الارشيف - طل القمر(زجليات)

Pages: 1

طل القمر(زجليات)
(انقر هنا ان احببت مشاهدة الموضوع الاصلي بالالوان و الصور )

Posted by: حكيم عيون

طلّ القمر بالليل قلتلو تعا....تا وشوشك همساتْ بلكي بتسمعا

وإن عَجبتكْ يابدر أنقل هالكلام....لهاك الصبية الواقفة وقلبي معا

سنتين صرّلا بهالفرندا بحزنْ دامْ.........تنطر فرحها والحزنْ ما ودَعا

جفـّتْ دموعا وأحترق قلبا حرامْ...أهليْ وأهِلها دسّو شوكة بمدمعا

وسنتين صرلي بحْرسا جوَّا الظلامْ...ومن غير ماتدرى ,عيوني بتقشعا

ناطر غيابيْ يمسحْ بجرحا العلامْ.....وماكان جرحا يختفيْ ما أروعا

كاساتْ خمري شربتهن تالخوفْ نامْ...بلكي الشجاعة بصيدها وبْشجِّعا

يالله تَنسرقْ بالخفى كمشةْ غرامْ....والحبْ يرجعْ دربنا ,ونمشي معا

لو قطعوني شقاف ,نظراتكْ سِهامْ ...بقلبيْ ياعمريْ بسْ الله ْبينزعا

يومْ إفترقنا والهجر سلّ الحسامْ.....وغزّو مَ بينْ ايدينْ حُبّا مجمِّعا

نهربْ خطيفة ْوبالخطيفة ْ لا ملامْ......مادام كلّ دروبنا متقطـّعا

هيدي القصيدة محمّلة شوق وهيامْ.....منْ قلبْ عاشقْ مانسيْ محبوبتو

يا بدر بالله ْ توصِّلا تا تقنعا
******************************

Posted by: الماهر

شكراً لحكيم عيون لأنه لفت انتباهي لموضوع الزجل وما يتميز به من بساطة وجمال ولكن أرجو من القارئ مراعاة اللحن المعتاد في هذا النوع من الشعر عند القراءة وذلك ليتمكن من تذوق الصور بالشكل الصحيح .

إلـــــــــــــــــــــــــى ( ل ) :
كيــــف النور يـــدق النور ................شغلة وما الها فكـــي
وردة نزرعت بين زهور................ لحلاها بتعطي حركي
**************************************
فل وياســـــــمين ومنتور ............... من شعرا بيغزل شبكي
وعطر خدود المنها يفور ............... بالراس بيعمل حكــــــي
**************************************
برحيقا بينصب خمـــــور ............. الصاحي بيسكر من سكي
وعودا من شــجر البخور ............. بقداس بيرمي بركـــــــي
**************************************
حلوي وتتخبا ببـلـــــــــور ............ وانطلعت تعمل لبكــــــي
وبروح وبيجي عالمـوتور............... بلكي بلمحها تكـــــــــي
*************************************
مفتون وعقلي مســــــحور ................ويللي بقلبي رح احكـي
علقا وعلقتا يــــــــــــا ناس ............... علقة وما منها فكـــــي
...............................

Posted by: الماهر

.............................عتـــــــــب......... ........................
ــــــــــــــــــــــــــــــــــــــــــــــــــ ــــــــــــــــــــــــــــــــــــــــــــــ

شايف أنا يا لام بعيونك عتـــب ..........................................
.................................... مدري حزن مدري كآبه أو غضـــب:cry4:
يوم الأحد مريت بهاك المــــسا ..........................................
.................................... نظرى غريبة ؟ ليش ما عرفت السبب

يوم الأحد أمسيت و بقلبي أســا ...........................................
.................................... ضــايع أنا بنيران زدتيها حطــــــــب

من بعد ما بحري هدي ومركب رسا ....................................
.................................... حبيــت من هالنت وصلك عتــــــــب :

ما بتحرز الأيام يا ست النـــــسا ..........................................
.................................... عبي الدني ضحكات و فرجينا العجب

Posted by: الماهر

كاستنا النصــا فاضـــــي .............. زهرة بشــهدا تمليهــــا
من الصحرة طبعة هادي .............. بنورُ الـــرب مكملهـــا
الإدارة بدهـــا قاضـــــي .............. بحزم وشدة يوجههـــــا
بشغلو فهمــــــان وداري .............. حسام يعبي مطـرحهـــا

كاتب فيكتور وطبيـــــب .............. رؤية يحب يفلســفهــــا
صاحي للدنيا ورقيـــــب .............. للأخطاء يصـححهــــــا
بإيمار بيكتب أديـــــــــب .............. جرجي أسمو يوقعهــــا
حاضر قلمو ما بغيـــــب .............. دعبول الكلمة بيرفعهــا

روحاني مر ونبــــــراس .............. أبو جوليـــان يمثلهـــــا
بالدين بيعطي بإحســـاس .............. آيات الكتب يفسرهـــــا
وشاعر زياد وشمــــــاس ............. أبيات بدقة ينظمهــــــا
قلبو بيوسع كل النــــــاس ............. بأدب وطيبي يحكمهـــا

