقل عنها عند الطرف الاخر ولو أن ما أكتبه الان يتوفر بنسبة20% في مجتمعنا لكنا بألف خير "ونحن الان بخير ولكن ليس بألف خير".
لحد هون الكلام حلو ومافي شي يزعل اي طرف بس هالسيناريو اللي اني كثير بحبو مانو عم يتطبق بمجتمعني وطبعا السبب واضح وماعد في داعي يكون موضوع للمناقشة وهوي "مجتمعني مجتمع ذكوري والزلمي عندو من حالو" لدرجة انو بيفكر عيلتو سفينة وهوي القائد ومن واجبو يوصلها لبر الامان "انشالله يوصلو للمينا الصح ومايضيعو بوسط البحر".
أني ماعد كثير حبيت ادخل بنقاشات بتتناول هيك أمور "بدون شدة عالميم" بس حبيت فكرة مهمة كثير ذكرها سيمون بالنسبة لوضعو وتربيتو بكنف أم عندها انفتاح عالمجتمع وعلى تماس مباشر بمشاكل المرأة وخليني قول المرأة المكافحة بكل معنى الكلمة والكل بيشهدو على هالشي , بس ياترى قديش نسبة الرجال او الشباب اللي ربيو بهيك اجواء او تحت كنف أم بس يعني بدون تدخل أي عنصر ذكوري ولو ما ربيان سيمون بهيك أجواء رح تكون مواقفو أو مواقف غير شباب نفس الشي تجاه المرأة؟ أو رح يكونو مثل أغلب شباب المجتمع؟......هلأ اني برأيي " ان كان صح او غلط" من هون بتبلش المشكلي او من هون بتموت , يعني من نقطة اسمهي العيلة اللي هيي اساس اي فكرة او معتقد عند اي شخص بهالمجتمع وقد مايكون مجتمعنا ذكوري مارح يقدر يأثر على تفكير انسان ترعرع بطريقة سليمة بكنف عائلة منفتحة عندها احترام المرأة والرجل على حد سواء بس برجع بقول انو وقت منطلع على مجتمع مثل زيدل منلاقي انو عدد الشباب او العائلات اللي عندهن هالوعي بينعدو على ايد وحدي "ياترى بدني شي اصبعين من الايد الثانيي ؟؟ مابظن" معناتو ماخليت الدنيي بعد من كم شب بتتوفر في معظم هالصفات "مو كلها" وصدقوني واني عم احكي عن ثقة انو في كثير حالات بمجتمعني شايفتها مثل ما كل الناس شايفينها وهالشي بيرفع الراس وبيخلي في شوية امل بالنفس يعني كمثال رح استعين فيك ياسيمون بالموني اذا بدك واذا بدك سلبطة لحتى أكد وجود رجل بتتوفر في صفات من اللي ذكرتهن سناء واني هالشي بشوفو من خلال احترامك ومحبتك لأمك " مو مثل احترام او محبة اي شب لأمو وكمان مابيعني هالشي انو بقية الشباب ماعندهن احترام لأمهاتهن مشان ماتفهمو حكيي غلط" بشوف هالشي من خلال تشجيعك الكبير لزوجتك نتالي واحترامك الأكبر والوعي اللي عندك للمساواة بين المرأة والرجل بشكل عام بالمجتمع.
هلأ اني عندي بالنتيجة المرأة والرجل وقت بيخلقو عندهن نفس القدرات ونفس الأحاسيس والمشاعر والاستعداد للتغيير للأفضل او للأسوأ بس الغلط اللي عم يصير بيبلش في أهالينا وقت اللي بميزو بين الشب والبنت والأفكار اللي بيزرعوها بعقولهن بالاختلاف الكبير بين الجنسين واللي هوي مانو موجود يعني كمثال بسيط كثير كثير وهوي انو الشب عيب يبكي لأنو الزلم مابتبكي بس البنت ولأنها حساسي أكثر من الشب معليش اذا بكت وجوعرت على كيفها وهالشي طبعا غلط لأنو في كبت كبير لمشاعر الشب وتسخيف لمشاعر المرأة يعني الأهل من خلال طرق تربيتهن بيظلمو الشب مثل مابيظلمو البنت وهالفكرة عن الرجولة والذكورية بمجتمعنا كان ضحيتها الرجل واللي على طول عندو خوف او عزة نفس مابتسمحلو يتحرر من هالقيود مع العلم انو الفرصة دائما موجودة.
هلأ اني خلصت حكي بهالموضوع وجي وقت الأهلين والسهلين بسيمون يعني عيب بعد ما استعنت في كمثال بردي مارحب في موهيك ؟؟؟؟ صدقني اني كثير مبسوطة بانضمامك لهالمنتدى الغالي على قلوبنا كزيدليين وصار غالي على قلوب كثير ناس برات زيدل. بتمنىانك تستمر معني حتى نستفيد من خبرتك بالحياة ومن أفكارك واني شخصيا ماعندي شك بهالشي وانشالله كمان نقدر نفيدك بشي بس المهم يضل الحوار والتواصل موجود.

