الارشيف - ماهي الأكلة المفضلة لديك ؟

Pages: 1

ماهي الأكلة المفضلة لديك ؟
(انقر هنا ان احببت مشاهدة الموضوع الاصلي بالالوان و الصور )

Posted by: Desert rose

لأكثر من سبب حبيت أفتح هالموضوع ..... بتمنى تساعدوني :

الأول _إغناء هالمنتدى منتدى الطبخ والأكلات الشهية بأكلات شهية جديدة .

الثاني _ إعطاء القيمة والحق للغذاء وللأكلات الطيبة اللي مناكلها كل يوم ومامنقدر نستغني عنها .... و صحيح نحنا مناكل لنعيش وما منعيش لناكل إنما هيدا الحكي مابينطبق على الكل وجايز ينطبق أكثر على النساء اللي بيحبوا الأجسام الرشيقة (( يعني مش بقناعة .... إنما مجبراً أخاك لو بطل ))

بس هالقول بينعكس تماماً عند الأغلبية من الرجال وبيصير ....نحنا منعيش لناكل ومامناكل لنعيش (( ماتزعلوا ))!!!!مش تهجم؟؟

ثالثاً _ ياجماعة ورغم كل الأقوال اللي الها علاقة بها الموضوع وأهمها :

خبزنا كفاف يومنا أعطنا يارب أغلب النساء بتبقى عندها طبخة اليوم هممم .....لأنها دائماً بتحتار بعملية الإختيار وخصوصاً بحضرة أولاد أو زوج (( مناكلها وما مناكلها ))...وماحدا يقول اذا ست بيت ما لازم تحتار ؟؟؟؟

لها السبب قلت ياسناء ما الك إلا أعضاء المنتدى يخبروكي عن أكلتهم المفضلة ...من دون شرح أو تفاصيل .....واذا مع شرح بيكون أحسن وهيك برتاح كم يوم ....!!

شوووو .....صعبة؟؟؟

واذا بتحبوا تعرفوا الأكلة المفضلة عندي هي (( pasta بالحبق

))

اذا ما عرفتوها رح أعزمكن عليها واذا ماعرفت أكلتكن .....ما عليكن إلا تعزموني

زهرة الصحراء

Posted by: sulieman safar

غزيزيتي سناء عن شرط ما بتصير . حيت الى البيت ولقيت نهلا طابخة مجدرة, اي نعم مجدرة, بدنا نرجع نعمر بلبن ونطبخ مجدرة. وأنا عادتا بحب المجدرة بشكل لكن بعد تحريفها واليك يا عزيزتي طريقة طبخ المجدرة على طريقة طباخ الكمأة المشهور:
تتطبخ ألمجدرة حسب الطريقة الحديثة نصف عدس ونصف برغل.
تحوج كمية وافرة من الفطر الطازج مع رأس ثوم وربع بصلة وحوالي 100 غرام أسفراغ في المقلاة وعلى نار عالية ومع القليل من زيت الزيتون لمدة دقيقتين. تضاف هذه التحويجة الى صحن مفروش وفيه المجدرة ومن بعدها تضاف تقبيعة الى الصحن أربع بيضات مقلية بشكل الرغيف.
صحتين وهنا
سليمان