عم سليمان الأميــــــــــــر ............. عبرة بمزحة يقدمهــــا
بالموقـع عندو تأثيـــــــــر ............. بصمة بصفحا بيتركها
عمر زغير وفعل كبيــــر ............. فايز يثبت صحتهـــــــا
واقع تاريــخ وتبصيــــــر ............. وجهة نظرو يثبتهـــــــا

وبالســاحة حكيم عيــــون ............. جراح الناس يداويهــــا
بأشعارو عندو مخــــزون ............. مابتنضب عا كثرتهـــا
وزكوان جديد ومشـــحون ............. بحب وغيرة بنفهمهـــا
أفكـــار بيعطي وبصـــون ............. الفكرة حتـى يوصلهـــا

كثيري الأسماء وما بــريد ............. يزعــل مني منسيهـــــا
شلــــة كبيري عم تـــــزيد ............. اخـــذ و رد يرسيهــــــا
دوحة خضرة عم تجــــود ............. زيدل أسمـو موقعهـــــا

Posted by: liza

حلو كتير يا حكيم عيون إزا أول مرة وهيك كيف مرة تانية ؟؟؟؟؟
والماهر كما كتير حلو الله يوفقكون يا رب وتتحفونا بهالزجل يلي بزكرنا بقعدة حلوة ضلت تمني مع شباب المنتدى(الجنسين) بضيعة زيدل نبع العطاء وأكيد السهرة ما بتحلى إلا بأحلى زجل من حكيم عيون والماهر
محبتي الخابوريــة

Posted by: victorwardeh

الشكر لك يا صديقي ماهر لزجلياتك الرقيقة والشكر أيضا ً لصديقي الحكيم لعذوبته ..أحببت فقط أن اشارككم و ارد لكم بعض من دين علي على طريقكتم و أعرف هذا ليس بمضماري فعذرا مسبقا ً على الصياغة التي لا تطال ابداعكم .

ماهر يا أحلى زجال ...........للكلمة ساحر فنان
قلت كتير بهالمجال .......من بعدك نحنا خرسان
حكيك بردلنا الروح ...........مرهم للقلب التعبان
هذا زمن المومسموح ....كل كلمة بتعمل طوفان
كلماتك بلسم لجروح ...... وزهورك صارت بستان
قول وكتر ضلك بوح ........تتسمع حتى الطرشان
طير وعلي روح و سوح....وخلي عينك عالأسنان
يا حكيم الكلك سحر ............للمركب إنت الربان
زجل وشعر ورقة نثر ..........ما بيهدا فيك البركان
أنا النهر وإنت البحر .............وبحورك مالا شطآن
والحب اللي هادر فينا .........شو بينفع بيهالزمان
للحلوة كتبنا أغنانينا ..........وطيرنا أحلى القصدان
قالت بعدك عايش وين .......شوف الدني يا فهمان
روح تزوج عابكير ..............أحسن ما تبقى بردان
بكرا بتندم عالتأخير ............وعالعمر المنك فلتان
قلتلها شكرا ً عالنصح .... ...بيعجبني طبع العزبان
تلميحك أكثر من واضح.... ......ما بدو ضارب فنجان
يمكن قصدك واحد تاني .......بيظهر تهتي بالعنوان
لا تظني إني عشقان .........أو راكض ورا النسوان
كلشي بهالدني فاني .........وكلشي بوقتو و بالآوان
بس الحب الشاغل بالي .......ما شفتو بين الخلقان
عنو مو ممكن اتخلى ..............بكرا بيزهر نيسان .
___________د. فكتور ______________
زيدل-18-11-2005م

Posted by: الماهر

كل الشكر لتشجيعكم وإنشاء الله نكون عند حسن الظن

(اقتباس عن فيكتور)........................................... .....
(طير وعلي روح وسوح............... وخلي عينك عالأسنـــان)

سناني ما بهكل همن .................... وجاري بالحارة دكتـور
لو بتسوس أنيابـــــي .................... واعجز عن كسر البلور
لو تتخلع أضراســـي .................... ولقمي أبلعها بالـــــزور
لو بتهرهر تيجانــــي .................... وبالوجه شبابيك تجـور
سناني ما بهكل همن ..................... وشادد ظهري بيفكتـور
************************************

وردة جوري وجليون ................... لا ليــزا أخت الخابـــــــور
لا ليـــــزا بنت جدادي ................... السريان اللي شعو النـــور
لا ليـــــزا بنت بـلادي ................... طيب الأرض الفيها زهور
ومن لطفا أنا ممنـــون ................... عا رقت حكيا مســــــرور
*************************************

Posted by: liza

حاولت إني رد لأهديك أحلى الكلام بس كل الكلام ما قدر يعبر عن هالأحساس
بس بقدر قلك لولا الماهر والحكيم القمر بمل منا وما بعود للسهرات طعمة انشالله منلتقي

