وهلق وبعد ماسمعت هاالقصة أبونا جورج بالله عليك ماطلع عبالك عروس بلبنة مع زيت الزيتون ونعنع أخضر مع خبز الصاج المرقوق متل منصور
لتستعيد ذكرياتك بالكسليك ؟؟؟

وأنتوا ياشباب ماأشتهيتوا ......شي عروس بلبنة بلدية لبنانية ..... ولك صدقوني مش رح تلاقوا أرخص من هيك عروس بها الأيام ...أصلاً بزيادة عليكم .

والمجوزين كمان إذا عبالكن ماتحرموا حالكن ...؟

سلام

مرحبا للجميع

الحمدلله اللي في ناس بيحبوا سناء فإن نطقوا ما بينطقوا إلا بالحق واضحين ومعروفين مش بالضرورة سمي أسماء ...!!!!

سليمان ياصاحب الحق والحقيقة .... ليه مستغرب تهجم حسام على لبنان (( يعني صارت سياسته واضحة متل الشمس اللي بتطلع الصبح وبتغيب المسا ...متل السياسي الفاشل اللي دائماً مع الواقف ))

بدويلطش حق العالم الكبير ..حسن كامل الصباح من اللبنانية ليعطي ببلاش للي قتلوه ومعروف مين قتله وليه قتلوه ولوووو ياحسام وهل يخفى تاريخ هيك مخترع لبناني إبن النبطية واللي ألوا فضل كبير على المدرسة السلطانية بدمشق وقت درس فيها مادة الرياضيات ....المهم كمان ماتلطش حق وفضل هالزلمة بسورية .. على كل الموضوع ممكن نطرحه ومهم كتير وهوي إغتيال الكثير من العقول العربية متل سميرة بو علي عالمة الذرة (( مابعرف إذا سامع قصتها كمان )) وتسلملي حسام ماتفكر تخترع شي عايزينك

وهلق خلينا نرجع لموضوعنا و لتاريخ العروس بلبنة .....ياأعضاء ويازووووار منتدى زيدل الأحباء و اللي رح تقروا هالموضوع أشهدوا بالحق في حدا بسوريا بيقول للسندويش (( عروس )).... قولوا ؟؟؟

إنما المعروف بأنو الرجال اللبناني واللي بيصر عمروا 60 و70 سنة بيقلها لمرتوا بدي عروس.... بزعتر ...بجبنة .....بلبنة .....يعني القصة تاريخية تقليدية .... ومعروف أنو اللبناني أول من أوجد الصاج والخبز المرقوق ومنقوشة الزعتر الأخضر بالخضار الشهية .... .فالله يوفقكن ماحدا ياكل حق حدا... القصة مش متحملة بها الأيام بيكفي اللي لطشتوا ...؟

أبونا جورج حقك علي..... قلت برجعك لأيام عروس اللبنة بس أنت يعني وسعت الدائرة شوي و انتقلت للمعاملتين ... وبعدين صرت بسندويش الفلافل ومن وين من آراكس (( الحق معك طيبة كتير مع كولا وكبيس الحر )) .....وعد خلص بــ 20 ....إنشالله مناكل فلافل لبنانية آراكسية والأطيب منها الفلافل.... الأبو زوزية .....من عند أبو الزوز بـــ سن الفيل .

شيف سليمان أيها الطاهي الممتاز واللي ألك سوابق قديمة عند ماقدمتلنا طبق المجدرة المزعوم بالفطر وخربتلنا بيتنا ..... واليوم عم تقدملنا عروس جديدة مابعرف إذا تاريخها زيدلي أو أسترالي بس بما أنك قلت عروس يعني صارت لبنانية (( عروس بقرنبيط مطبق بطحيني مع راق لحم خاروف ملفوفة بخبز مشروح وكثري ثوم...هممممممم ياهيك العرايس يابلا ))

الله يسامحك أبونا جورج أي صدقني هيك عروس هي اللي رح تخلينا نتشهون لحد الخطية وعجهنم دغري بإذن الله .

م: مبارح بالليل في شب من المنتدى قال بدو عروس بس (( مش بلبنة ولا بجبنة ولا بزعتر ولاولاولاولا بدو عروس ؟؟؟؟......فلحقوا حالكن يا ؟؟؟؟؟ اللي عبالوا يتصل في أو )) طلب مني ماقول أسموا

هيك أتعرفت عليه بمنتدانا العزيز بمشاركاته بزيدل الجميلة ...وكونه بكاليفورنيا وأنا ببيروت كان إالقاء التحية الدائم يتم إماعبر ماسنجر الياهو السهل أو عبر الإيميلات الخاصة ...وبعد زمن قليل وبعد عدة لقاءات أفصح عبدلله عن زيارته لزيدل بتاريخ 6 حزيران من صيف الـــ 2004 للقاء الأهل..وللقيام بواجب تنصير أولاده (( أيلينا... و..إيفان )) وكان نصيبي حلوا وعبدلله كان مزوق فكنت من بين المدعوين لحضور حفلة العماد بـــ 14 تموز .... وهيك تم اللقاء الأول من غير معرفة سابقة إلا بالصوت طبعاً على باب دير مار جريس بزيدل ..وكان صديقنا مبين متل الملاك النازل من السما...شب حلوا ....أنيق .....ونور الله عليه ......ولكن من سوء حظي كان اللقاء لوقت قصير كتير بالكنيسة والأسوأ أنو ماقدرت شارك المعمودين فرحهم بالحفل اللي صار بعد مراسيم العمادة ...تشوفوا متل ماخبرني وهوي (( مطفي وسكران )) فبقي عبدلله بذهني الملاك النازل من السما اللي شفتوا اول مرة على باب الدير.

