الارشيف - زيدل مابين الشرق والغرب

Pages: 1

زيدل مابين الشرق والغرب
(انقر هنا ان احببت مشاهدة الموضوع الاصلي بالالوان و الصور )

Posted by: Desert rose

من خلال مشاهدتي لبعض أفلام الفيديو المرسلة من قبل فئة من الزيادلة الأحباء المهاجرة للغرب لاحظت وبصورة جلية بأن بعض العائلات لم تتخلى عن الكثير من العادات أهمها ما تكلمنا عنه وهو شرب المتي وهو المشروب المفضل عند الزيادلة وثانيها هي طريقة الجلوس على الأرض لإحتساء هذا المشروب اللذيد ربما .بالإضافة إلى نقلهم بعض الأمور الحياتية في طريق الملبس والأكل والشرب .
برأيكم هل من المستحب نقل هذه العادات والتقاليد نسبةً للأجيال القادمة التي تولد هناك من جديد ?مع أننا لاحظنا وبفترة الأعوام السابقة أن الزيادلة في وسط زيدل بالذات لم يتخلوا كثيراً عن عاداتهم ...ولكن أصبح بمعتقد البعض أن الجلوس على مقاعد مرتفعة كالصالونات وغرف الجلوس أكثر حضارة من الجلوس على الأرض ...وإلا لما أستبدلوا ...(( الطراريح الأرضية والمساند الحائطية بتلك المفروشات الحديثة ))وأصبحنا نشاهد وفي كل بيت قديم أم محدث غرفة (( مد عربي )) وغرفة تحوي صالوناً فاخراً .برأيكم ما السر في نقل عادة الجلوس على الأرض إلى الغرب بالوقت الذي بدأت فيه قرية زيدل التوجه بعاداتها نحو تلك الأماكن في العالم ...وهل تعتقدون بأن زيدل ستنصهر بيوم في بوتقة التحضر لتتحول يوماً ما لمدينة صغيرة تدعى (( نيو زيدل الشرق )) يقابلها في كل مكان من الإغتراب الزيدلي بقعة مرادفة لها باللقب تدعى ((نيو زيدل الغرب ))....؟؟؟؟
مع التنويه إلى أن العكس صحيح فقد بدأ المغتربون ومنذ مدة لابأس بها بنقل الكثير من العادات وبكل شيئ تقريباً من الغرب إلى الشرق ....فهل لعب هؤلاء دوراً هاماً في هذا التبدل الحضاري الزيدلي الحاصل اليوم ....أم أن لأهالي زيدل المقيمين فيها دوراً أكبر من دورهم .
لكم محبتي
ولكم الحرية في الرد أو عدم الرد

زهرة الصحراء

Posted by: sulieman safar

الغالية سناء
بالنسبة لشرب المتي عند الزيادلة في الشرق والغرب يتعلق في طبيعة هذا المشروب أكثر من ما يتعلق بالعادات والتقاليد والسبب بأن المتي تحتوي على منبه الكافيين ومنشط طبيعي ينتمي الى عقاقير الدايريتكس ولذلك يجد الكثير بأن تناول كمية وافرة منها يجلب النشاط والحوية(حطي الأبريق عالنار).أما بالنسبة لمفروشات البيوت قد يجوز انها تغيرت مع التغير في طراز اللباس من حيث ان اللباس الحديث يبقى غير عملي مع الجلوس على الأرض ولكن هناك فئة من أهالي زيدل لا زالت تتراوح ما بين الماضي والجلوس على الأرض الحر المريح والجلوس على الكراسي والكنابايات وغيرها في الشرق والغرب.(متاي بلا سكر)
أم بالنسبة للتغير الاساسي عند أهالي زيدل في الشرق والغرب يحصل على الصعيد الفكري بسرعة الحلزون من حيث انهم يستبدلون التفكير العقائدي(سريان وكاثوليك زيدلي أو غير زيدلي) بالتفكير الحشري(بشو فيني استفيد) وهذا تغيير ايجابي وبنفس الوقت يتوجه نحوا المدنية من حيث ان العلاقة الاقصادية أقوى من العلاقة الاجتماعية. وبخلاصة هذا الحديث بحب خبرك اني عازم حالي لزيارتكم في لبنان مع شلة جديدة ورجائاً لا تفرشي شرقي أو غربي بل فرغيلنا المكان من كل المفروشات للرقص والدبكي والفرح والمرح وكمالة الحديث(غلت المي).
لكي وللعم أنطوان والصبية والشباب بركة العيد ومحبتنا.
سليمان

