الارشيف - الحب والزواج

Pages: 1

الحب والزواج
(انقر هنا ان احببت مشاهدة الموضوع الاصلي بالالوان و الصور )

Posted by: sulieman safar

أول شي بحب سلم سلام كبير على أصدقائي العزابيي وقلهم قديش فقدت للمماحكي معكم في هذا الموضوع.ولا تواخذوني اني حطيت هالموضوع في منتدى المجتمع لأنو كما يبدو الزواج في أيامنا هذه قد يجوز أن ينتمي الى عدة منتديات, مثل مندى الاقتصاد من حيث انو الزواج أصبح معادلة اقصادية," معك فرنك بتسوى فرنك" ولكن انتم تعرفون غلاتكم عندي ولا يمكن أن أعاملكم بمثل تلك الطريقة. فكرت حط الموضوع في منتدى الفنون من حيث انو الزواج صاير يتعلق بفكرة صغيرة " حلوي ولا ماي حلوي" أو " حلو أو مو حلو" ولكن فكرت فيها القليل وقلت لنفسي انو اصدقائي العزابية, واللتي بلغت لائحة اسمائهم أكبر من لائحة الارهابيين المطلوبين من قبل أميركا, يملكون من الفهم ما قدر ولا يمكن أن ينتمون الى مدرسة النظرة الدقيقة للحياة.بنفس الوقت كنت بدي حط الموضوع في منتدى الساسية من حيث انو العزابية عم يتلعبوا على الأحبال كلها بنفس الوقت ولكن ما حبيتكم تفيعوا عليي من كل الجهات . وأخر ما خطر ببالي اني حط الموضوع بمنتدى الطبخ والأكلات الشهية من حيث ان هناك قسم كبير من العزابية يعتقدون أن الزواج مثل أي طبخة , يا بتنجح يا بتفشل.
هل يا ترى أن كل هالأشياء اللتي ذكرتها عن العزابية في عصرنا هذا صح, ام هناك تعليل جديد من حيث انو العزابية ما بدهم يتزوجوا الا في حال انهم يوجدون أحد يحبوه. واذا سألتهم عن تعريف ذاك الحب توجد ان ليس ليديهم أي فكرة عن طبيعته أو تعريفة وهم سالكين في الحياة كجثث لا تعرف اتجاهها تتنظر شيء اسمو حب لكي يجذبهم.اذ ا كان هنال صلاحية لهذا القول فمن الضروري أن نوجد منتدى جديد تحت اسم " منتدى الجهال"
هاتوا لنشوف عزابية ومتزوجين.
سليمان

Posted by: hosam abdulaziz

اقتباس:

من مسرحة بياع الخواتم:لسماعها افتح الملف المرفق:
فيروز : بكرة حلوة كثير الخطبة بس الجازة بتبقى صعبة و لو بتشوفوا بعد الجازة ايام التعب و الغربة
العزابية: عارفين و رح نتجوز
فيروز : بس الجازة ولاد و هم
العزابية: عارفين و رح نتجوز
فيروز :فيها شغل و زق غراض
العزابية: عارفين و رح نتجوز
العزابية:عارفين بدنا نتعب عارفين رح نتعذب
لكن بدنا نتجوز حتى نصير نزق غراض و نتقاتل مع النسوان و نلم علينا الجيران و نولع سيجارة
و بظهر السيجارة نقعد على الباب نقول
يا ريت ما تجوزنا
يا ريت ما تجوزنا
يا ريت ما تجوزنا

انه لسر كبير كيف ان الأنسان يقدم متحمسا و متشجعا على امر (و هو الزواج) مع علمه المسبق بما يتنظره من مسؤوليات؟؟ و واجبات و اسر لحرية لطالما احبها.
فهل هذا يعني ايها المُبتلون ان ما ينتظرنا بعد الزواج يعوض عن الخسارة الناجمة عن الزواج ؟؟؟
لكن ما هو الذي يعوض عن متعة الحرية و الأستقلالية ؟؟؟ اهو العيش مع الزوجة تحت سقف واحد ؟؟؟ او هو رغبة الأنجاب و رعاية الأطفال؟؟؟و هو حب التغيير لتجربة بناء اسرة بعد الملل من الحياة الفردية.