شكراً يا ماهر عا زوقك الحلوو والله يوفقك

الخابورية

Posted by: ziad sattah

هالاسم بْ كنيه مشهور
خوالي من آل : الـماهـر

أشعارك وصلو الخابور
اجتازو حدود و معابر

بيكفي اللي قالو فيكتور
حتّى إعتبْركْ : شـــاعر

طاحش,و ما في:دستور
بســاحتنا جايي تناور

مش خايف إنّو الدكتور
يهجيك بشــعرو الثائر؟

بالساحة الحمرا مشهور
إسأل ْ مجرّب ْ خاسرْ

معْ إنّي متابع مسرور
بسمة ثمّي ع َ الآخر

بَسْ الهمزة ع َ لسطور
أو تحتا مانك فاكر؟؟

Posted by: الماهر

عا الهمزة مني سائـــل ................. مطرح مــا بدي بحطــــــا

وبنصح لا ثغرك تقفـل ................. يمـــــا بحطلو شطــــــــــا

والساحة بلوني عامــل ................. بالـــون الـــبدي بخطــــــا

وخوفي من قلبي شايل ................. وأيدي عا الشعر بسطـــــا

وحكيمك مانو خاجـــل ................. بس زجلي ما بيتخطـــــــا

والطحش بدمي جابــل .................. كلتو برغيف الحنطـــــــا

وفيكتور بشعري قايـل .................. ما زود بحري بنقطـــــــا

وحدود بفكري زايــــل................... عا الأرض بأيدي خرطا

والمـاهر كنية زاجــــل .................. خوالو من بيت السطـــــا
.................................... ح ......................................

Posted by: حكيم عيون

قلبي سألتو ليش عمتخفق طربْ
....................................قلـّي الهوى ناداكْ, ما سمعتو عجبْ..؟

هاكِ الصبية الواقفة حدّكْ قريبْ
.............................................غمزة عيونا شعلتْ فيِّ اللهبْ

تخمين صادتني بسهما العجيبْ
.....................................حاولتْ أهربْ عن طريقو ما سَرَبْ

لكْ تطلـَّع شوفْ نيَّال الصليب
..................................قاعدْ بصِدرا النورْ, دخلو اللي إنصلبْ

وهالشعر شلاّ ل وشَكلو غريبْ
.....................................مدري نهرْ مدري سحرْ مدري دهبْ

والقدْ خايف ها لعيون تصيب
........................................قامة جليلة والحسنْ فيها إنسكب

قلبي نصحني روح جربْ هالنصيبْ
....................................بلكي بترضى تكون لجروحي قـُطبْ

خفيتْ حالي ولملمتْ بعضي وإجيتْ
...........................................طالبتها بالوردْ عطيتني حطبْ

********************************************

Posted by: الماهر

رفيقي شعلي ناري ............ خلاني بدمي ألعب

أفعالي بدي اهجي ............. حكياتي بدي اسحب

أخطائي بدي ألغي .......... مغفرتك عندي مطلب

انتو ملوك بمملكتي ........... والطاعة عندي مذهب

زياد وفيكتور وحكيمي ....... بجزاكن فادي مرهب

Posted by: victorwardeh

معنا بهالساحة زياد.....أستاذ و شاعر مشهور
تاريخو كلو أمجاد.....ما بدو شهادة دكتور
ما بطلع عندو رداد..... بيغرد متل الشحرور
يا ماهر روق وهدي....بعدك بي أول السطور
خايف ما تطلع قدي.... وتصير بقلبك مقهور
كرمالك علينا الدوز... . وغفينا عيون الناطور
بضربلك من هلأ بوز...حتى ما يمل الجمهور
والحلوة ليش تجافيها..... بالقعدة مسك وكافور
خبرني شو قايل فيها.... تاشوفك كأنك مقدور
وعيونا وخدودا السمر...وبشرتها المتل البللور
ورياقا أطيب من خمر.... ودماتا صارو تنور
وينك يا شاعر تتغزل... وتحرك فيها الشعور
كانك مانك قادرتنزل....خلي وراقك بالجارور
_____________د.فكتور________
زيدل-20-11-2005م

Posted by: ziad sattah

نيّالو شو عقلو زْغيرْ
زغلول و إبن مبارح

شعرو من بحر:التكسير
و المعنى عَنّو : سارح

عاملّلي عنتر و الزير
و ناسي إنّا : الجوارح

و أبياتو سَلقْ و تعتير
طاحش عَ النسر الجامح

عمْ يتحشّر ْ بِ أمير
سيطو بْكل ْ المطارح

فيكتور بيشهدلو كتير
للأكثر مانو طامح

الزهرة بتسمعلو و بتصير
تْرندح ْ من شعرو الناجح

و الحكيم الـ هُوّي كبير
بيشيد ْ بعقلو ْ الراجح

و زكوان العبد الفقير
للرحمن اللي يسامح

بيشْهد لو إنّو ْ : قدير
بالأفكار اللي طارح

يا خالو استعجلت ْ كتير
الـ..... بعدك مش شالح

تْحَمّدْ ربّك ْ إنّو ْ كبير
قلبي و دغري بيسامح
***

[/size]

Posted by: الماهر

[size="4"][color="Red"][center] بدي يعذرني فيكتور .............. وأستاذو : زياد الشحرور
************************************

بايى حلوي بتغزل ................. وشعوري شو بدو يقول
مثل الطابي شاطتني .............. بالمرمى جابتني جــول

قا لتلي رفقة أجمل ................. بصفيرا عطيتني فــــول
برى اللعبة رميتني ................. كرت الأحمر يا مهبــول