مع حبي واحترامي
رشاعواد

Posted by: Desert rose

رشا أعذريني على سرعتي بالرد ولكن كمان تأخري كان رح يخليني أفقد حماسي بالتعقيب .
فقبل ما اترك بيروت حبيت أتصفح مواضيع المنتدى للمرة الأخيرة ومن سوء حظ سيمون أني قريت ردك ومديحك لها الإنسان اللي معرفتي في أنا طبعاً حديثة كتير وتمت عن طريق أحد الأصدقاء بجاكسن فيل ...وشفهياً فقط .
مابعرف شو لازم نفهم من كل هالمديح ..وكأنك يارشا عم توصلي رسالة بأنو في رجال بتحمل كل الصفات المذكورة بأول الموضوع .
صرت خايفة قول أي ....لأن إصراري رح يخسرني التحدي .
وكمان خايفة قول لآ تما يخسر سيمون هالشهادة الحلوة في .
فقبل ما الكن باااي الى اللقاء مرة تانية يوم الأتنين ..رح قول بيضل لكل قاعدة شواذ كبير وهالشواذ وحده بيخلي الدنية بألف خير .
مايكل رح أقتبس هالجملة من مشاركتك وأستعيد حق المرأة بتبديل المذكر بالمؤنث :

اقتباس:

كل رجل يريد في أعماقه أن يكون بطل امرأته أو فارسها في درع لامع (( البند الخامس ))

"وكل إمرأة تريد في أعماقها أن تكون بطلة زوجها أو فارسته في درع لامع "
بس من وين بدنا نجيب هيك رجااااال

لكم كل الإحترام والتقدير ..تحية خاصة لوالدة سيمون

زهرة الصحراء

Posted by: tomassen

مرحبا للكل :
بحب ضم صوتي لصوت رشا و قول بما انو الانسان ابن بيئته فالشغلة كلها بتبلش بالبيت يعني انا غالبا بحط الحق على المرأة (الام ) مع احترامي لكل الامهات بس يمكن بعد ما هي بتكون عانت من معاملة التمييز بين الصبي والبنت من صغرها بترجع وبتغلط نفس الغلطة مع اولادها ، يعني ليش لازم يكون في فصل وتمييز بين واجبات الاولاد
انا برايي لازم الاولاد يتحملوا نفس الواجبات ويكون الهم نفس الحقوق مثلا الكل مسؤول عن ترتيب تخته وتيابه ومو بس البنت بترتب تختها والام بترتب تخت الصبي وهيك بينتج عنا صبيان وبالتالي شباب وبعدين رجال ما بدهن مين يخدمهم وهيك منخلص من فكرة انو لازم الشب يتزوج منشان يجيب حدا يخدمه او بكلمة الطف شوي تدير بالها عليه
على كل حال لازم نبلش بحالنا بهالموضوع وبكرة اذا لاقينا زلمة محرز بلكي منقدر نربي ولادنا بدون تمييز

Posted by: RUSHA AWAD

بالعكس سناء خليكي متحمسي وكتبي اللي بتريدي وفورا خصوصي اذا كنت مثلي مافيكي تنامي وفي عندك كلمة حابي تقوليها قبل ماتنامي

. الحقيقة فكرتي بكل بساطة انو ممكن يلتقى كم صفة من اللي ذكرتيهن عند كم شب "بس" بمجتمعني الزيدلي و مو بالضرورة كل الصفات تتوفر . وهالشي مابيعني ابدا انو الشباب يشوفو حالهن هلأ ويكون راسهن كبر شوي على حكياتي

, بالعكس, لازم يحاولو جهدهن لحتى يكونو احسن وقبل مايقولولي المرأة لازم تحاول جهدها رح قلهن انو اغلب النساء عندهن الاستعداد ليكونو أحسن مما هني عليه بس ياريت انتن تتكرموا وتبادرو لانو اصلا النساء مبادرين خلقة وعودو شوفو كيف حياتكن بتصير

او رح تكون " للعزابية".

مع حبي واحترامي
رشاعواد

Posted by: angel

مرحبا" للجميع...
بحب أول شي رحب بالأخ سيمون بيناتنا واللي فاجأني الحقيقة ببلاغة حرفه وعربيته الفصحى السليمة بالرغم من سنين غربته العديدة .. وانشالله بيقضي معنا بالمنتدى أمتع الأوقات وبيتحفنا بمشاركاته الجميلة ...
وبحب ثاني شي نوه إنو دفاع سيمون عن المرأة ما نتج من فراغ .. لإنو الله أحاطه أولا" بأم عظيمة .. فالخالة أم سيمون مثال للمرأة الصلبة الطموحة المناضلة الصابرة والحكيمة_ الله يخليها فوق راسه _ وثانيا" بزوجة سكرة بتنشرب مع المي العكرة..الله يخليهم لبعض..
مابعرف حسام ليش نسيتني من جيل ال76 أو عم تذكر اللي كانوا معكم بالصف ؟؟

Posted by: سيلفانا خوري

انا معكم صبايا ومع فكرة ان لكل قاعدة شواذ لذلك الامر مانه مستحيل
اللي ممكن يضايق الفتاة في مجتمعنا ليست الذكورة بقدر ماهو الاستعلاء الذكوري النابع عن شعور الذكر بالقوة والقدرة على القيادة اكثر من الانثى التي يراها اضعف منه جسديا ولا تقبل ذكوريته بان تكون هي المتحكمة وانما ضعفها وانصياعها قد يشعره بانوثتها وبفائض رجولته لذلك يحاول عن قصد او عن غير قصد ان يتخلى عن الرومانسية الزائدة او عن بعض المواصفات المذكورة.......

