الارشيف - <<تعوا لنرجع ولاد صغار >>

Pages: 1

<<تعوا لنرجع ولاد صغار >>
(انقر هنا ان احببت مشاهدة الموضوع الاصلي بالالوان و الصور )

Posted by: Desert rose

يقال ان الطفولة هي نصف شخصية الانسان .... لان كل المشاكل والازمات التي تواجهه حين يكبر تعود اسبابها لصفات وحكايا في الذاكرة منذ ايام الطفولة .... و يلاحظ ان الاشخاص المرحين الودودين يكون لديهم رضا نوعاً ما عن طفولتهم ......

والآن جاء دوركم بعد الاسترخاء على كرسي الطبيب النفسي للاجابة :

1- أين قضيت اجمل ايام طفولتك ... في القرية .. في الحارة ... أم ..... ؟

2- هل كنت تصنف من بين الاشقياء .. أم من بين الاولاد المصنفين " عريف الصف " ؟

3- ما كانت لعبتك المفضلة مع اصدقائك .... الشباب ممنوع الجواب غير " كرة القدم " ؟

4- هل تذكر كم عدد المرات التي عاقبتك فيها امك ... أم انها لا تحصى .... ؟

5- اكثر شيء كنت تنتظر العطلة الصيفية لاجله ؟

6- هل كان والدك يرى كشف علاماتك حين كنت في الابتدائية ؟

7- كم مرة هربتم من المدرسة ؟

8- هل ما زال لديك احد اصدقاء الطفولة .. ؟

9- هل كانت لديك جدة او جد مميزين .... أم كانوا صارمين ؟

10- اجمل صورة .... واسوأ ذكرى ... ببالك من ايام الطفولة ؟

11- كيف تصف نفسك حين كنت طفل .. من وجهة نظرك انت .. ؟

12- هل تتمنى لاولادك طفولة مشابهة ؟

13- أي تعليق او اقوال اخرى ....

سترون بعد الاجابة عن الاسئلة كم في البال من ذكريات لايام برغم كل ما كان فيها ... لا تنسى ....

[align=center]********[/align]

مع التنويه أنني لاأضعكم في محكمة أمام حاكم فلكم حرية الإجابة بشكل منفرد على الأسئلة وقد تمزج الإجابات من قبل البعض فيخرج بعدها بلوحة فنية رائعة عن أجمل ذكريات الطفولة المطبوعة في ذاكرته ... وصدقوني سأضع نفسي أمام هذا لإمتحان أخيراً عندما أقرأ البعض من ردودكم إنشالله .