مينك أنت يا افتل ................... حتى بي ساحاتي تجول
ماء البارد كبتلـــي ................. وظهري من رجلة معلول
*************************************

حاكوها بلكي بتقنع ................... فرصة تعطي للشاطــــر
ورايات البيضة ترفع .............. وينساني الماضي الخاسر

لآنستي بدي ارجع ................. وعونك طالب يا شاعـــر
بلكي بهالصيف بنطلع ............. بزفي ويقودا المــــــاهر
*************************************

Posted by: الماهر

حكينا كلمي بالمقلـــــوب ........... علقتونـــا بهالهمـــزي

ساعة كر وساعة هروب .......... أشعار نجمعت جرزي

نحنا أسود تهز قلــــوب ............. بناكل عالوقعة معزي

لمــــا بتكشر الحـــروب ............ بنــصد الأعدا بقفــزي

والزير وعنتر مغضوب ........... وقـت الحزي واللـــزي

وقت الجد نســـد دروب ............ نســكر أبوابا بــــرزي

وقت بنلبس هالجلبــــوب ........... نشكل هالشمس بغمزي

وزغلول بزجلو المهيوب .......... شكيتو بعقدي خـــرزي

والشعر اللي بدو يـــروب ........... لبنو ياخذ من بـ( تـــــــــــــــــــــــــــــــــــــوت ؟)

يـا خالي يلي محبــــــوب .......

...... تنشمك بدك هـــــــزي

Posted by: ziad sattah

يا (لام ) يالّلي واقفي ب ْ هاك الطريق

الماهر نَدَالكْ منتظر ْ منّك جواب.

رْفيقة؟ النجم سهران ما بدّو رفيقْ

بدّو قمرْ, ت َ يرافقو بين الســـــحاب.

عندي عَرِضْ يا(لام) تَ يخفّ النقيق

و مانعود مجبورين ب ِ صوت الغراب

عرضي كبير و خاص بالماهر :يِليق:

{الماهر إلِكْ , خمسة معو فوق الحساب.}

Posted by: Desert rose

شعر الزجل خمر بخوابي عتاق
طعموا عاتم الناس دوا و ترياق

شعر الزجل خفقة قلب مشتاق
عنو حكى تاريخ شاعر عملاق

أسألوا الماهر
أسألوا زياد الخلاّق
أسألو الحكيم الواسع الآفاق

شعر الزجل وراق العمر
شعر الزجل كاسة خمر
شعر الزجل حب وعطف
شعر الزجل ....للمرجلة !!!
ساحة قتال من سيف الحرف

نطرنا كتير والنطرة إذا طولت بوَجع بتصيب ....والزجل حلو ...وإذا متل زجلكم بيطيب....... وين الشباب تعبواااااااا أو غاب القمر

زهرة الصحراء

Posted by: ziad sattah

بحضوركم: طلّ ْ القمر , ما غاب ْ

و لو غاب: رح ْ صحّيه كرمالك ْ أنا

يمكن ب ِ هادي المعركه : خسروا الشباب

ت َ يكون عالي الهام ْ قدّامي انحنى

جاهز أنا. ب ْ بيتين منّي عالحساب:

ب ْ خلّي الدّني تهتز ْ ويطيب الجنا .

- عزيزتي : نحن لم نتوقّف هنا بل تم نقل السجال إلى لينك : آنستي الجميلة ,بناءاً على طلب \الماهر \ و هناك كان لنا لقاء جميل , ولكن سمعت ُ أن الماهر مشغول قليلاً هذه الأيام و لكنه وعدني برد ًّ من كعب الدّست و الله يستر . أشكر لك سؤالك و متابعتك الدائمة .

Posted by: حكيم عيون

يا ديك يا صياح عتلال الخرابْ................شايف أنا ريشات طالوا عالجنا

تذكّر بهاك اليوم شو كان العذابْ ............لما حرقت الأرض من تحتك أنا

واللي بدق الباب رح يسمع جوابْ........وراسي أنا مرفوع عمرو ما إنحنا

مني ثلت بيوت دفعة عالحسابْ................وهلق إذا بتردّ رح زيدك هنا

Posted by: منير العيسى

شكررررررالكم اخواني ويعطيكم العافيه على الزجليات الرائعه جدأ

ونتظر المزيد منكم

منير

Posted by: ziad sattah

مسكين ْ يا دبّور ناوي عالخراب ْ

في مهدك المعهود من بَعد الهنا

ردّيت ْ ب ِ بَيتين و انزاح النقاب

عن موهبة ْ مغمور ْ, مش قدّي أنا

إن دقّيت ْ هاللأبواب :رح ْ تسمع جواب

مثل ْ النبيذ ْ المز ْ من ْ عِنباتنا.