اللقاء التاني كان خاطف ومن بعيد بحفلة المغتربين اللي صارت بشهر تموز وبالمناسبة بوجه شكر لكل اللي كانوا مهتمين بها الحفل...بانتظار الحفل القادم إنشالله (( وخسارة مارح يكون عبدلله )) المهم بالدقايق الأخيرة تصافحنا بالأيادي وتمنيت لقائه مرة تانية .

أتجدد اللقاء للمرة التالثة عند ماقمت أنا وطوني بزيارته ببيت أهله وهالمرة كان اللقاء حلوا و أطول فقدرت أتأمل كل ملامح عبدلله وبشفافية ولاحظ الهدوء اللي بيحكي فيه وبجدية وتناقلنا شوية أحاديث إجتماعية ..وبعدها تم الوداع بسبب الوقت اللي ماعد يسمحلنا باللقاء مرة تانية .....وفليت والإنطباع الأول اللي طبعتوا بذهني عن عبدلله ماأتغير.......ملاك يعني ملاك .....

وخلصت الصيفية وكل واحد رجع لبلدوا ... ورجعت أنا لبيروت واللقاء رجع يتجدد إنما هالمرة بصورة أوسع فعلى مايبدو بعد مارجع عزيزنا من هالرحلة السياحية وتماينسى الأيام الحلوة اللي قضاها ببلادنا الحلوة قرر يكمل رحلتوا بالتواصل أكتر وأكتر مع أهالي ضيعتوا عبر موقع ومنتدى زيدل ...؟

وهون بلشت أعرف عبدلله أكثر ....من حرفه من كلمته ... من طريقتوا بالتعبير وشوي شوي صرت أفهموا ....(( طبعاً هون إلي وقفة فما يحق بالفهم والقول للمتزوجين الراشدين لايحق للعزابية الغير راشدين )) يعني كان واضح وصريح وجريئ بكل اللي بيكتبوا وبكل المجالات والمواضيع .

هلق صحيح بيحرف الأمور على ذوقه أوقات ...لكن كل اللي بيسمح لنفسوا بأنوا يحرفوا ومن أميركا بالذات بتلغي محبته وغيرته الواضحة لناسوا وأهلوا وحبابوا وصحابوا .

فيا أبونا قصة[blink] المطروقة[/blink] قصة مش غريبة يحكي فيها عبدلله متل ماحكى كتير قبلها مرقها هالمرة كرمالي... بعرف قلبك كبير كتير وصدرك واسع .....وإذا مش كرمالي... كرمال العروس الحلوة اللي عندو ....واللي متأكدة مابيبدلها بكل عرايس العالم

أنا متلك أبونا جورج رح أشكر الله بأنو عبدلله مش شاعر .....لابل لازم أشكره كمان لأنو أكتر من شاعربكتير .

عبدلله من قلبي بدي قلك وخليني قول مش بالضرورة تكون شاعر لتعبر عن إحساسك ومكنونات قلبك اللي بتحكمك أوقات عن غير قصد .
أحياناً ممكن تقوم بفعل أكبر بكتير من كل الشعر الموجود بالعالم ...عمل بسيط لكنه عظيم ... بالنسبة للشعراء يكون شيء تافه و قليل إنما أنت بقرارة نفسك بتكون بتعرف بأنك قدمت أكتر من مستطاعك وغيرك عم يقدم موساعات شعرية وببعض الأوقات لكن مابتفيد

مالازم ننكر بأنو الشعرالمكتوب أو المسموع بيحرك أحاسيسنا اللي بتنهض فينا لعالم حلوا ومييز وخصوصاً إذا كان موجه ألنا بالذات..والكلمة الحلوة لايعلى عليها وماألها مقياس إن كانت موزونة أو غير موزونة بقصد طبعاً الوزن الشعري ... مابيهم إذا كانت عالقافية أو غير القافية نثر أو شعر المهم تضل الكلمة الحلوة بحياتنا منارة لدرب نحنا ماشيين في ومش عارفين لوين بدنا نوصل ...ونقولها حتى بالأوقات اللي مالازم نقولها .
فكلمة صباح الخير الصادقة منك الصبح ممكن تطربني أكثر من أي نغم أو قصيدة شعر
والمسا وقت تودعني بكلمة تصبحي على خير بتخليني ملكة على عرش كل ملوك الشعر .
فعذراً منك عزيزي عبدلله لاتقيس نفسك بقيس إبن الملوح ....ولا بنزار ......ولا بعنترة بن شداد ....ولابالأخطل الصغير....فحرف واحد من حروفك المكتوبة بصدق وأمانة ووفاء تساوي كل مملكة الشعر القديم والحديث .

دمت للجميع ودمت لي صديقاً وفياُ أميناُ شاعراً كنت أم لم تكون [align=center][/align]واليوم هالحكي رح يسمحلي أنهي كلام

موقع زيدل سوريا حمص  .. خدمات تشات و دردشة  ... أرشيف المنتدى

vBulletin Copyright ©2000 - 2008, Jelsoft Enterprises Limited.
vB Easy Archive Final ©2000 - 2008 - Created by Stefan "Xenon" Kaeser