بكل الأحوال لا يسعنا كعازبين القول (مع علمنا المسبق انه سيأتي يوم نقول فيه (يا ريت ما تجوزنا ) بس رح نقدم عهالخطوة من مبدأ وحيد و هو اذا جن ربعك جن معهم .

و انا استغرب كيف متزوج يتهم العزابيين بعدم تقديرهم لمعنى كلمة حب و انا من استطلاعات الراي بين جميع المتزوجين , لمست اجماعهم على فتور الحب بعد الزواج .
هات لنشوف يا متزوج عطينا شي درس ببلاش عن الحب لو سمحت.

ملاحظة: يمكن كثيرين بيقولوا انه حكينا كثير بالقصص , بس انا بقول هيك مواضيع لازم تكون مفتوحة بشكل دائم للحوار

Posted by: angel

أولا" بحب حيي روح الشباب وشباب القلب عند العم سليمان اللي دائما" بينكش مواضيع الحب والزواج واللي حامل هم كل عزابية المنتدى وعم ينق عليهم أكثر من أهلهم يمكن حتى يجوزهم وان دل ذلك على شي فبدل على مدى السعادة اللي عايشها بزواجه حتى حابب يخلي الكل يجربوها .. والحقيقة اللي بشوفهم هو والخالة نهلة بيدرك فورا" المحبة والانسجام والتفاهم اللي بيناتهم ( دقوا عالخشب ) ..
أما انت ياعزيزي حسام فكنت عم جهزلك رد قبل ما تكتب لأني عارفة اني رح افتح المنتدى اليوم ولاقي مشاركة الك بهالخصوص

منرجع لموضوع الحب والزواج ... يمكن أبلغ قول سمعته بالزواج هو : ( الزواج قفص ذهبي يتمنى الذين خارجه أن يدخلوه والقابعون فيه يحسدون الذين في الخارج)..

قبل ما جاوب على أسئلتك بدي احكي شوي عن الحب من الناحية العلمية لأنو اذا حكيت من الناحية العاطفية ما رح خلص لبكرة .. قرأت مرة بمجلة طبيبك انو في بالجسم هرمونات معينة بتتحكم بعملية الحب ( للأسف ظلت المجلة بسوريا وما عدت اتذكر اسم الهرمونات بالزبط) المهم انها بتنفرز بشكل متتابع وبالتالي بتقود تسلسل مراحل الحب من الاعجاب بالحبيب الى الحاجة لرؤيته الى التعلق به ثم الحاجة الى ملامسته حتى تصل شدة الحب الى مرحلة يصبح الزواج فيها حاجة ملحة .. يعني بحسب هالمقال الزواج هو ضرورة بتفرضها تركيبة الجسم .. وبها الحالة بكون التفكير بفترة اجازة يعني الحبيب مو شايف بالدني غير حبيبه وعم يخطط كيف بدو يسعده وبكونوا بقمة الرومانسية والثنائية ... أما شو بصير بعد الزواج فالرومانسية بتصطدم بمتطلبات الحياة وبتتحول لواقعية .. والحب اللي كان ينقسم على اثنين صار ينقسم على ثلاث وأربع .. مع قدوم الاولاد