قبل ما يسألني وسام ,بيجوز استعمال السلبين في عدم وجود الأسفراغ

Posted by: shadi

الحقيقة يا سناء موضوع كثير حلو وفينا نستفيد منو بأكثر من طريقة يعني أول شي للي ما عارفين شو بدهن يطبخوا وثاني شي لطريقة تحضير الطعام بالطريقة الصحيحة وأهم شي بنظري هوي فائدة الأكلة بشكل عام يعني القيمة الغذائية إلها...يعني فينا نقول هالمنتدى إلو علاقة كمان بالمنتدى الطبي .
انا بالنسبة إلي في أكلتين كثير مفضلات بس للأسف مو منتشرين كثير بزيدل. هني الملوخية بالدرجة الأولى والأرضي شوكي(أنكنار)... طبعاً لا تسألوني عن طريقة الطهي ... بس حبيت اذكرلكن بعض من فوائد الملوخية:
فوائد الملوخية:
1ـ تصنّف من الأغذية المفيدة السهلة الهضم .
2ـ غنيّة بالأملاح المعدنية مثل الحديد والفسفور .
3ـ تحتوي على البروتينات والفيتامينات مثل فيتامين(أ ) وفيتامين(ج ) .
4ـ غنيّة بالألياف الغذائية التي تساعد في مكافحة الإمساك .
5ـ تحتوي على مادّة غذائية تفيد في تلطيف الأغشية المعوية .
6ـ تحتوي على مواد تساعد في وقاية الأمعاء من الالتهابات .
7ـ زيت بذور الملوخية يفيد في علاج بعض الأمراض الجلديّة .
8ـ يمكن طهي الملوخية خضراء أو جافّة وإذا أضيف إليها اللحم تصبح وجبة غذائية كاملة .

______________________________________________

Posted by: liza

يعني أنا نفسي مرة أشوف رجال عم يكتب طريقة طبخ أكلة انشالله تبولة لك تبولة صعبة سلطة مو معقول هالرجال شو بحبوا كل شي عالجاهز بس شاطر شادي يعطينا فوائد الملوخية يا عمي ممكن نستفيد من طريقة الطبخ كمان ولووووو كتبولنا شي بساعد المرأة بالطبخ متل شو لازم تطبخ بالأسبوع.
أكيد لما قروا هالموضوع أحتاروا الشباب بأكتر أكلة بحبوها لأنهون كتار .
بس اليوم مستغربة إنو سليمان كيف وضح طريقة طبخ مجدرة ؟؟؟؟؟؟؟؟؟؟؟
لتكون أنت ألي بتطبخ بالبيت ( مزحة طبعاً وما تزعل منها)
عا كل حال صح عم تحكي سناء الطبخ هم كبير والله يعين المرأة شو عم تتحمل هموم بس لو الرجال يقدروا هالشي
كان الطبخ ما صفي هم .
محبتي ...ليزا

Posted by: shadi

مو مشكلة ليزا طبعاً انا عملت بحث بالنت للوصول إلى كيفية طبخ الملوخية.(للمهتمين )...... انشالله تفيدكن.
الملوخية المصرية
الطريقة :

* تخرط الملوخية جيدا اذا كانت خضراء أو تفرم بمفرمة الملوخية .
* يتم سلق الدجاج مسبقا والأحتفاظ بكوبين من الشوربة .
* يتم وضع قليل من الشوربة حوالي نصف الكوب على النار حتى تغلي .
* ثم توضع عليها الملوخية كل هذا والشوربة مازالت على النار .
* تقلب الملوخية جيدا .
* في النهاية راح تحصلي على ملوخية سميكة جدا .
* تهدئي النار جدا وتضيفي قليل من الشوربة مع التقليب المستمر .
* وهكذا تضيفي في الشوربة حتى تحصلي على القوام الذي تريديه .

مقادير التقلية :

نصف راس ثوم مقشورة ومفرية جيدا .
2 ملعقة كبيرة من السمن أو الزيت .
2 ملعقة صغيرة كزبرة جافة .
تغلي السمن على النار ويضاف اليها الثوم و الكزبرة ويقلى حتى يتغير لون الثوم .
ثم توضع فوق الملوخية .....

ملاحظة : تجدر الإشارة إلى أن أصل كلمة ملوخية هي ملوكية أي اكلة الملوك .

Posted by: shadi

طبعاً انا ما كثير بحب أكل الحلو بس في أكلة كثير بحبها وهي الكريم كراميل

كريم كرامل منزلي00لذيــــــــــــذ جـــــــــداً
المقادير :
5-7 بيضات
ثلاثة ارباع كوب سكر
اربعة كاسات حليب سائل او ( 4 كاسات ماء واربع ملاعق حليب بودر )
قليل من الفانيليا
هيل
زعفران
ربع كوب سكر للكراميل

الطريقة :

يخفق البيض مع السكر ثم يضاف الحليب والفانيليا والهيل والزعفران ويخلط بواسطة الخلاط اليدوي .

