الارشيف - الأهل تحت طائلة المسؤولية ...

Pages: 1

الأهل تحت طائلة المسؤولية ...
(انقر هنا ان احببت مشاهدة الموضوع الاصلي بالالوان و الصور )

Posted by: white flower

نرى خلال حياتنا نماذج كثيرة من الشباب منهم من كان مضربا للمثل في أخلاقه ونجاحه ....ومنهم من كان مضربا للمثل بسوء معشره وفشله ....ومنهم ..........
الى أي مدى يتحمل الاهل مسؤولية تكوين شخصية اولادهم ؟؟؟؟؟
هل نرى دائما في الاولاد ثغرات في قدرة الأهل و ثقافتهم التربوية ؟؟؟
الى أي مدى يمكن للاهل السيطرة على نوازع الابناء ؟؟؟؟؟
ما هي السياسات الاكثر نفعا للحصول على ما هو مرجو من الاولاد؟؟؟؟
هل يشكل حصول الاهل على ثقافة علمية فارقا ؟؟؟
لعل الموضوع يبدو بديهيا" ولكل منا نظامه ورأيه وتجربته وهذا هو ما نحتاجه فربما ساعدنا في تكوين قناعات أخرى اكثر نفعا

Posted by: angel

شكرا" white flower على طرح هالموضوع الهام ...
يمكن تربية الأولاد هي أصعب مسؤولية بواجهها الأهل بحياتهم ... لأنه أغلب السلوكيات الشاذة أو عقد النقص عند الأفراد تعزى لخلل بمرحلة الطفولة ...و مثل ما اتفضلت غالبا" ما نعزي نجاح أو فشل الأبناء في حياتهم للأهل أو جو البيت اللي ربيوا فيه ...أو نعزي سلوك الأولاد إلى حزم أو تراخي الوالدين في تربيتهم ........ لحد الاَن يمكن ما اتفق المحللون شو اللي بحدد سلوك الفرد هل هو الشخصية أو البيئة .... أنا شخصيا" بعطي علامة كبيرة للشخصية وبيبقي دور البيئة السليمة إنها تحاول تنمي الصفات الإيجابية وتشذب السلبية وبتصور من هون جاءت مقولة : الأولاد هداية من الله يعني بتسمعي أهل عم يقولوا مثلا":ابننا فلان ما حسينا بفترة مراهقته أبدا" بينما أخوه عذبنا كثير ... أومثلا":الولد الكبير مرضي بيسمع الكلمة لطيف بس الصغير متمرد عصبي مابرد عا حدا مع إنهم ربيوا بنفس الظروف وبنفس أسلوب التربية.. هلق بالنسبة لدور الأهل في حياة أولادهم : أولا" من الناحية المهنية أو الدراسية وقت الأهل بتوفر نفس الظروف والتسهيلات الدراسية لكل الأبناء .. منلاقي إنو منهم بوصلوا لأعلى الشهادات ومنهم بوقفوا بمراحل أدنى حسب قدراتهم وطاقاتهم أو قوة جلدهم على الدراسة.. يعني من هالناحية الأهل ممكن يكونوا بريئين من فشل أبنائهم ...
أما من الناحية الأخلاقية أو السلوكية فما بتصور إنو البيئة السليمة والإيجابية تنتج فرد مجرم .. يعني مهما كانت صفاته الشخصية سلبية بس اجتماعيا" ما بتصور يكون إنسان مؤذ أو شرير مع الاَخرين ...
بالنسبة للسياسات الأكثر نفعا" للحصول على ما هو مرجو من الأولاد .. فبتصور إنها سياسة الترغيب والترهيب ... أو الثواب والعقاب يعني مكافأة الولد على العمل الجيد وحرمانه من شيء يحبه عند قيامه بعمل سيئ
بالنسبة لثقافة الأهل فإلها دور في التوجيه السليم لميول الطفل أو المعالجة السليمة لمشاكله ... مثلا" الطفل اللي بعاني من فرط نشاط وحركية زايدة وكل اليوم عم ينط ويخرب بالبيت أو خارجه .. واللي غالبا" بقولوا عنه : ناقصه ترباية وضرب كثير مع إنو الأهل ما بكونوا مقصرين .. بس الطفل عنده طاقات زايدة وبدها تتفرغ .. هون بيجي دور الأهل المثقفين والواعيين بتسجيل هالطفل بنوادي رياضية بتمتص طاقاته الزايدة ...
مرة كنت بجلسة مع بضعة نساء من القرية وكان الحديث عم يدور عن الخرجية اللي بتعطيها كل أم لأولادها عالمدرسة .. وللأسف كانت الأرقام مرعبة وحرام طفل بالابتدائي بتسلم هيك أرقام .. بينما بعرف عائلة من أغنى أغنياء حمص بس الأم ما كانت تعطي أولادها غير مبالغ زهيدة بتكفي لشراء حاجة أو حاجتين .. حتى تعلمهم القناعةو كيف يتحكموا برغباتهم وإنو كل شيئ إله حدود ومو دائما" الحياة بتعطي الإنسان مثل ما بريد ..
بالنهاية برجع بأكد إنو تربية الأولاد مسألة كثير حساسة وصعبة وبتتطلب حكمة وصبر كبيرين من الأهل .. ولازم الأهل قبل ما تفكر بعدد الأولاد تفكر إذا فيها تمنح كل ولد حقه بالاهتمام والتربية..