زهرة الصحراء

Posted by: hosam abdulaziz

شكرا سناء عهالأفكار النيرة و للحقيقة عجبتني الفكرة , و بما انه اتهمتيني بالتهرب من الأجابة على موضوعك لمن يجرؤ رح عوضك هون و حاول جاوب عأسئلتك بمنتهى الصراحة
1- أين قضيت اجمل ايام طفولتك ... في القرية .. في الحارة ... أم ..... ؟
بدون تردد او تفكير بالقرية (زيدل)
2- هل كنت تصنف من بين الاشقياء .. أم من بين الاولاد المصنفين " عريف الصف " ؟
بيقول المثل حاميها حراميها, و انا كنت بالمدرسة لأكثر من مرة عريف الصف لكن بنفس الوقت كنت من منظمي الشغب بامتياز
بس ما بعرف شو صابني عكبر و عقلت كثير و صار القط بياكل عشايي.
3- ما كانت لعبتك المفضلة مع اصدقائك .... الشباب ممنوع الجواب غير " كرة القدم " ؟
هلق في المراحل الأولى البتدائية كانت اللعبات الولادية كرة القدم و السقوط او الطميمة.
بس عاد بالمرحلة اللي تليها انتزعنا عكبر و دخلنا عالم القمار (عالخفيف غير المؤذي) و صارت لعباتنا المفضلة هي الكوليه و الرشة و ننتظر العياد بفارغ الصبر لنفش السوسة.
4- هل تذكر كم عدد المرات التي عاقبتك فيها امك ... أم انها لا تحصى .... ؟
لا اتذكر ان والدتي قد عاقبتني بيوم ما , لكن انا ادين لها بأكثر من اعتذار ربما لأنني رفعت صوتي قليلا في وجهها ايام المراهقة , لكن هي تعرف انها لحظات طيش و لم تكن مؤذية .
5- اكثر شيء كنت تنتظر العطلة الصيفية لاجله ؟
الأبتعاد عن مقاعد الدراسة.
6- هل كان والدك يرى كشف علاماتك حين كنت في الابتدائية ؟
كان براها قبل صدورها كونه معلم في نفس المدرسة التي درست فيها (بس كانت بوقتها كلها نتائج بتشرف و ما بتخوف و يا ريت استمرت بهالشكل)
7- كم مرة هربتم من المدرسة ؟
هريبة بقلب الدراسة اكيد ما صارت
بس مرة عملنا تمرد جماعي قبل فوتتنا عالصف و السبب كان هطول الثلج الكثيف , و كافئتنا المدرسة بفصل جماعي لمدة يومين , و طبعا انا بشقاوتي و تمردي ما خبرت اهلي اني مفصول و كنت روح عادي عالدوام بس ما رح قلكم وين كنت قضيه.
و تكرر الفصل مرة ثانية بسبب كبر راس مع استاذ التربية العسكرية(بده ياني وقف قدام كل الطلاب و خصوصا الطالبات وقت تحية العلم لأنني مخالف باللباس العسكري فأنا كبرت عراسي و رفضت و قلتله رح روح خلف المدرسة و بعدين اتصرف مثل ما بدك ,عاد هون تحمس المدير و صف مع الستاذ و قرر فصلي ليومين) و كمان ما خبرت حدا من اهلي فيه ,
8- هل ما زال لديك احد اصدقاء الطفولة .. ؟
هم الأصل و سيبقون الأصل و انا من المؤمنين ان صديق الطفولة هو الوحيد الذي يستمر طوال العمر.
9- هل كانت لديك جدة او جد مميزين .... أم كانوا صارمين ؟
لسوء الحظ اني مذ خلقت لم يكن لي سوى جد و جدة من طرف الم و كانوا مقيمين في العاصمة و بالتالي كنا مميزين عندما نزورهم و مدللين و لا يوجد اي صرامة في تعاملهم.
10- اجمل صورة .... واسوأ ذكرى ... ببالك من ايام الطفولة ؟
في الطفولة لا يوجد ذكريات سيئة , و جميع لحظاتي كانت مميزة الى ابعد الحدود

11- كيف تصف نفسك حين كنت طفل .. من وجهة نظرك انت .. ؟ كنت مهذبا في تعاملي مع الناس , لكن من خلف الكواليس ما خليت شغلة عاطلة الا و جربتها(مع اصدقاء العمر) , من تدخين الى سرقات الى قمار (يخزي العين) الى ...........
بس عاد الحمد الله ما علقت فيي و لا عادة منها عكبر , لهيك انا مني زعلان من هالتجربة و ان اصغير و بيجوز كان الها الفضل بعدم تعلقي باسوء عادتين و هم التدخين و القمار.
12- هل تتمنى لاولادك طفولة مشابهة ؟
يا ريت اولادي يعيشوا طفولة سعيدة مثل اللي قضيتها مع اني بشك بهالشي بايام الأتاري و الكمبيوتر
يعني نحنا وقت تضيق خلاقنا نطلع من البيت و نهشل(تعبير زيدلي) و هالشي فيكم تقولوا دعكنا شوي و خلانا نكون قد حالنا الى نوع ما من عمر مبكر.

13- أي تعليق او اقوال اخرى ....
بيجوز اللي قراوا ما كتبت يعتبروا اني خبصت بطفولتي شوي , بس انا برد قلكم انه كلشي محروم مرغوب و انا دخنت و لعبت قمار و عملت المنيح و القبيح بعمر مبكر و معد ببالي شي.
لهيك على كبر كل هالأمور معد عبت عيني و ما استمريت باي وحدة منهم , لهيك ان ابنصح الهالي بارخاء الحبل قليلا على اولادهم وما تكونوا صارمين كثير.
طبعا خير الأمور اوسطها لا هيك و لاهيك.

شكرا سناء فوقتيني عذكريات حلوة لو بدي احكيلكم عنها بدي شي يومين ثلاث ما بخلص.