يذوب السكر على النار حتى يصبح سائل مع التحريك السريع ويصبح لونه بني فاتح وممكن اضافة رشة ماء اذا ثقل ولكن لا تنسون تحريك سريع وجيد ..

يوضع الكراميل في قاع الزبادي الدائريه ثم توضع الخلطة السابقة عليه ويترك بالفرن لمدة ساعة الا ربع الى ساعة وبعد الالانتهاء تقلب في طبق دائري وتوضع بالثلاجة مدة كافية لتصبح باردة ....
ملاحظة هامة جداً: اصبحت حالياً هذه الطريقة غير عصرية فالكثير من ربات البيوت يحصلن على الكريم كراميل جاهز بالسوق (ظروف) ويتم إضافة الحليب عليه فقط والكراميل فيصبح جاهزاً للأكل.
وألف صحة

Posted by: hosam abdulaziz

صراحة انا موضوع الطبخ آخر همي بس الله يعطيكم العافية
انا ما بحب الأكل بشكل عام و اي شي بيمشي حاله معي , و بقا كيف وقت اتجوز , اي نظرة حلوة من عيون المدام بتغنيني عن الأكل كل النهار , يعني هي بعدنا بالنظرة هه

المهم انا بدي عقب عليزا كونها بتمثل النساء اللي مفكرين انه شغل البيت هو عمل جبار .
انا من يومين كنت جالس مع الأهل و معنا شخص صيدلي و عم نحكي بالأعمال و الأشغال المنزلية و واجبات الزوجين
فضمن الحديث توصلنا لنتيجة و دعمها الصيدلي كونه بيفهم بالطب , انه اعمال المرأة هي ليست باعمال مجهدة و لا يجب ان تصنف من ضمن الأعمال, يعني طالما انه كل هالأعمال عم تنجز تحت سقف واحد و بدون حركة فتبقى ضمن مجال التسلية لا اكثر.
يعني المرأة اللي عندها وظيفة هي امرأة تتعب اكثر من المرأة اللي تقضي النهار كاملا بالمطبخ , طبخ جلي غسيل ... الخ
و المصيبة انه مع هالشي بتقضيها كل النهار هت للزلمة , اليوم جليت و كنست و مسحت و طبخت و و و و و ما ننسى الموال آخ يا ظهري و آخ يا راسي و آخ يا كتافي و آخ يا رجلي . و وقت تعزمها الجارة عشي كاسة متي او فنجان قهوة بتنسى كل الوجع و بتروح ركض و السبب انه اللسان بيكون بعد مش تعبان و في مجال يشغلوه شي ساعتين .
لهيك يا جماعة حاجي تحملونا من نية شغل البيت , انا سبق و اقترحت عليكم التبديل بس ما حدا وافق !!
يعني شو رايكم المرأة تصير مسؤولة عن مصروف البيت من الألف للياء و نحنا الزلم بنقوم بالباقي !!!

و لعلمكن انا بعرف اطبخ كثير اشيا , مجدرة , دفين , صينيات بانواعها , بجلي بمسح , يعني بتاع كلو

و الى اللقاء مع اكلة اخرى و بتصور شبعتوا يا نساء من هالوجبة الدسمة !!!

Posted by: George daboul

طبخة من الذاكرة
أثناء تأدية خدمة العلم كنا نسكن في دمشق وهذا ما كان بستدعي أن نقوم بإعداد الطعام بأنفسنا وأحيانا نستعيين ببعض الجيران لشرح طريقة الطبخ ويومها تلقينا المساعدة بشرح طريقة طبخ الفاصولياء مع البندورة بمساعدة الجارة وإليكم طريقة الإعداد كما شرحتها الجارة وكما تم التنفيذ
أولا - تقيلذ اللحمة المفرومة بإضافة معلقتين من السمن
ثانيا – إضافة الفاصولياء الخضراء المفرومة وتركها على النار حتى تذبل
ثالثا – اضافة البندورة المقشورة والمفرومة وتركها على نار هادئة حتى تنضج
************************************************** ***************
وبذلك تكون أصبحت جاهزة وصحتين وهنا
ولكن الذي حدث وكوننا في تلك الفترة ( عساكر ) بمعنى أن الامكانية المادية لا تسمح باضافة اللحمة وكوننا خجلنا من توضيح ذلك للجارة فقد قمنا بحذف الفقرة أولا بأكملها
وبعد أكلنا وشبعنا تذكرنا أننا لم نقم بإضافة السمنة
***************************************
لا أظن أن سيدة منزل شاطرة ستحذو حذونا
وعذرا إن أخطأت
‏الاحد‏، 24‏ تشرين الاول‏، 2004