Posted by: white flower

شكرا كثير أنجيل كلامك صحيح 100%
أنا طرحت الموضوع بعد نقاش كان جاري معي يومها عن شب صغير بالصف السابع مجنن أهله ما بيرجع على البيت قبل طلوع الضو ومعلق أهله بمشاكل كثيرة مع الناس من ورى سواقته المجنونه وخناقاته .......وقضيت بعدها وقت طويل بالتفكير وما اعرف جاوب حالي
مرة بقول معقول ابن 11 سنة ما يقدروا أهله يضبطو طلعته من البيت ورجعتو ....أنا بتصور انه هاذ يعتبر ضعف بالاهل وبيستاهلو لما بينقال عن ابنهم قليل ترباية
وموضوع السيارة والسواقة المجنونة هون بيشبه الي اتفضلت أنجيل بطرحه حول خرجية الولد على المدرسة بدون مراقبة وتوجيه يعني هاذ يعتبر مفهوم خاطىء للدلال أو اعتبار الاهل انه بهالتصرفات بيمنحو نفسهم وابنهم ثقة اكبر بالنفس ومكانه بين الناس........
وبنفس الوقت ممكن نعتبر مثل ما قالت انجيل انه شخصية الولد بتلعب دور كبير لدرجة انه بعض الاهل بتتفاجىء بتصرفات لاولادها تختلف عن المبادىء التي ظنو انهم نجحو بترسيخها بعقل الابن وهون قد يكون المحيط والظروف بعيدا" عن الاهل لعبو دور كبير بالاضافة لشخصيته
لانه الانسان بعد عمر معين (نسبي) بيحقق استقلالية عن الاهل واختباره للحياة بيخليه يتبنى مبادىء معينه بتناسبه ويرفض غيرها وهون ما فينا ننسى تأثير الاصدقاء على عقل وعواطف الابن
أما المستوى العلمي والثقافي للاهل أنا بشوف انه بيأثر أحيانا قليلة وليس دائما لانه الذكاء العلمي والثقافي يختلف عن الحكمة والذكاء الاجتماعي

Posted by: سيلفانا خوري

اعتقد ان عملية التربية والتوجيه تلعب دورا كبيرا في اعطاء الملامح الاساسية لشخصية الطفل ويتدخل في ذلك ايضا
البيئة والعوامل الوراثية....والجينات التي تؤثر في تحديد بعض هذه الطباع
السياسات الاكثر نفعا ً في رايي هي التي لا تعتمد على القساوة وانما على التفهم و الصبرعلى المحبة والاحترام
أن يكون التوجيه عن طريق النصح بحكمة ورفق وليس بقوة واتهام ان يجذبوا الاولاد اليهم بالتفاهم
والحنان وليس بالقهر.... مما يرفع من احساس الابناء بالمسؤلية ويجعلهم الين في التفاعل والانقياد
ومن المهم ان يعطي الاهل المثل بالقدوة الحسنة و مشاركة الابناء بالافكار...و الاطراء على الايجابيات وعدم التشهير بالسلبيات.... واتباع طريقة الاقتراح بدل من الاوامر....
الامر الذي ممكن ان يترك عند الابناء رغبة في الانصات او التنفيذ... نابع عن شعورهم بالرضى الذي قد يجعلهم اميل الى الطاعة والانضباط .