Posted by: wisam

انا بس النقطة اللي بحب نوه الها الى انه ربط الحضارة بالاستغناء عن العادات و التراث هو فكرة غير سليمة ابدا
و الا لما شاهدنا امير انكلترا يظهر بالمناسبات العامة مرتديا التنورة الاسكوتلندية و جورج بوش مرتديا قبعة الكاوبوي و الكثير غيرهم من الشخصيات التي تمثل دولا بمنتهى التطور لا توفر فرصة لاحياء التراث
بس برجع لزيدل و قصة المد العربي .. اعتقد انه حتى الان في زيدل نادرا ما يخلو بيت من الجلسة العربية ... و لا ابالغ ان قلت اغلب بيوت المهاجرين خارج زيدل تحتوي على جلسة عربية ايضا .. لذلك هنا اود ان اسجل اعتراض على كلمة استبدلوا .. لم يستبدل احد في زيدل الجلسة العربية بالصالونات و لان احتوت اغلب البيوت في زيدل على صالونات
و اعتقد ان اي فكر يعتقد بان استبدال الجلسة العربية بالصالون هو ظاهرة حضارية فكر مريض .. اما من يستبدلها لانها من وجهة نظره اريح لجسمه او لاسباب عملية فهذا عذر مقبول

بعدين هلق مواسم لعب الورق بزيدل ... اي بوطة ورق لمدة عشرة ساعات كيف الجسم بده يتحملها على كرسي .... ان ما تمدمد و ارتكى الواحد و اخد راحته ما بتزبط بنوب

Posted by: mariam

الحضارة تبدا من الماضي ولا يمكن لشعب يصنع حضارة وينكر ماضيه والا تبقى حضارته ناقصة......

المد العربي كيف بدأ ولماذا استمر وهل هو مهدد بالزوال .....الوضع الاكثر راحة للجسم هي وضعية الاسترخاء ..فبعد عناء وجهد يوم كامل وبعد الوقوف مطولا يحتاج الانسان الى التمدد واخذ وضعيات مريحة لعضلات البدن كان يرفع قدميه او يمدد جذعه ولان اهل زيدل اشتهرو على مر العصور بحبهم للعمل وقضاء الوقت الطويل فيه هم بحاجة لقضاء ما بقي من وقت بوضعية مريحة وتسمح له باستقبال ضيوفه اي ليست السرير....(.يحكى انه من القديم تصادف عمال كانو يبحثون عن عمل من قرى بعيدة فوقف احدهم وسال عابرا من اين هو آت وهل هناك مجال للعمل فأجابه ياراكبا ضهر كُر عا زيدل لاتمر أكلهن طيب بس شغلهن مرّ)وكان على مشارف زيدل......
بالاضافة لملاءمة الملابس لطريقة الجلوس ...فهل تستطيع مع التنانير القصيرة أكثر من اللازم وبناطلين الجينز الضبقة أكثر من اللازم ان تجلس على الارض........ومع مر الايام ونزول البعض الى المدن وبسبب النظرة الدونية من سكان المدن إلى سكان الريف بدا البعض يقلدهم ...وأصبح الاعتقاد انه بتقليدهم نكون أقرب للتمدن والحضارة باعتبار التمدن في مرحلة بعد الأرياف في صنع الحضارة .......والغريب أن البعض بدأ يقتنع ان المد الغربي هو أكثر راحة .....ولكن بقي من يعمل طوال النهار بحاجة الى المد الشرقي لأنه وبكل المقاييس أكثر راحة إلا بمقياس واحد وهو التنظيف والتعزيل فهو مرهق أضعاف اضعاف المد الغربي ...وهي نقطة مهمة في السعي وراء تغيير المد...اما من الناحية الطبية فبعض الحالات تحتاج المد الغربي لوجود صعوبة في حركات المفاصل ...وهلق ياسليمان حط ركايتين تحت ايدك وناولنا متاية بلا سكر بس مو غالية ..........وطمن بالك وبال سناء زيدل لن تكون الا زيدل الكل فيها خصص غرفة للمد الغربي او صالون لكنه لايستعمله الا في المناسبات القليلة او الأعياد لان الجلوس على الارض يعني الراحة و تحتاج وقت فهي ليست للزيارات الخاطفة ....ولان المغتربين يعملون فوق طاقتهم نقلو معهم المد المريح ليسترخو بعد عناء اليوم .......اما المتة فهي مشروب مفضل ولن يتغير طالما نقول اننا من زيدل .....هي جزء من عاداتنا ولو كانت مكتسبة ........لكن أخشى ما أخشاه ان تنقلب أفكارنا ناخذ من الغرب اشياء أكثر خطورة من الفرش...............

