الارشيف - حدود المجاملة

Pages: 1

حدود المجاملة
(انقر هنا ان احببت مشاهدة الموضوع الاصلي بالالوان و الصور )

Posted by: fr george massis

قصة حب مشربكة

اليوم حابب أحكيلكم قصة طريفة صارت معي بهالأسبوع............ تفضل يا أبونا......... شكراً!!!!!!
يا سيدنا القصة وما فيها أنو بنعزم على عشا عند عائلة برازيلية من رعيتنا بالكنيسة، ...يا سيدي رحنا على العشا تتعشو كل يوم بخير......... ومن وقت اللي انفتح الباب اللهما عافينا وإذا بشلة كلاب 5-6-7 وقت العديتهم طلعوا 8
أما شو كلاب حشمة وأدب ولغات وجمال ولاء وشو كل كلب أغلى من الثاني، ومانكم بالطولة قعدنا بالصالون وصاروا الشباب (الكلاب) واحد ورا الثاني ينطوا ويلعبوا معبرين عن فرحتهم بزيارة الضيف العزيز وما وفروا طريقة وما رحبوا فيها عليّ، وهون بيطيش حجري وبيجنن جنوني وبصيح، مشان الله احبسوهم بغير غرفة لوقت تخلص هالزيارة وإلا ......قول ما كفيت الكلمة وربك حبسوهم وقعدنا على رواق وكان الحديث التالي:
أبونا أنت ما بتحب الكلاب؟ الجواب طبعاً وبدون تفكير أكيد لا........
ومع هل اللا ظهر كل الجهل الشرقي وعدم مراعاة واحترام الحيوان خلقة الله ..........الخ
المهم بدنا نتعشى وبنفس الوقت نطري الجو، وبلشنا نشرح أنو عنا بنربي الكلاب بالمزارع والبرية أما بالبيوت إلى حد ما ممنوع وغير مستحب عدا بعض المتمدنين وبعد استطالة بالشرح والأخذ والرد يا سيدي الكريم (لنحط يا سيدتي الكريمة مشان ما يعلقوا علينا مفتشين حقوق المرأة بمنتدى زيدل ولا يهمك زعلكم بالدني)بيحطو العشا ومن هل بيحبهم قلبكم أشي محمر وإشي مقمر .............الخ
وهون حطنا الجمال أثاري العيلة متفقة عليّ وضبوا شنطة الست منى (اسم الكلبة ما يروح فكركم لبعيد) الأكل واللبس وتوابعه من شكل للشعر وصابون وشامبوا وكولونيا وحيشاكم التواليت المتنقل تبع الكلبة ، ومفروض على أبونا يبلش يحب الكلاب لأنو هيك بدو الوضع والبلد وإذا سامحوني أصحابنا وطلعوا قوادم يمكن سبب شرخ بالكنيسة مع شي عيلة بزيارات قادمة وهالموضوع صار وجرى والأمثلة كثيرة.........
الزيارة لمدة ثلاث أيام بالأسبوع من الإثنين وحتى الخميس، وهيك بلشت الست منى تقاسمني وتشاركني بمملكتي الصغيرة واللي بحبها كثير نمنا أول ليلة بسلام وقت بفيق الصبح بشوف الست منى نايمة على تختي ، وبعد ما عديت للمية وعم فكر شو بدي أعمل قررت أنو ما اخسر الإمتحان وتابع للنهاية...............
قمنا من على بكر ونزلنا على الحديقة محل ما بعمل رياضة المشي الصبح ونزلنا الست منى على الفسحة وكان الإعجاب من كل جمهور الحديقة والشاطر بدوا يسلم على منى ويبوسها معجبين بشكلة شعرها وريحة الكلونيا طبعاً أخذنا الحكي وما قلتكم سعر الست منى (1000$) وبعد المشورا رجعنا على البيت وطعميناها وغسلناها وصار وقت المدرسة قول فهمنا المخلوقة وطلبنا اذنها لنروح والحقيقة ما حكت شي ولكن ابدت اعجابها بأبونا جورج وعطتني بوسي على الحارك......فتحتلها السيدي على طل الصبح ولك علوش ورحنا على المدرسة ،.............

