الارشيف - رأيكم بسنة ال 2005

Pages: 1

رأيكم بسنة ال 2005
(انقر هنا ان احببت مشاهدة الموضوع الاصلي بالالوان و الصور )

Posted by: Nada1981

أعزائي,

بما انه ضل كم يوم على نهاية سنة ال 2005 حبيت افتح الموضوع هدا:

نظرة للخلف لسنة ال 2005, من خلال بعض الأسئلة المتعلقة بلموضوع هدا:

1.كيف كانت سنة ال 2005 ؟؟!!

2. هل تحققت امنياتكم بلسنة هي او حتى جزء بسيط منها؟؟

3. بتتمنى انه تكون سنة ال 2006 مثل ال 2005؟؟؟

4. الشغلات الحلوة ( او ال ما حلوة

) الي صارت معكم بسنة ال 2005

بتمنى المشاركة من الجميع حتى نعرف اكبر عدد من الاراء بلسنة القديمة.

و كل عام و انتم بخير جميعا, و انشاءالله بتكون سنة ال 2006 سنة خير و سعادة و فرح على الجميع.

ندووووش

Posted by: fr george massis

الحقيقة ندوش كيف وصلتك وعظة قداس راس السنة يلي بدي سويها مو معقول بنوب لوبعرف شلون بيصوروا بحطوا المشاركة لأبعثلك اياها بس بالبتغالية
على كل حال بتموني سرقتي قلوبنا بزيدل كل يلي عرفك حبك بتستاهلي موعظة مو خسارة بنوب فيكي
الحقيقة السنة من أولها عملت لجنة ليتورجية بالكنيسة وحطينا شعار المشاركة هي عيش للإيمان أو هي الإيمان المملموس
وهيك كثير مرات بعطي الميك لأحد أبناء الرعية وطبعاً بعد مايحضر معي الأفكار هوي يلي بيقود الوعظة أو بيعطينا شهادة حياة أحيانا عائلة وهيك بنكسر حاجز الخوري الكاهن الكل بالكل والمؤمن المستمع المتلقي وبنصير كلاً بالكل من أجل المسيح واعلان البشارة
والله معك..........................................
أنا سنتي كثير مليحة بداية تعرفت على أصدقاء جدد واختبرت مواضيع مختلفة سمحت لي ظروف 2005 أني خوض غمار مغامرات كثيرة عطتني عزم وتصميم أكثر وشجاعة وفرح بلا حدود
من ناحية العمل بنشكر الله كلشي مثل ما بدو ماشين ببطء بس المهم مانا مكانك راوح
كلشي بطلبوا مستجاب والحمدالله وشعاري دايما 100صديق قليل 1عدو كثير كثير
بهالسنة تعرضت لكثير من العنف والسرقات بالكنيسة بس منشكر الله ماحدا رجع بصندوق الماديات بتتعوض بتمنى سنة2006 يعم الخير والسلام وبنبني كلنا سوى حضارة الحب على كل الصعد والمستويات
وشكراً ندووش وكل عام وأنت بخير

Posted by: تامي العيسى

أولا بحب قول لكل الأعضاء كل عام وانتم بخير وآسفة لانو اتأخرت بمعايدتكم .
وثانيا بشكر الله على سنة 2005 بحسناتها وسيئاتها واللي كانت حسناتها غالبة .
وبما اني طالبة بالمدرسة شو رح تكون امنيتي غير اني جيب علامات مليحة والحمد لله اللي وفقني بهالسني وعطاني على حسن نيتي .
أما أمنياتي هالسنة هيي نفس السنة الماضية وخاصة انني السنة كفاءة فانشالله ما يضيعلي الله تعب . و هالسنة بطلب من الله طلب آخر باسم كل الناس أنو يعم السلام بكل منطقة بالعالم ملينا من الحروب والخصامات بين الناس فانشالله تكون هالسنة سنة خير على كل الناس وتتحقق أمانيكن كلها يارب . واللي بسلم أمره لالله بحققله اللي بيريده .