Posted by: fr george massis

بالبرازيل مافي مد عربي بس في دلال قهوة كبيرة يعني نادر ماشوفها ببت بزيدل مثلا بس هون بكل بيت ....................
كلام النشيد السوري ما بيفهموه ولا بيعرفوا يقولوا طبعا الأكثرية ولكن حافظين الموسيقى والدمعة بتنزل مهدارة وأوتوماتيك...................
اللباس كثير متحرر هون وبسبب الحر الشديد كل أيام السنة مو زلبطة مثل ما بيفكر البعض ورغم ذلك يلي بيفكر يزور سورية بيحترم عادات سورية وبيشتري ملابس مناسبة للزيارة فقط؟؟؟؟؟؟؟؟؟؟
والله معك............

Posted by: Desert rose

أربع آراء لأربع أشخاص من زيدل

وسام كندا
الدكتورة مريم زيدل وأبونا جورج البرازيل ...وسليمان من أستراليا !!

أبونا رده مفهوم وواضح وصريح مافي تعليق ....دلال القهوة كبيرة ماشاف منها بزيدل ومافي مد عربي والناس بتحترم مظهرها الخارجي وقت تغادر البرازيل تتجي زيارة للشرق ..مع أنو بيبقى لكل قاعدة شواذ.

وسليمان متل العادة ضيعني بين الفكر الحلزوني ..والصعيد الفكري ....والتفكير الحشري ... والتغيير الإيجابي ....ولكن بالنهاية الحمدلله فهمت بأنو عازم حالوا مع شلة جديدة عالمتي ...وهي أهم شي تكون الشلة جديدة

لأن الشلة القديمة خلص يرحم أيام زمان ماعد قادرين عالرقص والدبكة .....وسلام ألك من أحلى أنطوان وللعيلة كلها كمان .

ولكن برد وسام ومريم في شوية مغالطات .

فمثلاً وسام :

اقتباس:

و اعتقد ان اي فكر يعتقد بان استبدال الجلسة العربية بالصالون هو ظاهرة حضارية فكر مريض .. اما من يستبدلها لانها من وجهة نظره اريح لجسمه او لاسباب عملية فهذا عذر مقبول

معقول ياوسام الإنسان اللي بيفكر بالتحسين نتيجة التطور بيكون إنسان مريض ...طيب ليه مانسمي إنسان حضاري .؟؟ وأنت أدرى كونك مهندس وبتعرف شو يعني ديكور الخشب وشو إمكانية التلاعب بهيك أعمال واللي بتعكس على كل بيت طابع جميل مش ممكن نلاقي بالمد العربي .

اقتباس:

بعدين هلق مواسم لعب الورق بزيدل ... اي بوطة ورق لمدة عشرة ساعات كيف الجسم بده يتحملها على كرسي .... ان ما تمدمد و ارتكى الواحد و اخد راحته ما بتزبط بنوب

هيك أقنعتني الله يسامحكن ياأهالي زيدل في حدا بيلعب ورق عشر ساعات

دكتورة مريم :

اقتباس:

ومع مر الايام ونزول البعض الى المدن وبسبب النظرة الدونية من سكان المدن إلى سكان الريف بدا البعض يقلدهم ...وأصبح الاعتقاد انه بتقليدهم نكون أقرب للتمدن والحضارة باعتبار التمدن في مرحلة بعد الأرياف في صنع الحضارة

عذرا ولكن مش البعض لابل الكل ....ومابتصور بعد في بيت في شباب وصبايا مافي غرفة غربية ومن ثم مع احترامي لرأيك دكتورة مريم واللي في من الصحة أكتر من اللي أنا رح قولوا :
بتصوري في ناحية مهمة بتلعب دور بها التحضر وهي الناحية المادية وهون مابحب أدخل كتير بالتفاصيل كون الوضع المادي ممكن يحسس ناس كتير ولكن بعتقد هوي جزء من الحقيقة .

اقتباس:

ولان المغتربين يعملون فوق طاقتهم نقلو معهم المد المريح ليسترخو بعد عناء اليوم

كتير ناس بتشتغل متل المغتربين وبكل البلدان ولكن مش بالضرورة يكون عندهم مد عربي لذلك أنا بقول بأنو عادة المد ونقلها والجلوس على الأرض هي عادة مش أكثر ..وبيبقى هيدا رأي .
وهلق أنا اللي رح قلك أتفضلي شرفينا على فنجان قهوة ونقعدك قعدة ملوكية على كرسي ملوكي من خشب الأرز (( له تاج من الأعلى وجانبين تتكأين بيد على أحدهما وباليد الأخرى تحملين فنجاناً من القهوة العربية اللذيذة )) وياريت تتواقت مع زيارة سليمان وأهلا بالجميع كمان

.