.. وتبدل التخطيط من اسعاد الحبيب لتأمين احتياجات العيلة المتزايدة .. بس بالنتيجة الحب ما راح .. الحب اتحول من شكل لاخر حسب متطلبات المرحلة الجديدة ..
طبعا" رح تقلي انو مو كل حالات الزواج ناتجة عن قصة حب ولا حتى نصفها وبيجي هون الزواج التقليدي من مبدأ ( سنة الكون )والكون لازم يعمر والله بعث ادم وحواء للأرض حتى يملوها وحط راسك بين الروس وقول ياقطاعين الروس .. وبس الشب صار بعمر الزواج ببلش النق من الأهل انو لازم يواسي الناس ويصير عندو بيت واولاد والبنت بجوزوها لأنو( أهلها مو دايمين الها .. والوحدة اخرتها لزوجها وأولادها )... بس اذا جيت للحقيقة حسام بتصور انو هالكلام صح .. يعني حياة العزوبية حلوة و الاستقلالية أحلى والحرية أحلى وأحلى بس لعمر معين بعدين بتقلب بالعكس ...لأنو نفسية الانسان رح تتغير والأشياء اللي بتسعدو بتتغير حتى أصدقاء العزوبية بصيروا أصحاب عائلات وبصير هو مختلف بيناتهم.........وبالنهاية لو اللي قبلنا اكتشفوا انو الزواج هو الحالة الخطأ ماكانوا جوزونا وما كنا جينا بالأصل ...
واخر شي بتمنى لكل عزابية المنتدى انو يتجوزوا بعد قصة حب ( طبعا" الحب قبل الزواج مو شرط لازم للزواج الناجح ) بس المشاعر اللي رح تعيشوها مع الحب ما رح تعيشوها مرة ثانية بعد الزواج مهما كان ناجح

Posted by: حكيم عيون

(قرأت مرة بمجلة طبيبك انو في بالجسم هرمونات معينة بتتحكم بعملية الحب ( للأسف ظلت المجلة بسوريا وما عدت اتذكر اسم الهرمونات بالزبط) المهم انها بتنفرز بشكل متتابع وبالتالي بتقود تسلسل مراحل الحب من الاعجاب بالحبيب الى الحاجة لرؤيته الى التعلق به ثم الحاجة الى ملامحتى تصل شدة الحب الى مرحلة يصبح الزواج فيها حاجة ملحة .. )

صدقاً ما كنت ناوي أحكي وردّ على العم سليمان( ,لأنّو بالنهاية معروفة غايتو من إلحاحو علينا نحنا عزابية هالمنتدى تايشرِّبنا هالكاس؟؟؟؟؟؟؟) بس كلام أختي آنجيل السابق إستفزني وأسمحيلي أعتذر منكْ وقلِّك , أنو الكلام اللي قلتيه ( ظلم للحب) , مع إحترامي لمجلة طبيبك ولكاتب المقال اللي قريتيه فيها , بس هالتعريف بيحوِّل الإنسان لأشبه ما يكون بالحيوان مُسيَّر بغريزته فقط , اللي قاله ناشر المقال عن الحب , يكمِّله جزء روحي أسمى بكثير من الجزء الغريزي الدوني الذي تحدث عنه صاحب المقال .....ولو سلّمنا بتعريفه فبماذا نفسر أن الذي يحب يمكن أن
يضحَّي بحياته أو بسعادته مقابل سعادة من يحب .... (فالحب تضحية) ....هل الهرمونات والدافع الغريزي يدفعه لذلك ...؟...
لا أدعي المثالية , ولم أعرف الحب الحقيقي يوماً , ولكن تاريخ الحب والمحبين يعلمنا ذلك .....؟
بس معكون حق مية بالمية أنو الزواج شر لا بدّ منه للأسباب الأخيرة اللي ذكرتها آنجيل ...

يعني لا تظلّ تنقْ عمي سليمان لأنّو دربنا عالكاس تبعك واللي أنت عمتشربو رح نشربو ...

هذا حال الدنيا...

Posted by: fr george massis

يعني من جديد بدي حيّ الجميع
يا عم سليمان أنا فهمان قصدك كثير مليح بس هني ما عم يصدقوا
على كل حال مثل ما بيقول المثل الكهنوتي يا قلوسي يا عروسي؟؟؟؟؟؟؟؟
يعني إذا ما رح نشوف خطوات عملية هالسنة رح اضطر اقبل العزابية بالرهبنة وهيك بنرتاح وبنريح
شو رأيك..........