Posted by: liza

الموضوع أخد أهمية وهاله فينا نكشف الرجال من خلال موضوع الطبخ . سناء عرضت مشكلتها ألي عم تعاني منها كل مرأة , وسليمان عرض معلوماتو ويعطيه العافية , وشادي كمان حَب إنو يساعد المرأة قدر الإمكان وشكراً لطرق الطبخ يا شادي , أما حسام فا ما بحب يتعب حالو لا بالأكل ولا بالشرح ولا عرض أي مساعدات
ممكن إنو تفيدنا بالعكس أثبت إنو شغل البيت كلو لعبة أو متل ما سماها تسلييييييية .يا عزيزي حسام لما بتكون عم تلعب كرة القدم ألي هي تسلية ما بتتعب؟؟؟؟؟ كيف لو إنك تلعب باليوم لنفترض 5 ألعاب قصدي تسلييييييية وفوقها بوقت محدد واجب إنك تخلص منا قبل الضهر.
كل الحكي هاله ما بينفع بس كل شي بوقتو حلو بكرا جاي وراح نشوف ردة فعلك تيابك مو مغسولة ولا الطبخ جاهز ولا تسمعوا يا جيران

كم مرة راح تلعن هالعيشة .

انشالله منوضح هالشي بموضوع تاني يناسب الزاوية بس حابة زكرك يا حسام حتى ما تنسى
إنه << الجنة تحت أقدام الرجاااااااااااال >> ,<< الزوج المثالي ينبغي ان يكون أخرس00الزوجة المثالية ينبغي ان تكون صماء>>

محبتى ...........ليزا
أنا كتبت الرد بعد رد حسام .

Posted by: Desert rose

مش عارفة ليزا اذا كل اللي منسمعوا لازم نصدقوا ...>>>> قال مامتنا ماشفنا مين مات ؟؟

يمكن هالتعقيب بغير محلوا ...إنما بوقتوا أكيد ....حابة أسأل الصديق حسام إذا حضرتوا اللي نقر البيتجان ....ولف ورق العريش ...وطبخ الكبسة .... ليقوم بلم هالجمعة الحلوة ...أو إذا أم وسام العزيزة ((الله يعطيها العافية )) بعصاها السحرية خلقت هاالطاولة الغنية بالأكلات الشهية .....وبعدها قام بجلي الصحون وترتيب الوضع متل ماكان .

أنا مضطرة صدق حسام وصديقه الصيدلي كمان (( سامحك الله أيها الصيدلي )) بس رح أعتبر هالشي نوع من النكران لفضل المرأة على الرجل على مر الزمان .....وحسب نياتكم ترزقون ....فخافوا ربكم يااااا ...رجاااال .

يعني الحقيقة ياهيك أكلة فاصوليا خضرا يابلا ....هلق من الناحية الصحية أحسن بلا لمحة وبلا سمنة ....بس من الناحية الذوقية مابعرف كيف انبلعت معكن .....(( تعيش وتاكل غبرها جورج مع أنو بها الأيام صار صعب رجال ينسى الأكلات الدسمة ))

شكرا شادي على الكريم كراميل ....بس أنا بحبها جيبها خالصة

سليمان عجل شرف لزيدل ..... صرنا عايشين بشهية لندوق هالمجدرة الخرافية .