[/size]

Posted by: حكيم عيون

يمكن إنتْ سكران مش عارف أنا
............................الغارق بشربة مي ,مابينزل بحرْ

وإن كان هيدا نبيتْ يا أستاذنا
.........................بحلف ْ ماإرفع كاس أو إشربْ خمرْ

نحنا الخطفنا الشمس ,نورا والسنا
...............................نحنا سفينة نوح بزْمان الغمرْ

نحنا قمر سهران بليالي الهنا
.....................بهمسةْ شِعر من هَونْ بنشق الصخرْ

نحنا ان إجا نيسانْ زهرة سوسنا
...........................وإن كان مرّ الغيم بنصير المطرْ

خايف يا إبن العمْ عليْكْ من الونى
.......................خايف مَتحْمُلْ كاس منْ مِدّةْ عَبَرْ

والشِعر يا إستاذ مش رقص وغنا
.....................الشعر خفقة ْ قلبْ عا لمسةْ وترْ

**************************************

Posted by: ziad sattah

عندك جمال الحرف و الكلمة ْ

و عندي نعومة ْ ب ْ تشبه النسمة

أنت َ و أنا طيرين ْ صدّاحين

رْسَمْنا على شفاف العمر بسمة

حوّا بْسؤال صغير:"إنتوا وين"

حجْبت ْ شمس أنوارنا بْغَيمة

أنت َ حكيم الفكر قَبل ْ العين

و محسوبك الإستاذ بالحكمة

أنت َ و أنا بقمّة جبل نسرَين ْ

وحدو النسر يشمَخ ْ على القمة

ب ْ نبقى سوى طول ْ الزمان اثنين

و ناديك : خيّي , مش إبن عمّي..

Posted by: حكيم عيون

يسلم تمّك يا إبن العمْ.........لا تنهم ولا تهتمْ

بنبقى نحنا فراخ زغار ....وإنتْ البي وإنتْ الأمْ

لو ريش جناحاتكْ طال......شوبدنا بالقيل وقال

بنبقا نحنا وحدة حال...أنتَ البسمةِ ونحنا التمْ

لقينا زهرة ْ بهالبستان....المليان ورودُ وريحانْ

سقينها صدق وإيمان.......تتفيض بعطرا ويعمْ

هيدي الصلحة ياشباب.........تنعيّد بكرا أحباب

لكنْ والله لوْ ما تابْ........بعد العيد ْبعيد الغمْ

وكلّ عامٍ وأنتم بألف خير

****************************

Posted by: ziad sattah

غاب ْ القمر ْ عن بابْنا مُدّه ِ

و الفِكْر ْ صار ْ يْجيب ْو يوَدّي

خايف ْ أنا لولا قمرنا غاب ْ
يتْفَرّقوا النجمات ْ من حَدّي

أِنت َ و أنا يا بدر ْ كنّا كْتاب ْ
إقرأ إلَك ْ و تْنام عا زندي

و هاك العريشه و شَجْرِة اللبلاب ْ
بْ يِتْساءلوا عن حلمنا الوَردي

شو بْقول ْ للجيران للأصحاب ْ
لو يسألوني؟رَد ْ: ما عندي

عندي أمَل ْ, رَح ْ ضَلْ خَلْف الباب
حتّى إذا طَلّ القمر سهران
إنسى الجَفى,واستَقْبلو بْ: وردهِ

*****

Posted by: الماهر

القمر لو غـــاب لا بد ما يطلـــــع

علينــا يطل بأشـــــواق مشتـــدي

وتعود ساحــات الشعــر تولــــــع

من بعد غفوة قمر عــــا مخـــدي

هو وانت يا خال صخر من مقلـع

سطاح متكني والأنساب محمودي

فادي الماهر.

Posted by: Desert rose

معك أنا رح ضل سهرانة
ناطرة القمر تيغني غناني
إن شفتوا عيني غمضت
ماتقولوا نمت
قولوا الزهرة هونيك
بعذب الكلام سهرانة
بطرفة محكية شعر
بشرود بغروب
وشكر
عم دور ع ها ك القمر
الـ عاغيبتوا قلبي أنقهر
دخلك ماتطول كتير
بخاف يمرق هالدهر
وترجع تلاقيني
عــ شي قصيدة من قصايدك
غفيانة

زهرة الصحراء

Posted by: ziad sattah

ان غاب القمر يا خال مش صدفه
مهما إبتعَد ْهالخيط ب ِ كََفّي

يمكن ْ خُسوفو ب ْهالوقت بْ يْتِمْ
وْ يْعود للمشوار : تَ يكفّي

وْ نِرْجَع ْ زهور الياسمين ن ْ شِم ْ
وْ نْرَجّع ْ البسمة على الشّفّه ِ .

غاب القمر , طل القمر مش هَم ْ
تلاتي ب ِ ساح الموهبة :إسراف
إنت ِ و انا يا خال بْ نْكَفّي

***

Posted by: الماهر

بين القمر والشمس يا خـال في إلفــه

بمركب الشعر هني القبطــان والدفـــه

وبضلي أنا نورس من حولهـم بيحـــوم

ونبقى أنا والزهر ننطر على الشــــرفه

فادي الماهر.