ويبقى هذا رأيي... واصحاب الخبرة هم الاعلم ؟؟

سيلفانا

Posted by: angel

سيلفانا أحيانا" القسوة والحزم مطلوبين خاصة بالعمر الصغير لأنو الطفل مو دائما" بيستوعب بالكلام والنصح ولازم بس أخطأ يتعاقب حتى يحس إنو الخطأ بجر أشياء غير مستحبة ... طبعا" مو شرط كلمة عقوبة بتعني الضرب أو الإيذاء الجسدي بس ممكن مثل ما قلت بأول مشاركة تكون بحرمان الطفل من مزية معينة أو من شيئ بحبه ...والأمور اللي تفضلت وذكرتيها بتتطبق على الأعمار الأكبر ..
white flower أنا ما عم شكك أبدا" بالحكمة والذكاء الاجتماعي ... بس الثقافة والاطلاع على الوسائل الحديثة بالتربية وتقويم السلوك ساعدت بحل مشاكل وأمور ممكن تصعب على الحكمة الاجتماعية ...

Posted by: Nada1981

مرحبا جميعا

انا معكم 100% انه الاهل بيلعبو دور كبير بتربية الاطفال و الدور هدا بعتبره انا من اصعب الشغلات الي الاهل بيقدموها لاولادهم.

يمكن الايام هي صار لازم نحكي عن التربية برات البيت و جوات البيت. يعني الاهل و الاصدقاء او الاقارب. الاهل ممكن يكونو مراقبين اولادهم تمام و عم يحاولو يربوهم احسن تربية بس الاهل مافيهم يراقبو اولادهم برات البيت و تصرفاتهم مع العالم او مع اصدقائهم برات البيت كيف عم تكون.

انا بطبيعة شغلي بشوف كل يوم عالم جديدة و فئات مختلفة من العالم. ان كان بلعمر او الجنسية و الخ...

و من فترة سنتين لاحظنا انه تصرفات الاولاد برات البيت عم تكون غير تمام جوات البيت, بدليل انه لمى نفس الاولاد بيجو بيحضرو فيلم مع اهلم بتكون تصرفاتهم غير. وقتها الواحد بيسئل حاله طيب هلشي صح ولا غلط؟ الضغط على الاولاد جوات البيت ممكن يجيب رد فعل عكسي و وقتها رح يكون غلط الاهل!!

القساوة مع الاطفال انا ضدها تمام, لانه الطفل لازم تاخديه بلكلام بلاول لحتى يفهم انه الشي الي عمله غلط, و الاهل لازم يعدو لل 10 قبل ما يرفعو ايدهم و يضربو الاولاد. و بس توصل لل 100 وقتها الحكي ماله فائدة مع الطفل هدا و وقتها بس ممكن استعمال القساوة.

بعدين يا white flower مثل ما قلتي كيف الاهل ماعم يقدرو يضبطو ولد لسى بصف السابع و عمره 11 سنة بس؟ هدا الظاهر مابقى ينفع معه الكلام. الاهل للاسف تأخرو بلتدخل بس كمان حتى لو تأخرو لسى فينهم ينقذوه.

طبعا كل عائلة الها طريقة معينة بتربية اولادها. و بعض الاهل بيحبو يعطو اولادهم كلشي بدهم لانه هنن بيفكرو وقتها انهم بلطريقة هي بيكسبو الاولاد لصفهم و بلطريقة هي بيعبرولهم فيها عن حبهم الهم. الاهل الي عم يعطو اولادهم مصروف كبير مابيفكرو انه الاولاد ممكن يشترو غير شي بلمصاري هي؟ الولد متى ماشاف بأيدة مصاري كتيرة اكيد رح يفكر يشتري شغلات اهه مابيحبوه يشتريها, مثلا الدخان او المشروب. الدلال الزائد انا ضده كتير, لانه هي الشغلة عم عاني منها انا هلا و يمكن ذكرتها عدة مرات بمواضيعي. لانه انا معتبرتها شغلة اثرت سلبيا عليي و مع هلشي ماحابة غيرها ( حتى بيصحله يضل مدلل بعد 25 سنة و بيقول لاء ههههههه )

انجيل انا معك انك فينك تعاقبي الولد على شي من دون ضرب, مثلا بتحرميه يومتها من انه يحضر افلام كرتون, او مثلا تحرميه من الشوكولا ليوم ( انا من هلا رح عاقب حالي و امنع عن حالي الشوكولا و الشيبس ههههههههههههه )

سيلفانا طريقة الاقتراح بدل الاوامر ممكن ماتنفع مع كل الاولاد او كل الاعمار او حتى لمى بتكوني عم تتعاملي مع بنت او ولد. لانه مثل ما قلت الاهل ممكن يضبطو اولادهم جوات البيت بس.

تحياتي للجميع و شكرا على المواضيع الحلوة و شكرا للصبايا على المشاركة الدائمة.