__________________________________________

وبالمناسبة وقت كنت ولد قد صديقنا ؟؟؟

كان البابا ياخدنا لزيدل 15 يوم بالسنة ....الأيام كانت أحلى من اليوم والأكل كان بألف خير رغم بساطته .....بتذكر أكلة بسيطة كانوا يسموها فتوش غير الفتوش اللي نحنا منعرفوا ومافي أي شبه بيناتهن إلا بعض المواد المشتركة وكنت كل أطلبها لبساطتها ولذتها وهي :

_رغيف خبز سخن طالع من التنور
_ جاط موضوع في حصوص مدقوقة من الثوم مع الملح والقليل من الماء
_ يضاف اليهم القليل من زيت الزيتون
_يقطع الخبز الى قطع صغيرة
_ تضاف إلى المزيج السابق
ومن ثم تؤكل بشهية ......واوووو.......(( ياهيك الأكل يابلا )) عيش كتير بتسمع كتير.... وبتاكل كثير
وبنصح كل الستات بهيك أكلة لأن مافيها تعب... يمكن على هيك أكلة يقدرونا شوي .

[blink]زهرة الصحراء[/blink]

Posted by: sulieman safar

معك حق ليزا يمكن في مجال للصبايا أن يستعملوا الطبخ لتنسيق الرجال, يعني بعد خفية الدم,تبقى المعرفة في الطبخ أهم ما هوا مطلوب في الزوج المناسب وعندها حسام يغير رأيه.......اي نظرة حلوة من عيون المدام بتغنيني عن الأكل كل النهار ...لأنو المدام ما بيصير عندها وقت تنظر اليه وعندها حسام يقول للمدام دخيلك شو بدك اياني اعمل ....بطبخ , بمسح, بغسل بس طلعي فيي.على ما أضن ان حسام عم يعمل دعاي لنفسه والدليل ....
انا بعرف اطبخ كثير اشيا , مجدرة , دفين , صينيات بانواعها , بجلي بمسح , يعني بتاع كلو ....أكيد كل الصبايا صاروا يعرفوا هلشي يا حسام لكن ما حدى عم يقرب عليك من لسانك. صحيح أنا بطبخ القليل لكن أعتبر الطبخ هوا من أكبر الفنون في الحياة ومن الضروري أن يعرف الرجل شي عنو(ولو كان نظري) مو بس يعلق على المدام.الخلاصة ,الى حد ما يغير رأيه حسام عن الصبايا من الضروري حسمه من قائمة الزوج المناسب.
عزيزتي سناء المجدرة التي ذكرتها ليست خرافية بل نوع من الابداع عندي في الطبخ وبس جيت على الصيفية رح عدل طبختها مرة ثانية حيث اني استعمل الكمأة بدال الفطر(لا تنسي أنتي ووسام 5كغ كمأة مجففة) وبدي اعزم ليزا وجورج الدعبول ضيوف شرف وقلي المجدرة بفسق حلبي والصنوبر محوج بالسمني العربية وكوسكس بدال البرغل وعندها نصلح بين حسام والصبايا.(شايفي سناء قلبتها فوقاني تحتاني)
عم شادي نسيت تذكر اطارات البصل الني في الخل وخبز المحمص مع الملوخية ولكن ألله يعطيك العافية بتسوى 100 حسام.
أنا صايم من هلق
سليمان.

ملاحظة: كل من لا يشارك في هذا الموضوع يبقى غير معزوم

طرفة الى جورج الدعبول:
يحكى ويقال انو واحد من زيدل زرع فاصولية وصار عندو فاصوليات بيعجبوك وعندما أخذهن للسوق كان سعرها رخيص ,حوالي الخمس ليرات الكيلو,فقال للعميل أنا بدي خمسة وعشرون ليرا بلكيلو فأجابه العميل وبكل برادي شو يعني فاصولياتك لحمهن منهن وفيهن.خوذ نصيحتي جورج أشتري فاصولياتك من زيدل مرة ثانية.