Posted by: Desert rose

من يومين حبيت رجعكن ولاد صغار بالعمر طبعاً . بمشاركة حلوة وخفيفة هي برأي أغلى من مال الدني اللي حكى عنوا وديع الصافي .
ولكن تبين بأنو الزيادلة بشكل خاص أو حتى مانظلم الزيادلة فقط فلازم نقول :
تبين بأنو أعضاء منتدى زيدل وقت يكبروا بيحبوا يضلوا كبار مابيحبوا يرجعوا يصغروا .

وربما أحيانا بيمنعنا الخجل بأنو نرجع لعمر الطفولة المرحلة الأجمل بحياة كل واحد منا .

1- أين قضيت اجمل ايام طفولتك ... في القرية .. في الحارة ... أم ..... ؟

بالشام طبعاً

2- هل كنت تصنف من بين الاشقياء .. أم من بين الاولاد المصنفين " عريف الصف " ؟

كانوا يصنفوني عريفة صف لأني كنت شقية كتير

3- ما كانت لعبتك المفضلة مع اصدقائك .... الشباب ممنوع الجواب غير " كرة القدم " ؟

كانت هواياتي مش لعبتي ركوب البسكليت والموتورسيكل وبالمناسبة أحرزت مرتين بطولة سباق الدراجات الهوائية بدمشق واللي كانت تقوم في شبيبة الثورة كل عام حول حديقة التجارة

4- هل تذكر كم عدد المرات التي عاقبتك فيها امك ... أم انها لا تحصى .... ؟

مابتذكر عاقبتني ولامرة (( فأنا الصغيرة وكنت كتير مغنجة )) ولكن كانت تزعل مني إذا أتصرفت تصرف مش على خاطرها أو خاطر أخواتي

5- اكثر شيء كنت تنتظر العطلة الصيفية لاجله ؟

مافي شي محدد... عادي ...ماكنت أنتظر شي معين .

6- هل كان والدك يرى كشف علاماتك حين كنت في الابتدائية ؟

طبعاً ....ولكن أخي الكبير غسان شيخ الشباب ((ياماما ))

كان يرعبني لأن كان هوي المسؤول عن كل خط أحمر بالعلامات ...وهناك البكاء وصرير الأسنان ولكن أنا كنت متوسطة الإجتهاد يعني ماعندي خطوط حمر إنما حصلت مرة وماعد تكررت بالقومية بالمرحلة الإعدادية ...كان وراي وراي

.7- كم مرة هربتم من المدرسة ؟

مابينعدوا

بكل وقت فراغ أو غياب المعلمة أو الأستاذ كنا نهرب من فوق حيط المدرسة ... نروح نشرب عصير وناكل سندويش جبنة عالنار (( كنت حب هالسندويش كتير ))

8- هل ما زال لديك احد اصدقاء الطفولة .. ؟

طبيعي لا... فنحنا بالمدينة وصعب يبقى صديق طفولة من المدرسة ولكن عندي جار طبيب أسنان رافقني بكل المراحل الدراسية ومازال لهلق جار الرضا وصديقي الطيب بالشام .

9- هل كانت لديك جدة او جد مميزين .... أم كانوا صارمين ؟

وعيت عندي جدتين ...أم أمي بالشام كانت كتير حنونة وطيبة ...وأم البابا كانت بزيدل ماشفتها بالشام ولامرة بسبب فقدانها لبصرها و اللي صاب عيونها وقت كنت أنا صغيرة وكمان كانت كتير طيبة تستقبلنا كتير منيح ...ورغم أنها مابتقشع كانت تعمللنا أكلة زيدلية كتير لذيذة أسمها (( السيالات )) وكنا ناكلها من تحت إيديها بشهية ..الحقيقة كان وضعها يحزني .

10- اجمل صورة .... واسوأ ذكرى ... ببالك من ايام الطفولة ؟

أجمل صورة أيام العيد في كل مكان .... وأسوأ ماعندي الحمدلله

11- كيف تصف نفسك حين كنت طفل .. من وجهة نظرك انت .. ؟

ماكنت عاقلة كتير كنت مشاغبة ولكن كنت طيبة ولحد اليوم أنا هيك بس مابحب القط ياكل عشاي ...يعني إنما الصبر حدود في كل أمر على قول أم كلثوم .