والمرأة على الرغم من رغبتها في ان تكون النصف المكمل وليس النصف الضعيف تنساق غريزياً الى ملامح هذه الرجولة
الرجولة التي ليست تسلط وانما إحتواء ليست انانية وانما عطاء ..وبالطبع ليس كل ذكر يحمل مواصفات الرجولة؟؟؟؟؟

وكما يريدها هو جميلة وذكية متفهمة وواعية عاشقة وصديقة تفهم افكاره وترضي غروره وكبريائه وتشاركه فشله نجاحه طموحاته كذلك هي تننتظر منه ان يروي احاسيسها ومشاعرها لانها في النهاية كائن عاطفي لا يينمو ويزدهر من دون سقاء الحب والحنان ولااعتقد ان هناك إمرأة تعشق الرجل المهتز الشخصية والغير القادر على اثبات قدرته في القيادة ورجولتة فمن الطبيعي أن يكون رجلا ً لتشعر هي بانها انثى ؟؟؟؟؟

سناء الله يكون معك وانشالله بتوصلي بخير وسلامة
و رشا لا تزعجي حالك.. بيكفي نقول جملة واحدة ومختصرة...
( ذكورة الرجل لا تكملها الا انوثة المراة)

مع تحياتي سيلفانا

Posted by: hosam abdulaziz

يا جماعة خافوا ربكم , كمان بدكم تعترضوا عمشيئة رب العالمين ؟؟؟؟
اذا هو من وقت خلق البشرية , جعل البنية الفزيولوجية للرجل , اقوى من البنية الفزيولوجية للمرأة ,و اكيد كان هالشيء مدروس و مخطط و ليس عن عبث او صدفة.
و بنفس الوقت بنية المرأة الها مزاياها و خصوصياته و ليس بالضرورة ان تعني ضعفها.
فاذا رب الكون هيك بده , ما بعرف ليش نازلين كيل التهم عالرجال بأنه متسلط و مستبد و قيادي و لا يقبل الأوامر بل يصدرها و و و .
و ما بعرف كنكم ما رح ترضوا الا ما تشوفوا الرجال صاروا كلهم (مستانثين) و النساء صارت مسترجلة !!!!!!!

بصراحة انا كثير بستغرب وقت بسمع البنات بزيدل عمتتذمر بهالطريقة عن واقع حالها بخصوص المساواة مع الرجل !!!!! لأنه الواقع بيقول غير هيك معليش اسمحولنا فيها .
و لازم تبوسوا ايدكم كل يوم وجه و قفي عهالزلم اللي مثل الجواهر كلها و اللي اغليهم بيتمتع بقسم كبير من الصفات المذكورة.

بدوري بوجه شكر لكل شخص وجه اطراء الي بهالمشاركة و بتمنى اني ظل عند حسن ظنكم ,
بس سناء ما خبرتنا شو وجه الشبه بيني و بين كازانوفا ؟؟؟
انا كل اللي بعرفه عن كازنوفا انه اشهر الابطال الشهوانيين للجنس و برقبته شي 120 امرأة ؟؟؟ فهل من تفسير ؟؟؟؟

و لأنجيل بقول اكيد ماني نسيان انك من جيلي , بس ان اعم بحكي عن جيل 1976 بزيدل فقط و انت بعد ما حل نعطيكي الجنسية الزيدلية , انشاء الله شي 20 سنة ثانية بنفكر فيها.

merellaa صرت اتحسر عالأيام اللي ما كنتي معنا فيها بالمنتدى , الف شكر لأبونا جورج اللي عرفك علينا و شجعك للانضمام النا .

اما الـ young sister تمنيت تكون شهادتك اجرأ من هيك يا زميلتي ( منين طلعتيلي بقصة الزمالة ؟؟؟ )

و اخيرا بشكر كل اللي عبروا عن آرائهم بالموضوع من مايكل و سيمون و رشا و tomassen و سلفانا.

Posted by: RUSHA AWAD

كلني منعرف انو الأرض بتدور داير الشمس وكمان بتدور حول محورها بس كونو على ثقة تامة انو هالمحور مانو "الرجل". وكمان بما انو عم نحكي عالكرة الأرضية: في وجهين لهالكرة بيتبادلو الأدوار بشكل متناغم وتبادل هالأدوار الو دور كبير بالحفاظ عالحياة بهالكوكب وهالوجهين هني (وجه مظلم ووجه مضيء) يعني احيانا بصير الوجه المضيء مظلم والمظلم مضيء وهلما جرى بس اذا الارض بدها توقف عن الدوران رح توقف الحياة بوجه ويمتد هالدمار والموت للوجه المضيء وهيك العلاقة بين الرجل والمرأة "مثل ما أني بشوفها بهيك مجتمع مثل مجتمعني" يعني بدها تمر احيان يكون الرجل هوي الوجه المضيء لهالعلاقة و العكس صحيح بس المصيبي انو يوقف تبادل الادوار وهيك بكون أحد الطرفين هوي المسبب الأول اللي بيقضي عالتناغم بيناتهن واللي بدورو بيقضي عالتواصل ووووو....حتى تدمر العلاقة من اساسها هون عاد "يعوض بسلامتكن" وشو السبب الأساسي؟؟؟؟ السبب واضح وصرلني عم نعيد ونزيد في بهالموضوع وبعدة مواضيع سابقة.
بعد كل هالكلام عن التناغم والتوافق الفكري ووووووو بيجي حسام وبيبلشلي بنظريات اني شخصيا ماني مقتنعة فيها بالمرة