[align=center]

[/align]

اللي بدي قولو هلق أنو كنت ما ني مصدق تخلص المعلمة لأرجع على البيت وشوف منى اللي ما فارقت فكري ولا دقيقة، وشقد كانت فرحتي كبيرة لما فتحت الباب وركضت على حضني ولوحوست خدودي .........
هالقصة من واقع حياتي اللي عشتها وحطيتكم بأدق تفاصيلها بعرف في كثير ما بيهم الموضوع وبعرف كثير علقوا سلباً وإيجاباً المهم أنو أنا سعيد من زيارة منى وصرت انتظر يوم الإثنين الجاي لحتى شوفها........
السؤال هو هل عندي استعداد لغير قناعاتي مع تغير مجتمعي؟
بمجمل مقارناتنا الخاطئة عن الشرق والغرب، هل عندي استعداد مسبق للبس عادات غربية فرضت علي؟
لأي مدى بتأقلم وبنجح؟
وقت اللي برجع شوبدي رجع معي تربيتي ولا تأقلمي؟
القصة بسيطة مع كلبة ولكن فيك تسقطها على مئات الأمثلة، الأكل ،اللبس، الشعر، الأصدقاء، الحب، الجنس،العائلة................؟؟؟؟؟؟؟؟؟؟؟؟؟؟؟؟؟؟؟؟
والله معكم..............

Posted by: Desert rose

أبونا مش رح أقدر أوصفلك حالتي بشكل دقيق وبتفاصليها وأنا عم بقرا قصتك متل ماحضرتك كتبت بدقة حكاية العزيزة على قلبكم ((الست منى ))...؟؟
هلق ممكن حب كل الحيوانات الأليفة ....بس الله .....يسعدهن ويبعدهن ....يعنى لامنى ولا مية وحدة متل منى ممكن تخليني إذا تركت بيروت غيرت قناعاتي... وبعد ماكون رافضة لتربية أي نوع حيوان داخل بيتي ..يصير في بيتي كلب ووووشوووووينام بتختي ..... وينط على كتافي ....وبوسوا ويبوسني .....لا والأحلى يلحوسني أي عااااااال معقوووول أبونا هالحكي ؟؟؟
أنا بحترم كل اللي بيحبوا الحيوانات وبيعطفوا عليها وأنا ممكن كون بحبها وبعطف عليها بس ماوصل لوقت أعتني بكلب لها الدرجة (( شامبوا....بون بون خصوصي......ألعاب خاصة في ......الخ )) .......؟؟ لسببين أولاً لأني مابحب هالنوع من الهوايات .... ثانياً وولو بفرض رح كون من هالهواة فبلادنا بغض النظر متمدنين أم غير متمدنين مابتسمح أخلاقياً أني قول بأنو عندي كلبة حقها ((1000$)) ومصروفها الشهري قد ربع حقها ؟؟ وأنت أدرى بأنو بالسوبر ماركات في مكان هائل مخصص لكل مايحتاجه الحيوان ((أكل ...أكسسوار ... وحتى الألعاب كل حيوان عنده لعب خاصة في .....الكلب مثلاً عندو كيس عظم وكل عظمة لون وكل عظمة شكل ... يعني ....ضروري نرفه الكلب متل ما نرفه الإنسان ؟؟

وبصراحة في قريبة ألنا ببيروت عندها كلبة بتحبها كتير ....أنا مابحبها ....مش لقريبتنا لالا.... للكلبة أسمها ((باريتا )) الكلبة طبعاً .....عودت هاالإنسانة .....وقت تسمع صوتي ...... ضروري تخفي صوت باريتا

بس شو كلبة ياأبونا شفتها مرة وحدة بحياتي وماعدتها

حلوةةة بس أسمها كلبة يعني بتعض ؟؟ أنا بخاف بصراحة ما بأمن للكلاب رغم وفائهم للأنسان واذا مد الموضوع أكثر ممكن خبركن كيف عضت كلبة أليفة متل الكلبة منى ومتل باريتا إبن أخي يوسف ياااااحرام

اللي عنده فضول يخبرني ؟؟؟

نسيت أسألك أبونا المحروسة اللي بالصورة هي الست منى ؟؟؟؟؟

[align=center]<<ماتسألوني عنها كل اللي بعرفوا أسمها ساندي وعايشة بكندا>>[/align]

[align=center]

[/align]

[align=center]<<بس عن جد مش مهضومة أكثر من ستنا منى ؟؟؟؟>> [/align]

النتيجة من الكلام وبشكل جدي ومع إحترامي لكل من يحب هالنوع من الهوايات .....ممكن جامل واتأقلم بكتير شغلات إلا بتربية الحيوانات وخصوصاً الكلاب والكلبات ..؟؟؟

وشكرا أبونا على أسلوبك اللطيف الخفيف والشكر الكبير على توجيه حديثك للسيدات اللطيفات كمان ...وتحية كبيرة لأصدقائك بالبرازيل ....وإذا بيوم فكرت تعزمني عالبرازيل ...الله يوفقك ...ماتجرب تخليني زورهن ؟؟

وسؤال رح أنتظر جوابوا بصراحة ليه مسمية الكلبة منى يعني اسم عربي أنشالله يكون عندهم كلاب كمان ...وياريت تعرفنا على أسماء الباقيين

زهرة الصحراء

Posted by: عزالدين حسون

قصه غريب الف شكر

موقع زيدل سوريا حمص .. خدمات تشات و دردشة ... أرشيف المنتدى