12- هل تتمنى لاولادك طفولة مشابهة ؟

لا لا...بتمنى أحسن أكيد مع أنو كنت مرتاحة كتير ومبسوطة بطفولتي كتير وماعندي اي معاناة بها المرحلة ولكن هالكلام هلق مابيفيد لأن هالوقت بدو راحة أكتر ولو بدو الوضع اليوم يكون متل وضع أهلي من زمان مارح يكونوا ولادي مرتاحين متل ماهني مرتاحين اليوم .

13- أي تعليق او اقوال اخرى ....

ماعندي شي زيادة إلا نصيحة قدمها لأعضاء منتدى زيدل وهي :

كل وقت يعطي حكموا ....واليوم اللي بيروح ممكن يجي أحسن منوا إنما مستحيل يجي متلوا ..مشان هيك دائماً أضحكوا وأنبسطوا وأبتسموا .

شكرا حسام لصراحتك ...إنما الحقيقة صعقت باللي قريتوا عن طفولتك وكانت المقارنة صعبة بين ماضيك وحاضرك ..ولكن رح كون صريحة كتير وقك كنت مبسوطة كتير وأنا عم برجع معك لطفولتك .

زهرة الصحراء

Posted by: nicole

لست أدري يا سناء لماذا إغرورقت عيني بالدموع عندما قرأت موضوعك فهل هو الحنين إلى الطفولة أم هو الحنين إلى زيدل أم الحنين إلى عائلتي و أقربائي ورفاق العمر و أخذني ذلك الحنين إلى تصفح خواطر كنت قد كتبتها في صف العاشر بناء على طلب إستاذ عزيز لذلك اسمحوا لي أن أشاركم إحداها
(عبر مفارق الماضي )
قالوا أن الزمن ممحاة لكلمات الماضي الذهبية المكتوبة على ورقة الحياة
فراعني ما قالوا وحملت مفتاح قلبي و رفعت مزلاجه و رحت أنفض عن نفسي غبار الزمن لأقرأ ما حفرته السنون على جدران قلبي فطالعتني من بين السطور حارة صغيرة وأزقة متعرجة طبعت على جدارها بسمات بريئة وكلمات ساذجة كانت كل عالمنا آن ذاك و أمامها هناك منزل بسيط ومسطبة صغيرة جلست عليها الجدة لتحدثنا عن قصص الطفولة عن ليلى والذئب و عن جحا وحماره لتحملنا على أجنحة الخيال تطير بنا على بساط ألف ليلة وليلة وتحط بنا عبر مفارق القرية حيث جلست والدتي و والدي والجارة والجار وتراكض الأولاد و تضاحكوا وبينهم طفلة صغيرة مجدولة الضفائر رأت الحياة كرة ولعبة لعلها أنا بحثت فيها عني عن أوجه للشبه بيننا بين فتاة اليوم وطفلة الأمس ولكنني وجدت بأنها أنا وليست أنا ولعلي سأعود بعد سنين لأنكر نفسي وأبحث عن أوجه للشبه بينها وبيني لكنني لن أنسى أن الماضي ينبض في عروقنا ومهما نسينا ومهما سلونا سيظل حاضرنا إمتدادا لماضينا
فما أجمل الذكريات حين تدق بقضتها أبواب القلب وما أحلى أشواق الماضي عندما تداعب بأناملها عتبات الروح ولكن ما أصغر هذا القلب الذي يتسع لكل هذا البوح لكل تلك الذكريات لمطر ذاك الحنين ما أصغر هذا القلب وما أكثر معجزاته عندما ينطوي على تلك الآماد الفسيحة التي إسمها الماضي

عذراً لأنني ابتعدت عن الموضوع لكنني سأعود للإجابة على الأسئلة لاحقاً

Posted by: celine

قضيت ايام الطفولة بمكان اقامتي ومتل ما بيقولو مسقط رأسي مدينة حمص......والاحلى بضيعتي صدد اوقات العطل والمناسبات

(كنت) اعتبر هادية جدا جدا ولهيك كنت احصل على محبة المدرسين والمدرسات لانو كنت شاطرة وهادية وطبعا الوضع انعكس تماما بعد الابتدائية
بالاعدادي والثانوي لانو كانو قبل يحطوني عريفة لاني هادية وبعدين كانو يفكروني هادية بس كنت انا سبب الفوضى وخاصة بمدرسة كلها بنات واللي بحبها كتيير وكنت مستلمة الاذاعة وحط اخر المنوعات ونشد الدبكات وياما عاقبوني انا العريفة وانا عم زقف وحمس الصف ونحنا عم نغني شي غنية عالعالي اذا مرق شب قدام المدرسة وطبعا بشطارتي كنت اتملص من العقاب........