Posted by: sulieman safar

سني ولا من هيك
1.كيف كانت سنة ال 2005 ؟؟!!
سني ولا من هيك تعرفنا على أمثال الغالية ندوش(والي ما بيعرف ندوش وخصوص ضحكتها, لا يمكن أن يتعرف على الموت البطيْ قبل أن يراه)
وكذلك تعرفنا على أمثال العزيزة تامي وهيا تحمل أمال الأجيال في تعابيرها وجرائتها.وبنفس الوقت تعلما كيف نختلف قبل أن نتفق.
2. هل تحققت امنياتكم بلسنة هي او حتى جزء بسيط منها؟؟
لا ...... ولا حتى جزء ضغير منها وهوى الخلاص من كل العزابية.
3. بتتمنى انه تكون سنة ال 2006 مثل ال 2005؟؟؟
يعني بصراحة بدك حدى يسرق أبونا الغالي جورج بدل أن يسرق الكنيسة لالا يا ريت السني الجاي تكون مثل هالسني.
4. الشغلات الحلوة ( او ال ما حلوة ) الي صارت معكم بسنة ال 2005
الله يحلي ايامك يا ندوش. كلشي بهالسني كان حلو ومضت وكأنها نهار واحد .
كل عام وانتم بخير .
سليمان

Posted by: Nada1981

تمام الحمدلله انه ابونا جورج و تامي و العم سليمان عندهم طابع حلو عن سنة ال 2005 عكسي انا تماما

يعني عنجد لو فيني امحي شي اسمه سنة 2005 من حياتي كنت عملتها. للاسف السنة هي ماكنت مبسوطة منها ابدا بس مافينا نقول غير انه الله هيك بده و سنة ليك و سنة عليك

بس عنجد الشغلة الوحيدة الحلوة الي كانت فيها اني شاركت معكم بلمنتدى و من خلاله تعرفت على كتيرين منكم, بس رح ابتدي القصة من الاول.

اكيد كل راس سنة الواحد بيكون عنده امنيات للسنة الجديدة: بشكر الله الامنية تبعي اتحققت لانه كل سنة الشي الي بطلبه من الله يخليلي اهلي و اخواتي فوق راسي و يضلو بصحتهم و عافيتهم,

السنة من اولها ابتدت غلط بغلط, و الشهر الاول و الثاني كله كنت عنجد كرهانة حياتي كلها و مالي خلق لأي شي, تركت جامعة الحقوق لانه هيك و هيك ماكنت عم ركز على الدراسة و ضغط الدرس كان عم يسببلي كآبة اكتر لهيك قلتلهم لأهلي اذا ما تركت الجامعة هلا رح يصيبني شي قالو لاء عمرينها.

المهم وقتها حاولت اشغل حالي بلقراءة و الرياضة و هيك لحتى بلشهر ال 3 على ما اعتقد كان الي الشرف اني سجلت معكم بلمنتدى و بلشت شارك معكم و هي كانت اول مرة بشارك فيها بمنتدى بلانترنت. مابتذكر كيف تعرفت على الموقع بس من اول ما قريت كم موضوع حبيت اتعرف عليكم لانه وقتها الظاهر الدم الحمصي حركني

هي كانت الشغلة الكويسة الوحيدة الي عملتها بسنة ال 2005 و فيني قول انه كسبت اصدقاء حقيقين فيني افتخر فيهم

وقتها تعرفت على سهير و عماد و من وقتها بلشت سهير مشكورة تعرفني على الاصحاب الثانيين.

طلال كان اول شخص بشوفه على الطبيعة, وقتها انبسطنا كتير بزيارته النا بهولندا يومين قضيناهم تدوير بلسيارة و سينما و ضحك و قضينا وقت حلو معه. بعدين لمى رحنا على سوريا بلصيف كمان كان الي الشرف اتعرف شخصيا على عمادو الي شفته من بعد ساعتين بحمص, سناء و حسام عبد العزيز انا فاجئتهم بلأهرام بحمص على الغداء ( سلام و ربا و جورج دعبول و تامي و حسام دانييل و الدكتورة مريم و سمر ضاحي و ابونا جهاد و ابونا جورج و روعة اخت سهير و رودين الاشقر تعرفت عليهم بعزيمة سلام للاعضاء ببيتها و كانت قعدة كتير حلوة ) , فكتور كمان نفس الليلة زرناه بلعيادة تبعه و شربنا معه كاست بيرة

يعني تقريبا شفت اصحابنا كلهم من عدا سهير

الي عرفتني عليهم تقريبا جميعا, العم سليمان و عبدالله عرعوش كمان ما حصلي الشرف انه شوفهم شخصي لهيك انشاءالله بنشوفكم بسنة ال 2006.