يا جماعة خافوا ربكم , كمان بدكم تعترضوا عمشيئة رب العالمين ؟؟؟؟

اذا هو من وقت خلق البشرية , جعل البنية الفزيولوجية للرجل , اقوى من البنية الفزيولوجية للمرأة ,و اكيد كان هالشيء مدروس و مخطط و ليس عن عبث او صدفة

مدروس مشان شو؟؟؟؟ وشو العبرة انو الرجل يكون أقوى من المرأة فيزيولوجيا برأيك؟؟؟؟؟؟

و ما بعرف كنكم ما رح ترضوا الا ما تشوفوا الرجال صاروا كلهم (مستانثين) و النساء صارت مسترجلة

يعني مابتصور صرلني عم نعيد ونزيد بالكلام عن المرأة والرجل مشان يكون في براس اي انسانة عم تسعى للمساواة " بالدرجة الاولى" فكرة انها تسترجل والزلمي " يستأنث" حلوي هاي يستأنث.
بس على كل حال لا عتب على أفراد عايشين بمجتمع بشوفو في التفاهم والاحترام المتبادل بين الرجل والمرأة استرجال من المرأة او خنوع من الرجل " اي شو القصة معركة والشاطر اللي بينتصر؟؟؟؟؟!!!!!"
على قولة: " اي لكن ياعمي ماشي على كيفها مثل التوتو, مالو كلمة بالبيت ولا بيسترجي يقلها لاء على شي, جوز الست, وووو...."
اي لكن , والله العظيم معكن حق, لانو اذا صرتو مثل فلان من الناس اللي عاطي قيمة لمرتو بتصيرو مثلو بعدين يعني مثل التوتو وأني شخصيا مابرضالكن ياها بالمرة.
اني أساسا ماكان عندي شي ضيفو بعد المشاركي اللي حطيتها بالأول بس حكيات حسام خلوني عيد النظر ويمكن مجتمعني ماخرج نكون في ديمقراطيين بالتفكير تجاه الاخر

وانشالله كون غلطانة بهالجملي.

مع حبي واحترامي
رشاعواد

Posted by: hosam abdulaziz

يا رشا القصة منها قصة تنظير و لا شيء
بس انت كثير متحاملة عالرجال و دوره القيادي بالمجتمع و معتبرة هالشي نوعا من التسلط و الاستبداد.
انا حبيت وضحلك انه لرب العالمين دور بهالشيء عبر الصيغة اللي خلق فيها الجنسين.
و ابسط مثال رح ذكرك فيه هو برسلة القديس بولس الى اهل افسس و اللي بتتلى في سر الزواج وقت بيقول الكاهن للمرأة:
ايتها النساء اخضعن لأزواجكن كما لربنا ، لان الرجل هو رأس المرأة ، كما أن المسيح هو رأس الكنيسة ، وهو مخلص الجسـد،
فكما أن الكنيسة تخضع للمسيح، لتخضع النساء لرجالهن في كل شيء
و ما بعرف اذا عندك اعتراض عكلام القديسين ؟؟؟
و انت بالايام بس نفرح منك , رح توافقي عهالكلام قدام الكاهن و الناس و انت مبسوطة و عمتضحكي كمان

.
انا بتمنى عليكي ما تحملي المسؤولية عالرجل او المرأة لأنها قصة اكبر من قدراتهم و مرسومة بدقة لتحدد هالمعادلة هي.
لأنه عمر البشرية يفوق ال 5 آلاف سنة و بعدها ماشية عهالمنوال و ما تغير فيه شيء حتى الساعة.
فما معقول نتوقع من رجل القرن الواحد و العشرين انه يغير من هالصيغة هي, بس كمان لازم نسجل نقطة بحق الرجال هالأيام و انهم اكثر استيعابا من ذي قبل لزوجاتهم و اصبحت المساواة موجودة بنسبة كبيرة تصل الى 90%.

اخيرا بحب قلك انه نحنا على خلاف كبير بهالموضوع و يمكن ما رح نتفق , بس الأكيد منه اننا متفقين بأمر وحيد و هو انه كل واحد مننا عميقول بينه و بين حاله عن الثاني:
الله يعيين اللي رح يبتلي بالايام فيك .