Posted by: حكيم عيون

يا إبنْ عميْ تما تزيدْ الطرافة.ْ...............يا بُرعمْ موهبة ْ كلّو ظرافة ْ

بيكفيْ رقبتكْ تِعلى وتِغامرْ ................كِتر ماإشمختْ فكـّرتكْ زرافةِ

أنْا الكلماتْ بسكبها جواهرْ.................وما برضا هيكِ إحكيها صِرافة ْ

أنا الراعي بشعري اللي انتْ خابرْ...ما بغفا بيومْ ,ساهرْ عا خِرافي

إذا بحكيْ بتهتز ّ المشاعرْ...........بيضوي بشمعتي كلْ ليلْ غافي

غبتْ يومينْ وكـّستوا المنابرْ..........بكلامْ رخيصْ بالمُجملْ سخافة ْ

أنا راجعْ ببحريْ الموجْ هادرْ..................تغرِّقْ بالعذوبة ْ كلْ ساحة ْ

.....................وحـَلّي بالعسلْ طعم ْ القوافيْ

***********************************************

Posted by: ziad sattah

*
حكيم عْيون ْ عَنّا غاب ْ مُدّة ِ

وْ جايي اليوم ْ ب ِ ساحة ْ تَحَدّي

لو انّو بْحكِمْتو هالعَمّ ْ عامِل ْ
لـ َ جاني يْبوس ْ إيدي قَبل ْ خدّي

أنا اللي كنْت ْ لـ َ شِعرو أجامِل ْ
ت َ حتّى إرفَعو مَرّة لـ َ حَدّي .

شوْ جاب ْ الغِر ْ لـ َ مُهر ْ الأصايل ْ
بُحور ْ الشّعر ْ كاتِبها بـ ِ يَدّي

أنا اللي عْملت ْ بالساحة عَمايل ْ
وْ هُوّي كان ْ يتْغَنّى و ُ يسْكََر ْ
ع َ شِعري وْ ما حَدى بالشّعر ْ قَدّي

Posted by: الماهر

اهلين بطلتك حكيم !!!!!!!!!!!!!!!!(نورت).

بعد اذنك خال بس بكلمة .

يا ابن عم خالي والكنيي العتيدي ...........................................
....................................... يا صاحب الموج والقوافي المجيدي

يا ناكر المعروف والنظرة السديدي ........................................
.......................................... ناطر أنا شوفك بي جملي مفيدي

بغيابك ذكرنا أفعال منك حميدي ............................................
............................................. لكن رجعتك كانت جداً بليدي

وبدل ما تشكر مستفقدك بي قصيدي .......................................
.......................................... راجع بساحة تناور وتحيك مكيدي

ها لمرة سماح لكن بنبرى شديدي ..........................................
........................................... إذا بعد تنعاد فلتك رح تكون عا أيدي

فادي الماهر .

Posted by: حكيم عيون

بالإذنْ منْ الماهرْ وبتمنى ياخذها بروحْ رياضيةْ ..(يعني بلالك هالعلقةْ)...

عصيبة ْ وقعتكْ والله ْ عصيبة ْ...............وقصيرة ْ نظرتكْ مانا مُصيبة ْ

على نفسكْ تسرَّعتْ التجنـِّيْ ............ودخلتْ بردِّتكْ أكبر مصيبة ْ

أنا بـِسْكرْ على شعريْ وفنـّيْ..........وانتْ مكتومْ عا خشبة ْ صليبي

بجلدة َ كلمتكْ فكريْ بْحنـّيْ.............وبكلّـلْ حرفْ كلماتي ْ الرهيبة ْ

أنا عبْقرْ بأعماقي بجـِنِّي................ووحييْ سارحْ بأرضي الخصيبة

وقوافي الشعرْ شذ ّبْها مِسنـِّي...........تصارِتْ ناعمة وحلوة ْ رتيبةْ

وإذا الأفكارْ بعدتْ يومْ عنـِّي...........بفقشة ْ إصبعي بتخلقْ عجيبة ْ

إذا بغازلْ بشعريْ بصيرْ جنـِّة ْ..........وإذا بِهجي ْ جـِهنمْ في لهيبيْ

وياماهرْ ركـِّزْ , الدوزانْ فنـِّةْ ................ولا جملة بوزنكْ مشْ معيبة ْ

الزجلْ ألحانْ معزوفةْ برنـِّةْ ........................وصورةْ تفرفحْ النفسْ الكئيبة ْ

ونصيحة ْ يابن عميْ سماعْ منَّيْ.................المراجلْ أغلبا قالوا هزيمة ْ

............وبناري ْ بتكـْتملْ كـِلا ّ هريبة ْ

*********************************************

Posted by: ziad sattah

شوفوا مين عم يعطي نصيحة ْ

لـ ِ بَيّ الشّعر ْ و الكلمة الفصيحة

يـ َ عمّي رْوح ْ و اسئلْ عن خصالي
م َ بَدّي قُولها كِلمة ْ صَريحة

ع َ عرشْ الشّعر مِتْرَبّع ْ لَحالي
و روابي كلمتي جَنّة فسيحة

أنا اللي بْنَيْت ْ كِلْ بنيان عالي
وانا اللي عْطَيت ْ للأزهار ْ ريحة

أنا اللي رَكْعِت ْ الكْلمة قبالي
بدنيا الشّعر ْ معبودا و مسيحا

بْصَراحة بْ قولْ: يا عمّي يـَ غالي

يَرَيْت ْ ب ْ تنسحب ْمنّك ْ لحالك

م َ بَدّي اليوم ْ إعْمَلّك ْ فَضيحة .