زهرة الصحراء

Posted by: hosam abdulaziz

في نقطة مهمة و هي انه طبيعة سكان المدينة فرضت هالنوع من المد و الأستغناء عن المد العربي:
1 العلاقات الأجتماعية محدودة و رسمية يعني مثلا الزيارات غالبا قصيرة , فنجان قهوة عالماشي و بالسهرة شغلة ساعة , ساعة و نص.
بينما بالريف ابسط قعدة (شربة متاي) بتاكل سعتين و ما فوق , و بالسهرة بتطول القصة فأكيد هالشي بيتطلب قعدة عربية مريحة .
2 ضيق مساحات المنازل في المدينة بيمنعهم من التفريط فيها للمد العربي
فالمد العربي بده غرفة مثلا 5×6 و هي بالمدينة بتعمل غرفتين,
بينما بالقرية المساحات اوفر و بتسمح بوجود غرف كبيرة الحجم , و طبعا لازم يكون المد كبير مشان الواحد يتمطرق عطوله و ما يزعج الحواليه.

هلق في امر استوردوه القرويين من الحضريين و ما بعرف كيف اغفلتوا الطرف عنه و هو الكرس الفرنجي

يعن يهيدا غير شكل قعدة مريحة و ممكن الواحد يدخن سيجارة او يقرأ جريدة و حتى يدرس شوي.

بكل الأحوال ظاهرة نقل العادات الى بلدان الأغتراب هي امر طبيعي بيقوم فيه كل انسان , و بياخذ معه الحاجات اللي بتريحه.
فاللي ربي عالمد العربي و المتي و الشدة , صعب ينساها و يستبدلها بالعادات الثانية.

Posted by: mariam

هل شاهدت يوما مسلسل ارابيسك لأسامة أنور عكاشة ...
لمن لايعرفه .....طلب من فنان في صناعة الارابيس ان يشيد قصرا لدكتور مغترب وعالم أعطاه المخطط أراد أن يزاوج بين قاعات عربية ارابيسك وقاعات حديثة وبعيدا عن البعد السياسي للمسلسل أراد الفنان القيام بذلك ولكنه تارة يهد هنا وتارة يهد هناك ولم تتزاوج معه..........وسقطت البناية........

عذرا منك سناء ....بساطة المد العربي وسهو لة التعامل معه بالإضافة لكونه مريح يوحي بالبساطة هذه البساطة القريبة من الطبيعة التي تعطي لأبناء الريف ميزتهم في بساطتهم وتمردهم في عنفوانهم وقسوتهم في طيبتهم ومحبتهم هذه الألفة التي تجمعهم يجب ان لاتتغير

ابن الريف مهما بعد و مهما غير من سكنه ولو سكن قصورا يبقى في داخله ذلك الجزء المختبيء بين الضلوع يبقى في داخله ابن الريف ......ولتعذريني لايعني ذلك أنه غير متحضر .....ولكن حتى اغنى أغنياء القرى ومنهم أغنى بكثير من أبناء المدن يبقى لهم طابع مميز .....هناك مثل فرنسي يقول مافيك تحط بسمار مدور بثقب مربع......يعني شكلو غلط ......عنا كثير صالونات بيفرشو أكبر شقق المدينة ولكن عنا شعور داخلي انها مو مريحة وانها لضيف تأداية واجب وابن الريف بيحب الضيف ضيف مو تأداية واجب ......انا كثير بحب الديكورات بالخشب والبيوت وبحب الأرابيسك وبحب الحفر بس حتى استمتع بالفن بفضل اتفرج على كرسي من خشب الأرز المحفور بس ما برتاح بالقعدة عليه ولا بحس حالي ملكة فيه ......بحس حالي مقيدة ....وانا بعشق حريتي اعطيني اقعد على حصيرة ومد رجلي بالمطرح اللي بيريحني ومرة اتربع ...ومرة ارتكي يمين ومرة يسار و وقتها اعطيني فنجان قهوة او متاية انا كثير بكون ممنونة......واذا كانت الحضارة بالفرش انا متخلفة جدا ......وما ماني زعلانة لانو هيك حضارة ما بستهويني .....بالمقابل ابن المدينة ما بيعرف يقعد عا مد عربي لانو بيحس بنفس الغربة اللي بيحس فيها ابن الريف وبالتالي يبقى الفرش عادة تتبع لظروف معيشية بيئية اكثر منها مادية ......مثلا كانت الطراريح كلها صوف لان الأغلبية كانت تربي أغنام ......وكانت أكثر دفءا بالشتاء ولاتنقل الحرارة بالصيف ولان شكلها غير ثابت استبدلت بالأسفنج الصناعي وشتان بينهما....