Posted by: سيمون برصون

ابهجت روحي حفاوة الترحيب و المحبة التي غمرني بها اعضاء هالمنتدى, و ادفئ قلبي وشاح مديح الاحباء الذي امنوا علي به , وشاح خيوطه مسؤولية بتمنى ان ارقى لها, سأحاول قدر ما استطعت ان اشارك واساهم معكم في رعاية هذه الشجرة العظيمة املا ان نستلذ ونستفيد جميعا و أولادنا من بعد بثمارها الطيبة
بعد هالشهادة الحلوة التي امتن لها من رشا ( وهي العضو الحبيب في حزب الحلاوة و الدلع),و شبه الاجماع على انني اقف على اقرب نقطة للاعتدال في هذا الموضوع بات متوجب علي ان اعطي وجهة نظر مفصلة
اولا احبب تصحيح فكرة مهمة وردت و اطمئنكم ان الرجال المؤمنين بدور المرأة في المجتمع و أهميته هم نسبة جيدة في يومنا هذا لا بل تشكل نسبة عالية في مجتمعات لهابعض الخصوصيات و ان اختلف مدى تحررهم من قيود المجتمع الذكوري و هذه النسبة تشكل نواة و قاعدة حقيقيةللتغيير لكن تراكمات من عمر الانسان ليس لها من عصا سحرية
التغيير قد بدأ ولا يمكن ايقافه الا بتدمير التقدم العلمي و التكنولوجي الذي شكل اساس التغيير الاجتماعي.يفسر هذا ارتباط وضع المرأة القانوني بتقدم المجتمع العلمي والتقني و يفسر اصرار العقائديات الرجعية المبنية على ذكورية المجتمع رفض التقدم العلمي و وسمه بالشيطانية.
بالعودة الى شروط الرجل المناسب التي تبنتها سناء نرى ان ما تصبو له المرأة هو بعد مشاعري انساني للرجولة ولا تمانع أو تعترض على المزايا الفيزيولوجية الذكورية, انها تطالب ان يكون الرجل على مستواها في المقدرة على الاحساس و فهم و ترجمة عواطفه مغفلة ضعفه و تقدمها عنه باشواط سيكولوجيا
ان المراة تنعم بتقدم و تمييز نفسي يوازي التمييز الجسدي للرجل لكنه غير واضح للعيان ولهذا لا يعطى اهمية بقدر التمييز المرئي عند الرجل
طبيعة الكائن البشريفرضت على كل من جنسيه وظائف معينة لضرورة البقاء والنظر في هذه الوظائف يمكن ان يشع الضوء على العوامل التي لعبت دورها في تطوير الكائن البشري لما هو عليه الان جسديا و نفسيا
مسؤولية الاستمرارية وقعت على عاتق الذكر فاعطته التمييز الجسدي لتلبية مترتبات هذه المسؤولية من حماية و تامين سبل البقاء ( مأكل,مشرب,مسكن,... وكل ما يتبع). و مسؤولية الرعاية وقعت على عاتق الانثى فاعطتها التمييز السيكالوجي ايضا لتلبية مترتبات مسؤوليتها من امومة وتنشئة الصغار و حضانة(للكبار والصغار) و هذا ما اعطاها احساسها المرهف و تفاعلها مع ادق تفاصيل عواطفها(هذا يفسر مزاجية المرأة) و بما انها المسؤول عن تعليم صغارها التواصل (اللغة) برعت في قدرة التعبير وترجمة احاسيسها بدقة. اما الذكر (المظلوم) لم يبرئ من افتراسيته لما وفرت للانسان من سبل البقاء فكبتت عوطفه تحت وطئ دماء الوحش والفريسة ومن ثم دماء اخيه الانسان(بفعل طمعه), حتى ان قضائه في الصيد والحرب و العمل فترات طويلة جعلت من الصمت رفيقا له فترجم احاسيسه بحركات ايمائية (كالرقص و المصارعة)
نتجت هوة عميقة بين الجنسين و تواصل شبه معدوم حتى بعد ان ادرك الانسان وجوده و تمييزه و اقام مجتمعاته الحضرية و الحضارية و ذلك بسبب السيطرة الذكورية و وضع المرأة في المقعد الخلفي. لكن التطور التقني افقد الرجل قيمة تمييزه الفيزيولوجي الذي كان يمسكه زمام الامور و يخوله للتفرد في صناعة القرار
واحتك الجنسين لاول مرة في تاريخ البشرية على كل الصعد و في كل المواقع وبدأنا بصياغة انسان و مجتمع جديد اكن هناك معضلة ( انتن بتحكوا بالهمس و نحنا بنحكي باللمس , ما فينا نترجم, و مش موجود كتاب "تعلم الهمس في ايام خمس)
لكن هل في هذا سبب الصدام الذي نعيشه بين المرأة و الرجل؟
ادعوكم للقيام بتجربة فرضية (فلنسميها الارخبيل الازرق عنblue lagoon )
فرضيا اذا ما جمعنا طفلين(ذكر و انثى)ايما كان العرق اللون الجنسية الدين ...الخ في بيئة آمنة توفر لهما البقاء و لم نعرض نموهما و تفعلهما الطبيعي لاي مؤثرات خارجية, لكانت النتيجة الشبه مطلقة تعايش و تكاملهذين الانسانين و تناغم مطلق لخصوصيتهما و حتمية اشتراكهما للاستمرار و تكوين وخدة بشرية ( اسرة)
في بيئة مخبرية اي رجل ممكن ان يكون رجل الاحلام لاي امرأة , ذكوريته و انوثتها هما اساس التناغم و ليس اساس الصدام
وبالمقارنة بين البيئة المخبرية و الواقع لرأينا ان الفرق الوحيد هو التدخل المباشر في النمو النفسي الطبيعي لكلا الانسانين أو ( التربية الاجتماعية)
من هنا لا بد ان نصل الى نتيجة تؤكد ان جدار العزل الفاصل بين الرجل و المرأة هو صنيعة المربين , تصب اساساته مع ولادة الطفل ( تمايز الابتهاج لولادة طفلة أو طفل) وتنظم ابعاده بفصل الجنسين عن خصوصيات بعضهما فصل شبه تام في بعض المجتمعات
المتورط الاكبر من المربين في تغذية هذه العنصرية هم الوالدين. فتمييز الوالدين لاحد الجنسين (الذكور على الاغلب) واعطائه سلطانا على الجنس الاخر و عزل خصوصيات كل جنس على حدى هو الاساس الحقيقي لتحويل الندين المتكاملين الى خصميين متناقضين.
عوض ان يكرم الرجل الانوثى يستهلكها و تمقت المرأة الذكورية عوضا عن ان تامن معها و الحل الوحيد لهذه المعضلة هو ان تماشي و تواكب تربية اطفالنا لتقدمنا الحضاري و نبدأ بتربية انسان و ليس فقط تربية فتيات و فتيان

سيمون

والدتي ترد تحياتكم بقبلات شوق وتشكر و تفخر باطرائكم
.