اسوأ الذكريات وقت السفر على حمص بعد العطلة الصيفية الطويلة بالضيعة ... واللي كنت انبسط فيها بطولها وعرضها من مناسبات للقاء بكل الاهالي للعب البيت بيوت... ولعبة العصفور الطيار مع الشباب انتهاء بركوب البسكليت اللي هيي رياضتي المفضلة حتى الان....ومابعتقد تركها .. انتبهو ماحدا يجي عالضيعة عغفلة ويلقطني عالبسكليت...وقتها......

وبهيك كنت اقضي اجمل اللحظات بالصيف بصدد وشوي بحمص ورح خبركن عن احلى تقليد كنا نعملو بالحارة بحمص وقت الاحتفال بعيد الصليب كانو يجتمعوا اولاد الحارة وانا منهن ونروح نجمع خشب ووو.....مشان الشعبورة ....
وبليلة 14 ايلول (قبل المدرسة بيوم )وكنا نشعل الشعبورة او النار بعد الساعة 8 ونص لانو شارعنا عام وبيمرق منو الباص وكنا نجتمع حول النار حاملين صلبان صغيرة و نرتل والسبب انو كلنا مع بعض بمركز التربية الدينية من الصغر وكنا نغني ونرقص وحتى ندبك وكتا نتضايق ونخاف تنطفي الشعبورة بس تمرق سيارة او يتضايق حدا من الدخان فيرشلنا اياها بالمي ......

يعني بعتقد هيك حطيتكن بالجو وصدقوني لحظات مابتتعوض...واكيد ما بقى تنعاد

ما عندي ولا جد ولا ست من حوالي 8 سنين وهالشي بيحزني كتيير و بيخليني ضعيفة وحتى كتيير احيانربتدمع عيوني اذا شفت ختيار اوختيارة والسبب انو فقدتهن على صغر يعني اهل امي توفوا وانا بعمر 6 سنين واهل ابي وانا بعمر ال10 سنين ومابقي الا شوية ذكريات حلوة وطيبة متل قلبهن...

دايما اهلي كانو يشوفو كشف العلامات ولما كبرت ماعد شافو ه على اساس بسبب الثقة بانو اكيد العلامة كاملة يعني ملوا بس اكيد انطلاقا من احترامي للاهل وانو لازم يصيرو يشفو الكشف متل اهالي الطلاب الباقيين خليتهن بحنكتي الخاصة يرجعو ا يتفرجو عليه من جديد......ههههههه

كنت لما زاعل البابا هوي يراضيني لاني الصغيرة والمدللةومع هيك انا برفض الدلال لانو بحسو بيضر اكتر بكتير مما بيفيد والنتايج واضحة وجلية بوجودي معكن هلأ...

يمكن لاني صغيرة اصدقاء الطفولة بعدهن لهلأ وكل سنة بيزيدو كتير وانا ضد مقولة اصدقاء الطفولة هني اللي بيستمروا وبس لانو بعتقد المعدن هوي الاساس....

لما اتزوج رح حاول قد مافيي اتفادى الاخطاء اللي فيي واللي بعتبر الحق فيها على اهلي ودلالهن الي واكبر دليل هوي عدد ساعات الانترنت اللي بقضيها بعمر يمكن مو كتير مناسب او حتى يمكن بوقت مو كتير مناسب وبنفس الوقت هالشي فخر لالي ...وكمان اكيد هالشي بيدل على ثقة اهلي فيي اني قد ماكان بقدر نظم وقتي
وبتمنى كون هيك جاوبت على كل التساؤلات اللي توجهتلي من قبل الاعضاءالاصدقاء...