Posted by: hosam abdulaziz

انا رح بلش ردي بنقطة هامة و هي انه نحنا الرجال اذكياء بما فيه الكفاية للتغلب على مكر و دهاء النساء.
يعني نحنا بنعرف انه المرأة دائما بتحب تحمل الرجال من نية على اعمالها المنزلية و بتصورله اياها انها اصعب من كافة الأعمال اللي بيقوم فيها الرجل, و من هالمنطلق توجهوا الرجال لمجاولة ايجاد البديل و تهميش دور لمرأة كربة منزل حتى يحدوا شوي من هالنق
فاخترعنالكم الغسالة الأوتوماتيك تما يوجعوكم كتافكم , و كمان جلاية الكهرباء تما تشقق ايديكم , و كمان المكرويف تما تحترق ايديكم بتسخين الأكل , و كمان المكنسة الكهربائية تما تتحسسوا من الغبرة و ظهركم يوجعكم , و ما ننسى معدات تحضير الأكل اي حتى لف ورق العنب و تحضير الكبة صار الهم ماكينات .
بقا ديروا بالكم وجود المراة كربة منزل معد من الضروريات !!
هلق اللي عم يتمشطر ويقول انه الرجال و انا منهم ما بنعرف نتصرف شي بدون عون المرأة؟؟؟
انا رح ذكركم و بحكي عن حالي انه صار عمري 28 سنة و عايش بدون وجود اخت بالبيت و بالتالي طول عمري بعتمد عحالي من كوي و ترتيب و ربما جلي و غسيل احيانا.
و رح يصرلي 5 سنيني عايش وحيدا في السعودية و بالتالي اعتمادي عحالي 100 % من كل الجوانب , غسيل مسح جلي تنظيف و طبخ احيانا ...
يعني مني بعيد تماما عن جو و مسؤوليات المرأة , و بصراحة ما لقيت فيها اي صعوبة تذكر خلينا نكون واقعيين , ساعتين باليوم كفيلة بانجاز كافة اعمال المنزل .
اما المرأة الموظفة هي حكي ثاني , بتستاهل رفع القبعة و التحية و الأكرام كمان و ما بيطلعلنا نحكي عنها بنوب.

خيي جورج يعطيك العافية عهالطبخة حقيقة اثبتت للجميع انه الرجال تصنع المعجزات و لا يصعب علينا شيء
ليزا يا عيني انا شخص ما بحب اتكل عحدا بنوب , يعني ما رح انطر من المدام لتقوم بهيك واجبات و بفضل اتكل عنفسي بدل التململ و التذمر لأنه بيهمني كثيييير راحتها,
انا مني محتاج لدعاية مثل ما قال العم سليمان , لأنه عند الأمتحان يكرم المرء او يهان , و جاي الأيام , انا ما بتصور يكون في عند امراة الخفة و النشاط اللي بتمتع فيهم

(بشكر الله) و اللي من خلالها فيني رتب كل اموري دون الحالجة لأي مساعدة.
اذا بيهمكم اكتبلكم شي طبخة رح علمكم قريبا طبخ الكبسة السعودية .

Posted by: maichel bengame

الى الأخت Desert rose
شو مشان هل حرب على الرجال لآ وكمان معك مناصرين مثل الأخت ليزا
بس بتعرفوا بيعجبني حسام لانه ثابت على مبدئه
هي شغلة من صفات الرجال و بهك مناسبة بحب وجهلو أحلى
تحية لأحلى حسام

Desert rose اولا إحترامي إلك ولكل الشليه
ثانيا انتوا مابتعرفوا قدام مين عم تحكوا على الطبخ
بكل تواضع معكم الشيف مايكل بنيامين له له له إنكشفت الحكايه
وفتحت على حالي باب مابيتسكر

اوكي رح علمكن وجبة تعلمتا بيروت بفندق الرويال بلازا
<<<<<<<<كوسا بالجوز >>>>>>
المقادير : اهمى شي الجوز ؟؟؟؟؟؟
2_ كوسا خضراءصفراء مش مشكله مابتفرق
الطريقة :
اولا تأتي بجوزك تفتحي فمه
ثانيا تطعي الكوسا في فمه . نقطة إنتهى
أصبح لدينا كوسا باالجوز

وجبة خفيفة وسهلة

Posted by: Desert rose

طبعاً أنا بيهمني الأمر بحيث عندى جوزززززززززززززززز وفي أفتحلووووا تمووووا ...وطعمي كووووووسا ...وجرب هالأكلة الشهية اللي تعلمتها أنت ببيروت .....((كوسا بالجوووز ))......وويننننننننن بالرويال بلازا ....