للعزيزة نهلة و العم سليمان احلى تحية شوق و محبة
وسمع يا عم شو صاحبك القرواني مكفي
سرقوا ارز جبال الرب الحضارة الفينيقيي
سرقوا الحرف من التاريخ جبران و رحبانيي
سرقوا جونيه و راس بيروت التبولة الكبة النيي
ان قدر كحلي بهالقد بيلبق لللبنانيي

عم

Posted by: hosam abdulaziz

سيمون سرد جميل قدمتلنا اياه و توضيح و لا اروع بس هالشيء ما بيمنع اني خالفك الرأي
بموضوع انه الرجولة و الأنوثة هي امر بنكتسبه بالتطبع و التربية.
انا من وجهة تظري الغريزة بتلعب دور بهالخصوص, يعني الرجولة شغلة موجودة ضمنا فينا
و فيزيولوجيا و العلم بيثثب هالشيء عبر الفرق في الهرمونات المنتجة عند الجنسين و اللي
الها دور بالطباع لدى كليهما.
رح اعطيك بعض الأمثلة:
كلنا بنلاحظ توجه الاطفال الصغار ضمن عمر السنتين او ثلاث , فوقتها ما فيني قول انه الولد
تربى عالرجولة و البنت تربت عالأنوثة
فلو حطينا طفلين ذكر و انثى بغرفة العاب
لاحظ فورا كيف الولد بيتقدم مم الألعاب اللي بدها عنف و حركة
بينما البنت بتروح فورا عالدمة و اللعاب و تبلش تحاول تغنجها و تربيها .
فهون براي الغريزة الها دور قبل التربية .
لو نظرنا مثلا بموضوع الحيوانات اللي من خلقها مجبورة تمشي عرجليها.
فلاحظ مثل الغزال وقت يخلق خلال 5 دقائق بيوقف عرجليه , و فورا بيبلش بالهرب وقت
يشوف حيوان مفترس قرب منه و بيهرب برفقة اهله
فهذا ايمتى لحق يتعلم انه هو رح يكون فريسة من حيوان آخر و انه مطلوب منه الهروب
حتى ينجو بحياته.
فهي امثلة بسيطة انا مقتع فيها بأنه التكوين الفيزيولوجي لأجسامنا مع الغريزة اللي بتكون
فينا , هي بتلهب الدور الأول بقصة الرجولة و الأنوثة و ليس عملية تربية نهائيا.
الكلام اللي حكيته حول بدايات الحياة البشرية منطقي كثير بترسيخ هالمبدأ بين الجنسين و
تقوية شوكة الرجل اكثر.
و انا في عندي تفسير آخر لهالموضوع من وجهة نظري , بس بتمنى تتقبلوا هالتفسير و
هو:
انه عملية الجنس بحد ذاتها بين الجنسين , بتعطي للرجل دور الـ Leader بهالعملية , و
لو كان من الناحية الظاهرية و بتشبيه آخر انه الرجل هو المفترس و الأنثى هي الفريسة.
و هالشي بتصور عطا تميز للرجل و اعطاه سبب آخر انه يتفوق على الأنثى بحياته.

Posted by: سيمون برصون

يمكن كتابة العربي بدون التشكيل النحوي بيصعب قرائة الجمل و التعبير المقصود
لكن يا حسام ظلمت الموضوع و ظلمتني بهالرد

انا اثبت ان الذكورية و الانوثى وتناغمهما هو الامر الطبيعي و ان التربية الاجتماعية هي السبب الوحيد الذي يجعل منا مفترس و فريسة

Posted by: Desert rose

أبداً أبداً سيمون رح خالفك وقلك مش صحيح بأنو اللغة العربية صعبة الفهم من دون تشكيل .
اللغة العربية حروفها واضحة ومش بحاجة لا للتأنيث ولا للتذكير.
اللغة العربية فقط مضمونها خاضع للتحوير وللتغيير .
كلماتك كانت واضحة ورسالتك كانت مفهومة للدرجة اللي فيها شعرت بنفسي وكأني ريشة خفيفة محمولة على نسمة لطيفة عم بتمايل بين سطورك بتعقيبك الماقبل الأخير .
وللتأكيد على على كلامي بأنو اللغة العربية مضمونها مش الواضح ...فبمشاركة سابقة نعتت حسام بكازانوفا عصره .
فقام حسام وشد اللحاف لعند...... جياكومو كازانوفا (1725- 1798) المغامر الإيطالي من القرن الثامن عشر، واللي اشتهر بمجونه وبمغامراته وعلاقاته العاطفية الكثيرة وولعه الشديد بالنساء حتى أصبح يضرب باسمه المثل بسبب مغامراته العاطفية الكثيرة.
طيب هون أنا بستغرب ليه حسام ماشبه حاله مثلاً بـــ خوسيه كازانوفا أستاذ علم الإجتماع المعروف في جامعة شيكاغو ...أو بغير كازانوفا مثلاً ... فهل من تفسير ؟؟؟؟

النتيجة إذاً مش الحق عل التشكيل بفهم اللغة العربية الحق أولاً وأخيراً على الفن بالتفكير .
ولكن سبحان الله في مثل شعبي حلوا كتير بيقول :

اللي في شوكه بتنخزه

على فكرة الإشارات أهم بكتير من التشكيل فأنوا قلك :
سيمون أنت مهضوم ؟
هون بكون عم بسألك ؟
أو قول :
سيمون شب مهضوم .
هون بكون عم أحكم على هضمنتك

.