اما الكرسي الافرنجي ياحسام هو أسوأ اختراع الحمام العربي بيضل أفضل.........

شكرا سناء عالعزيمة بس بدك تعذريني انا مابعرف اقعد عا كرسي ملوكي انا محلي طراحة بالارض ان ان سمحت الايام وزرناك بناخذ طراحتني معني لاتهكلي هم

Posted by: a_aroush

شو هالتمرّد على عادات الريف عندك سناء ؟

عادة شرب المتي هي أصلاً جابولنا إياها اللي هاجروا عالأرجنتين من أهالي زيدل , و استمرت لهلأ , و إمتياز نشر هالمشروب بالغرب هو لصالح الأرجنتينيين و خصوصاً هون بأمريكا , فلو رحتي على محل أرجنتيني , بتلاقي أشكال ألوان من المتة بعمرنا مو شايفينها .

أما القعدة العربيّة فهي شغلة ثانية , فهي عادة مو أكثر و تعودنا عليها و صارت بالنسبة النا مريحة , أما هي عمليّاً لا مريحة و لا شي , إلا إذا كان الوحد متمطرق على طولوا مثل ما قال حسام , و لكن ما حدا بيقعد متمطرق على طولوا لو كان عنده حدا , إلا إذا كان قريب كثير , يعني من البيت الجواني , لأنوا منعتبر اللي بيتمطرق قدام العالم قلّة احترام .

فيبقى أنه نقعد و نحنا متربعين و ما برعف كيف ممكن تكون القعدة و الواحد متربّع أريح من قعدة الكرسي أو الصوفا , طبعاً مو حيالله كرسي يعني لازم يكون مريح للقفا و للظهر , ولولا أننا ريفيين و منتحمّل شوي أكثر من أهل المدينة كانت هالقعدة هلكتنا كلنا من زمان , و لكن بالرغم من صلابة الريفيين منلاقي الكبار و خصوصاً النسوان كلهن بيشكو من ركبهن , لأنهن غالباً بالبيت و لما ما بيكون عندهن شي باقي الوقت متربعين و عم يشربو متي , حتى اهترت ركبهن من القعدة و التربّع عالأرض .

أما عن لعب الشدة عشر ساعات , كيف طلعت معكن أنه القعدة عالأرض أريح ما بعرف , يبدو ولا واحد منكن بيلعب شدّة

. يا أما مو مجربين القعدة على طاولة لتقارنوا .

أما عن نقل العادة معنا وين ما رحنا هي شغلة طبيعية , و مو بس أهل زيدل اللي بياخذو عاداتهن معهن , كل الناس بتاخذ عاداتها معها وين ما راحت أما أننا نأثر عالغرب بعاداتنا هي صعبة لأننا قلال كثير لأن نأثر على مجتمع , و لكن فينا نقول كسوريين و لبنانيين عموماً لأنو عاداتنا قريبة و متشابهة ممكن نكون أثرنا كجالية بالمجتمع هون بشيء , مثلاً بنقل الأكلات و المشروبات اللي مناكلها نحني , فالحمص و التبولة و المتبّل ( البابا غنوج ) و الكباب و الكفتا و الفلافل و الشاورما , كلها أكلات كثير أمريكان هلأ بياكلوها و بيفضلوها كمان , و القهوة العربية و لو أنهن بيقولولها تركية بس يمكن لأنهن غشيمين عن أن القهوة خلقت عند العرب أولاً .

بالنهاية أنا بأيد العم سليمان بفكرة أننا ما منتقبّل العادات الجيدة بسهولة و منتطور بسرعة الحلزون , فبدك شي مية سنة ثانية سناء ممكن تلاقي هالعادة انتهت .. بس عم سليمان المتة ما فيها كافين .. بس فيها منشط طبيعي ... و عازم حالي معكن لعند سناء على متاي و منروح كلنا سوا حتى ما نخصرها مرتين لأنها مبين بخيلة , ما بدها كل نهار تنعجىء بواحد مني , فمنروح كلنا و منوفر عليها شوي .

موقع زيدل سوريا حمص .. خدمات تشات و دردشة ... أرشيف المنتدى