ندى

Posted by: Desert rose

اقتباس:

المشاركة الأصلية كتبت بواسطة engel

لحد الاَن يمكن ما اتفق المحللون شو اللي بحدد سلوك الفرد هل هو الشخصية أو البيئة .... أنا شخصيا" بعطي علامة كبيرة للشخصية

اقتباس:

المشاركة الأصلية كتبت بواسطة سيلفانا

ويتدخل في ذلك ايضا البيئة والعوامل الوراثية....والجينات التي تؤثر في تحديد بعض هذه الطباع

الحمدلله أنكم أضأتم الموضوع من كل جوانبه فلم تبقى أي ثغرة إلا وسددتم فراغها بالمنطق السليم .وما أردت الدخول إلا لوضع قناعاتي أن سلوكيات الفرد لها تأثير كبير في عدم السيطرة على الأولاد ...بدليل أننا لووضعنا مجموعة من الأولاد بعمر معين في وسط ممتاز معزول عن الناس مع مربية بمعاملة واعية واحدة لابد أن يتميز طفل عن طفل بشيء ما ...لربما تكون العصبية الزائدة عند أحجهم أو عدم قدرة طفل على التحمل مدة طويلة بالعزل وهذا مانلحظة في المدارس الداخلية على وجه التحديد أو في المياتم .

مع كامل إحترامي لأرائكم وشكراً للــــ white flower

زهرة الصحراء

Posted by: white flower

بدي اشكر الجميع انجيل سيلفانا ندى سناء على مشاركتي ومساندتي

يمكن الواحد اذا بدو يفكر بالناس الي بيعرفها من اقارب واصدقاء وجيران ....وبيحاول يعمل تقييم لاساليب الاهالي مع ملاحظة الاختلاف باطباع الابناء رح يطلع معو شي مليون قاعدة يعني عنجد شي بيوجع الراس بس انا بتصور انه الانسان بترباية اولاده دائما بيحط بين عيونه الطريقة الي اتربى عليها ووقتها يمكن يحاول يغير جذريا اذا كان عندو معاناة من طفولته أو ممكن يعتمدها بانسياق اعمى بايجابياتها وسلبياتها ....وبيبقى الاحسن انه نستفيد من أخطاء الغير ونلاحظها مع مراعاة شخصية الابن الي الها الدور الاكبر مثل ما اتفضلتو سيلفانا وانجيل وسناء
يعني هالموضوع بيحتاج قوة وذكاء وصبر من الاهل وبحب ضيف انه عمر الاهل وخبرتهم اله الدور الكبير مشان هيك ما بحب الزيجة بعمر صغير.......ونيال الي الله بيعطيه اولاد صالحين

وما تضحكو عليي وتستغربو هاي أول مرة بحاول اتعمق بمعاناة الاهل بهالمجال ويمكن هاذ مثل ما قالو انجيل وندى اصعب المسؤوليات الي بيواجهها الاهل بحياتهم وخصوصا انه المجتمع كله بيساهم بتلقيم الولد المفاهيم السيئة مع الجيدة مثل ما قالت ندى وهيك ما فينا نظلم الاهل دائما
أنا بتخيل انه ترباية الولد بتنقسم لمراحل وكل مرحلة الها سياسة خاصة :
الولد قبل 4 سنين بيحتاج حنان وتنبيه بدون صراخ وعقاب وما نعطيه كل شي بدو اياه على اساس انه صغير........
الولد بعد 4 سنين بيصير اكثر قدرة على الاستيعاب وهاذ اكثر عمر بيقدرو الاهل فيه يسيطرو على الولد وبيصير فيهم يعاقبوه بعد ما يشرحوله غلطه
أما بعمر المراهقة بيشوفو الاهل نجوم الضهر ...هالعمر بدو صبر من الاهل كثير بيصير الابن بحاجة ليتعامل على انه واعي وشب والحقيقة انه بيكون طفل بحاجه لعناية مشددة بدون تضييق وما لازم الاهل يواجهوه الا في حالات الخطر لانه بيكون عنيد وما رح يتعلم الا من تجاربه
وبالنهاية ما بتظهر حقيقة الانسان قبل عمر 21 وهو العمر المحدد عالميا بعدها بتمشي سياسة الصداقة والاحترام المتبادل مع الحفاظ على هيبة الاهل الضرورية في كل مراحل التربية
عذرا للاطالة وشكرا للجميع........

موقع زيدل سوريا حمص .. خدمات تشات و دردشة ... أرشيف المنتدى