زهرة الصحراء

Posted by: tomassen

مع انو بتعجبني افكار حسام بس هالمرة ناقص كلامك يعني كفي شو بيئولوا للعريس بالاكليل "أحب امرأتك هذه كما أحب المسيح الكنيسة" يعني محبة بلا شروط وبلا حدود
بالمحصلة بعتقد فينا نلاقي زوجات بتخضع للزوج بكل شي بس ما منلاقي رجل بيحب زوجته 50% من محبة المسيح للبشر
وتاني شغلة مختلفة فيها معك هي انكارك لدور التربية ، صحيح الانسان بيخلق فيه مجموعة من الغرائز بس التربية بتساعد على تهذيبها
على كل حال الجدل حول موضوع الرجل والمرأة برأيي جدل عقيم مامنو نتيجة وما بعرف ليش على طول بيعتبروا الزواج أو أي علاقة بين الرجل والمرأة لازم تكون النتيجة يا قاتل يا مقتول بدل ما ينظروا للجنسين على انهم شريكين مكملين لبعضهن(take it easy)
وبالمناسبة في مثل روماني بيقول "اذا كان الرجل هو رأس البيت فالمرأة هي الرقبة التي تدير الرأس كيفما تشاء"

Posted by: Litany

أول شي بحب إني أبدي إعجابي ب DESERT ROSE وعن جد اسم على مسمى
بصراحة سناء بحس إنك متل الأم الحنونة لكل أصدقاء هالمنتدى .. مواضيعك وردودك دايما تلامس العقل والقلب وتضفي احساساً يشبه ذاك الذي تحسينه حين تمررين وردة على خدك فتغدق عليك يأجمل الأحاسيس: نسيم الصيف .. عبق الربيع ... نعومة بشرة الطفل. أنا مابقصد أكبرك بالعمر بس إنت كبيرة بعقلك وقلبك وحبك.

اما عن الصفات في الذي لم يولد بعد فهي حقاً ماتتمناها كل فتاة وعن جد هالصفات بخاف أحكي فيا وخاصة أمام أي شاب لأنه وقتها رح يكون رده بشكل مباشر أو غير مباشر متل ما عمل أخونا حسام إنه كل هالصفات فيه ويمكن أكتر وإذا حب يكون غير هيك و واقعي أكتر رح يدعي إنه حسب الطرف الآخر بتحدد العلاقة والمشاعر وغيره.... بس في شي الشباب مابيعرفوه وهو إنه مهما البنت طالبت بالمساواة بس بيبقى شعورها إنه تكون تحت جناح الشخص اللي ختارته يكون شريك حياتها بالمرتبة الأولى بشرط إنه هالجناح مايخنقها ويكون لمسة حنان وحب وحماية من كل شي ممكن يئذيها بعيد عنه.
وبيقوله الشباب عن البنات إنن عاطفيات ومانن عرفانين إنه هالنقطة لصالحن..
ليش....؟؟؟؟؟ لأنه للأسف لما الشب بيحب عن جد بيصير إما مجنون او بيتعطل عقله كلما لزمه بوجود حبيبته، وإذا ما حب أو راد يخفي مشاعره لحتى يبقى رجال بعيون رفقاته علأقل ... فهون هو غالباً غليظ أو غير مابتتمناه حبيبته إنه يكون... على عكس الفتاة البريئة والمسكينة بوجود هيك شباب. لما البنت بتحب بتصير رمز العطاء وما بيتوقف عقلها لأنه الحنان والعاطفية والحب أصلاً من صفاتها وحتى إذا ما حبت وتزوجت مثلاً لأنه قسمة ونصيب بس. بس كمان في هالحالة هي زوجة مخلصة وعطوفة وصابرة.

يعني كل الصفات اللي ذكرتيها ياسناء أنا بحب اقرا عنا بالقصص أو أشوفها بالأفلام بتكون أحلى وبتمنحك فسحة من الأمل وراحة النفس ... يعني هالصفات حرام نحكي فيا. إذا نوجدت فعلاً بتكون المفاجأة وقتها كتير حلوة وإذا ما شفناها مابنكون خسرنا شي طالما ماهي على بالنا .. في الخيال فقط ومهما ادعى الشباب عكس ذلك.

وبحب بعد ماطولت شويه بلحكي اللي مارح يحبوا الشباب.... إني فعلاً أشكر حسام لأنه دائماً بيضفي على كل موضوع بيشارك فيه وعلى كل رد شيء من الدعابة اللطيفة التي بتخليني أنسى إني عم أكتب لأ بحس إني جالسة معكن وعم نحكي ومبسوطين وصحي إنه أحيانا عم ينخلط المزح بالجد بس صدقني ياحسام بحس إنه ورا هالروح المرحة عندك في شي مخبا ...

بشكر جميع الأصدقاء وتحية من قلبي وأنا مبسوطة بانضمامي لهالمنتدى الراقي وبتمنى فعلاً إني كون خفيفة الظل ومقبولة من الجميع...