Posted by: angel

والله يا حكيم انبسطت وقت قرأت اني استفزيتك مو مشان شي بس يمكن هاي أول مرة باستفز حدا لأنو اللي بيعرفني عن قرب وبيعرف طبيعتي ما بصدق اني ممكن استفز مخلوق .. منرجع للمقال يعني بالأصل لو ما أني استهجنته وقتها ما كان ظل عالق ببالي ..صحيح العلم بفاجئنا كل يوم بفكرة جديدة بس هالموضوع كله جديد .. بعدين قلت يمكن يكون فيه شيء من الصحة خاصة انو أغلب مواضيع مجلة طبيبك ان ما كان كلها مترجم والأجانب ما بيطرحوا فكرة الا بعد دراسات واحصائيات دقيقة خاصة انهم مسميين الهرمونات بأسمائها .. على كل العلم كله قائم على الجدل والفرضيات وطول عمرهم العلماء مقسومين مع وضد ..وأنا حبيت شارككم بالشي اللي قرأته والكم مطلق الحرية بالاقتناع فيه...

Posted by: a_aroush

testosterone

هذا هو اسم الهرمون الذي تبحثين عنه Angel

أعجبني جوابك جداً Angel و أحب أن نربط كل شيء في حياتنا بحقائق علميّة لأن كل شيء في هذا الكون يسير تحت نظام و قواعد فيزيائيّة و رياضية و كيميائيّة , حتى تصرفاتنا على اختلافها بين انسان و آخر يكمن ورائها تفسير علميّ بحت و قوانين طبيعية تحكمها , و من يقول أن الانسان ليس حيوان فهو لا يرتكز إلا على عدم تقبله للفكرة لا غير .

و حقيقة لا أستطيع أن أزيد على ما قالته Angel , فالحب كقاعدة للزواج هو أقوى رابط بين اثنين و أضمن وسيلة لزواج ناجح .

أما عن مسؤولية هذا الهرمون في عمليّة التضحية التي يتكلم عنها الدكتور حكيم عيون , فهذا الهرمون ليس هو فقط وراء دافع التضحية من أجل الحبيب , و إنما هو أيضاً سبب تهوّر الشباب المراهق و اتباعه تصرفات و أساليب كثيرة تكون أحياناً خطيرة على حياته لسبب واحد و هو إعجاب الحبيب .

و أعجبني تحليلك عم سليمان على أن فينا نحط هالموضوع في أي من تلك المنتديات , الاقتصادي أو السياسي أو الفني أو منتدى الطبخ ... لكن من المفروض أن يكون هذا الموضوع في منتدى أخر غير موجود هنا و هو منتدى .. ( الرومانس ) .

و لكن هناك نقطة رئيسيّة فيما قاله العم سليمان يجب التعليق عليها أكثر , هو معرفة العزابية بمعنى الحب , و أنا لا أقول أن المتزوجون يعرفونه أكثر .

و لكن النقطة التي يجب دراستها هو صلاحيّة الشباب العزابية في مجتمعنا لأن يتعرفوا على معنى الحب أكثر و أن يتأكدوا من مشاعرهم تجاه من يحبون , و أن يتشاركو معهم في أعمال تؤكد لهم مشاعرهم هذه و أهم كل شيء أن يتأكدوا من أن هناك رابط كيميائي يجمعهم لأنه رابط مهم أكثر بكثير من الإعجاب بالشكل و الأخلاق و غيره و لو أن تلك الأمور لها أهميتها أيضاً و خصوصاً الجمال .

أما عن منتدى الجهال عم سليمان فهو يصلح للمتزوجين و العزابية معاً , و يمكن كني وصلني معك لنتيجة بهالشيء أنا و سهير ... ههههههههه , و إذا صار شي منتدى جهال رح تكون أول مشترك فيه

موقع زيدل سوريا حمص .. خدمات تشات و دردشة ... أرشيف المنتدى