اخر شي بحب قولو اني عشت طفولة سعيدة لدرجة اني على كبر صرت اتلقى الصدمات وحدة وبعدها وحدة وكل مرة بقول معقول في ناس هيك...معقول يصير هيك..
يمكن هيك خبرتكن سر كتير مهم اني بخاف من الصدمات واحيانا المفاجأت حتى السعيدة منها...بالرغم انو انا كتيير بحب فاجىء غيرييعني( لازالت الحياة ليس فقط تدهشني لابل تصدمني)....يمكن لاني صغيرة ....لكن بعد كل صدمة برجع بستعيد قوتي وحياتي وذكرياتي وبرجع بنصدم والسبب انو(ليس للروح ذاكرة)....

واكيد مش مهم تكون الطفولة او الماضي ابيض كان او اسود المهم الحاضر يكون ابيض ومشرف....وانشالله كلنا منعيش حياة حلوة وصافية من كل شي بيعكرها

لكم محبتي سيلين....

Posted by: حكيم عيون

أخ ... والله ورجعّتينا يا زهرتنا لأيام بعيدة , رجعّتينا لأيام بسيطة وحلوة وبعيدة عن الروتين الممل , أيام الطفولة . فطفولتي كانت في بيت على حدود القرية تجاوره بيوت قليلة العدد ,يمتد على مساحة لابأس بها مسورة يتوسطها بستاننا المميز في القرية وماحولها , وكأنه واحة جميلة على أطراف الصحراء,كنت أصغر أخوتي سنناً يعني كنت الطفل المدلل عند المرحوم والدي ,لم يكن لي أختلاط كبير بأطفال القرية بحكم البعد عنها , ماعدا أبناء الجيران , وابن أختي الذي هو كان صديقي وعدوي الرئيسي , فتارةً ترانا على وئام نلعب سوية وبلحظة واحدة تعلق الخناقات بيننا ,ونعود في صباح اليوم التالي للعب من جديد مع بعضنا ,كان الصيد هواية مفضلة لدي وخاصة صيد العصافير في بستاننا ,وكان يأخذ أغلب أوقات الصيف لدي , مازلت مولع به حتى الآن ولكن طبعاً لاوقت له لدي حالياً , بالإضافة للسباحة في بركة البستان الكبيرة المميزة , أما المدرسة فقد كان علي أن أمشي ما يقارب الواحد كيلو متر حتى أصلها ,كنت من الطلاب المتفوقين فيها , وغالباً ماكنت أعين عريفاً وكم قتلةٍ أكلت من الأولاد المشاكسين عند أنتهاء الدوام في المدرسة , لأذكر أني هربت من المدرسة في صغري , ولم أخفي نتائج آخر السنة عن أحد من أهلي ,ولأذكر أنني عوقبت من قبل أمي , وحتى أبي إلا في حالات أستثنائية , وطبعاً بسبب تعدد أنماط الحياة التي عشتها وتعدد الأماكن التي سكنتها لم يبقى لي أحد من أصدقاء الطفولة ,وأما عن الجدّ والست فلم أعرف أحد منهم لأنهم للأسف توفّيوا قبل أن أولد بإستثناء جدّتي أم والدي التي أذكرها ببساطتها قليلاً ,وأجمل صورة ببالي من صور الطفولة هي صورة العصافير المتساقطة التي كنت أصطادها ببارودة الخردق
(ولو أنو فيها قسوة شوي بس هي الحقيقة ولا بدكون نياني كذّب ),وأسوأ صورة هي لما أنقطعت أصبعتي الوسطى وأنا عمدوّر موتور مجموعة الكهربا , الله لايذوقكن هذاك الوجع ,و قد لاتبدو طفولتي مميزة بنظر غيري ولكنها بالنسبة لي وبالرغم من الوحدة التي تربيت عليها وفرضت عليّ في صغري , أجدها مميزة وأحنّ إليها كلما شعرت بالملل من روتين الحياة ,قد تبدو طفوتي روتينية ولكن كلّ يوم فيها كان جديداً بالنسبة لطفل ,وكان اليوم فيها يعادل سنة كاملة من أيامنا هذه التي نعيشها الآن , كنت طفلاً هادئاً مطيعاً وأحمل مخيلةً واسعة أعشق البراري والصحراء ( هاي الصحراء الحقيقية مو الصحراء تبعك يازهرتنا) ,هذه هي الحقيقة بدون زيادة ولانقصان , هيك بدك ياسناء ,ارتحتي هيك .

موقع زيدل سوريا حمص .. خدمات تشات و دردشة ... أرشيف المنتدى