"في زمن الخرافات هذا.. بحثت عنك .. لم أجدك
ركبت البحر.. عانقت السماء.. فلم أجدك
عندما تعبت من العدو .. ألاحق السراب .. والخيبة تحاصرني...
هناك مرضت وتمددت هناك على فراش الموت
وهناك من بعيد البعيد ... من عصر سحيق ... من واد عميق
سمعت صوتك يناديني ...!!! لا تسألني كيف ...؟؟؟ فأنا لا أعرف ...
كل هذا اعتراني وأنا على فراش الموت
سمعت صوتك وأنا على فراش الموت
فانتعشت كعصفور جريح...

... لكني لم أجدْكْ ....؟؟؟!!!! " -مقتبس-

Posted by: Desert rose

هلق نسبة كبيرة أجمعت بأنو ممكن نلاقي هالصفات مجموعة برجال
بس !!!!!!

معقول نلاقي هيك رجال

بتقولوا المرأة بنص عقل وهالأتنين دخلكن بنص شو ؟؟؟؟؟؟؟؟؟؟

مه أنو بحب الــــ ************أكتر من الـــ ههههههههه بس والله هيك منظر بدو هيك ضحكة

هههههههههههههههههههههههههههههههههههههههههههه
ههههههههههههههههههههههههههههههههههههه
ههههههههههههههههههههههههههه
ههههههههههههههه
ههههههههه
ههههه
ههه
ه

ههههههههههههههههههههههههههههههه
ههههههههههههههههههههههه
هههههههههههههههه
هههههههههه
هههههههه
ههههه
ههه
ه

Litany شكراً للإطراء أتمنى أنني أستحقه

زهرة الصحراء

Posted by: سيمون برصون

بعد التمعن بالقراءة يمكن رح اقتنع برأي حسام

هههههههههههه (هي بس تكفي 70 حرف )

Posted by: Desert rose

سيمون في شي أسموا إقتباس
فإنك تقتنع برأي حسام من دون مانعرف بالضبط شو اللي أقتنعت في رح يولد عنا مشكلة بسوء الفهم والهضم وتصير الأفكار تاخدنا وتودينا على خاطرنا وعلى ذوقنا ...وهيدا شي مش سهل لاعليكن ولاعلينا .
فمابعرف أنو بعد كل اللي قريتوا شو هالشي العظيم اللي وافقت علي الصديق حسام .
بكل الأحوال هالموقف الموالي مش غريب عليك ....بالنهاية كمان أنت رجال ....وصحيح ممكن يكونوا اللي متلك قلال ....بس بالنهاية أسمك رجال ...وأكيد رح تكون عنصر معارضة لحزبنا يعني حزب النساء .
فالله يوفقك ويوفق كل شي في رجال بها المنتدى أنتوا لاتقربوا من حزبنا ونحنا بألف خير من الله

قال شو :

اقتباس:

المشاركة الأصلية كتبت بواسطة سيمون برصون

بعد التمعن بالقراءة يمكن رح اقتنع برأي حسام

زهرة الصحراء

Posted by: silva

أكبر تحية للغوالي00

لكل شيء في الدنيا اثنين000 العينان000 الحاجبان00الاذنان000 الشفتان000اليدان 000 الرجلان000 00000 لنتصور انسان يعيش بواحدة مما ذكر ت000 لكن التكامل بينهما منحه الله 00ومنه تبدأ قصة الحياة ولعل النسبية تظهر بكل منا بسب ما مر به خلال مسيرة حياته 000 والرجل ذو الصفات الواردة 00والفتاة ذات الصفات الموازية بنسبة أقل أو أكثر لاتهم بل الاهم كيف يرى كل منهما الاخر 00وما يريده بالاخر00وما قديتركه من أثر طيب خلال لقائهما القصير أم الطويل واأما لحسام فهو يستحق الافضل دائما وأتمنى له كل التوفيق

Posted by: hosam abdulaziz

اقتباس:

المشاركة الأصلية كتبت بواسطة silva

واأما لحسام فهو يستحق الافضل دائما وأتمنى له كل التوفيق

الف شكر الك عهالكلام الجميل و بتمنى كون فعلا بستاهله , و ما خيب ظن احد فيي باي يوم.
بس عاد شو بدك تعملي هالبنات عنا بالمنتدى كل وحدة لابسة نظارة شمسية سمكها متر و منهم شايفيين المنيح من القبيح و بيظلوا يدقوا فينا.
الله يفتح بصيرتهم يا رب

Posted by: Desert rose

اللي بيعرف بيعرف واللي مابيعرف بيقول كف عدس
أخت سيلفا شكراً جزيلاً على هالكلام العادل واللي في أنصفتي الرجل والمرأة
ولكن أعذريني أصابع اليد مش كلها متشابهة
ومش كل شخص حكى معنا بدبلوماسية بيكون دبلوماسي
وخصوصاَ بها الأيام اللي أصبحت في الدبلوماسية الإيجابية .....قمة النصب والإحتيال وخصوصاً من الرجال

زهرة الصحراء

Posted by: silva

لا تظن بأنك ستخيب ظننا فيك 000 واسمح لنفسي القول البنات شاطرات وستكون قريبا بالقفص ولعلك تطبق 00في التأني السلامة

وياغاليتي زهرة الزهور الدبلو ماسية جميلة ولايمكن لمن يملك الرؤية الصحيحة بالتميز بين الخطأ والصواب تمر عليه بالنصب والاحتيال

موقع زيدل سوريا حمص .. خدمات تشات و دردشة ... أرشيف المنتدى