Posted by: حكيم عيون

يا بنْ عمّي على رسلكْ ومهلكْ........مرقْ وحْيـَكْ بـِردّ ة ْ اليومْ سَلّـكْ

لمعْ شعركْ دقيقة ْ بعتمْ طايفْ .............بيكفيْ بخترة ْ ووقـِّف تقلـَّك ْ

أنا الغيمْ الب ِشعري ْ ياما عاصفْ .......مطرْ وثلوجْ عا وعركْ و سَهلكْ

خـِبرتكْ بالشعرْ نتفة ْ زخارفْ................فقيرْ الموهبة ْ وراوح ْ محَلـَّك

نشلتكْ منْ سقوطكْ صِرتْ واقفْ.......طبيعيْ بعشرِتيْ يخِضرِّ مَحلكْ

أنا شعريْ الطبيعة ْ للي ْ شايفْ.........وإليْ ثوراتْ لو صارتْ ح َتهلكْ

إجيتكْ رجعكْ تلميذ ْ خايفْ............وبساطي إسحبو من تحتْ نـَعلكْ

إجيتكْ عارياحيْ بَرَدْ قاصفْ ............ت َغطـّيْ بالشعرْ حَرّ السوالفْ

وإكسحْ زهرْ أيامكْ ونَحْلكْ

*********************************************

Posted by: ziad sattah

اسمَحو لي اليَوم ْ يا أهل ْ القوافي

تـ َ قول ْ الحكي ياللي عا شْفافي

حكيم ْ عْيون لو ْ بيْضَل ْ يحكي
ع َ هالمنوال ْ رَح ْ إنسى اللّطافه ِ

عواصف ْ موهبة ِ مْنْ الضّعفْ تِشكي
ع َ باب ْ الصّيفْ نحنا يا أسَافه ِ

خايف ْ عا فراقو صِير ْ إبْكي
أنا اللي كِنت ْ شيلو عا كْتافي

بـ ِ بَحرْ الشّعرْ بَعْدو فِرْخ ْ سَمْكه ِ

شوْ طَيّب ْ يا سَمَك ْ عالنّار ْ مشوي

تعالوا تْفَضّلوا , صَحّة وْ عَوافي .

Posted by: حكيم عيون

عذروني يارفاقيْ و يا صِحابي .............إذا ما قسيتْ عا أغلى حِبابيْ

دَقـَر عرشيْ ورديء القولْ سَمَّعْ....ومِشانْ العرشْ رح ْ إنسى القرابة ْ

وإذا عَينيْ بِ تبكيْ أو بتدمعْ..........بكـَفـِّيْ بِ ِشلعا وبحـِْمُلْ عذابي ْ

أنا سَمْكة ْ ووحوشْ الشعرْ ب ِبلعْ..........إذا ببحريْ بـ ِتدقرْ يومْ بابيْ

أنا الكلمة ْ ب ِتمِّيْ قـَصفْ مَدفعْ.............إذا بترميكْ رحْ تصبحْ خرابة ْ

وقزازكْ منْ حرابيْ هَرّ صدّع ْ................بدرع ْ قزازْ هاجمْ عا حرابي ْ

ونصيحة ْ حاج ْ تتقدمْ وإرجعْ .............برَجعةْ هَيبتكْ بكْسبْ ثوابيْ

أنا شاعرْ على عرشكْ تِرَبـَّعْ...............عزفْ ألحانْ منْ شِعرو صبابة ْ

وإذا الأوتارْ ب ِعزفي بـِتقطعْ ...........لشيلْ شواربكْ , شِدَّا تا تطـْولْ

ومدّن ْ هَونْ وأعملهنْ رَبابة ْ

*************************************************

Posted by: ziad sattah

**

تيهي لـ ْ فَوق يـ َ حْروفي الأبيّه ِ

علا نَجْمي تـ َ صار ْ البَدر ْ خَيّي

م َ فيني اليَوم ْ إرجَع ْ ع َ البَدَاوي

تـ َ إسمَع ْ للرّبابه ِ الهمشريه ِ

حكيم الفِكر ْ رَح بيضَل ْ خاوي

بِلا شعرة ْ من ْ كْرومي السّخيّه ِ.

كِريم ْ النّفس ْ: شو بْيَعطي بْسَخاوي

و ْ ذليلة ِ: طُلبِة ْ النّفْس ْ الرّديّه ِ

ذِراعي بـ ِ قَرابة ْ دَم ْ : لاوي

و َ إلا ّ كِنت ْ بـ ْ مْحيلَك ْ : هَويّه ِ

الـ ْ م َ عندو موهبة ْ بيْضَل ْ هاوي

وْ حَليق ْ الوَجه ْ لو ْ مَدّيَت ْ يَدّك ْ

ع َ وَجْهو : يْذَكّرَك ْ بـ ِ ثَوب ْ حَيّه ِ.