بعد ما رجعت من سوريا غيرت الدراسة تبعي و غيرتها من المحاماة للسياحة و السفر يعني غير مجال تماما بس الي شافني عرف اديه انا بحب سوريا و منشان هيك رح حاول اعمل شي لبلدنا. و الحمدلله كله تمام هلا.

الحمدلله انه رحنا بلصيف على سوريا كانت احلى شي صار معي لولا هيك كنت قلت ياريت لو يخذفو سنة ال 2005 كلها من التاريخ.

لهيك بتمنى تكون سنة ال 2006 احسن من سنة ال 2005 لانه بلفعل كانت من اسوء السنين الي مرت عليي.

كل عام و انتم بألف خير و انشاءالله بتكون سنة ال 2006 خير علينا جميعا بلصحة و العافية.

ندوووووووووووووش

http://www.l--l.com/getimg.php?image=img_0681.jpg ( انا و عمادو و الكورونا الي ضلينا سنة نتفق انه رح نشربها مع بعض بسوريا )

http://www.l--l.com/getimg.php?image=2005.jpg ( ندووووش 1981-2005 )

Posted by: suher issa

شكرا ندوش على موضوعك الجميل وانتظرت لاخر يوم لكي اشارك فيه لانني انتظرت بلكي بهل اليومين فيه شي جديد لسنة 2005 ولكن متل بعضو كله هههههههههههه
الحقيقة سنة 2005 كانت عادية بالنسبة لي وهي كباقي السنين طبعا شي غير ان سنة 2004 كنت في سوريا بقبال العائلة والاصدقاء وهذه السنة لا
هذه السنة كل يوم مر متل بعضه الحقيقة ولا شي جديد في حياتي كان
ولكن كما ذكرتي ان الشيء الجميل ان تعرفت عليك انت وعلى النت وكان فرصة حلوة الحقيقة
لان كنت افتح النت بالليل لا احد كان موجود ون لاين ولكن بهذه السنة كل ما افتحه الاقيكي بوجهي هههههههههههههههههه واسمك مضوي دائما والله واحلى ندوش والله
ايام حلوة قضيناه مع بعض ........من ضحك........مزح..........نشكي همومنا..........نساعد بعض ..........لقد كنت صديقة عزيزة علي وغالية رغم لم اعرفك شخصي ولكن القلوب واحساسي كان يقول أنني اعرفك من زمان
وبما انك فتحتي هذا العنوان اقول لك الشيء الجديد في عام 2005 هو التعارف عليك واشكرك على كل شي واشكرك على صداقتك التي اعتز بها
واتمنى السنة 2006 ان اتعرف عليك وتعطيني مجال لكي اعرف ندوش بحق وحقيقي وبلا حدود بيننا
لك كل المحبة واتمنى ان تكون سنة 2006خير لك وللجميع وان تحققي ما تريدينه وان تتفوقي بدراستك وتبقي احسن دليلة سياحة بالعالم
اخيرا اتمنى للجميع سنة خير وان تكون السنة القادمة خير على الجميع وان تكون أفضل لكل ما حقق امنياته بسنة 2005
وكل عام وانتم بخير

Posted by: white flower

في البداية بدي سلم على الجميع وكل عام وانتم بخير
سنة 2005 عندي ماخلت من الدموع والتعب والقلق من أولها لاخرها بس كان فيها حدث حلو كثير ما فيني انكرو مع انو حتى هوي كمان ما تم بسهولة بس كان أحد أحلامي الجميلةو تحقق
الشغلات المو حلوي كانت اني اختلفت مع أحد أهم الأشخاص بحياتي و علاقتي فيه الان شبه منهارة وهاي تعتبر من المصايب الي رح يطول تاثيرها عليي ربما لعدة سنين
طبعا ما بتمنى ابدا انوا تكون ال 2006 مثل ال 2005 عليي
منرجع منقول الحمد لله على كل حال ( بس ما تقو لو عني نقاقة وهاي مشاركتي الأولى)
بس ال 2006 بلشت معي مليح كثييييييييييييييير انشا الله تكفي معي هيك
أول يوم بال 2006 انقبلت عضويتي بمنتداكم العزيز على قلبي بتمنى تقبلوني معكم
بتمنى السلام والأمان للجميع وعلى قولةالأغنية
بتمنالكن أعياد مجيدة وسنة جديدة و أيام سعيدة
الأعياد والأفراح تبقى على طول والمحبة تغمر قلوبكن بين عيالكن تكون

موقع زيدل سوريا حمص .. خدمات تشات و دردشة ... أرشيف المنتدى