وإنشالله الكل يجربها آآآآآآآآآآآآآآآآآمين

دخلك يامايكل مافي شي أكلها بتنطبخ بالجوززززززات ...........بدل الجو ززز؟؟

مهضومة منك عزيزنا

[blink]زهرة الصحراء [/blink]

Posted by: hosam abdulaziz

الأخ maichel bengame
انا بدوري بشكرك عالثناء و الأطراء الموجه مباشرة الي , هي حقيقة شهادة بعتز فيها و بتعطيني دفع معنوي كبير لأصمد بوجه المعارضة الشديدة اللي دائما بصطدم فيها .
يا صاحبي يمكن انت حبيت كتاباتي لسبب وحيد هو انا بكتب الواقع و الحقائق و صراحة قلال اللي بيكرموا علينا بآرائهم الحقيقية
بس الغريب انه هيك اطراء مو اول مرة بسمعه و دائما عميكون من ذكور , شو السبب يا ترى ؟؟؟؟؟ انا عاملهم شي للجنس اللطيف

؟؟؟
على كل مرحبا بك معنا في المنتدى و برد كرر شكري الك.

Posted by: sulieman safar

وهلق كرامة الترحيب بلأخ مايكل معنا بالمنتدى بدي حط طريقة الطبخ لأكلي يمكن يعود أصلها لزيدل وهيا أكلة السفسوف.والحلو في أكلة السفسوف انها مثل أكلة التبولي كل واحد بيسويها شكل وبتطلع على طول صح ولذلك انا متأكد من طريقتي:

1- يوضغ 200 غرام برغل ناعم ويضاف اليها نصف ليتر ماء غالياً وتغطى
2-تقطع كمية ووافرة من الخيار والبندورة والمقثي والبجر والبصل الأخر الى قطع صغيرة
3- تقلي 12 بيضة بشكل رغيف بالسمن وتقطع الى قطع على ذوق الطباخ(ة)
تخلط الكل سوية وتحوجها بالبقدونس والكزبرة الخضراء وتلف بورق عنب طازج وتؤكل .
صحة وهني.
سليمان
ملاحظة 1:
قبل ما يذكرني احد انو مافي ورق عنب طازج بزيدل حالياً أنا عازمكن على اكلة سفسوف عندنا بأستراليا بس جيبوا العرق والنبيذ الميماسي معكن.
ملاحظة 2:
أخ مايكل مافي حاجي تحمد بحسام خشية انو يصير عاطل عن العمل.

Posted by: maichel bengame

هاي سناء
مشان الوجبة لززززززززززوجات فأنا رح دافع بدوري عن الأزواج
بهل مقطع لصغير من هل غنية:
واعتونا تسقونا وطعمونا لامنسف شفنا ولا حتى علبة طونا << ولو لهدرجة في كذب في مرحلة الخطبة >>
,,,,,,,,,,,,,,,,,,,,,,,,,,,,,,,,,,,,,,,,,,,,,,,,
يا أخي حسام أول شي نحن معك بس إنت كتبت
يا ترى ؟؟؟؟؟ انا عاملهم شي للجنس اللطيف ؟؟؟ <حسام >
احلى شي إني حاسك عم تلعب على الطرفين طيب إنت على أساس زعيم المعارضة كيف عم تسأل
معروف إنه كل مملكة تنقلب على نفسها تفشل.
فألله يرضة عليك خليك على موقفك . فأنت قائد هذه المعارضة .. ولعيونك على الموت انا جاهز
,,,,,,,,,,,,,,,,,,,,,,,,,,,,,,,,,,,,,,,,,,,,,,
أخي وصديقي الأول في هذا المنتدى سليمان
بنسبة للعزيمة انا كتير بشكرك وكمان رح رد عليك بهل كلمات من إغنية قديمة <أه يا غزيل >
ميلك ميولي لعملك تبولي ... ومش الفواكه مايهمك صار في أغاني كتير مثل البرتقالة و والرمانة والتفاحة ووو,,,
انا هيك بكون رديتلك العزيمة بعتبار إنك قلت السفسوف مثل التبولي ...
ومشان حسام انا بقلك ماتعتل هم فالطبع يغلب التتطبع ..أوكي
.................................................. ............
اما عن الاكلة المفضلة لدي هي ... المحبة والصداقة
بس بحب هل أكلة تبقى على النار وعم تغلى وما تستوي أبدا <<لانه إذا ستويت وأكل وشرب عليه الزمان مصيبة >>
مايكل بنيامين
أتمنى أن نأكل جميعا القربان المقدس