*

Posted by: حكيم عيون

أنا البدر بسما الأشعارْ غيِّة ْ...........وكلاميْ نجومْ منْ حوليْ بهيَّة ْ

عَ نوريْ بتسهرْ البسماتْ فرحة ْ......وبـِعتميْ بتزلْ الدمعة ْ سخيـَّة ْ

م َبدّي خواتْ مذلولة ْ ب ِجرحا.......وم َبدّيْ شويعـِر قـْتلـْتو بإيديْ

بيكفي ْ تزينْ الطعنة ْ بـِطرْحة ْ........ت َتخفيْ دمْ مسفوكْ بكلاميْ

....فرحْ كذَّ ابْ ما بدنا يا خييْ..

*******************************************

Posted by: ziad sattah

*

نَصيحة ْ بَيْ لـ َ إبنو : يـ َ بَيّي

الكتابة ْ فَن ْ, ما هِي ْ عَنْتَريّه ِ

شوْ بَدّي قُول ْ يا بَيّي تَتِفهَم ْ

نَفَذ ْ صَبْري من النّفْخة ْ الغبيّه ِ

إذا بِتْسَلّم ْ سْلاحك ْ بِتِسْلَم ْ

النّصيحة ْ كانت بـ ْ ناقة ْ هَديّه ِ.

أنا عَندي الشّعر ْ كـ َ بْيْرْ زَمْزَم ْ

من الرّحمان ْ لـ َ خَلقوا : عَطيّه ِ.

الكتابة ِ مِن ْ قوافيّي تْعَلّم ْ

و انِت ْ أخطَئت ْ وْ تْحَدّيت ْ عِلْمي

يـ َ إبني ( لا تَعُد ْ )لـ َ هالخطيّه ِ

Posted by: حكيم عيون

بيكفي شرشحة ْ بيكفيْ فضيحة ْ..........ومنْ مجانين ْ رحْ آخذ ْ نصيحة ْ

الكلمة ْ ب ِتقتلْ الْ عقلو أساسو ْ...وإلكْ عقلاتْ مشْ شامملا ريحة ْ

أنا الخسرانْ والمكسورْ كاسوْ.........وإنتْ سلطانْ بالكلمة ْ الفصيحة ْ

وإذا عنَّدْ فهيمْ ورِكبْ راسوْ..................فروحْ معاهْ لا تعملْ ب ِمثلوْ

شو نفعْ الموهبة ْ ونفعْ القريحة ْ

*******************************************

Posted by: ziad sattah

**

الزّجَل ْ ساحة ْ لـ ِ أصحاب ْ المواهب ْ

م َ في مغلوب ْ بالسّاحة ْ وْ لا غالب ْ

شو نَفْع ْ الموهبة ِ لو ما روينا

بـ ِ ماء الورد: بستان ْ الحبايب ْ

م َ فينا نْقَيّم ْ السّلطان ْ فينا

قَرَابة ِ وْ معْرِفة ْ وْ بُكرى :نَسايب ْ

بْعِدْنا بالزّجل ْ, و ْ اليوم ْ جينا

بـ ِ مشوار العُمُر ْ يَدّي بـ ِ يَدّك ْ

تـ َ مَيقولوا : قمَرْنا عاد ْ غايب ْ

* *

Posted by: ziad sattah

بعد أن قرأ أحد أساتذتنا في زيدل هذه الزجليات :أعجب بها كثيرا ً ( حسب تعبيره ) و أحب ّ َ أن يعلّق عليها فقال :

**

تحيّةْ حُبْ للشّعّارْ مَطْلع ْ

لشُعّار الزجل عَمّـ مُد ْ إيدي
عجبني كونكم للشّعر مرجِع ْ
حلو كتير و الفكرة سديدي
دربي دربكم , مشوار واحد
و جيت اليوم أهديكم قصيدي
____
نطقت الشعر لمّا كنت إرضع
قبل ما أمسك الدفتر بـ ِ إيدي
و بحور الشعر إلها كنت مرجع
و نظمت ْ حروفها بـْ فكرة جديدي
و كنتْ قدّام أمواج القوافي :
شاطئ صلب ْ و صخورو عنيدي
____
إلتقيت اليوم مع إبن المقفّع ْ
و أبو الطّيّب ْ بأفكارو الفريدي
جاني البحتري و العين تدمع
وقفت و قلت : شو طالع بإيدي
عقدنا لـ َ اجلكم للشعر مجمَع ْ
الفرزدق شَق ْ ثوبو و قال :باطل
بعد شِعري , شُصاير بالقصيدي ؟
***

( بمناسبة الخطوبة ) :
و بدّي قول للدكتور ماجد
ألف مبروك و الفرصة سعيدي
**

\ حافظ قرنفلي \

Posted by: rabeea

سلام على جميع الاعضاء بمنتدا زيدل
حابب اسأل سؤال قبل:_ انا عضو جديد في المنتدا هل لي حق بالتدخل بالشعر والرد مثل باقي الاعضاء ؟

Posted by: ziad sattah

نحن بالانتظار و تكرم هالعيون
شرط أن يكون
موزون
و موزون
و موزون.

قرأت ُ مَرّة ً مقولة للكاتب مارون عبّود يقول فيها : وَقِّع ْ دائما ً إذا لم تَزِن ْ كي لا تخرج عن ملكوت الشعر .
و أهلا ً بك أخ ربيع ..

موقع زيدل سوريا حمص .. خدمات تشات و دردشة ... أرشيف المنتدى