Posted by: allbaseet

بعد التحية للجميع وبالأخص للأخ سليمان الذي يحمل مفاتيح النكتة وحلاوة اللسان وأكيد
جارتنا لها أثر كبير بذلك وأحيها تحية العيد وتحية للزهرة التي عندها جوز وبتفتح فمه للأكلة
الشهية و انشالله بالصحة والعافية وليست كما تمنت للكل أن يجربوها وبعدها أمين وتحية للأخ
حسام ولكن ليست معارضة بل محاورة والمعارضة فقط بالسياسة لإثبات الوجود ومحو الآخر
والمحاورة تكون لإثبات الرأي وتصويب الخطأ وبالنسبة للأكلات فثقافتي ضعيفة لأني ما عشت
يوما" لوحدي وحتى في أيام الخدمة العسكرية بسبب وجود زملاء فنانين بالطبخ وقصدت بكلمة
فنانين لأن الطبخ اليوم يملكون زمامه الرجال والنساء معا" وأكبر معلم بين طيات كتب فن الطبخ
ومن الضروري إظهار بعض الأكلات على صفحات المنتدى وخاصة إذا تم طبخها كما طبخوها
المشاركون جميعا وبهروها بالبسمة الندية وربما ضعفي بالثقافة المطبخية ناتج عن كسلي أو بسبب
وضع زوجتي الغير موظفة والتي ما زالت تؤدي حتى عمل الكوي لثياب أولادها الذين أصغرهم
سنا" تجاوز الثامنة عشرة فكيف لأعمال المنزل الأخرى والله يعطيها ويعطيكم العافية ومع ذلك
أثناء وجودي في البرية خلال بعض أيام الصيف وبسبب الرجيم الغذائي لأني ختيار ورفيقي
الكلسترول والشحوم الثلاثية تعلمت ومارست صنع السلطة بالبندورة والخيار وتوابعها وبدون
تحديد المقادير كما يقول الأخ سليمان وحسام وغيرهم المعلمين وتحديد ساعات عمل المرأة
اليومية تحدده نشاط المرأة وعدد الأولاد ومساحة المنزل وتوفر الأدوات المنزلية الحديثة وأنا مع
مساعدة الرجل للمرأة بالأعمال المنزلية وخاصة إذا كانت موظفة .
وأكلتموها يا شباب بضربة ليزا الجز راوية والزهرة اللبنانية الشامية الحمصية وصحّتين وعوافي
-----------
شو ها الحكي كلنا بالهوى
بنعيش وبنعمل وبناكل هوى
إن كان تبولة أو ملوخية
بس المهم السكرة سوا
وبيت التعاون الله مجملو
وصوت المحبة أعظم دوى
---------- البسيط 30/12/2004

Posted by: حلاوة الشام

كيفكن
يالطيف عهالموضوع شو حلو
لانو احلى موضوع عندي الاكل
ليييييش لانو محسوبتكون بتحب ( بطنا )
و اطيب اكله عندب
معكرونه بالبشاميل
بس انا بحط فيا قشطه
شوفو كيف
لكل معلقه طحين كاسه حليب
اول شي بتحمصي الطحين عالناشف و بعدين بتصيري تحطي الزبده شوي شوي حتى تصير متل عجينه البتفور
يعني بتفت شوي و بعدين حطي الحليب و البهارات و مكعبين ماجي و جبنه الموزيرلا و بعد ما تصير ضابطه حطي عليها علبتين قشطه و حركيون و قيميون عن النار
طبعا من جه تانيه بتكوني قليتي فطر وفليفله بانواعه و دره و دجاج و سالقه المعكرونه
بتخلطي المعكرونه مع الخضره و بتحطي شوي من الخلطه و بتحركيا و الباقي عالوش
و ادعولي

موقع زيدل سوريا حمص .. خدمات تشات و دردشة ... أرشيف المنتدى